ಏನಾಗಲಿ ಮುಂದೆ ಸಾಗು ನೀ

"ನನ್ನಷ್ಟು ಕಷ್ಟ ಯಾರಿಗೂ ಇಲ್ಲ..."," ನನಗಿರುವ ಹಾಗೆ ತೊಂದರೆಗಳು ಬಂದಿದ್ದರೆ...","ನಾನು ಅನುಭವಿಸಿದ ನೋವನ್ನು ನೀವು ಅನುಭವಿಸಿದ್ದರೆ ನೀವು ಹೀಗಿರಲು ಸಾಧ್ಯವೇ ಇರುತ್ತಿರಲಿಲ್ಲ." ಎನ್ನುವವರೆಲ್ಲ ಗಮನಿಸಲೇಬೇಕಾದ ಅಂಶವೆಂದರೆ ನಿಮಗಿಂತ ಕಷ್ಟ ಪಟ್ಟವರು, ನಿಮಗಿಂತ ಕಷ್ಟಪಡುತ್ತಿರುವವರು ಇದ್ದೇ ಇರುತ್ತಾರೆ. ಆದರೆ ಕಷ್ಟಕ್ಕೆದರಿ ಪಲಾಯನ ಮಾಡಿದ್ದರೆ ಅಥವಾ ಕಷ್ಟ ಬಂದಿತೆಂದು ಹಾಗೆಯೇ ಇದ್ದುಬಿಟ್ಟಿದ್ದರೆ ಇಂದಿನ ಮುಕ್ಕಾಲು ಪಾಲು ಸಾಧಕರು ತಮ್ಮ ಗಮ್ಯವನ್ನು ಸಾಧಿಸುತ್ತಲೇ ಇರಲಿಲ್ಲ.

"ಯಾರಿಗಿಲ್ಲ ನೋವು, ಯಾರಿಗಿಲ್ಲ ಸಾವು

ವ್ಯರ್ಥ ವ್ಯಸನದಿಂದ ಸಿಹಿಯು ಕೂಡ ಬೇವು"

ಹೌದು, ಬದುಕಿನಲ್ಲಿ ನೋವು-ಕಷ್ಟಗಳಿಲ್ಲದೇ ಇರುವವರು ಯಾರು? ನಾವು ಮೊದಲು ಭೂಮಿಗೆ ಕಾಲಿಡುವುಡುವಾಗ ಅಮ್ಮ ಅನುಭವಿಸಿದ್ದೂ ನೋವೇ. ನೋವು-ಕಷ್ಟ ಎಂದುಕೊಂಡು ಅಮ್ಮಂದಿರು ಭಾವಿಸಿ ಹೆರಿಗೆ ನೋವನ್ನು ಅನುಭವಿಸದೇ ಇದ್ದಿದ್ದರೆ ಇಂದು ನಮಗೆ ಅಸ್ತಿತ್ವವೇ ಇರುತ್ತಿರಲಿಲ್ಲವೇನೋ?ಆಟ ಆಡುವಾಗ ಬಿದ್ದು ನೋವಾಯಿತು ಎಂಬ ಕಾರಣಕ್ಕೆ ಹೆದರಿ ಮಕ್ಕಳು ಅಳುತ್ತಾ ಕುಳಿತು ಆಟವನ್ನೇ ಆಡದಿದ್ದಿದ್ದರೆ ಮಕ್ಕಳ ಬೆಳವಣಿಗೆ ಆರೋಗ್ಯವಾಗಿರುತ್ತಿತ್ತೇ?ಕಷ್ಟಪಟ್ಟು ಓದುವುದೇತಕೆ?ಎಂದು ಸುಮ್ಮನೆ ಕುಳಿತಿದ್ದರೆ ವಿದ್ಯಾವಂತರೆನಿಸಿಕೊಳ್ಳಲಾಗುತ್ತಿತ್ತೇ?ಸಾಮಾಜಿಕ ಬದಲಾವಣೆಗಳಾಗುತ್ತಿದ್ದವೇ?

ಆದರೆ ಈ ಸಂದರ್ಭಗಳಲೆಲ್ಲ ಅಷ್ಟಾಗಿ ಕಾಡದ ಕಷ್ಟ ಎನ್ನುವ ಪದ ಕಾಡಲು ಶುರುವಾಗುವುದು ಉದ್ಯೋಗ ಅರಸಿಕೊಂಡು ಹೋಗಿ ಉದ್ಯೋಗ ದೊರಕದಿದ್ದಾಗ ಅಥವಾ ಸಣ್ಣ ಸಂಬಳದ ಉದ್ಯೋಗ ದೊರೆತಾಗ. "ನನಗೇ ಈ ಕಷ್ಟ ಏತಕೆ..?" ಎಂಬ ಪ್ರಶ್ನೆ ಕಾಡಲು ಶುರುವಾಗುತ್ತದೆ.

ಎಷ್ಟೋ ಜನರಿಗೆ ಉದ್ಯೋಗವೇ ಇರುವದಿಲ್ಲ ಅಥವಾ ದೇಹದ ಯಾವುದೋ ಭಾಗ ನ್ಯೂನತೆಯಿಂದ ಕೂಡಿರುತ್ತದೆ. ಅವರಿಗೆ ಹೋಲಿಸಿದರೆ ನಮ್ಮ ಪರಿಸ್ಥಿತಿ ಉತ್ತಮವೇ ಆಗಿರುತ್ತದೆ.ಆದರೆ ನಾವು ಅದನ್ನು ಗಮನಿಸುವ ಅಥವಾ ಯೋಚಿಸುವ ಮನಸ್ಥಿತಿಯಲ್ಲಿರುವುದಿಲ್ಲ ಅಷ್ಟೇ. ವ್ಯರ್ಥವಾಗಿ ಚಿಂತಿಸಿ ಸಿಕ್ಕ ಚಿಕ್ಕ ಖುಷಿಯನ್ನೂ ಕಳೆದುಕೊಂಡು ನಮ್ಮ ಬಾಳಲ್ಲಿ ಕಷ್ಟವೇ ತುಂಬಿದೆ ಎಂದು ವ್ಯಥೆಪಡುತ್ತೇವೆ.

ಹಾಗೆಂದು ಎಲ್ಲರ ಕಷ್ಟಗಳು ಚಿಕ್ಕವು ಅಂತಲೋ ಅಥವಾ ಏನೇನೂ ಇಲ್ಲ ಎಂದಲ್ಲ."ಆನೆಯ ಕಷ್ಟ ಆನೆಗಾದರೆ, ಇರುವೆಯ ಕಷ್ಟ ಇರುವೆಗೆ". ಅವರವರ ನೋವು-ಕಷ್ಟಗಳು ಅವರವರಿಗೆ ಹೆಚ್ಚು. ಆದರೆ ಕಷ್ಟ ಎಂದು ಕೊರಗಿದರೆ, ನೋವು ಎಂದು ಮರುಗಿದರೆ ಅವೆಲ್ಲಾ ಬಗೆಹರಿದುಬಿಡುತ್ತವೆಯೇ? ಸುಖ ಈ ಘಳಿಗೆಯೇ ಬರಬೇಕೆಂದುಕೊಂಡರೆ ಮಾತ್ರ ಸಾಧ್ಯವೇ?

"ಯಾವುದೂ ಕೂಡಾ ಸುಲಭವಾಗಿ ಅಥವಾ ಉಚಿತವಾಗಿ ದೊರೆಯುವುದಿಲ್ಲ. ಹಾಗೆ ದೊರೆತರೂ ಅದು ಶಾಶ್ವತವಾಗಿ ಇರುವುದೂ ಇಲ್ಲ" ಎಂಬ ಮಾತುಗಳನ್ನು ಆಗಾಗ ಓದುತ್ತಲೋ ಅಥವಾ ಕೇಳುತ್ತಲೋ ಇರುತ್ತವೆ. ಆದರೂ ಈ ಕ್ಷಣ ನನ್ನ ಕಷ್ಟಗಳೆಲ್ಲಾ ದೂರವಾಗಬೇಕು ಎನ್ನುತ್ತಾ ಅದನ್ನು ಒಪ್ಪಲು ತಯಾರಿರುವುದಿಲ್ಲ. ಒಟ್ಟಾರೆ ಗಿಣಿಪಾಠದಂತೆ ಅದನ್ನು ಜಪಿಸುತ್ತೇವೆ ಅಷ್ಟೇ.

ಕಷ್ಟಗಳನ್ನು ಸಹಿಸುವ ಸಾಮರ್ಥ್ಯ ಉಳ್ಳವರಿಗೆ ಮಾತ್ರ ಕಷ್ಟಗಳು ಬರುತ್ತವೆ. ಜೊತೆಗೆ ಅವು ನಮ್ಮ ಬಾಳಿನಲ್ಲಿ ಹೊಸ ಪಾಠವೊಂದನ್ನು ಕಲಿಸಿ ಹೋಗುತ್ತವೆ. ಕಷ್ಟದಲ್ಲಿ ಜೊತೆಯಲ್ಲಿ ನಿಲ್ಲುವವರಾರು, ನಮ್ಮ ಹಿತಚಿಂತಕರು ಮತ್ತು ಹಿತಶತ್ರುಗಳು ಯಾರು ಎಂಬುದರಿಂದ ಹಿಡಿದು ಕಷ್ಟವನ್ನು ಸಹಿಸಿ ನಿಲ್ಲುವ ಸೈರಣೆಯನ್ನೂ ಅದು ತಿಳಿಸಿಕೊಡುತ್ತೇವೆ. ಯಾವುದೇ ಕಷ್ಟ,ಯಾವುದೇ ನೋವು ಬಂದರೂ ಅದನ್ನು ಮೆಟ್ಟಿ ನಿಲ್ಲುತ್ತೇವೆ ಎಂಬುದು ನಿಜವಾದ ಶಕ್ತಿ.ಆ ಸಮಯದಲ್ಲಿ ಮುಖದಲ್ಲಿ ಮುಗುಳ್ನಗು, ಶಾಂತತೆಯ ಜೊತೆಗೆ ಸರಿಯಾದ ನಿರ್ಧಾರ ನಮ್ಮನ್ನು ಕಷ್ಟದಿಂದ ಬಿಡಿಸಲು ಸಹಾಯಕ. ಅಕಸ್ಮಾತ್ ಈ ಪರಿಸ್ಥಿತಿಯಲ್ಲಿ ನಾವಿಲ್ಲದೇ ಇದ್ದರೂ, ನಮ್ಮ ಹತ್ತಿರದವರು ಅಥವಾ ಪರಿಚಿತರು ಆ ಪರಿಸ್ಥಿತಿಯಲ್ಲಿದ್ದರೆ ಅವರಿಗೆ ಸಾಂತ್ವನ, ಧೈರ್ಯ ತುಂಬುವ ಆತ್ಮವಿಶ್ವಾಸದಾಯಕ ಮಾತುಗಳನ್ನಾಡೋಣ. ಇದು ಸಾಧ್ಯವಾಗದಿದ್ದಲ್ಲಿ ಕುಗ್ಗಿಸುವ ಮಾತುಗಳಂತೂ ಬೇಡ.

ದೇವರೆನಿಸಿಕೊಂಡ ರಾಮನಿಗೇ ವನವಾಸದ ಕಷ್ಟ ತಪ್ಪಲಿಲ್ಲ, ಕೃಷ್ಣನಿಗೆ ಶ್ಯಮಂತಕ ಮಣಿಯನ್ನು ಕದ್ದ ಎಂಬ ಅಪವಾದ ಕಾಡದೇ ಬಿಡಲಿಲ್ಲ. ಆದರೆ ಅವರು ಈ ಸಂಧರ್ಭಗಳಿಗೆ ಅಂಜದೆ, ಅವುಗಳನ್ನು ಅನುಭವಿಸಿ ಮುನ್ನಡೆದರು. ಕಷ್ಟ ಕಳೆದ ಮೇಲೆ ಸುಖ ಬಂದೇ ಬರುವುದು. ಒಳ್ಳೆಯ ಕಾಲಕ್ಕಾಗಿ ಕಾಯೋಣ. ಇಂದಿನ ಕಷ್ಟದ ದಿನಗಳಿಗೆ ಮುಂದಿನ ದಿನಗಳಲ್ಲಿ ಒಳ್ಳೆಯ ಪ್ರತಿಫಲ ಸಿಕ್ಕೇ ಸಿಗುವುದು ಎಂಬ ಭರವಸೆಯೊಂದಿಗೆ ಕಾಯೋಣ. ರಾಮ-ಕೃಷ್ಣರಷ್ಟು ಸೈರಣೆ ಇಲ್ಲದಿದ್ದರೂ, ನಮಗೆ ಸಾಧ್ಯವಾಗುವಷ್ಟು ಸಮಾಧಾನ ತಂದುಕೊಂಡು ಧೈರ್ಯವಾಗಿ ಕಷ್ಟದ ದಿನಗಳನ್ನು ಕಳೆಯೋಣ.

"ಬಾಳ ಕದನದಲ್ಲಿ ಭರವಸೆಗಳು ಬೇಕು

ನಾಳೆ ನಮ್ಮದೆನ್ನುವ ನಂಬಿಕೆಗಳು ಬೇಕು"  

ಹೌದು, ಈ ಮಾತಿನಂತೆಯೇ ಭರವಸೆಯನ್ನು ಮೂಡಿಸಿಕೊಳ್ಳುತ್ತಾ ನಂಬಿಕೆಯೊಡನೆ ಹೆಜ್ಜೆ ಹಾಕೋಣ. ನೆಮ್ಮದಿಯ ನಾಳೆಗಳಿಗಾಗಿ..

-ವಿಭಾ ವಿಶ್ವನಾಥ್

ಸ್ಟ್ರೆಸ್ ಫ್ರೂಟಿಂಗ್, ಸುಸೈಡ್ ಫ್ರೂಟಿಂಗ್ ಕೇವಲ ನೇರಳೆಯಲ್ಲಲ್ಲ...!

ಈಗ ನಾಲ್ಕಾರು ದಿನಗಳಿಂದ ನೇರಳೆ ಹಣ್ಣಿನ ಸುದ್ದಿ ಕೇಳುತ್ತಾ ಅಥವಾ ಓದುತ್ತಾ ಇದ್ದೇವೆ. ನೇರಳೆ ಹೆಚ್ಚು ಫಲವಾಗಿ, ಉದುರಿದ ವರ್ಷ ಭೀಕರ ಬರಗಾಲ ಎನ್ನುವ ಹಿರಿಯರ ಮಾತನ್ನು ನೆನಪಿಸಿಕೊಳ್ಳುತ್ತಿದ್ದೇವೆ. ವೈಜ್ಞಾನಿಕವಾಗಿ ಇದನ್ನು ಸ್ಟ್ರೆಸ್ ಫ್ರೂಟಿಂಗ್ ಎಂದು ಕರೆಯುವ ವಿಚಾರದ ಕುರಿತು ಹಾಗೂ ಇದು ಮರದ ಸುಸೈಡ್ ಫ್ರೂಟಿಂಗ್ ಅಂದರೆ ತನ್ನನ್ನು ಉಳಿಸಿಕೊಳ್ಳುವ ಸ್ವಾರ್ಥದ ಬದಲಾಗಿ.. ತನ್ನ ಸಂತತಿ ಉಳಿಯಬೇಕೆಂದು ಹೆಚ್ಚು ಫಲವನ್ನು ಕೊಡುತ್ತಾ ಹೋಗುತ್ತದೆ. ಮುಂದೆ, ಈ ಫಲದ ಬೀಜಗಳೇ ಆ ಹಣ್ಣಿನ ಸಂತತಿಯನ್ನು ಉಳಿಸಿಕೊಂಡು ಹೋಗುತ್ತವೆ. ಇದಿಷ್ಟು ಎಲ್ಲರಿಗೂ ಗೊತ್ತಿರುವ ವಿಚಾರದ ಪುಟ್ಟ ಸಾರಾಂಶ. 

ನನಗೊಂದು ಸಂದೇಹ ಬಂದಿತು. ಸ್ಟ್ರೆಸ್ ಫ್ರೂಟಿಂಗ್ ಹಾಗೂ ಸುಸೈಡ್ ಫ್ರೂಟಿಂಗ್ ನೇರಳೆ ಮರ ಮಾತ್ರವಾ..?

ಈ ಕುರಿತು ಹುಡುಕಲು ಹೊರಟ ನನಗೆ ಕೆಲ ಅಚ್ಚರಿಯ ವಿಚಾರಗಳು ತಿಳಿದವು. 

ಯಾವಾಗ ಒಂದು ಮರಕ್ಕೆ ತಾನು ಸಾಯುತ್ತಿದ್ದೇನೆ ಅಥವಾ ತೀವ್ರ ಅಪಾಯ ಎದುರಾಗಿದೆ ಎನ್ನುವ ಮುನ್ಸೂಚನೆ ಸಿಗುತ್ತದೆಯೋ.. ಆಗ ತನ್ನ ವಂಶವನ್ನು ಮುಂದಕ್ಕೆ ಕೊಂಡೊಯ್ಯಲು, ಬೀಜಗಳನ್ನು ಸೃಷ್ಟಿಸಲು ತನ್ನಲಿರುವ ಕೊನೆಯ ಹನಿ ಶಕ್ತಿಯನ್ನು ಬಳಸಿ ಅತಿಯಾಗಿ ಹೂವು, ಹಣ್ಣುಗಳನ್ನು ಬಿಡುತ್ತದೆ. ಸಾಮಾನ್ಯವಾಗಿ ಇಂತಹ ಪ್ರಕ್ರಿಯೆಯನ್ನು ದೀರ್ಘಕಾಲದ ಬಹುವಾರ್ಷಿಕ ಹಣ್ಣಿನ ಮರಗಳಲ್ಲಿ ಕಾಣಬಹುದು. ಅದರಲ್ಲಿ ನೇರಳೆಯೂ ಒಂದು. 

