ಸುಪ್ತತೆಯ ಭೀತಿ

ಮುಖದಲ್ಲಿ ಅರಳದ ಗುಪ್ತ ಭಾವನೆಯೊಂದು
ಅರಳಿ ಮೊಗ್ಗಾಗಿ ಬಿಟ್ಟಿದೆ ಸುಪ್ತತೆಯಲಿ..

ವಿನಾಕಾರಣ ನೋವುಂಡು ಕೂತಿರುವಾಗ
ಸಂತೈಸುವ ಭಾವ ಕಣ್ಣಲ್ಲಿ ಕಂಡರೂ..
ಮತ್ತಾವ ಕೂಪಕೋ ಬೀಳಬೇಕೆಂಬ ಅಂಜಿಕೆಯಲಿ
ಮನದಲ್ಲಿಯೇ ಬೆಚ್ಚಗೆ ಕುಳಿತಿವುದು ಭೀತಿ

ಆ ಕಣ್ಣಲ್ಲಿ ಕಂಡ ಭಾವ ಅರ್ಥವಾಗುತ್ತಿಲ್ಲ
ಮನದ ಮಡಿಲಲ್ಲಿ ಅದೇನೋ ಕಲಕುವಿಕೆ
ಅದಾವ ಜನ್ಮದ, ಅದ್ಯಾವ ಅಂಜಿಕೆಯೋ ಕಾಣೆ
ನಿನ್ನ ನೋಡಿದೊಡನೆಯೇ ಉಕ್ಕುತಿವುದು ಭೀತಿ

ಭೀತಿ ಇನ್ನೆಂದೂ ಮತ್ತಾವ ಭಾವವೂ ಆಗದು
ಮೊಗ್ಗೊಂದು ಜಾತಿಯಾಗಿ, ಮತ್ತಾವುದೋ ಹೂವಾಗಲು..
ಪ್ರಕೃತಿಯ ನಿಯಮ ಮೀರಿ ನಡೆಯಲು..
ಯಾವುದೋ ಭಾವಕ್ಕೆ, ಮತ್ತೇನೋ ಹಣೆಪಟ್ಟಿ

ಭೀತಿಯ ಕಾರಣಗಳಿಗೆ ಬರವಿಲ್ಲ, ಹೊಸವೂ ಅಲ್ಲ
ಮತ್ತೆ ಮತ್ತದೇ ಕಳೆದುಕೊಳ್ಳುವ ಭೀತಿ
ಕಳೆದು ಹೋದರೂ ಅದೇಕೋ ನಿಲ್ಲದ ಸೆಳೆತ
ಹೊಮ್ಮುತಲಿವುದು ಸುಪ್ತತೆಯಲಿ ಭೀತಿ

ಚಿತ್ತ ಭಿತ್ತಿಯ ಕಂಗೆಡಿಸದ ನಿಶ್ಚಲತೆ ಮಾತಲ್ಲಿ
ತಾನಾರಿಗೂ ಕಮ್ಮಿಯಿಲ್ಲವೆನ್ನುವ ಹಮ್ಮು ನಡೆಯಲ್ಲಿ
ಬೀಗುತಿರಬಹುದು ನೀನೀಗ, ಬಾಗಲೇ ಬೇಕು
ಭೀತಿಯ ಭಾವ ಕಲಕಬಹುದು ನಿನ್ನನೂ..

ಅರ್ಥವೇ ಆಗದ ಕಾರಣದ ಕಂದರದಿ ಬಿದ್ದವರ
ಮೇಲೆತ್ತಿ ಸಂತೈಸುವ ಕಾಯಕದಲಿದ್ದ ದಾರಿಹೋಕ
ಅದೇಕೋ ಮನದಿ ಬಿತ್ತಿ ಹೋಗಿರುವ ಭೀತಿಯ
ಹಾದಿಯ ನೆಚ್ಚು, ಈ ಹಾದಿಹೋಕನನ್ನಲ್ಲವೆಂದು

ಅಂತರಾಳದಿ ಮೂಡಿದ ಈ ತೆರನಾದ ಭೀತಿ
ನಿಜವೇ ಆಗಿ ಬಿಡಲಿ, ಸೆಳೆತ ಸರಿದುಬಿಡಲಿ
ಭೀತಿಯ ಗಾಳದಲಿ ಸಿಲುಕಿ ಒದ್ದಾಡುವುದಕ್ಕಿಂತ
ನಿರ್ಭೀತಿ, ನಿರ್ಲಿಪ್ತತೆಯ ಭಾವವೇ ಸುಖವೆನಿಸಬಹುದು.

~ವಿಭಾ ವಿಶ್ವನಾಥ್