ಮಾವಿನ ಮರದಲ್ಲಿಯೂ ಇಂತಹ ಸ್ಟ್ರೆಸ್ ಫ್ರೂಟಿಂಗ್ ಅನ್ನು ಕಾಣಬಹುದು. ದೀರ್ಘ ಬರಗಾಲ ಬಂದಾಗ ಅಥವಾ ಮರದ ಬೇರುಗಳಿಗೆ ತೀವ್ರ ಹಾನಿಯಾದಾಗ ಮಾವಿನ ಮರ ಆ ವರ್ಷ ಅತಿ ಹೆಚ್ಚು ಹೂ ಬಿಡುತ್ತದೆ. "ಮರ ಸಾಯುತ್ತೇನೋ.. ವಿಪರೀತ ಕಾಯಿ ಕಚ್ಚಿದೆ" ಎನ್ನುವುದನ್ನು ಕೇಳಬಹುದು.

ಮೂಸಂಬಿ, ನಿಂಬೆ, ಕಿತ್ತಳೆ ಹಾಗೂ ಆ ಜಾತಿಯ ಗಿಡಗಳು ಸಹ ಇಂಥದೇ ವರ್ತನೆಯನ್ನು ತೋರುತ್ತವೆ. ದೀರ್ಘಕಾಲ ನೀರು ಸಿಗದಿದ್ದಾಗ ಅಥವಾ ಬೇರಿಗೆ ಶಿಲೀಂದ್ರ ರೋಗ ತಗುಲಿದಾಗ ಎಲೆಗಳಿಗಿಂತಲೂ ಬಿಳಿಯ ಹೂ ಹೆಚ್ಚಾಗಿ ಕಾಣಸಿಗುತ್ತವೆ. ಇದನ್ನು ತಮ್ಮ ಅನುಕೂಲಕ್ಕೆ ಬಳಸುವವರೂ ಇದ್ದಾರೆ. ಉದ್ದೇಶಪೂರ್ವಕವಾಗಿಯೇ ಇಂತಹ ಗಿಡಗಳಿಗೆ ಕೆಲವು ದಿನ ನೀರು ನಿಲ್ಲಿಸಿ, ಅಂದರೆ 'ವಾಟರ್ ಸ್ಟ್ರೆಸ್' ಕೊಟ್ಟು ಇಳುವರಿ ಪಡೆಯುವ ಪದ್ಧತಿಯೂ ರೂಢಿಯಲ್ಲಿದೆ.

ಸೀಬೆ ಮರ ಒಣಗುವ ಹಂತಕ್ಕೆ ತಲುಪಿದಾಗ ಅಥವಾ ಅದರ ಕಾಂಡಕ್ಕೆ ತೀವ್ರ ಗಾಯಗಳಾದಾಗ ಮೂರು ಪಟ್ಟು ಹೆಚ್ಚು ಕಾಯಿಗಳನ್ನು ಬಿಡುತ್ತದೆ. ತೆಂಗಿನ ಮರವೂ ಇಂತಹದ್ದೇ ವರ್ತನೆ ತೋರುತ್ತದೆ. ತೀವ್ರ ಮಿಂಚು ತಗುಲಿದಾಗ ಇನ್ನೇನು ಕೆಲವೇ ತಿಂಗಳು ಸಾಯುತ್ತದೆ ಎನ್ನುವ ಸಂದರ್ಭದಲ್ಲಿ ತನ್ನ ಜೀವಿತದ ಕೊನೆಯ ಹಂತದಲ್ಲಿ ಹೆಚ್ಚು ಹೊಂಬಾಳೆಗಳನ್ನು ಬಿಡುತ್ತದೆ.

ಸ್ಟ್ರೆಸ್ ಕೇವಲ ಮನುಷ್ಯರಿಗಲ್ಲ.. ಗಿಡಗಳಿಗೂ..!

ಕೇವಲ ಬರಗಾಲ ಅಥವಾ ನೀರು ಸಿಗದಿದ್ದಕ್ಕೆ ಮಾತ್ರ ಗಿಡಗಳಿಗೆ ಸ್ಟ್ರೆಸ್ ಉಂಟಾಗುವುದಿಲ್ಲ. ಮರಕ್ಕೆ ಆಹಾರ ಅಥವಾ ನೀರು ಸರಬರಾಜು ಮಾಡುವ ಬೇರುಗಳು ಹಾನಿಗೊಳಗಾದಾಗ ಅಥವಾ ಕೀಟಗಳು, ರೋಗಗಳಿಂದ ಬಾಧಿತವಾದಾಗಲೂ ಇಂತಹ ವರ್ತನೆ ಕಾಣಿಸುತ್ತದೆ. 

ತೀವ್ರ ಹವಾಮಾನ ವೈಪರೀತ್ಯದಿಂದ ಇಂತಹ ಸ್ಟ್ರೆಸ್ ಉಂಟಾಗುತ್ತದೆ. ಈಗ ನಾವು ನೋಡುತ್ತಿರುವ ನೇರಳೆ ಮರದ ಉದಾಹರಣೆ ಇದಕ್ಕೆ ಹೆಚ್ಚು ಸೂಕ್ತ.

ಮರದ ಕಾಂಡಕ್ಕೆ ಕೊಡಲಿಯಿಂದ ಆಳವಾಗಿ ಕತ್ತರಿಸಿದಾಗ ಸಹ ಮರಗಳು ಸ್ಟ್ರೆಸ್ ಗೆ ಒಳಗಾಗುತ್ತವೆ. ಹಳೆಯ ಕಾಲದಲ್ಲಿ ಮಾವು ಅಥವಾ ಹಲಸಿನ ಮರಗಳು ಹೆಚ್ಚು ಕಾಯಿ ಬಿಡದಿದ್ದಾಗ ಅದರ ಕಾಂಡಕ್ಕೆ ಕೊಡಲಿಯಿಂದ ಸಣ್ಣದಾಗಿ ಗಾಯಮಾಡುವ ಮೂಲಕ ಮರವನ್ನು ಹೆದರಿಸುತ್ತಿದ್ದಾರಂತೆ. ಇನ್ನು ಕೆಲವರು ಮರಕ್ಕೆ ವಾಚಾಮಗೋಚರವಾಗಿ ಬಯ್ಯುವುದನ್ನು ಮಾಡುತ್ತಿದ್ದೆವು, ಅದಾದ ಮರು ವರ್ಷಕ್ಕೆ ಹೆಚ್ಚು ಫಸಲು ಬಂದಿತು ಎನ್ನುತ್ತಾರೆ. ಮರಕ್ಕೆ ಬೈದಾಗ ಅದರಿಂದ ಹೆಚ್ಚು ಫಸಲು ಬಂತು ಎನ್ನುವುದಕ್ಕಿಂತಲೂ.. ವೈಜ್ಞಾನಿಕವಾಗಿ ಹೇಳುವುದಾದರೆ ಮರಕ್ಕೆ ಗಾಯವಾದ ತಕ್ಷಣ ತನಗೆ ಆಪತ್ತು ಬಂದಿದೆ ಎಂದು ಭಾವಿಸಿದ ಮರ ಮುಂದಿನ ಬಾರಿ ಅತಿಯಾಗಿ ಹಣ್ಣು ಬಿಡುತ್ತಿತ್ತಂತೆ. ಪ್ರಕೃತಿಯ ಸೃಷ್ಟಿ ಅದೆಷ್ಟು ಸೂಕ್ಷ್ಮ. ಅಲ್ಲವೇ..?

ಇದಿಷ್ಟು ಸ್ಟ್ರೆಸ್ ಫ್ರೂಟಿಂಗ್ ವಿಚಾರವಾಯಿತು. ಹೀಗೆ ಮಾಡಿದಾಗ ಮರಗಳು ಹೆಚ್ಚಿನ ಫಲ ನೀಡುತ್ತವೆ. ಹಾಗೆಂದು ಎಲ್ಲವೂ ತಮ್ಮನ್ನು ತಾವು ಕೊಂದುಕೊಳ್ಳುವುದಿಲ್ಲ. ಸುಸೈಡ್ ಫ್ರೂಟಿಂಗ್ ಕಂಡುಬರುವುದು ತೀವ್ರ ನೀರಿನ ಅಭಾವ ಹಾಗೂ ಬರಗಾಲದ ಸಮಯದಲ್ಲಿ ನ ಈಗ ನೇರಳೆ ಮರಗಳು ಸುಸೈಡ್ ಫ್ರೂಟಿಂಗ್ ಮಾಡಿಕೊಳ್ಳುತ್ತಿವೆ ಎನ್ನುತ್ತಿದ್ದಾರೆ. ಅವುಗಳ ಅಂತ್ಯವನ್ನು ಕಾಣುವ ಸಮಯ ದೂರವೇನಿಲ್ಲ.

ಆದರೆ, ತನ್ನ ಜೀವಿತಾವಧಿಯಲ್ಲಿ ಒಂದೇ ಒಂದು ಬಾರಿ ತಮ್ಮ ಕೈಲಾದಷ್ಟು ಹೆಚ್ಚಿನ ಹೂವು-ಹಣ್ಣು ಬಿಟ್ಟು.. ನಂತರ ಕಡ್ಡಾಯವಾಗಿ ಸಾಯುವ ಸಸ್ಯಗಳು ಬೇರೆಯೇ ಇವೆ. ಈಗ ಅವುಗಳ ಕುರಿತು ಹೇಳುತ್ತೇನೆ.

ಹಿಂದಿನ ಕಾಲದಲ್ಲಿ "ಬಿದಿರು ಹೂ ಬಿಟ್ಟು ಅಕ್ಕಿಯಾಯ್ತು ಅಂದರೆ ಆ ವರ್ಷ ಖಂಡಿತ ಬರಗಾಲ" ಎನ್ನುತ್ತಿದ್ದರು. ಇದನ್ನು ನೀವು ಕೇಳಿದ್ದೀರಾ ಅಥವಾ ಈ ಪ್ರಸಂಗಕ್ಕೆ ಸಾಕ್ಷಿಯಾಗಿದ್ದೀರಾ..?

ಸೂಸೈಡ್‌ ಫ್ರೂಟಿಂಗ್ ಗೆ ಅತ್ಯಂತ ಕರಾರುವಕ್ಕಾದ ಉದಾಹರಣೆ ನೀಡುಬಹುದೆಂದರೆ ಅದು ಬಿದಿರು. ಬಿದಿರಿನಲ್ಲಿ ಹಲವಾರು ತಳಿಗಳಿವೆ. ಈ ತಳಿಗಳ ಆಧಾರದ ಮೇಲೆ 30 ರಿಂದ 120 ವರ್ಷಗಳಿಗೆ ಹೂ ಬಿಟ್ಟು, ಅಕ್ಕಿ (ಬೀಜ) ಆಗುತ್ತವೆ. ಇಡೀ ಕಾಡಿನ ಬಿದಿರೆಲ್ಲ ಒಟ್ಟಿಗೆ ಹೂ ಬಿಟ್ಟು ಬೀಜ ಪ್ರಸರಣ ಮಾಡಿ ಒಣಗಿ ಸಾಯುತ್ತವೆ. 

ತಾಳೆ ಜಾತಿಯ ಕೆಲವು ಮರಗಳು ಸಹ ಇಂತಹ ಸೂಸೈಡ್ ಫ್ರೂಟಿಂಗ್ ಮಾಡಿಕೊಳ್ಳುತ್ತವೆ. ಶ್ರೀಲಂಕಾ ತಾರಿಪೆ (Talipot Palm) ಸುಮಾರು 30-80 ವರ್ಷಗಳ ಕಾಲ ಕೇವಲ ಎಲೆಯನ್ನು ಮಾತ್ರ ಬೆಳೆಸುತ್ತಾ.. ತನ್ನ ಜೀವಿತಾವಧಿಯ ಕೊನೆಯಲ್ಲಿ ಲಕ್ಷಾಂತರ ಹೂ-ಹಣ್ಣುಗಳನ್ನು ಬಿಟ್ಟು ಹಣ್ಣುಗಳು ಮಾಗುತ್ತಿದ್ದಂತೆ ಮರ ಸಾಯುತ್ತದೆ. 

ಬಾಳೆ ಗಿಡವನ್ನು ಗಮನಿಸಿದ್ದಾದರೆ.. ಒಂದು ಬಾರಿ ಗೊನೆ ಬಿಟ್ಟ ಬಾಳೆ ಅದನ್ನು ಕೊಯ್ದ ನಂತರ ಒಣಗುತ್ತದೆ. ಆದರೆ, ಅದರ ಬುಡದಿಂದ ಹೊಸ ಗಿಡಗಳು ಹುಟ್ಟಿ ಫಸಲು ಹೆಚ್ಚುತ್ತದೆ.

ಬಿದಿರು ಅಥವಾ ನೇರಳೆ ಸ್ಟ್ರೆಸ್ ಫ್ರೂಟಿಂಗ್ ಅಥವಾ ಸುಸೈಡ್ ಫ್ರೂಟಿಂಗ್ ಮಾಡಿಕೊಳ್ಳುವಾಗ.. ಒಂದು ಪ್ರದೇಶದ ಗಿಡಮರಗಳೆಲ್ಲವೂ ಒಟ್ಟಿಗೆ ಆ ಪ್ರಕ್ರಿಯೆಗೆ ಒಳಗಾಗುವುದಕ್ಕೆ ಕುತೂಹಲಕರ ಕಾರಣ ಹಾಗೆಯೇ ಚಾಣಾಕ್ಷ ನಡೆಯೂ ಇದೆ.

ಒಂದು ಪ್ರದೇಶದಲ್ಲಿ ಹೀಗಾಗುತ್ತಿದೆ ಎಂದಾಗ ಆ ಪ್ರದೇಶದ ಹವಾಮಾನದ ಪ್ರಚೋದನೆ ಹಾಗೂ ಅವುಗಳ ಜೀವಕೋಶದಲ್ಲಿರುವ ಜೆನೆಟಿಕ್ ಕ್ಲಾಕ್ ಕಾರಣವಾಗಬಹುದು. ಎಂದರೆ, ಒಂದೇ ತಾಯಿಬೇರಿನಿಂದ ಹುಟ್ಟಿ ಬೇರೆ-ಬೇರೆ ಕಡೆ ಪ್ರಸರಣವಾಗಿ ಹುಟ್ಟಿರುವ ಆ ಗಿಡಗಳು ಆಂತರಿಕವಾಗಿ ಒಂದೇ ರೀತಿ ವರ್ತಿಸುತ್ತವೆ ಎನ್ನುತ್ತಾರೆ.

ನನಗೆ ಎಲ್ಲಕ್ಕಿಂತ ಅಚ್ಚರಿಗೊಳಿಸಿದ ಕಾರಣ ಎಂದರೆ ಅವುಗಳ ಆಲೋಚನೆಯ ಪರಿ. ಒಂದೊಂದು ಗಿಡ ಒಮ್ಮೊಮ್ಮೆ ಹಣ್ಣು ಬಿಟ್ಟರೆ ಪ್ರಾಣಿ-ಪಕ್ಷಿಗಳು ಅದನ್ನು ತಿಂದು ಖಾಲಿ ಮಾಡಿಬಿಡುತ್ತವೆ. ಆದರೆ, ಎಲ್ಲ ಮರಗಳೂ ಒಟ್ಟಿಗೆ ಫಲ ಬಿಟ್ಟಾಗ ಎಷ್ಟು ತಿಂದರೂ ಅವು ಖಾಲಿಯಾಗುವುದಿಲ್ಲ. ಹೊಟ್ಟೆ ತುಂಬಿ ಸಾಕಾಗಿ ಸುಮ್ಮನಾಗಿಬಿಡುತ್ತವೆ. ಮುಂದಿನ ದಿನಗಳಿಗೆ ರಕ್ಷಿಸಿಕೊಳ್ಳುವ ಮನುಷ್ಯನನ್ನು ಹಾಗೂ ಅವನ ಅತಿಯಾಸೆಯನ್ನು ಅವು ಪರಿಗಣಿಸಿಲ್ಲವೇನೋ.. ಹೀಗೆ ಪ್ರಾಣಿಗಳು ತಿಂದು ಉಳಿಯುವ ಲಕ್ಷಾಂತರ ಬೀಜಗಳು ಮಣ್ಣು ಸೇರಿ ಮುಂದಿನ ಪೀಳಿಗೆಗೆ ಸಾಗುತ್ತವೆ.

ಗಿಡಗಳಿಗೂ ಜೀವ ಇದೆ ಎಂದಷ್ಟೇ ಓದಿದ್ದವಳಿಗೆ.. ಗಿಡಗಳ ಸ್ಟ್ರೆಸ್ ಕುರಿತು ತಿಳಿಯಿತು. ಕುತೂಹಲದಿಂದ ಅದರ ಹಿಂದೆ ಸಾಗಿದಾಗ ನಾನು ತಿಳಿದುಕೊಂಡ ಕೆಲ ಕುತೂಹಲಕರ ವಿಚಾರಗಳಿವು.

~ವಿಭಾ ವಿಶ್ವನಾಥ್

ಪ್ರತಿಯೊಬ್ಬರ ಬದುಕಿನ ಸ್ಟಾರ್ಟಿಂಗ್ ಪಾಯಿಂಟ್ ಬೇರೆಯೇ ಅಲ್ಲವಾ..?!

"ನಿನ್ನ ಜೊತೆಯವರಿಗೆಲ್ಲ ಮದುವೆಯಾಯಿತು. ಇನ್ನೂ ನಿನಗೆ ಮದುವೆ ಆಗಿಲ್ವಾ..?!"

"ನಿನ್ನ ವಯಸ್ಸಿನವರಿಗೆ ಮದುವೆಯಾಗಿ ಮಗು ಇದೆ. ನೀನು ಮದುವೆಯಾಗಿ ನಾಲ್ಕು ವರ್ಷವಾದರೂ ಇನ್ನೂ ಮಗು ಆಗಿಲ್ವಾ ಅಥವಾ ಮಾಡಿಕೊಂಡಿಲ್ವಾ..?!"

"ಇಂಜಿನಿಯರಿಂಗ್ ಮುಗಿಸಿ ಕೆಲಸಕ್ಕೆ ಸೇರಿದ ನಿನ್ನ ಫ್ರೆಂಡ್ಸ್ ಎಲ್ಲರೂ ಎರಡು ವರ್ಷದ ಸಂಬಳ ತೆಗೆದುಕೊಂಡಿದ್ದಾರೆ, ಇನ್ನೂ ನಿನ್ನ ಕೆರಿಯರ್ ಸ್ಟಾರ್ಟ್ ಆಗಿಲ್ವಾ..?"

"ಇವಳ ಜೊತೆಗೆ ಹುಟ್ಟಿದ ಆ ಮಗು ಈಗಾಗಲೇ ಮನೆ ತುಂಬಾ ಓಡಾಡುತ್ತೆ. ಇವಳಿನ್ನೂ ತೆವಳುವುದರಲ್ಲಿಯೇ ಇದ್ದಾಳಾ..?!"

"ನಿನ್ನ ಜೊತೆ ಕೆಲಸಕ್ಕೆ ಸೇರಿದವನಿಗೆ ಈಗಾಗಲೇ ಪ್ರಮೋಷನ್ ಹಾಗೆ ಪ್ಯಾಕೇಜ್ ಕೂಡ ಜಾಸ್ತಿ ಆಯ್ತು. ಎರಡು ಕಂಪನಿ ಬದಲಾಯಿಸಿದ. ನೀನಿನ್ನೂ ಅದೇ ಕಂಪನಿಗೆ ಅಂಟಿ ಕೂತಿದ್ದೀಯಾ..?"

ಹೀಗೆ ಬರೆಯುತ್ತಾ ಹೋದರೆ ಪ್ರಶ್ನೆಗಳ ಅಲ್ಲಲ್ಲ ಕಾಳಜಿಯ ನೆಪದ ಚುಚ್ಚುಮಾತುಗಳ ಪಟ್ಟಿ ಸಾಗುತ್ತಲೇ ಹೋಗುತ್ತದೆ. ಇದೆಲ್ಲದಿದ್ದರೂ ಇಂತಹ ಯಾವುದಾದರೂ ಒಂದಲ್ಲಾ ಒಂದು ಪ್ರಶ್ನೆಗಳನ್ನು ಎದುರಿಸಿಯೇ ಇರುತ್ತೇವಲ್ಲವಾ..?!

ಒಂದೇ ದಿನ, ಒಂದೇ ಸಮಯಕ್ಕೆ ಹುಟ್ಟಿದ ಮಕ್ಕಳಲ್ಲಿಯೂ ಬೆಳವಣಿಗೆಯ ವ್ಯತ್ಯಾಸವಿರುತ್ತದೆ. ಹಾಗಿರುವಾಗ ಈ ವಯಸ್ಸಿನಲ್ಲಿ ನಿನ್ನ ಜೊತೆಯವರು ಮಾಡಿರುವ ಸಾಧನೆ ನಿನ್ನಿಂದ ಸಾಧ್ಯವಾಗಿಲ್ಲವೇಕೆ ಎಂದು ಪ್ರಶ್ನಿಸುವವರೇನು ಕಡಿಮೆ ಇಲ್ಲ. 

ಪ್ರತಿಯೊಬ್ಬರ ಬದುಕಿನ ಕಲಿಕೆ ಒಂದೇ ರೀತಿ ಇರುವುದಿಲ್ಲ. ವಯಸ್ಸು, ಅನುಭವ, ಪ್ರಯತ್ನ, ಲಕ್ ಒಬ್ಬರಂತೆ ಒಬ್ಬರಿಗಿರುವುದಿಲ್ಲ. ಅಕಸ್ಮಾತ್ ಹಾಗೆಯೇ ಇದ್ದರೂ ಬೆಳೆದ ವಾತಾವರಣ ಮನಸ್ಥಿತಿ ಬೇರೆಯೇ ಇರುತ್ತದಲ್ಲವಾ..?!

ಮೇಲಿನ ಪ್ರಶ್ನೆಗಳು ಅಥವಾ ಅಂತಹ ಸಂದರ್ಭಗಳು ಎದುರಾದಾಗ ಅಥವಾ ಪದೇ ಪದೇ ಅಂತಹ ಪ್ರಶ್ನೆಗಳೇ ಎದುರಾದಾಗ ನಾವು ಒಂದಲ್ಲಾ ಒಂದು ಬಾರಿಯಾದರೂ.. ಒಂದು ಕ್ಷಣವಾದರೂ ಅವರು ಹೇಳಿರುವ ಮತ್ತೊಬ್ಬರೊಡನೆ ಹೋಲಿಸಿಕೊಂಡಿರುತ್ತೇವೆ. ಹೌದು ತಾನೇ..?

ಇಷ್ಟಕ್ಕೂ ಇನ್ನೊಬ್ಬರೊಂದಿಗೆ ನಾವು ಯಾಕೆ ಕಾಂಪಿಟೇಶನ್ ಗಿಳಿಯಬೇಕು..? ಪ್ರತಿಯೊಬ್ಬರ ಬದುಕಿನ ಸ್ಟಾರ್ಟಿಂಗ್ ಪಾಯಿಂಟ್ ಹಾಗೂ ಎಂಡಿಂಗ್ ಪಾಯಿಂಟ್ ಎರಡೂ ಬೇರೆ ಬೇರೆ ಅಲ್ಲವಾ..! ಸಾಗುವ ಗತಿ ವಿಭಿನ್ನವೇ ಅಲ್ಲವಾ..? 

ಹಾಗೆಂದು, ಎದುರಿನವರಿಗೆ ಪ್ರತ್ಯುತ್ತರ ಕೊಡಲು ಹೋಗದೆ ಸುಮ್ಮನಾಗಿ ಬಿಟ್ಟಿರುತ್ತೇವೆ. ಏಕೆಂದರೆ, ಪ್ರತಿಯೊಬ್ಬರ ಮಾತು ಹಾಗೂ ಮೆಚ್ಯುರಿಟಿಯ ಸ್ಟಾರ್ಟಿಂಗ್ ಪಾಯಿಂಟ್ ಕೂಡಾ ಬೇರೆಯೇ. ಎಲ್ಲದಕ್ಕೂ ಉತ್ತರ ಕೊಡುತ್ತಾ ಕುಳಿತುಕೊಳ್ಳಲು ಸಾಧ್ಯವಿಲ್ಲ. ಹಾಗೆಂದು ಮನಸ್ಸನ್ನು ವಿಚಲಿತಗೊಳಿಸಿಕೊಳ್ಳುವುದು ಬೇಡ. ನಮ್ಮ ಪ್ರಯತ್ನ ನಾವು ಮಾಡುತ್ತಿರೋಣ. ನಮ್ಮ ಬದುಕಿನ ಟರ್ನಿಂಗ್ ನ ಸ್ಟಾರ್ಟಿಂಗ್ ಪಾಯಿಂಟ್ ಸಿಕ್ಕಿಯೇ ಸಿಗುತ್ತದೆ. ಹಾಗೆಯೇ ಮಾತನಾಡುವವರ ಬಾಯಿಗೆ ಎಂಡಿಂಗ್ ಪಾಯಿಂಟ್ ಸಹ..!

~ ವಿಭಾ ವಿಶ್ವನಾಥ್

ಬಸವಣ್ಣನವರ ವಚನಗಳು

ಹಬ್ಬಕ್ಕೆ ತಂದ ಹರಕೆಯ ಕುರಿ

ತೋರಣಕ್ಕೆ ತಂದ ತಳಿರ ಮೇಯಿತ್ತು!

ಕೊಂದಹರೆಂಬುದನರಿಯದೆ ಬೆಂದೊಡಲ ಹೊರೆಯ

ಹೋಯಿತ್ತು!

ಅದಂದೆ ಹುಟ್ಟಿತು, ಅದಂದೆ ಹೊಂದಿತ್ತು.

ಕೊಂದವರುಳಿದರೆ ಕೂಡಲಸಂಗಮದೇವ ?

ಇಲ್ಲಿ ಹಬ್ಬಕ್ಕಾಗಿ ಪ್ರಾಣಿಬಲಿಯನ್ನು ಕೊಡುವಾಗ ಅದು ತನ್ನ ಸಾವನ್ನು ಅಷ್ಟು ಬೇಗ ನಿರೀಕ್ಷಿಸದೆ, ದೈನಂದಿನ ಜೀವನಾರೂಢಿಯಂತೆ ತನ್ನ ಹಸಿವನ್ನು ತೀರಿಸಿಕೊಳ್ಳಲು ಅದೇ ಹಬ್ಬಕ್ಕೆ ತಂದು ಕಟ್ಟಿದ ತೋರಣಕ್ಕೆ ತಂದಿದ್ದ ತಳಿರನ್ನು ಮೇಯ್ದು ತನ್ನ ಹಸಿವನ್ನು ನೀಗಿಸಿಕೊಂಡಿತು. ಅದು ಕ್ಷಣಿಕವಾದ ಕಾರ್ಯ ಮಾತ್ರವೇ ಆದರೂ.. ಕುರಿಗೆ ಅದರ ಅರಿವಿರಲಿಲ್ಲ. ಕುರಿಯನ್ನು ಬಲಿ ಕೊಡುವ ಮನುಷ್ಯನ ಮುಂದಿನ ನಡೆಯಲ್ಲಿ ಇದೇ ರೀತಿಯನ್ನು ಕಾಣಬಹುದು. ಮನುಷ್ಯನಿಗೂ ಮುಂದೊಂದು ದಿನ ಇದೇ ರೀತಿಯ ಸಾವೇ ಕಾದಿರುತ್ತದೆ.

ಇಲ್ಲಿ ಪಾತ್ರಗಳು ಬದಲಾಗುತ್ತವಷ್ಟೇ.. ಕುರಿಯ ಜಾಗದಲ್ಲಿ ಮನುಷ್ಯನಿರುತ್ತಾನೆ ಮತ್ತು ಮನುಷ್ಯನ ಜಾಗದಲ್ಲಿ ಜವರಾಯ ಇರುತ್ತಾನೆ. ಸುಖ, ಭೋಗ, ಲಾಲಸೆಗಳಿಂದ ಆಯಾ ಕ್ಷಣಕ್ಕೆ ಬೇಕಾದುದನ್ನು ತನಗೆ ಬೇಕಾದಂತೆ ಬಳಸಿಕೊಳ್ಳುವ ಮನುಷ್ಯ ಸಾವಿನ ಅರಿವೇ ಇಲ್ಲದಂತೆ, ಅಷ್ಟಕ್ಕೂ ಸಾವಿನ ಭಯವೇ ಇಲ್ಲದಂತೆ ಬದುಕುತ್ತಾ ಸಾಗುತ್ತಾನೆ.

ಇಲ್ಲಿ ಬುದ್ಧಿವಂತ ಮನುಷ್ಯನಿಗೂ ಬುದ್ಧಿಹೀನ ಪ್ರಾಣಿಗೂ ಅಂತಹ ವ್ಯತ್ಯಾಸವೇನೂ ತೋರುವುದಿಲ್ಲ. ಆದರೆ, ಕರ್ಮವೆಂಬುದು ಯಾರನ್ನು ಬಿಡಲಾರದು. ತಾನು ಮಾಡಿದ್ದನ್ನು ತಾನೇ ಮುಂದೊಂದು ದಿನ ಉಣ್ಣುವ ಮನುಷ್ಯ ಆ ರೀತಿ ಯೋಚಿಸಲಾಗದ್ದು ಮಾತ್ರ ವಿಪರ್ಯಾಸ.

ಬಸವಣ್ಣನವರ ಈ ವಚನದಲ್ಲಿ ಪ್ರಾಣಿಬಲಿಯ ಮೂಢನಂಬಿಕೆಯನ್ನು ತೋರುತ್ತಲೇ.. ಸಾವಿನ ಅನಿವಾರ್ಯತೆ ಹಾಗೂ ಜೀವನದ ನಶ್ವರತೆಯ ಪಾಠವನ್ನು ಹೇಳಿದ್ದಾರೆ.

ಎನಿಸು ಕಾಲ ಕಲ್ಲು ನೀರೊಳಗಿದ್ದರೇನು,

ನೆನೆದು ಮೃದುವಾಗಬಲ್ಲುದೆ ?

ಎನಿಸುಕಾಲ ನಿಮ್ಮ ಪೂಜಿಸಿ ಏವೆನಯ್ಯಾ

ಮನದಲ್ಲಿ ದೃಢವಿಲ್ಲದನ್ನಕ ?

ನಿಧಾನವ ಕಾಯ್ದಿದ್ದ ಬೆಂತರನ ವಿಧಿ ಎನಗಾಯಿತ್ತು

ಕಾಣಾ ಕೂಡಲಸಂಗಮದೇವ.

ನೀರಿನ ಗುಣ ಎಲ್ಲವನ್ನು ಮೃದುವಾಗಿಸುವುದೇ ಆದರೂ.. ಕಲ್ಲಿನ ಗುಣ ಕಠಿಣವಾದದ್ದು. ಅದು ಎಷ್ಟೇ ಕಾಲ ಹರಿಯುವ ನೀರಿನ ಅಡಿಯಲ್ಲಿದ್ದರೂ ಮೃದುವಾಗದು. ಅದು ತನ್ನ ಸ್ವಭಾವವನ್ನು ಎಳ್ಳಷ್ಟು ಸಹ ಬದಲಾಯಿಸಿಕೊಳ್ಳುವುದಿಲ್ಲ.

 

ಮನಸ್ಸಿನಲ್ಲಿ ದೃಢಭಕ್ತಿ ಇಲ್ಲದೆ ಕೇವಲ ಬಾಯಿಮಾತಿಗೆ ಅಥವಾ ಮೇಲ್ನೋಟಕ್ಕೆ ಮಾತ್ರ ಭಕ್ತಿ ತೋರಿಸುತ್ತಾ ಪೂಜಿಸಿದರೂ.. ಅವರಿಗೆ ದೇವನು ಒಲಿಯಲಾರನು. ಅಂತಹ ಭಕ್ತಿಯನ್ನು ಎಷ್ಟೇ ಕಾಲ ತೋರಿದರೂ ಅದು ವ್ಯರ್ಥ. ತನು - ಮನಗಳನ್ನು ಅರ್ಪಿಸಬೇಕು ದೇವರು ಒಲಿಯಲು.  ಅದಕ್ಕಾಗಿ ಮಾನಸಿಕ ದೃಢತೆ ಬಹಳವೇ ಮುಖ್ಯ.

ಇಲ್ಲವಾದಲ್ಲಿ ಭೂಮಿಯೊಳಗೆ ಹುಗಿದಿಟ್ಟ ನಿಧಿಯನ್ನು ಕಾಯುವ ಪಿಶಾಚಿಯಂತೆ ಅಂತಹವರ ಬದುಕು ಕಾಣುವುದು. ಭೂಮಿಯೊಳಗೆ ಹುಗಿದಿಟ್ಟ ನಿಧಿಯನ್ನು ಪಿಶಾಚಿ ಕಾಯುವುದು ಎನ್ನುವ ನಂಬಿಕೆ ಇದೆ. ಅದರಿಂದ ಪಿಶಾಚಿಗೆ ಯಾವ ರೀತಿಯ ಸಹಾಯವೂ ಆಗುವುದಿಲ್ಲ. ಬದಲಾಗಿ, ಅದು ಅವಶ್ಯಕತೆ ಇರುವವರ ಕೈಗೆ ಸಿಕ್ಕರೆ ಅದಕ್ಕೊಂದು ಸಾರ್ಥಕತೆ.

  

ಬದಲಾಯಿಸಿಕೊಳ್ಳದ ಸ್ವಭಾವದವರ ಜೊತೆಗಿರುವುದು, ಮನಸ್ಸಿನಲ್ಲಿ ಭಕ್ತಿ ತೋರದೆ ಕೇವಲ ಢಾಂಬಿಕ ಭಕ್ತಿ ತೋರುವುದು ಹಾಗೂ ಉಪಯೋಗವಿಲ್ಲದ ಕೆಲಸವನ್ನು ಮಾಡುವುದು ಎಂದಿಗೂ ಸಾರ್ಥಕತೆಯನ್ನು ತರಲಾರದು. ಇದಕ್ಕಾಗಿ ಸಾರ್ಥಕವಾದ ಬದಲಾವಣೆ ಬಹಳಷ್ಟು ಅಗತ್ಯ. ಈ ರೀತಿಯ ಬದಲಾವಣೆಯೇ ಕೂಡಲಸಂಗಮ ದೇವನನ್ನು ಒಲಿಸಿಕೊಳ್ಳುವ ಪರಿ.

~ವಿಭಾ ವಿಶ್ವನಾಥ್

ಕನ್ನಡದಲ್ಲಿ ಬರೆದ / ಬರೆಯುತ್ತಿರುವ ನನ್ನ ಇಷ್ಟದ ಲೇಖಕರು : ' ಸಾಯಿಸುತೆ '

ಕನ್ನಡದಲ್ಲಿ ಬರೆದ / ಬರೆಯುತ್ತಿರುವ ನನ್ನ ಇಷ್ಟದ ಲೇಖಕರು : ' ಸಾಯಿಸುತೆ '

ಸಾಯಿಸುತೆ ಅಮ್ಮನವರವರ ಕೃತಿಗಳನ್ನು ಓದಿದ ನಂತರವೂ ಹಲವಾರು ಲೇಖಕ ಹಾಗೂ ಲೇಖಕಿಯರು ಇಷ್ಟವಾಗಿದ್ದಾರಾದರೂ.. ಅಂದಿನಿಂದ ಇಂದಿನವರೆಗೆ ಬದಲಾಗದೆ ಉಳಿದ ನನ್ನಿಷ್ಟದ ಲೇಖಕಿ ಅವರು.  ಕೆಲವು ಇಷ್ಟವಾದ ಲೇಖಕ/ ಲೇಖಕಿಯರ ಕೃತಿಗಳನ್ನು ಒಂದರ ಮೇಲೊಂದರಂತೆ ಓದುತ್ತಾ ಇದ್ದಾಗ ಏಕತಾನತೆಯ ಅನುಭವವಾಗಿದ್ದಿದೆ. ನಿರಂತರವಾಗಿ ಅವರದ್ದೇ ಕೃತಿಗಳನ್ನು ಓದುತ್ತಿರುವಾಗಲೋ ಅಥವಾ ಸಾಕಷ್ಟು ಪುಸ್ತಕಗಳು ಬಂದಾಗ ಅದರಲ್ಲಿ ವಿಷಯ ಅಥವಾ ಕಥಾವಸ್ತುವಿನಿಂದ ಕೆಲವೊಮ್ಮೆ ಒಂದೇ ರೀತಿ ಎಂದೆನಿಸಬಹುದೇನೋ.. ಆದರೆ, ನನಗೆ ಸಾಯಿಸುತೆಯವರ ಕೃತಿಗಳ ವಿಚಾರದಲ್ಲಿ ಎಂದಿಗೂ ಈ ಅನುಭವವಾಗಲಿಲ್ಲ. 

ನಾನು ಮೊದಲಿಗೆ ಓದಿದ ಅವರ ಕಾದಂಬರಿ ಅಗ್ನಿದಿವ್ಯ. ಆ ಕಾದಂಬರಿಯ ಮೂಲಕ ಅವರ ಉಳಿದ ಕಾದಂಬರಿಗಳ ಲೋಕಕ್ಕೆ ಕಾಲಿಟ್ಟ ನನಗೆ ಪ್ರತಿಯೊಂದು ಕಾದಂಬರಿಯಲ್ಲೂ ವಿಭಿನ್ನವಾದ ಓದಿನ ಅನುಭವ ದಕ್ಕಿದೆ. ಗ್ರಂಥಾಲಯದಿಂದ ತಂದು ಓದಿದ್ದ ಕೃತಿಗಳೇ ಹೆಚ್ಚಿದ್ದು.. ಇತ್ತೀಚಿಗೆ ನನ್ನ ಸಂಗ್ರಹ ಸೇರುತ್ತಿರುವ ಅವರ ಪುಸ್ತಕಗಳು ಅವರ ಓದಿನ ವಿಸ್ತಾರತೆ ಹಾಗೂ ಆಲೋಚನೆಯ ಅಗಾಧವ್ಯಾಪ್ತಿಯನ್ನು ನಮಗೂ ದಾಟಿಸುತ್ತಿದೆ.

ಲೈಟ್ ರೀಡಿಂಗ್ ಗೆ ಅಥವಾ ಓದಿನ ಮೊದಲ ದಿನಗಳಿಗಾಗಿ ಅವರ ಕೃತಿಗಳನ್ನು ಆಯ್ಕೆ ಮಾಡಿಕೊಳ್ಳಬಹುದು. ಹಾಗೆಯೇ.. ಕೆಲವೊಮ್ಮೆ ಆತ್ಮಸ್ಥೈರ್ಯ ಕುಗ್ಗಿದಾಗ ಅಥವಾ ಆತ್ಮವಿಶ್ವಾಸ ಕಡಿಮೆಯಾದಾಗಲೂ ಅವರ ಓದು ಗಟ್ಟಿತನದ ಅನುಭವವನ್ನು ನೀಡಿದೆ. 

ಹಲವಾರು ದಿಗ್ಗಜರು ಹಾಗೂ ಹೆಸರಾಂತ ಲೇಖಕ/ಲೇಖಕಿಯರು, ನವಬರಹಗಾರರು ಹೀಗೆ ವಿಭಿನ್ನ ಹೊಸತನದ ಓದಿಗೆ ತೆರೆದುಕೊಳ್ಳುವೆನಾದರೂ.. ನನ್ನ ಇಷ್ಟದ ಓದಿನ ಪ್ರಕಾರ ಇಂದಿಗೂ ಸಾಮಾಜಿಕ ಕಾದಂಬರಿಗಳು ಅದರಲ್ಲೂ ಕೌಟುಂಬಿಕ ಪ್ರಭೇದಕ್ಕೆ ಆದ್ಯತೆ ಕೊಡುವ ಕಾದಂಬರಿಗಳು. ಕುಟುಂಬದ ಒಗ್ಗಟ್ಟು ಹಾಗೂ ಕುಟುಂಬಕ್ಕಾಗಿ ಬದುಕುವ ಅವರ ಕಾದಂಬರಿಯ ಹಲವು ಪಾತ್ರಗಳು ವಾಸ್ತವಕ್ಕೆ ಬಹಳ ಹತ್ತಿರವಾಗಿ ಹಾಗೂ ನನ್ನ ಕನಸಿನ ಕಲ್ಪನೆಯ ಪಾತ್ರಗಳೇ ಕಣ್ಮುಂದೆ ಬಂದಂತಾಗಿ ಮನಸ್ಸಿಗೆ ಬಹಳ ಹತ್ತಿರವಾಗಿವೆ. ಅವರ ಕೆಲವು ಕಾದಂಬರಿಗಳ ವಿಶೇಷತೆ ಕುರಿತು ಹೇಳಿ ನನ್ನಿಷ್ಟದ ಅವರ ಕಾದಂಬರಿ ಕುರಿತು ಪ್ರಸ್ತಾಪಿಸುತ್ತೇನೆ.

ವಿವಾಹ ಬಂಧನ : ವಿವಾಹ ಎಂಬುದು ಒಲ್ಲದ ವಿಷಯವಾಗಿ, ಅದು ಗಂಡು, ಹೆಣ್ಣು ಇಬ್ಬರ ಪಾಲಿಗೂ ಬಂಧನವಾಗಬಾರದು. ಹಾಗೂ ಪವಿತ್ರವಾದ ವಿವಾಹ ಬಂಧನದಲ್ಲಿ.. ಸಂಗಾತಿಗಳ ಆಯ್ಕೆ ಎಷ್ಟು ಮುಖ್ಯವೆಂಬುದನ್ನು ಹಾಗೂ ಅದು ಹಿರಿಯರಿಂದ ನೋಡಿ, ಮಾಡಿ ನಿಶ್ಚಯವಾದಾಗ ಅವರ ನಿರ್ಣಾಯಕ ಶಕ್ತಿ ಚಿಕ್ಕವರಿಗಿಂತಲೂ ಎಷ್ಟು ಮಹತ್ವವಾದದ್ದು ಎಂಬುದನ್ನು ಎತ್ತಿ ಹಿಡಿದಿರುವ ಕಾದಂಬರಿ. ಇಲ್ಲಿ ಅನುರಾಧಳ ತಾಳ್ಮೆ ಹಾಗೂ ಹಿರಿಯರಿಗೆ ತೋರುವ ಗೌರವ ಇವೆರಡರ ಜೊತೆಗೆ "ಸಂಸಾರ ಗುಟ್ಟು ವ್ಯಾದಿ ರಟ್ಟು" ಎಂಬಂತೆ ನಡೆಯುತ್ತಾ ತನ್ನ ಬದುಕನ್ನು ತಾನೇ ಸರಿಪಡಿಸಿಕೊಳ್ಳಲು ಕಾಯುವ ತಾಳ್ಮೆಯ ಪರಿ ವಿವಾಹದ ಮೊದಲು ಅಥವಾ ನವವಿವಾಹಿತ ಹೆಣ್ಣುಮಕ್ಕಳು ಓದಲೇಬೇಕು  ಎನಿಸುವಂತೆ ಮಾಡಿದ ಕಾದಂಬರಿ.

ಶಿಲ್ಪ ತರಂಗಿಣಿ : ಗಂಡು ಮಾತ್ರ ಮತ್ತೊಂದು ಪ್ರೇಮದಲ್ಲಿದ್ದು.. ವಿವಾಹವಾದಾಗ ವಿಭಿನ್ನವಾಗಿ ನಡೆದುಕೊಳ್ಳುವ ಮನಸ್ಥಿತಿಯನ್ನು ಬದಲಾಯಿಸಿರುವ ಕಾದಂಬರಿ.  ವಿವಾಹ ಬಂಧನದಲ್ಲಿ ಆ ಚಿತ್ರಣವಿದ್ದರೆ ಇಲ್ಲಿ ಕಾದಂಬರಿಯ ನಾಯಕಿ ತಾನು ಪ್ರೀತಿಸದ ಹಾಗೂ ಹಿರಿಯರಿಂದ ನಿಶ್ಚಯವಾದ ವರನೊಟ್ಟಿಗೆ ವಿವಾಹವಾಗಿ ಬದುಕುವ ಸಂದರ್ಭವಿದೆ. ತಾಳ್ಮೆ ಹೆಣ್ಣಿಗೆ ಮಾತ್ರವಲ್ಲ ಗಂಡಿಗೆ ಸಹಾ ಎಂಬುದನ್ನು ಎತ್ತಿ ತೋರುವ  ಚಿತ್ರಣವಿದೆ. ಅಲ್ಲದೆ, ಭಾರತೀಯ ಸಂಸ್ಕೃತಿ ಹಾಗೂ ಸಂಪ್ರದಾಯದಲ್ಲಿ ವಿವಾಹಕ್ಕಿರುವ ಮಹತ್ವ ಹಾಗೂ ಹೆಣ್ಣಿನ ಆಲೋಚನೆ ಎರಡನ್ನೂ ಪ್ರಭಾವಿಸುವ ರೀತಿ, ಸಮಾಜದಲ್ಲಿ ಇರಬೇಕಾದ ಸಂಸ್ಕೃತಿ-ಸಂಪ್ರದಾಯಗಳ ಅಗತ್ಯತೆಯನ್ನು ಹೇಳುತ್ತದೆ.

ನನ್ನೆದೆಯ ಹಾಡು : ಪೋಷಕರಿಗೆ ಮಕ್ಕಳ ಮೇಲಿನ ಪ್ರೀತಿ ಅತಿ ವ್ಯಾಮೋಹವಾದಾಗ ಹಾಗೂ ಮಕ್ಕಳ ಮನಸ್ಥಿತಿಯನ್ನು ಅರ್ಥಮಾಡಿಕೊಳ್ಳದಾದಾಗ ಅವರೊ ಳಗಿನ ಹಾಡಿನ ಪಾಡು ಏನಾಗಬಹುದು ಎಂಬುದನ್ನು ಸಂಪತ್ ಗಿರಿಯವರು ಹಾಗೂ ವಿಷ್ಣುವಿನ ಪ್ರಸಂಗದಲ್ಲಿ ಕಾಣಬಹುದು. ಕೆಲವೊಮ್ಮೆ ತಂದೆ-ಮಕ್ಕಳ ಪ್ರೀತಿ, ಕಾಳಜಿಯನ್ನು ನೋಡುತ್ತಿರುವಾಗ ಅಸೂಯೆಯಾದರೂ.. ಮಗನ ಮನಸ್ಸನ್ನು ಅರ್ಥಮಾಡಿಕೊಳ್ಳುವ ಸೂಕ್ಷ್ಮತೆಯೊಂದಿದ್ದಿದ್ದರೆ..! ಎಂದೂ ಅನ್ನಿಸುತ್ತದೆ. ಪೇರೆಂಟಿಂಗ್ ನಲ್ಲಿ ಇರಬೇಕಾದ ಸೂಕ್ಷ್ಮತೆಯನ್ನು ಅರಿವಾಗಿಸುವ ಕಾದಂಬರಿ. ಜೀವನದಲ್ಲಿ ಪೋಷಕರಲ್ಲಿ ಇರಬೇಕಾದ ಸೂಕ್ಷ್ಮತೆಯನ್ನು ಲೇಖಕಿ ಹೇಳಿರುವ ಶೈಲಿ ಮನಮುಟ್ಟುತ್ತದೆ.

ಶುಭಮಿಲನ : ಹೆಣ್ಣಿಗೆ ದೈಹಿಕ ಹಿಂಸೆಗಳು ಮಾತ್ರವೇ ಕೌಟುಂಬಿಕ ಹಿಂಸೆಗಳಲ್ಲ. ಬದಲಾಗಿ, ಮಾನಸಿಕ ಹಿಂಸೆ ಆಕೆಯನ್ನು ಯಾವ ಹೀನಾಯ ಪರಿಸ್ಥಿತಿಗೆ ತರಬಲ್ಲದು ಎಂಬುದನ್ನು ಹಾಗೂ ಹೆಣ್ಣೊಬ್ಬಳ ಮಾನಸಿಕ ತುಮಲವನ್ನು ಸಶಕ್ತವಾಗಿ ಹಿಡಿದಿಟ್ಟಿರುವ ಕಾದಂಬರಿ. ಕೆಲವೊಮ್ಮೆ ತಂದೆ-ತಾಯಿಯರ ಪೂರ್ವಗ್ರಹಪೀಡಿತ ಮನಸ್ಸು ಮಕ್ಕಳ ವಿವಾಹದ ನಿಶ್ಚಯದ ವಿಷಯದಲ್ಲಿ ತಲೆದೋರಿದಾಗ ಮಕ್ಕಳು ಅನುಭವಿಸಬಹುದಾದ ಕಷ್ಟಗಳು ಹಾಗೂ ಅವರ ಮನಸ್ಸು ಮುರಿದು ಮುಂದೆ ಉಂಟಾಗಬಹುದಾದ ಪರಿಣಾಮಗಳ ಚಿತ್ರಣ ಇಲ್ಲಿದೆ. ಕೆಲವೊಮ್ಮೆ ಸ್ವಾಭಿಮಾನವನ್ನು ಬದಿಗೊತ್ತಿ ಹಾಗೂ ಅತಿ ತಾಳ್ಮೆಯನ್ನು ತಂದುಕೊಂಡರೂ ವೈವಾಹಿಕ ಬದುಕು ಸರಿಯಾಗದಿದ್ದಾಗ ತೆಗೆದುಕೊಳ್ಳಲೇ ಬೇಕಾದ ಗಟ್ಟಿ ನಿರ್ಧಾರ ಎಷ್ಟು ಮುಖ್ಯ ಎಂಬುದರ ಸಂದೇಶವಿದೆ. 

ಮುಗಿಲ ತಾರೆ ಹಾಗೂ ಶರದೃತುವಿನ ಚಂದ್ರ : ಇದರಲ್ಲಿ ಚೈತ್ರ ಹಾಗೂ ಭಾಷ್ಯಂರವರ ಪಾತ್ರಗಳು ಮನಸ್ಸಿನಲ್ಲಿ ಇನ್ನೂ ಅಚ್ಚಳಿಯದಂತೆ ಉಳಿದಿವ ಭಾಷ್ಯಂ ತನ್ನ ಅಕ್ಕನ ಮಗನಾದ ದಿವಾಕರನಿಗೆ ಹಿರಿಯ ಮಗಳು ಚೈತ್ರಳನ್ನು ಕೊಟ್ಟು ವಿವಾಹ ಮಾಡಿದ್ದರು. ಆದರೆ, ತನ್ನ ಜೀವನದ ಪರಮ ಸತ್ಯವೊಂದನ್ನು ಬಿಚ್ಚಿಟ್ಟ ಮಗಳಿಗೆ ತಂದೆಯಾಗಿ ಜೊತೆಯಾಗಿ ನಿಲ್ಲುವ.. ಅವಳು ಸ್ವಾಭಿಮಾನದ ಬದುಕನ್ನು ಕಟ್ಟಿಕೊಳ್ಳಲು ಜೊತೆಯಾಗುವ ತಂದೆಯಾಗಿ ಮುಗಿಲ ದಾರಿಯಲ್ಲಿ ಕಂಡರೆ..  ತಂದೆಗಾಗಿ ಎಲ್ಲವನ್ನು ತ್ಯಾಗ ಮಾಡಲು ಹೊರಡುವ ಮಗಳಾಗಿ ಚೈತ್ರ  ಶರದೃತುವಿನ ಚಂದ್ರದಲ್ಲಿ ಕಾಣುತ್ತಾಳೆ.  ಪತ್ನಿ ವಿನಿಮಯದಂತಹಾ ಗಂಭೀರ ಸಮಸ್ಯೆಯನ್ನು ಕಾದಂಬರಿಯಲ್ಲಿ ಕಾಣುತ್ತೇವಾದರೂ ಅತಿಯಾದ ವರ್ಣನೆಯಿಂದ ಮುಜುಗರ ತರಿಸದಂತಹಾ ಓದು ಇಲ್ಲಿದೆ.  ಮಕ್ಕಳ ಮನಸ್ಥಿತಿ ಎಷ್ಟೇ ಕುಸಿದಾಗಲೂ ಮತ್ತೆ ಸಮಾಜದ ವಿರುದ್ಧ ಸ್ಪರ್ಧೆಗೆ ಇಳಿಸುವಲ್ಲಿ ಅವರನ್ನು ಸಿದ್ಧಗೊಳಿಸುವ ಹಾಗೂ ಆತ್ಮವಿಶ್ವಾಸದಿಂದ ಬದುಕು ಕಟ್ಟಿಕೊಳ್ಳಲು ನೆರವಾಗುವ ಇಂತಹಾ ತಂದೆಯ ಉದಾತ್ತ ಪಾತ್ರ  ಸದಾ ನನ್ನಿಷ್ಟದ ತಂದೆಯ ಪಾತ್ರ. ವಿವಾಹವನ್ನು ಮುರಿದುಕೊಳ್ಳುವ ಪ್ರಸಂಗ ಇಲ್ಲಿ ಬಂದಾಗ ಪರಿಸ್ಥಿತಿಯ ಗಂಭೀರತೆಯನ್ನು ಅರಿವಾಗಿಸುವ ಹಾಗೂ ಅದು ಎಷ್ಟು ಅನಿವಾರ್ಯವಾದಾಗ ಸಂಬಂಧವನ್ನು ಕೊನೆಗೊಳಿಸಬೇಕು ಎನ್ನುವ ಸೂಕ್ಷ್ಮತೆಯನ್ನು ತಿಳಿಸಿರುವ ಚಿತ್ರಣವಿದು. ಅತಿಯಾದ ವರ್ಣನೆ ಹಾಗೂ ಅನಗತ್ಯ ವರ್ಣನೆಯಿಲ್ಲದ ನಿರೂಪಣೆ ನನಗೆ ಸಾಯಿಸುತೆಯವರ ಬರಹದ ಶೈಲಿಯಲ್ಲಿ ಸದಾ ಇಷ್ಟವಾಗುವ ಅಂಶ.

ನೂರು ನೆನಪು : ಇದು ನನ್ನಿಷ್ಟದ ಕಾದಂಬರಿಯಾಗಿ ಉಳಿಯಲು ಕಾರಣ ನನ್ನ ಆಲೋಚನೆಯನ್ನು ಬದಲಿಸಿದ ಕಾದಂಬರಿಯೂ ಹೌದು. ಒಂದು ಅನಾಥ ಮಗುವಿಗೆ ಕೌಟುಂಬಿಕ ಜೀವನವೊಂದನ್ನು ಕಟ್ಟಿಕೊಡುವುದು ಸುಲಭದ ಮಾತಲ್ಲ. ಅದರಲ್ಲಿಯೂ ಒಂದು ಮಗುವಿರುವ ಮನೆಯಲ್ಲಿ ಮತ್ತೊಂದು ಮಗು ಅನಾಥ ಮಗುವಿನಂತೆ ಬೆಳೆಯದಿದ್ದರೂ.. ಸತ್ಯ ಗೊತ್ತಿರುವಾಗ ಅದರ ಚಿತ್ರಣ ಹೇಗಿರಬಹುದು ಎಂಬುದನ್ನು ಕಾಣಬಹುದು. ಅದರಲ್ಲಿಯೂ ಆ ಮಗು ಹೆಣ್ಣು ಮಗುವಾಗಿದ್ದರೆ ವಿವಾಹದ ನಂತರದ ಬದುಕು ಅದೆಷ್ಟೋ ವಿಭಿನ್ನ ಎಂಬುದನ್ನು ಕಾಣಬಹುದು. ಇಲ್ಲಿ ಚಂದ್ರಹಾಸನ ಪಾತ್ರ ನನ್ನ ಆಲೋಚನೆಯನ್ನೇ ತಿರುವು ಮುರುವಾಗಿಸಿತು. ಯಾರನ್ನೂ ಕೇವಲ ಒಂದು ಆ್ಯಂಗಲ್ ನಿಂದ ನೋಡಿ ಅಳೆಯಬಾರದು ಎಂಬುದನ್ನು ಅರಿವಾಗಿಸಿದ ಚಿತ್ರಣ.  ಮಾನಸಿಕ ತುಮುಲಗಳನ್ನು ಹಾಗೂ ಜೀವನ ಮೌಲ್ಯಗಳು ನೆನಪುಗಳ ಜೊತೆಗೆ ಬಿಂಬಿತವಾಗಿರುವ ಕಾದಂಬರಿ.

ಪ್ರಿಯ ಸಖೀ, ತೊರೆದು ಜೀವಿಸಬಹುದೇ, ಪರ್ಣಕುಟೀರ, ನಾಟ್ಯಸುಧಾ, ಬಾಡದ ಹೂ , ನಿನಾದ, ಸಪ್ತಪದಿ, ಬಣ್ಣದ ಚುಂಬಕ.. ಹೀಗೆ ಹೇಳಬೇಕಾದ ಪಟ್ಟಿ ಬೆಳೆಯುತ್ತಲೇ ಸಾಗುತ್ತದೆ. 

ಕಥಾ ಶೈಲಿ, ನಿರೂಪಣೆ, ಕಥಾವಸ್ತು, ಮೌಲ್ಯಗಳು, ಅತಿ ಎನ್ನಿಸದ ಪಾತ್ರ ಪೋಷಣೆ, ಅನಗತ್ಯ ವರ್ಣನೆಯಿಲ್ಲದ ವಾಸ್ತವಕ್ಕೆ ಒತ್ತು ನೀಡುವ ಬರಹ, ವಿಶೇಷ ಹಾಗೂ ಅತ್ಯಮೂಲ್ಯ ನುಡಿಮುತ್ತುಗಳ ಬೆನ್ನುಡಿ, ಕೌಟುಂಬಿಕ ಮೌಲ್ಯಗಳ ಸಂದೇಶ ಹೀಗೆ ಪಟ್ಟಿ ಮಾಡುತ್ತಾ ಹೋದರೆ ಅನೇಕ ವಿಚಾರಗಳಿಂದ ನನಗೆ ಸಾಯಿಸುತೆಯವರು ಎಂದೆಂದಿಗೂ ಅಚ್ಚುಮೆಚ್ಚಿನ ಲೇಖಕಿ.

~ವಿಭಾ ವಿಶ್ವನಾಥ್

ಹೆಣ್ಣು ಸಂಸಾರದ ಕಣ್ಣು ಮಾತ್ರವಲ್ಲ ಸಮಾಜದ ಕಣ್ಣು ಸಹ

 ಮೊಲೆ, ಮುಡಿ ಬಂದಡೆ ಹೆಣ್ಣೆಂಬರು

ಗಡ್ಡ ಮೀಸೆ ಬಂದಡೆ ಗಂಡೆಂಬರು

ನಡುವೆ ಸುಳಿವ ಆತ್ಮನು

ಹೆಣ್ಣೂ ಅಲ್ಲ ಗಂಡೂ ಅಲ್ಲ ಕಾಣಾ! ರಾಮನಾಥ

ಎನ್ನುವ ಜೇಡರ ದಾಸಿಮಯ್ಯನ ವಚನವನ್ನು ಕೇಳಿದಾಗ ಗಂಡು ಹಾಗೂ ಹೆಣ್ಣು ಇಬ್ಬರನ್ನು ಗುರುತಿಸುವುದು ಇದೇ ಆಧಾರದ ಮೇಲೆಯೇ ಅಲ್ಲವಾ ಎಂದೆನ್ನಿಸದಿರದು. ಆತ್ಮಕ್ಕಿಲ್ಲದ ಲಿಂಗದ ಹಂಗು ದೇಹಕ್ಕೆ ಮಾತ್ರ. ಈ ವ್ಯತ್ಯಾಸದ ಗುರುತಿಸುವಿಕೆ ಇಂದು ಇಲ್ಲಿಯೇ ನಿಲ್ಲದು. ಹೆಣ್ಣೆಂದರೆ ಹೀಗೆಯೇ ಇರಬೇಕು ಎನ್ನುವ ಕಟ್ಟುಪಾಡಿಗೆ ಮುಂದುವರಿಯುತ್ತದೆ. ಹೆಚ್ಚು ಧೈರ್ಯ ಪ್ರದರ್ಶಿಸುವ ಹೆಣ್ಣನ್ನು, ಮುಂದಾಳತ್ವಕ್ಕೆ ಮುಂದಾಗುವ ಹೆಣ್ಣನ್ನು ಗಂಡುಬೀರಿ ಎಂದೂ.. ಗಂಡು ಕೊಂಚ ನಾಚಿದರೆ, ಹೆಚ್ಚು ಅಲಂಕಾರ ಮಾಡಿಕೊಂಡರೆ, ಎಲ್ಲರಿಗೂ ಕಾಣುವಂತೆ ಅತ್ತರೆ ಹೆಣ್ಣಿಗ ರಾಮ ಎಂದೂ ಹಣೆಪಟ್ಟಿ ನೀಡಿಬಿಡುತ್ತಾರೆ. 

ಹೆಣ್ಣಿಗೆ ಧೈರ್ಯ ಪ್ರದರ್ಶಿಸುವ, ಮುಂದಾಳತ್ವ ವಹಿಸಿ ಮುಂದೆ ಸಾಗುವ ಹಕ್ಕಿಲ್ಲವಾ..? ತನ್ನ ಧೈರ್ಯ, ಬುದ್ಧಿವಂತಿಕೆಯಿಂದ ತನ್ನ ವ್ಯಕ್ತಿತ್ವವನ್ನು ಅನಾವರಣಗೊಳಿಸಿಕೊಳ್ಳುವುದಕ್ಕೆ ಕೊಕ್ಕೆ ಏಕೆ ? ಈ ಟೀಕೆ, ಟಿಪ್ಪಣಿಗಳನ್ನು ಮೀರಿ ಮುಂದೆ ಸಾಗಿದರೂ ಗಂಡಿಗೆ ಸಿಗದ ಮನ್ನಣೆ, ಪ್ರಶಸ್ತಿ, ಅಧಿಕಾರಗಳು ಸಿಕ್ಕಾಗ ಅವಳು ಅದನ್ನು ತನ್ನ ಪ್ರತಿಭೆಯಿಂದಲೇ ಪಡೆದುಕೊಂಡಿದ್ದರೂ.. ಅವಳ ಕುರಿತು ಅಸಹನೆ ಕಕ್ಕಲು ಅದಕ್ಕೊಂದು ಕೊಂಕು. ಅವಳ ಚಾರಿತ್ರ್ಯದ ಕುರಿತು ಮಾತನಾಡುತ್ತಾ ಅವಳಿಗೆ ಕೆಲಸದ ಸ್ಥಳದಲ್ಲಿ ಮಾನಸಿಕ ಕಿರುಕುಳ ಶುರುವಾಗಬಹುದು. 

ಹೆಣ್ಣು ಉದ್ಯೋಗದಲ್ಲಿದ್ದಾಗ ಅನುಭವಿಸುವ ಹಿಂಸೆಗಳಲ್ಲಿ ಮಾನಸಿಕ ಕಿರುಕುಳ ಒಂದು ಬಗೆಯಾದರೆ, ದೈಹಿಕ ಕಿರುಕುಳ ಮತ್ತೊಂದು ಬಗೆಯದ್ದು. ದೈಹಿಕ ಕಿರುಕುಳದ ಕುರಿತು ಅವಳೇನಾದರೂ ಮಾತನಾಡಿದರೆ ತಪ್ಪು ಅವಳದ್ದೇ ಎಂಬಂತೆ ಮಾತನಾಡುವ ಮಂದಿ ಅವಳನ್ನೇ ಕುಗ್ಗಿಸಬಹುದು.

ಈ ರೀತಿಯ ಘಟನೆಗಳು ಹೆಣ್ಣಿನ ಶೀಲ, ಚಾರಿತ್ರ್ಯವನ್ನೇ ಪ್ರಶ್ನಿಸುವಂತೆ ಮಾಡುವಾಗ ನನ್ನಲ್ಲಿ ಉದ್ಭವಿಸುವ ಪ್ರಶ್ನೆ ಗಂಡಿಗೆ ಏಕೆ ಈ ಶೀಲ, ಚಾರಿತ್ರ್ಯದ ಕುರಿತ ಭಯವಿಲ್ಲ..? ಇಷ್ಟೇ ಅಲ್ಲ.. ಈ ಲೈಂಗಿಕ ಕಿರುಕುಳ ಅತ್ಯಾಚಾರವಾಗಿ ಬದಲಾದಾಗ ಆಪಾದನೆ ಬರುವುದು ಹೆಣ್ಣಿನ ಮೇಲೆಯೇ.. ಅವಳು ಅಷ್ಟೊತ್ತಿನಲ್ಲಿ ಹೊರಗೇಕೆ ಹೋಗಬೇಕಿತ್ತು ? ಅವಳು ಪ್ರಚೋದನಕಾರಿಯಾದ ಬಟ್ಟೆ ಧರಿಸುವ ಅಗತ್ಯವಿತ್ತೇ ? ಹೀಗೆ ಪ್ರಶ್ನೆಗಳ ಸರಮಾಲೆಯೇ ಶುರು. ಆದರೆ, ಏನೂ ಅರಿಯದ ಪುಟ್ಟ ಹೆಣ್ಣು ಹಸುಳೆಗಳ ಮೇಲೆಯೂ ಅತ್ಯಾಚಾರವಾಗುವಾಗ ಅದಕ್ಕೇನು ಹೇಳಬಲ್ಲರು ? ಇಷ್ಟೇ ಅಲ್ಲದೆ, ಅತ್ಯಾಚಾರ ಮಾಡಿದ ಆಪರಾಧಿಯೊಂದಿಗೇ ಆ ಹುಡುಗಿಯ ಮದುವೆ ಮಾಡುವ ತೀರ್ಮಾನ ಮಾಡಿದಾಗ ಗಂಡಿನ  ಅಪರಾಧಕಲ್ಲ ಅಲ್ಲಿ ಶಿಕ್ಷೆಯಾಗಿದ್ದು.. ಬದಲಾಗಿ, ಅಲ್ಲಿ ಶಿಕ್ಷೆ ಅನುಭವಿಸುವುದು ಹೆಣ್ಣು. ಕೆಲವರು ಈ ರೀತಿ ಶಿಕ್ಷೆ ಅನುಭವಿಸಿದರೆ ಎಷ್ಟೋ ಹೆಣ್ಣು ಮಕ್ಕಳ ಮನೆಯಲ್ಲಿ ಆ ಕುರಿತು ಸುದ್ದಿ ಹೊರಹೋಗಲು ಬಿಡುವುದೇ ಇಲ್ಲ. ಅಪರಾಧಿ ಅದೆಷ್ಟು ಆರಾಮವಾಗಿ ತಪ್ಪಿಸಿಕೊಳ್ಳಬಲ್ಲನೋ.. ಅಷ್ಟೇ ಸುಲಭವಾಗಿ ಮತ್ತೊಂದು ಅಂತಹದ್ದೇ ಅಪರಾಧವನ್ನೂ ಮಾಡಬಲ್ಲನು.

ಮಿತಿ ಹೇರುವ ಸುತ್ತಮುತ್ತಲಿನ ಸಮಾಜದಿಂದ ಮಿತಿಯನ್ನು ದಾಟಿ ಬೆಳೆಯಬಲ್ಲ ಹೆಣ್ಣಿಗೆ ಬಹಳ ಮುಖ್ಯವಾದದ್ದು ಮಾನಸಿಕ ಸ್ಥೈರ್ಯ. ದೈಹಿಕ ಸಧೃಢತೆ ಆರೋಗ್ಯ ಎಷ್ಟು ಮುಖ್ಯವೋ ಮಾನಸಿಕ ಆರೋಗ್ಯ, ಮಾನಸಿಕ ಸ್ಥೈರ್ಯವೂ ಅಷ್ಟೇ ಮುಖ್ಯ. ತನ್ನವರಿಂದಲೇ ಅದು ಸಿಕ್ಕಾಗ ಅವಳಲ್ಲಿ ಉಂಟಾಗುವ ಆತ್ಮವಿಶ್ವಾಸದ ಗುಣಮಟ್ಟ ವಿಶಿಷ್ಟವಾದದ್ದು. ಹೆಣ್ಣು ಸಂಸಾರದ ಕಣ್ಣು ಮಾತ್ರವಲ್ಲ ಸಮಾಜದ ಕಣ್ಣು ಸಹಾ ಹೌದು. 

~ವಿಭಾ ವಿಶ್ವನಾಥ್

ಸದ್ದಿಲ್ಲದ ಸಾಧಕ : ನೊಬೆಲ್ ಪ್ರಶಸ್ತಿ ಪಡೆದ ಶತಾಯುಷಿ ಜಾನ್ ಬ್ಯಾನಿಸ್ಟರ್ ಗುಡ್‌ಎನಫ್‌

ಸದ್ದಿಲ್ಲದೆ ಎಷ್ಟೋ ಸಾಧಕರು ತಮ್ಮ ಛಾಪನ್ನು ಮೂಡಿಸಿರುತ್ತಾರೆ. ಆದರೆ, ಅವರ ಸಾಧನೆಗಳ ಫಲವಾಗಿ ಸಿಕ್ಕ ಎಷ್ಟೋ ಆವಿಷ್ಕಾರಗಳನ್ನು ನಾವು ಬಳಸುತ್ತಿದ್ದರೂ.. ನಮಗೆ ಅದರ ಅರಿವೇ ಇರುವುದಿಲ್ಲ. ಇದೇ ಅಲ್ಲವೇ ನಿಜವಾದ ಸಾಧನೆ ಎಂದರೆ.. ಅವರು ಯಾರು, ಎಲ್ಲಿಯವರು ಎಂದು ತಿಳಿದಿಲ್ಲದಿದ್ದರೂ.. ಅವರ ಪ್ರತಿಫಲದ ಸಾಧನೆಯನ್ನು ಮಾತ್ರ ಬಳಸಿಕೊಳ್ಳುತ್ತಾ ಅವರು ಅವರನ್ನು ನೆನೆಸಿಕೊಳ್ಳುವುದು.

ಇಂದು ನಾನು ಹೇಳಲು ಹೊರಟಿರುವ ಆ ಸಾಧಕರ ಆವಿಷ್ಕಾರ ಇಲ್ಲದ್ದಿದ್ದಿದ್ದರೆ.. ಇಂದು ಸ್ಮಾರ್ಟ್ ಫೋನ್ ಇರುತ್ತಿರಲಿಲ್ಲ, ಲ್ಯಾಪ್ಟಾಪ್ಗಳೂ ಇರುತ್ತಿರಲಿಲ್ಲ, ಎಲೆಕ್ಟ್ರಿಕ್ ವಾಹನಗಳು ಸಹಾ ಇರುತ್ತಿರಲಿಲ್ಲ. ಯಾಕಿರುತ್ತಿರಲಿಲ್ಲ ಗೊತ್ತೇ..?? ಇಂದು ನಾವು ನಮ್ಮ ಸ್ಮಾರ್ಟ್ ಫೋನ್ ಗಳಲ್ಲಿ, ಲ್ಯಾಪ್ಟಾಪ್ ಗಳಲ್ಲಿ, ಎಲೆಕ್ಟ್ರಿಕ್ ವಾಹನಗಳಲ್ಲಿ ಬಳಸುವ ಬ್ಯಾಟರಿ ಇದೆಯಲ್ಲ.. ಅದೇ ಲಿಥಿಯಂ-ಅಯಾನ್ ಬ್ಯಾಟರಿ. ನಾವು ಚಾರ್ಜ್ ಮಾಡಿದಾಗ ಆ ಪವರ್ ಅನ್ನು ಹಿಡಿದಿಟ್ಟುಕೊಂಡು ನಮಗೆ ನಂತರ ಬಳಕೆಗೆ ಸಿಗುವಂತೆ ಮಾಡುವ ಲಿಥಿಯಂ-ಅಯಾನ್ ಬ್ಯಾಟರಿಯನ್ನು ನಮಗೆ ನೀಡಿದ ಸಾಧಕರು ಇವರು. ಇವರೇ "ಜಾನ್ ಬ್ಯಾನಿಸ್ಟರ್ ಗುಡ್‌ಎನಫ್‌.

ಇವರ ಹೆಸರನ್ನು ಎಲ್ಲೋ ಕೇಳಿದಂತಿದೆಯಲ್ಲ ಎಂದು ಯೋಚಿಸುತ್ತಿದ್ದೀರಾ? ಹೌದು, ಅಪರೂಪಕೊಮ್ಮೆಯಾದರೂ ಕೇಳಿರುತ್ತೀರಿ. ಏಕೆಂದರೆ, ಇವರಿಗೆ 2019ರಲ್ಲಿ ರಸಾಯನಶಾಸ್ತ್ರ ವಿಭಾಗದಲ್ಲಿ ನೊಬೆಲ್ ಪ್ರಶಸ್ತಿ ಬಂದಿದೆ. ಕೇವಲ ಇದಷ್ಟೇ ವಿಶೇಷವಲ್ಲ ಇವರು ಈ ನೊಬೆಲ್ ಪ್ರಶಸ್ತಿಯನ್ನು ಸ್ವೀಕರಿಸಿದಾಗ ಇವರಿಗೆ ಆಗಿದ್ದು 97 ವರ್ಷ. ಇದುವರೆಗಿನ ನೊಬೆಲ್ ಪ್ರಶಸ್ತಿ ಪಡೆದವರ ಇತಿಹಾಸದಲ್ಲಿ ಇವರು ಅತ್ಯಂತ ಹಿರಿಯ ವ್ಯಕ್ತಿ ಎಂದು ದಾಖಲಾಗಿದ್ದಾರೆ. ಸಾಧನೆಗೆ ಎಲ್ಲಿದೆ ವಯಸ್ಸಿನ ಮಿತಿ..? ಕೆಲವರು 20ನೇ ವಯಸ್ಸಿನಲ್ಲಿ ಸಾಧನೆ ಮಾಡಿ ಹೆಸರು ಗಳಿಸಿರುತ್ತಾರೆ. ಆದರೆ 97 ರಲ್ಲಿಯೂ ಸಾಧನೆ ಮಾಡಿ ಅದೇ ಹುರುಪು, ಉತ್ಸಾಹದೊಂದಿಗೆ ತಮ್ಮ ಸಂಶೋಧನೆಯನ್ನು ಮತ್ತಷ್ಟು ಮುಂದುವರಿಸುವ ಭರವಸೆ ನೀಡಿ ಎಲ್ಲರಿಗೂ ಜೀವನ್ಮುಖಿಯಂತೆ ಭಾಸವಾಗಿದ್ದ ಈ ವ್ಯಕ್ತಿಯೇ "ಜಾನ್ ಬಿ ಗುಡ್‌ಎನಫ್‌".

ಇವರು ಮತ್ತೊಮ್ಮೆ ಸುದ್ದಿಯಾಗಿದ್ದರು. ಅದು 2022 ಜುಲೈ 25ರಂದು. ಏಕೆಂದರೆ, ಇವರು ಶತಾಯುಷಿಯಾಗಿದ್ದರು. ಸಂಶೋಧನೆಗಳಲ್ಲಿ ರಾಸಾಯನಿಕ ಪರೀಕ್ಷೆಗಳಿಗೆ, ವಿಕಿರಣಗಳಿಗೆ ಒಡ್ಡಿಕೊಳ್ಳುವ ಎಷ್ಟೋ ವಿಜ್ಞಾನಿಗಳು ಅಲ್ಪಾಯುಷಿಗಳು ಎನ್ನುವ ತಪ್ಪು ಕಲ್ಪನೆಯನ್ನು ತೊಡೆದು ಹಾಕಿ ತಮ್ಮ 100ನೇ ವರ್ಷದ ಗಡಿ ದಾಟಿದ್ದರು. ಇದೇ ವರ್ಷ ಜುಲೈ 25ಕ್ಕೆ ಇವರಿದ್ದಿದ್ದರೆ 101 ವರ್ಷ ತುಂಬುತ್ತಿತ್ತು. ಆದರೆ, ತಮ್ಮ ಅನಾರೋಗ್ಯದ ಕಾರಣದಿಂದ ಇವರು ಮೊನ್ನೆ ಅಂದರೆ 2023 ಜೂನ್ 25ರಂದು ನಿಧನ ಹೊಂದಿದರು. ಇವರು ಕೇವಲ ತಮ್ಮ ಸಾಧನೆಯಿಂದ ಮಾತ್ರವಲ್ಲ.. ತಮ್ಮ ಜೀವನದಲ್ಲಿ ಉಂಟಾದ ಸವಾಲುಗಳನ್ನು ಮೆಟ್ಟಿನಿಂತು ಮಾಡಿರುವ ಸಾಧನೆಯಿಂದ ಎಲ್ಲರಿಗೂ ಸ್ಫೂರ್ತಿಯಾಗಿದ್ದಾರೆ. ಇವರ ಜೀವನದ ಹಿನ್ನೋಟವನ್ನೊಮ್ಮೆ ನೋಡಿ ಬರೋಣ ಬನ್ನಿ. 

ಇವರು ಹುಟ್ಟಿದ್ದು ಜೇನ್ ಎನ್ನುವ ಜರ್ಮನಿಯ ಪಟ್ಟಣದಲ್ಲಿ. ಇವರ ತಂದೆ-ತಾಯಿ ಇಬ್ಬರು ಅಮೆರಿಕನ್ನರು. ತಂದೆಯ ಹೆಸರು ಎರ್ವಿನ್  ರಾಮ್ಸ್ಡೆಲ್ ಗುಡ್‌ಎನಫ್‌. ತಾಯಿ ಹೆಲೆನ್ ಮಿರಿಯಂ ಗುಡ್‌ಎನಫ್‌. ಆದರೆ, ನಂತರದ ದಿನಗಳಲ್ಲಿ ಇವರಿಬ್ಬರ ವಿಚ್ಛೇದನವಾಗುತ್ತದೆ. ಜಾನ್ ಹಾಗೂ ಅವರ ತಮ್ಮ 12 ವರ್ಷದ ನಂತರ ಬೆಳೆದದ್ದಲ್ಲವೂ ಬೋರ್ಡಿಂಗ್ ಸ್ಕೂಲಿನಲ್ಲಿ. ಜಾನ್ ಅವರ ತಂದೆ ಹಾರ್ವರ್ಡ್ ಡಿವೈನಿಟಿ ಸ್ಕೂಲ್ ನಲ್ಲಿ ಪಿ.ಎಚ್.ಡಿ ಮಾಡಿದ್ದರು. ನಂತರ ಯೇಲ್ ಯೂನಿವರ್ಸಿಟಿಯಲ್ಲಿ ಹಿಸ್ಟರಿ ಆಫ್ ರಿಲಿಜಿಯನ್ ಎನ್ನುವ ಸಬ್ಜೆಕ್ಟ್ ನ ಪ್ರೊಫೆಸರ್ ಆಗಿದ್ದರು. ಇವರು ಎರಡನೇ ವಿವಾಹವನ್ನು ಸಹಾ ಆಗಿದ್ದರು. ಅವರಿಗೆ ಇಬ್ಬರು ಹೆಣ್ಣು ಮಕ್ಕಳಿದ್ದರು. ಜಾನ್ ರಿಗೆ ತಮ್ಮ ತಾಯಿ ದೂರವೇ.. ತಂದೆಯ ಒಡನಾಟವೇ ಹೆಚ್ಚು. ಅವರು ಬೋರ್ಡಿಂಗ್ ಸ್ಕೂಲಿನಲ್ಲಿದ್ದಾಗ ತಂದೆ ಮೂರು ತಿಂಗಳಿಗೊಮ್ಮೆ ಪತ್ರ ಬರೆಯುತ್ತಿದ್ದರು. ಆದರೆ, ತಾಯಿ ಪತ್ರ ಬರೆದದ್ದು ಒಮ್ಮೆ ಮಾತ್ರ.

ಜಾನ್ ರಿಗೆ ಬಾಲ್ಯದಲ್ಲಿ ಒಂದು ಕಾಯಿಲೆ ಇತ್ತು. ಅದೇ ಡಿಸ್ಲೆಕ್ಸಿಕ್. ಹಾಗೆಂದರೆ, ಅವರಿಗೆ ಕಾಣುತ್ತಿದ್ದ ಪದಗಳಿಗೂ ಹಾಗೂ ಉಚ್ಚಾರಣೆಯಾಗುತ್ತಿದ್ದ ಪದಗಳಿಗೂ ಸಾಕಷ್ಟು ಬದಲಾವಣೆಗಳಿತ್ತು.  ಡಿಸ್ಲೆಕ್ಸಿಕ್ ನಿಂದ ಬಳಲುತ್ತಿರುವ ಎಷ್ಟೋ ಮಕ್ಕಳಿಗೆ ಈ ರೀತಿಯ ಸಮಸ್ಯೆಗಳಾಗುತ್ತವೆ. ಅವರು ಕಾಣುವ ಪದಗಳಿಗೂ ಉಚ್ಚರಿಸುವ ಪದಗಳಿಗೆ ಅಥವಾ ಸಂಖ್ಯೆಗಳಿಗೆ ವ್ಯತ್ಯಾಸವಿರುತ್ತದೆ. ಅಲ್ಲದೆ, ಎಷ್ಟೋ ಜನರಿಗೆ ಇದು ಬಣ್ಣದ ಗುರುತಿಸುವಿಕೆ ಹಾಗೂ ಅದನ್ನು ಹೇಳುವುದಕ್ಕೂ ಭಿನ್ನತೆ ಇರುತ್ತದೆ. ಇದರಿಂದಾಗಿ, ಕಲಿಕೆಯಲ್ಲಿ ಹಿನ್ನಡೆಯಾಗಲೂಬಹುದು. ಇದನ್ನು ಜಾನ್ ರವರ ಶಾಲೆಯಲ್ಲಿಯೇ ಗುರುತಿಸಿದ್ದರು. ನಿಯಮಿತವಾದ ವೈದ್ಯಕೀಯ ಚಿಕಿತ್ಸೆಯಿಂದ ಇದನ್ನು ಹಂತ ಹಂತವಾಗಿ ಗುಣಪಡಿಸಿಕೊಳ್ಳಬಹುದು. 

ಜಾನ್ ರವರು ಕೂಡ ಇದೇ ಸಮಸ್ಯೆಯಿಂದ ಬಳಲುತ್ತಿದ್ದರಿಂದ ಅವರು ಬಾಲ್ಯದಲ್ಲಿ ಹೆಚ್ಚಾಗಿ ಇಷ್ಟ ಪಟ್ಟದ್ದು ಸಂಖ್ಯೆಗಳನ್ನು ಎಂದರೆ ಗಣಿತವನ್ನು. ಹಾಗಾಗಿ, ಅವರು ಮೊದಲು ಬಿ.ಎಸ್ ಪದವಿ ಪಡೆದದ್ದು ಯೇಲ್ ಯೂನಿವರ್ಸಿಟಿಯಿಂದ. 1944 ರಲ್ಲಿ ಈ ಪದವಿ ಮುಗಿಸಿದ ಅವರಿಗೆ ಸುಮ್ಮ ಕಮ್ ಲಾಉಡ್ ಎಂದು ಲ್ಯಾಟಿನ್ ನಲ್ಲಿ ಕರೆಯಲಾಗುವ ಒಂದು ಪ್ರಶಸ್ತಿ ಕೂಡ ಕೊಡಲಾಗಿತ್ತು. ಇದು ಆ ತರಗತಿಯಲ್ಲಿ ಕೇವಲ 20% ಪ್ರತಿಭಾವಂತ ವಿದ್ಯಾರ್ಥಿಗಳಿಗೆ ಕೊಡಲಾಗುವ ಪ್ರಶಸ್ತಿ. 

ಅವರು ಯೇಲ್ ಯುನಿವರ್ಸಿಟಿಯಲ್ಲಿ ಪದವಿ ಪಡೆದುಕೊಳ್ಳುವ ಸಮಯದಲ್ಲಿ ಹಾಗೂ ಪದವಿ ಪಡೆದುಕೊಂಡ ನಂತರ.. ಯು.ಎಸ್ ನ ಮಿಲಿಟರಿಯಲ್ಲಿ ಸೇವೆ ಸಲ್ಲಿಸಿದ್ದರು. ಎರಡನೇ ವಿಶ್ವ ಯುದ್ಧದ ಸಂದರ್ಭದಲ್ಲಿ ಮಿಲಿಟರಿಯ ಮೆಟಿರಿಯಾಲಜಿಸ್ಟ್ ಆಗಿ ಕಾರ್ಯನಿರ್ವಹಿಸಿದ್ದರು. ಅದಾದ ನಂತರ, ಅವರು ಚಿಕಾಗೋ ಯೂನಿವರ್ಸಿಟಿಯಿಂದ ಭೌತಶಾಸ್ತ್ರದಲ್ಲಿ ಪಿ.ಎಚ್.ಡಿ ಪಡೆದರು. ನಂತರ, 1952 ರಲ್ಲಿ ತಮ್ಮ ಯುನಿವರ್ಸಿಟಿ ಆಫ್ ಚಿಕಾಗೋಗೆ ಹೋಗಿ ಅಲ್ಲಿ ಭೌತಶಾಸ್ತ್ರದಲ್ಲಿ ಪಿ.ಎಚ್.ಡಿ ಮಾಡುತ್ತಾರೆ.

ಆಗಿನಕಾಲದಲ್ಲಿ ಭೌತಶಾಸ್ತ್ರವೇನಿದ್ದರೂ ಮೊದಲ 20-30 ವರ್ಶಗಳಲ್ಲಿ ಓದಿ ಅರ್ಥೈಸಿಕೊಳ್ಳುವುದು ಎನ್ನುವಂತಹಾ ಅಭಿಪ್ರಾಯ ಗಟ್ಟಿಯಾಗಿತ್ತು. ಅಲ್ಲದೆ, ತಮ್ಮ ಸಹಪಾಠಿಗಳಿಗೆ ಹೋಲಿಸಿದರೆ, ಜಾನ್ ಹಿರಿಯರಾದ ಕಾರಣ ಭೌತಶಾಸ್ತ್ರ ಹೇಳಿಕೊಡುವ ಪ್ರೊಫೆಸರ್ ಅವರ ಕುರಿತು ತಮಾಷೆಯನ್ನೂ ಮಾಡುತ್ತಿರುತ್ತಾರೆ. “ ಈ ವಯಸ್ಸಿನಲ್ಲಿ ಭೌತಶಾಸ್ತ್ರ ಕಲಿಯುವುದೆಂದರೆ ಹೇಗೆ? ನಿಮ್ಮ ವಯಸ್ಸಿನವರು ಈಗಾಗಲೇ.. ಭೌತಶಾಸ್ತ್ರದಲ್ಲಿ ಸಾಧನೆ ಮಾಡಿಯಾಗಿರುತ್ತದಲ್ಲವೇ?” ಎಂದು ಹಾಸ್ಯ ಮಾಡುತ್ತಿದ್ದರಂತೆ. ಈ ಮಾತಿಗಳಿಗೂ ಎದೆಗುಂದದೆ, ಜಾನ್ ಸಂಶೋಧನೆ ಮುಗಿಸಿ ಪಿಎಚ್.ಡಿ ಪದವಿ ಪಡೆದರು. ಸಣ್ಣ-ಪುಟ್ಟ ಕುಹಕ-ಟೀಕೆಗಳಿಗೆ ಮನಸ್ಸು ಕುಗ್ಗಿಸಿಕೊಳ್ಳುವವರಿಗೆ ಜಾನ್ ದಾರಿದೀಪದಂತಿದ್ದಾರೆ.

ಅವರು ಚಿಕಾಗೋದಲ್ಲಿ ಓದುತ್ತಿದ್ದ ಈ ಸಂದರ್ಭದಲ್ಲಿಯೇ.. ತಮ್ಮ ಸಂಗಾತಿಯನ್ನು ಭೇಟಿಯಾಗಿದ್ದು. ಇವರ ಪತ್ನಿ ಐರಿನ್ ವೈಸ್ಮನ್ ಕೆನಡಾದ ಇತಿಹಾಸ ಶಾಸ್ತ್ರಜ್ಞೆಯಾಗಿದ್ದವರು. 1951 ರಲ್ಲಿ ಇವರ ಮದುವೆಯೂ ಆಗುತ್ತದೆ. ಐರಿನ್ ವೈಸ್ಮನ್ ಅವರು 2016ರಲ್ಲಿ ತೀರಿಕೊಳ್ಳುತ್ತಾರೆ. ಇದಾದ ನಂತರ ಇವರಿಗೆ ಮಕ್ಕಳಿಲ್ಲದ ಕಾರಣ.. ಟೆಕ್ಸಾಸ್ ವಿಶ್ವವಿದ್ಯಾಲಯವೇ ಸಹಾಯಕರನ್ನು ನೇಮಿಸಿ ಜಾನ್ ಅವರ ಯೋಗಕ್ಷೇಮವನ್ನು ನೋಡಿಕೊಳ್ಳುತ್ತಿದ್ದಾರೆ. 

ಭೌತಶಾಸ್ತ್ರದಲ್ಲಿ ಪಡೆದ ಪಿ.ಎಚ್.ಡಿ ಅವರಿಗೆ ಸಾಕಾಗಲಿಲ್ಲ. ನಂತರ, ಅವರು ರಿಸರ್ಚರ್ ಆಗಿ ಸೇವೆ ಸಲ್ಲಿಸಿದ್ದು ಎಂ.ಐ.ಟಿ ಯ ಲಿಂಕನ್ ಲ್ಯಾಬ್ ನಲ್ಲಿ. ಸುಮಾರು 24 ವರ್ಷ ಇಲ್ಲಿ ಸೇವೆ ಸಲ್ಲಿಸಿದರು. 

ಇವರು ಲಿಂಕನ್ ಲ್ಯಾಬ್ ನಲ್ಲಿ ಸೇವೆ ಸಲ್ಲಿಸುತ್ತಿರುವ ಸಂದರ್ಭದಲ್ಲಿ ತಮ್ಮ ಶಾಖೆಯಿಂದ ಬೇರೆ ಶಾಖೆಯ ಜೊತೆಗೆ ಹೊಂದಿಕೆಯಾಗುವಂತಹಾ ಮತ್ತೊಂದು ರಿಸರ್ಚ್ ನ ಪಾಲುದಾರರಾಗಿದ್ದರು. ಅದು ಇಂದಿನ ಕಂಪ್ಯೂಟರ್ ಗಳಲ್ಲಿ ಹಾಗೂ ಲ್ಯಾಪ್ಟಾಪ್ ಗಳಲ್ಲಿ ಉಪಯೋಗವಾಗುವ ರ‍್ಯಾಮ್ ಬಳಕೆ. ಎಂ-ರ‍್ಯಾಮ್ ಎಂದರೆ ರ‍್ಯಾಂಡಮ್ ಅಕ್ಸೆಸ್ ಮ್ಯಾಗ್ನೆಟಿಕಲ್ ಮೆಮೊರಿ. ರಾಂಡಮ್ ಆಕ್ಸಸ್ ಮೆಮೊರಿ ಎಂದರೆ ಅದು ತಾತ್ಕಾಲಿಕವಾದ ಮೆಮೊರಿ ಸ್ಟೋರೇಜ್. ಇಂದಿನ ಮೊಬೈಲ್ ಫೋನ್ಗಳಲ್ಲಿ, ಕಂಪ್ಯೂಟರ್ ಗಳಲ್ಲಿ, ಎಷ್ಟೋ ಮಿಲಿಟರಿ ಸೇವೆಗಳಲ್ಲಿ, ವಿಮಾನದ ಬ್ಲ್ಯಾಕ್ ಬಾಕ್ಸ್ ಗಳಲ್ಲಿ ಇದು ಉಪಯುಕ್ತವಾಗಿದೆ. ಈ ಎಂ -ರ‍್ಯಾಮ್ ನ ಆವಿಷ್ಕಾರದಲ್ಲಿಯೂ ಬಹಳ ಮಹತ್ವದ ಪಾತ್ರ ವಹಿಸಿದ್ದರು ಜಾನ್. ಅವರ ಭೌತಶಾಸ್ತ್ರದ ಆಯಸ್ಕಾಂತೀಯ ಶಕ್ತಿಯ ಜ್ಞಾನ ಇಲ್ಲಿ ಬಹಳ ಉಪಯುಕ್ತವಾಗಿತ್ತು. 

ನಂತರ, 1970-80 ರಲ್ಲಿ ಆಕ್ಸ್ಫರ್ಡ್ ಯುನಿವರ್ಸಿಟಿಯ ಇನ್-ಆರ್ಗಾನಿಕ್ ಕೆಮಿಸ್ಟ್ರಿ ಲ್ಯಾಬ್ ನಲ್ಲಿ ಕಾರ್ಯನಿರ್ವಹಿಸಿದ್ದರು. 1986 ರಿಂದ ಟೆಕ್ಸಾಸ್ ವಿಶ್ವವಿದ್ಯಾಲಯದಲ್ಲಿ ಪ್ರೊಫೆಸರ್ ಆಗಿದ್ದರು. ಮೆಕ್ಯಾನಿಕಲ್, ಮೆಟೀರಿಯಲ್ ಸೈನ್ಸ್, ಎಲೆಕ್ಟ್ರಿಕಲ್ ಇಂಜಿನಿಯರಿಂಗ್ ಇದೆಲ್ಲದರಲ್ಲೂ ಪರಿಣಿತರಾಗಿದ್ದ ಇವರು ತಮ್ಮ ಸಂಶೋಧನೆಯನ್ನು ಕೂಡಾ ಮುಂದುವರಿಸುತ್ತಿದ್ದರು. 

ಇವರಿಗೆ ನ್ಯಾಷನಲ್ ಮೆಡಲ್ ಆಫ್ ಸೈನ್ಸ್, ಕೊಪ್ಲಿ ಮೆಡಲ್, ಫರ್ಮಿ ಅವಾರ್ಡ್, ಡ್ರೇಫರ್ ಪ್ರಶಸ್ತಿ, ಜಪಾನ್ ಪ್ರಶಸ್ತಿ, ನೊಬೆಲ್ ಪ್ರಶಸ್ತಿ, ಐ.ಇ.ಇ.ಇ ಪ್ರಶಸ್ತಿಗಳು ಬಂದಿವೆ. ಅಷ್ಟೇ ಅಲ್ಲದೆ.. ಮೆಟೀರಿಯಲ್ ಸೈನ್ಸ್ ವಿಭಾಗದಲ್ಲಿ ಇವರ ಹೆಸರಿನಲ್ಲಿ "ಗುಡ್‌ಎನಫ್‌" ಎನ್ನುವ ಪ್ರಶಸ್ತಿ ಪ್ರದಾನ ಮಾಡಲಾಗುತ್ತದೆ.

ಲಿಥಿಯಂ-ಅಯಾನ್ ಬ್ಯಾಟರಿಗಳು ಇವರ ಪ್ರಮುಖ ಆವಿಷ್ಕಾರ. ಆದರೆ, ಈ ಲಿಥಿಯಂ-ಅಯಾನ್ ಬ್ಯಾಟರಿಗಳಿಗಿಂತ ಮುಂಚೆ ಇದಕ್ಕೆ ಪ್ರಯತ್ನ ನಡೆದಿತ್ತೇ..?? ಅಥವಾ ಇದಕ್ಕಿಂತ ಮುಂಚೆ ಇದ್ದ ಬ್ಯಾಟರಿಯ ಕಾರ್ಯ ನಿರ್ವಹಣೆ ಹೇಗಿತ್ತು..?? ಎನ್ನುವುದನ್ನು ನೋಡುವುದಾದರೆ 1965 ರಲ್ಲಿ ನಾಸಾದವರು ಈ ಪ್ರಯತ್ನ ಮಾಡಿದ್ದರು. 1974ರಲ್ಲಿ ಎಂ. ಸ್ಟ್ಯಾನ್ಲಿ ವಿಟ್ಟಿಂಗ್ ಹ್ಯಾಮ್ ಎನ್ನುವವರೂ ಈ ಕುರಿತ ಪ್ರಯತ್ನ ಮಾಡಿದ್ದರು ಆದರೆ ಇವೆರಡೂ ಸಂಪೂರ್ಣವಾಗಿ ಸಫಲವಾಗಿರಲಿಲ್ಲ.

1980 ರಲ್ಲಿ ಜಾನ್ ಲಿಥಿಯಂ-ಅಯಾನ್ ಬ್ಯಾಟರಿಗಳ ಕುರಿತ ಆವಿಷ್ಕಾರಕ್ಕೆ ಕೈಜೋಡಿಸುತ್ತಾರೆ. ಹಾಗೆಂದು, ಇದು ಸುಲಭದ ಆವಿಷ್ಕಾರವೇನೂ ಆಗಿರಲಿಲ್ಲ. ಇದರ ಎಲೆಕ್ಟ್ರೋಡ್ ಗಳು ಹೊಂದಾಣಿಕೆಯಾಗಬೇಕಿತ್ತು. ಕೊಂಚ ಏರುಪೇರಾದರೂ ಸಹಾ ಸ್ಪೋಟಗೊಳ್ಳುವಂತಹ ವಸ್ತುವೇ ಆಗಿಬಿಡುತ್ತಿತ್ತು. ಇದಲ್ಲದೆ.. ಇಂತಿಷ್ಟೇ ತಾಪಮಾನದಲ್ಲಿ ಈ ಕಣಗಳ ಒಳಗೊಳ್ಳುವಿಕೆ ಸಾಧ್ಯವಾಗಬೇಕಿತ್ತು. ಜಾನ್ ರ ಪ್ರಯತ್ನಕ್ಕೆ ಫಲ ಸಿಕ್ಕಿತ್ತು.

ಇದಾದ ನಂತರ 1987 ರಲ್ಲಿ ಅಕಿರಾ ಯೋಶಿನೋ ಎನ್ನುವ ವಿಜ್ಞಾನಿಯೊಬ್ಬರು ಯೋಶಿನೋಸ್ ಡಿಸೈನ್ ಎನ್ನುತ್ತಾ ಜಾನ್ ಕಂಡುಹಿಡಿದಿದ್ದ ಲಿಥಿಯಂ-ಅಯಾನ್ ಬ್ಯಾಟರಿಯನ್ನು ಕೊಂಚ ಮಾರ್ಪಡಿಸುತ್ತಾರೆ. ಏಕೆಂದರೆ, ಆ ಬ್ಯಾಟರಿ ಬೆಲೆ ಜನಸಾಮಾನ್ಯರಿಗೆ ಕೈಗೆಟುಕುವಂತಿರಲಿಲ್ಲ. 1980ರ ದಶಕದಲ್ಲಿ ಎಕ್ಸಾನ್ ಕಂಪೆನಿಯವರು ಇದನ್ನು ಕಮರ್ಷಿಯಲ್ ಆಗಿ ಮಾರ್ಪಡಿಸುವ ಯೋಚನೆಯನ್ನು ಹೊಂದಿದ್ದರು. ದರ ಹೆಚ್ಚಾಗಿದ್ದರಿಂದ ಸುಮ್ಮನಾಗಿದ್ದರು. 1991ರಲ್ಲಿ ಸೋನಿ ಕಂಪನಿಯವರು ಜಗತ್ತಿನ ಮೊದಲ ರಿಚಾರ್ಜೆಬಲ್ ಲಿಥಿಯಂ-ಅಯಾನ್ ಬ್ಯಾಟರಿಯನ್ನು ಬಳಸಿದರು. ಇದಾದ ನಂತರ ಈಗ ಎಲ್ಲೆಡೆ ಬಳಕೆಯಾಗುತ್ತಿದೆ. 

ಇದೇ ಕಾರಣಕ್ಕಾಗಿ 2012ರಲ್ಲಿ ಐ.ಇ.ಇ.ಇ ಮೆಡಲ್ ಹಾಗೂ 2019ರಲ್ಲಿ ಎಂ ಸ್ಟ್ಯಾನ್ಲಿ ವಿಟ್ಟಿಂಗ್ ಹ್ಯಾಮ್, ಅಕಿರಾ ಯೋಶಿನೋ ಹಾಗೂ ಜಾನ್ ಗುಡ್‌ಎನಫ್ ಮೂವರೂ ರಸಾಯನಶಾಸ್ತ್ರ ವಿಭಾಗದಲ್ಲಿ ನೊಬೆಲ್ ಪ್ರಶಸ್ತಿ ಪಡೆದುಕೊಂಡರು. ಸತತ ಏಳು ವರ್ಷಗಳ ಕಾಲ ಜಾನ್ ಗುಡ್ಎನಫ್ ಇವರ ಹೆಸರು ನೊಬೆಲ್ ಪ್ರಶಸ್ತಿಗಾಗಿ ಉಲ್ಲೇಖವಾಗುತ್ತಿತ್ತು. ಆದರೆ, ಈ ಪ್ರಶಸ್ತಿ ಇವರಿಗೆ ಒಲಿದು ಬಂದಾಗ ಅವರಿಗೆ 97 ವರ್ಷ. ಅವರದು ಎಂದಿಗೂ ದಣಿವರಿಯದ ಉತ್ಸಾಹ. 97ರ ವಯೋಮಾನದಲ್ಲೂ ಗಾಲಿ ಕುರ್ಚಿಯಲ್ಲಿ ಕುಳಿತೇ ನೊಬೆಲ್‌ ಪ್ರಶಸ್ತಿ ಪ್ರದಾನ ಸಮಾರಂಭಕ್ಕೆ ಬಂದು ಪ್ರಶಸ್ತಿ ಸ್ವೀಕರಿಸಿದ್ದರು.

“ಯುವಕರ ಆಸೆ ಎಂದಿಗೂ ಸಾಮಾನ್ಯವಾಗಿ ಪ್ರಸಿದ್ಧಿಯಾಗುವುದು ಅಥವಾ ಗ್ಲಾಮರಸ್‌ ಆಗಿರುವುದು ಅಥವಾ ಶಕ್ತಿಶಾಲಿಯಾಗಬೇಕೆಂದೇ ಇರುತ್ತದೆ. ಹಾಗೆಂದು ಎಲ್ಲರೂ.. ಸ್ವಲ್ಪ ಸಮಯಕ್ಕಾದರೂ ಸಹಾ “ಪರ್ವತದ ರಾಜ” (ಕಿಂಗ್ ಆಫ್ ಮೌಂಟೇನ್) ಆಗಲು ಸಾಧ್ಯವಿಲ್ಲ ಎಂಬುದನ್ನು ನಾನು ಅರಿತುಕೊಂಡೆ. ಆದ್ದರಿಂದ, ರಾಜನಾದರೇನು., ಜೀವನಕ್ಕೆ ಏನು ಅರ್ಥವಿದೆ? ಜೀವನದ ನಿಜವಾದ ಅರ್ಥವು ಯಾವುದೋ ಕೋಟೆಯ ರಾಜನಾಗುವುದಲ್ಲ, ಬದಲಾಗಿ ನಾವು ಸಲ್ಲಿಸುವ ಸೇವೆಯ ಮಹತ್ವ ಮತ್ತು ಶಾಶ್ವತತೆಯಲ್ಲಿದೆ ಎಂದು ನಾನು ತಿಳಿಯಲು ಪ್ರಾರಂಭಿಸಿದೆ”. 

ನೊಬೆಲ್ ಪ್ರಶಸ್ತಿ ಪಡೆದುಕೊಂಡಾಗ ಹೀಗೆ ಹೇಳಿರುವವರು 97 ವರ್ಷದ ಯುವಕ ಪ್ರೊ. ಜಾನ್‌ ಗುಡ್‌ಎನಫ್. ‌

ಲಿಥಿಯಂ-ಅಯಾನ್ ಬ್ಯಾಟರಿಯ ಮೂಲ ಫಾರ್ಮುಲಾ ಗೆ ಇವರು ಪೇಟೆಂಟ್ ಪಡೆದುಕೊಳ್ಳಲು ನಿರಾಕರಿಸಿದ್ದರು. ಏಕೆಂದರೆ, ಅವರಿಗೆ ಇದು ಇಷ್ಟು ಬೆಲೆಯುಳ್ಳದ್ದು ಎನ್ನುವ ಅರಿವಿರಲಿಲ್ಲ. ಆದರೆ, ಅದಾದ ನಂತರವೂ ಸಹಾ ಆ ಪೇಟೆಂಟನ್ನು ತಮ್ಮ ಹೆಸರಿಗೆ ಪಡೆದುಕೊಳ್ಳಲಿಲ್ಲ. ಇದಕ್ಕಾಗಿ ಅವರು ಯಾವ ರಾಯಧನವನ್ನೂ ಸ್ವೀಕರಿಸಲಿಲ್ಲ. ಬದಲಾಗಿ, ರಾಯಲ್ಟಿ ಹಣವನ್ನು ಯು.ಕೆಯ ರಿಸರ್ಚ್ ಇನ್ಸ್ಟಿಟ್ಯೂಟ್ ಗೆ ಹೋಗುವಂತೆ ಮಾಡುತ್ತಾರೆ. 

ಇವರು ಶತಾಯುಷಿಯಾದ ಸಂದರ್ಭದಲ್ಲಿಯೂ ಸಹಾ ಇವರು ಟೆಕ್ಸಾಸ್ ಯುನಿವರ್ಸಿಟಿಯಲ್ಲಿ, ತಮ್ಮ ಸಂಶೋಧನೆಯಲ್ಲಿ ತೊಡಗಿಕೊಂಡಿದ್ದರು. ತಾವು ಕಂಡುಹಿಡಿದಿದ್ದ ಬ್ಯಾಟರಿಯನ್ನು ಮತ್ತಷ್ಟು ಅಭಿವೃದ್ಧಿಗೊಳಿಸಿ, ಎಲೆಕ್ಟ್ರಿಕ್ ವಾಹನಗಳಲ್ಲಿ ಮತ್ತಷ್ಟು ಶಕ್ತಿ ತುಂಬುವ ಕೆಲಸದಲ್ಲಿ ನಿರತರಾಗಿದ್ದರು. ಪೆಟ್ರೋಲ್, ಡೀಸೆಲ್ ಹೀಗೆ ಮುಂತಾದ ಬೇಗನೆ ಮುಗಿದು ಹೋಗಬಹುದಾದ ಫಾಸಿಲ್ ಇಂಧನಗಳ ಮೇಲೆ ಇರುವ ಮನುಷ್ಯನ ಅವಲಂಬನೆಯನ್ನು ಕಡಿಮೆ ಮಾಡಿ, ಬೇರೆ ಹಾದಿಯನ್ನು ತೋರುವ ಯತ್ನದಲ್ಲಿದ್ದರು. 

ಇವರು 2008ರಲ್ಲಿ ತಮ್ಮ ಆತ್ಮ ಚರಿತ್ರೆಯನ್ನು ಬರೆದಿದ್ದಾರೆ.ಅದರ ಹೆಸರು "ವಿಟ್ನೆಸ್ ಟು ಗ್ರೇಸ್" ಎಂಬುದಾಗಿ. ಇದು ವಿಜ್ಞಾನ ಹಾಗೂ ಆಧ್ಯಾತ್ಮಿಕ ನಂಬಿಕೆಗಳನ್ನು ಒಳಗೊಂಡಿರುವ ಪುಸ್ತಕ. ಇದರಲ್ಲಿ ತಮ್ಮ ವೈಯಕ್ತಿಕ ಜೀವನಕ್ಕಿಂತ ಹೆಚ್ಚಾಗಿ, ತಮ್ಮ ವೈಜ್ಞಾನಿಕ ಸಾಧನೆಗಳು ಹಾಗೂ ಆಧ್ಯಾತ್ಮಕ್ಕೂ ಇರುವ ಇಂಟರ್ಸೆಕ್ಷನ್ ಕುರಿತಾಗಿ ಹೇಳಿದ್ದಾರೆ. 85 ಪುಟಗಳ ಪುಸ್ತಕವನ್ನು ಆಸಕ್ತರು ಓದಬಹುದಾಗಿದೆ. 

ಸಾಧಕರು ಹೀಗೆಯೇ ನಮ್ಮ ಮಧ್ಯದಲ್ಲಿಯೇ ಇರುತ್ತಾರೆ. ಆದರೆ, ಅವರ ಸಾಧನೆ ಸದ್ದು ಮಾಡಿದ್ದರೂ.. ಬಹುಶಃ ಅವರ ಮರಣದವರೆಗೂ ನಮಗೆ ಆ ಕುರಿತು ಹೆಚ್ಚಾಗಿ ತಿಳಿಯದೇ ಹೋಗಬಹುದು. ಅವರ ಸಾಧನೆಗಳಂತೂ ನಮ್ಮ ಜೀವನದಲ್ಲಿ ಹಾಸು ಹೊಕ್ಕಾಗಿರುತ್ತವೆ.

~ವಿಭಾ ವಿಶ್ವನಾಥ್

ಮಹಿಳಾ ಆ್ಯಂಕರಿಂಗ್ ಟ್ರೆಂಡ್ ಸೆಟ್ಟರ್ ನ್ಯೂಸ್ ವುಮೆನ್ ಬಾರ್ಬರಾ ವಾಲ್ಟರ್ಸ್

ಇವತ್ತಿನ ಮಾಧ್ಯಮ ಜಗತ್ತಿನಲ್ಲಿ ಆ್ಯಂಕರಿಂಗ್ ಗೆ ಒಂದು ವಿಶೇಷವಾದ ಸ್ಥಾನವಿದೆ. ಸ್ಟೇಜ್ ಕಾರ್ಯಕ್ರಮಗಳ ನಿರೂಪಣೆಗೂ, ರೇಡಿಯೋ ಕಾರ್ಯಕ್ರಮಗಳ ನಿರೂಪಣೆಗೂ, ಟಿ.ವಿ ಕಾರ್ಯಕ್ರಮಗಳ ನಿರೂಪಣೆಗೂ ಬಹಳವೇ ವ್ಯತ್ಯಾಸವಿದೆ. ಅದರಲ್ಲೂ ಸಂದರ್ಶಕರಾಗಿ ಹಾಗೂ ಪ್ಯಾನೆಲ್ ಡಿಸ್ಕಶನ್ ಗೆ ಒಂದು ಬೇರೆಯದ್ದೇ ತೂಕ. ಸೌಂದರ್ಯ, ಮಾತು, ಪ್ರಸೆಂಟೇಶನ್, ಸಮಯಕ್ಕೆ ಸರಿಯಾಗಿ ಮಾತನಾಡುವ ಚಾತುರ್ಯ, ವರ್ತಮಾನದ ಅರಿವು, ಮುಂದೆ ಕುಳಿತಿರುವವರ ಘನತೆ ಇದೆಲ್ಲದರ ಜೊತೆಗೆ ಕಾನ್ಫಿಡೆನ್ಸ್ ಎನ್ನುವುದು ಮಿಳಿತವಾದರೆ ಅವರು ಮೀಡಿಯಾದ ಸ್ಟಾರ್ ಆ್ಯಂಕರ್ ಆಗುವುದರಲ್ಲಿ ಸಂದೇಹವೇ ಇಲ್ಲ. ಸುದ್ದಿ ಪ್ರಪಂಚದಲ್ಲಿ ಪುರುಷರದ್ದೇ ಪ್ರಾಬಲ್ಯವಿದ್ದಾಗ ಜಗತ್ತಿನ ಪ್ರಥಮ ಮಹಿಳಾ ಹೋಸ್ಟ್ ಆಗಿ ಟ್ರೆಂಡ್ ಸೆಟ್ ಮಾಡಿ ಐದು ದಶಕಗಳು ತನ್ನದೇ ಛಾಪು ಮೂಡಿಸಿದ್ದೇ ಬಾರ್ಬರಾ ವಾಲ್ಟರ್ಸ್. ಆ ಕಾಲದಲ್ಲಿಯೇ ಅತಿ ಹೆಚ್ಚು ಸಂಭಾವನೆ ಎಂದರೆ ವರ್ಷಕ್ಕೆ ಒಂದು ಮಿಲಿಯನ್ ಡಾಲರ್ ಸಂಭಾವನೆ ಪಡೆದು ಎಲ್ಲರಿಗೂ ಅಚ್ಚರಿ ಮೂಡಿಸಿದ್ದ ಗಣ್ಯಾತಿಗಣ್ಯರು ಎಂಬುದನ್ನೂ ಲೆಕ್ಕಕ್ಕಿಡದೆ ಪಾಯಿಂಟ್ ಬ್ಲ್ಯಾನ್ಕ್ ಪ್ರಶ್ನೆಗಳನ್ನು ಕೇಳುತ್ತಾ ಒಂದೊಮ್ಮೆ ಎದುರಿಗಿರುವವರನ್ನೂ ಮೌನ ವಹಿಸುವಂತೆ ಮಾಡುತ್ತಿದ್ದವರೇ ಬಾರ್ಬರಾ ಜಿಲ್ ವಾಲ್ಟರ್ಸ್. ಅಷ್ಟೇ ಅಲ್ಲ, ಅಂತಹಾ ಪ್ರಶ್ನೆ ಮಾಡಿದಕ್ಕೆ ಆಕೆ ಯಾವತ್ತೂ ಕ್ಷಮೆ ಯಾಚಿಸಿದ್ದೂ ಇಲ್ಲ. 

ಯು.ಎಸ್ ನ ಬಾರ್ಬರಾ 2022 ಡಿಸೆಂಬರ್ 22 ರಂದು ತಮ್ಮ 93  ನೇ ವಯಸ್ಸಿನಲ್ಲಿ ಕೊನೆಯುಸಿರೆಳೆದಿದ್ದಾರೆ. 1929 ರಲ್ಲಿ ಯು.ಎಸ್ ನ ಬೋಸ್ಟನ್ ನಲ್ಲಿ ಹುಟ್ಟಿದ ಬಾರ್ಬರಾ ಎಂಟರ್ಟೈನ್ ಮೆಂಟ್ ಜಗತ್ತಿನ ಶೋ ಬ್ಯುಸಿನೆಸ್ ಬುಕ್ಕಿಂಗ್ ಏಜೆಂಟ್ ಹಾಗೂ ನೈಟ್ ಕ್ಲಬ್ ಓನರ್ ಲೂಯಿಸ್ ವಾಲ್ಟರ್ ಹಾಗೂ ದೇನಾ ರ ಮಗಳು. ಮುಂದೆ ಬಾರ್ಬರಾ ಗೆದ್ದದ್ದು 12 ಎಮ್ಮಿ ಅವಾರ್ಡ್ ಗಳನ್ನು. 1953 ರಲ್ಲಿ ನ್ಯೂಯಾರ್ಕ್ ನ ಸಾರಾ ಲಾರೆನ್ಸ್ ಕಾಲೇಜಿನಲ್ಲಿ ಡಿಗ್ರಿ ಮುಗಿಸಿದ ಈಕೆಯ ಜರ್ನಲಿಸಂ ಕೆರಿಯರ್ ಮೊದಲು ಶುರುವಾಗಿದ್ದು 1961 ರಲ್ಲಿ ಎನ್. ಬಿ. ಸಿ ( ನ್ಯಾಷನಲ್ ಬ್ರಾಡ್ ಕಾಸ್ಟಿಂಗ್ ಕಂಪನಿಯಲ್ಲಿ) ರಿಪೋರ್ಟರ್ ಆಗಿ, ಪ್ಯಾನೆಲ್ ಮೆಂಬರ್ ಆಗಿ, ಮಹಿಳೆಯರ ಆಸಕ್ತಿಕರ ಕತೆಗಳ ಶೋ ಗೆ ಸೆಗ್ ಮೆಂಟ್ ಪ್ರೊಡ್ಯೂಸರ್ ಆದ ಬಳಿಕ 1964 ರಲ್ಲಿ "ಟು ಡೇ ಗರ್ಲ್" ಎನ್ನುವ ಶೋ ನಲ್ಲಿ ಆಕರ್ಷಕವಾಗಿ ಪುಟ್ಟ ಮಾತುಗಳು ಹಾಗೂ ಜಾಹೀರಾತುಗಳನ್ನು ಓದಲು ತೊಡಗಿದರು. ನಂತರದ ದಿನಗಳಲ್ಲಿ ತಮ್ಮ ಕೆರಿಯರ್ ನಲ್ಲಿ ಪುಟ್ಟ ಪುಟ್ಟ ಮೆಟ್ಟಿಲುಗಳನ್ನು ಹತ್ತುವಂತೆ ಎನ್.ಬಿ.ಸಿ ಯಲ್ಲಿಯೇ ಬೆಳಿಗ್ಗೆ ಪ್ರಸಾರವಾಗುತ್ತಿದ್ದ ಯು.ಎಸ್ ನ್ಯೂಸ್ ಪ್ರೋಗ್ರಾಮ್ 'ಟು - ಡೇ' ನಲ್ಲಿ ಮೊದಲಿಗೆ ಕಮೆಂಟೇಟರ್ ಆಗಿ ನಂತರದಲ್ಲಿ ನ್ಯೂಸ್ ರೀಡರ್ ಆಗಿ ಮೊದಲ ಮಹಿಳಾ ಕೋ - ಹೋಸ್ಟ್ ಆಗಿ 1974 ರಿಂದ ಕಾರ್ಯ ನಿರ್ವಹಿಸಿದರು. ಕೇವಲ ಪುರುಷರೇ ಹೋಸ್ಟ್ ಮಾಡುತ್ತಿದ್ದ ಶೋ ಗೆ ಕೋ- ಹೋಸ್ಟ್ ಆಗಿ ಎಲ್ಲರ ನಿಲುವನ್ನೂ ಬದಲಿಸಿ ಟ್ರೆಂಡ್ ಸೆಟ್ಟರ್ ಆದರು. ಆಕೆಯ ಬುದ್ಧಿವಂತಿಕೆ ಮತ್ತು ಕ್ಯಾಮೆರಾ ಪ್ರೆಸೆನ್ಸ್  ಜೊತೆಗೆ ಆಕೆ ತನ್ನ ಮುಂದಿನ ಕಾರ್ಯಕ್ರಮಗಳಿಗೆ ಮಾಡಿಕೊಳ್ಳುತ್ತಿದ್ದ ಸಿದ್ಧತೆ ಎಲ್ಲದರಿಂದ ಆಕೆಗೆ ಖ್ಯಾತಿ ದೊರೆತು ಆಕೆಯನ್ನು ಉನ್ನತ ಸ್ಥಾನದಲ್ಲಿ ನಿಲ್ಲುವಂತೆ ಮಾಡಿತು. ಇದರ ಮರುವರ್ಷವೇ ಆಕೆಗೆ ಮೊದಲ ಎಮ್ಮಿ ಅವಾರ್ಡ್ ದೊರೆತದ್ದು. 

 ಯು.ಎಸ್ ನ ಮೊದಲ ಮಹಿಳಾ ನೆಟ್ವರ್ಕ್ ನ್ಯೂಸ್ ಆ್ಯಂಕರ್ ಆಗಿ ಸೇರಿದ್ದು ಎ.ಬಿ.ಸಿ ನ್ಯೂಸ್ ಅನ್ನು. 1976 ರಲ್ಲಿ ಅಲ್ಲಿ ತಮ್ಮ ಕೆರಿಯರ್ ಶುರು ಮಾಡಿದಾಗ ಆಗಿನ ಯು.ಎಸ್ ಪ್ರೆಸಿಡೆಂಟ್ ಆಗಿದ್ದ ರಿಚರ್ಡ್ ನಿಕ್ಸನ್ ನಿಂದ ಈಗಿನ ಪ್ರೆಸಿಡೆಂಟ್ ಡೊನಾಲ್ಡ್ ಟ್ರಂಪ್ ವರೆಗೂ ಎಲ್ಲರನ್ನೂ ಸಂದರ್ಶನ ಮಾಡಿದ್ದಾರೆ. ಇಷ್ಟೇ ಅಲ್ಲ ಈ ಪಟ್ಟಿಯನ್ನು ನೋಡುತ್ತಾ ಹೋದರೆ ದೊಡ್ಡ ಪಟ್ಟಿಯೇ ಇದೆ. ಯು.ಕೆ ಯ ಪ್ರಧಾನಿ ಮಾರ್ಗರೇಟ್ ಥ್ಯಾಚರ್, ರಷ್ಯಾದ ಪ್ರೆಸಿಡೆಂಟ್ ವ್ಲ್ಯಾದಿಮಿರ್ ಪುಟಿನ್, ಕ್ಯೂಬಾದ ಸರ್ವಾಧಿಕಾರಿ ಎಂದೇ ಹೆಸರಾಗಿದ್ದ ಫಿಡೆಲ್ ಕ್ಯಾಸ್ಟ್ರೊ, ಈಜಿಪ್ಟ್ ನ ಪ್ರೆಸಿಡೆಂಟ್ ಅನ್ವರ್ ಸಾದತ್, ಇಸ್ರೇಲ್ ನ ಪ್ರಧಾನಿ ಮೆನಾಚೆಂ, ಜೊತೆಗೆ ಹಲವಾರು ಪಾಪ್ ಸ್ಟಾರ್, ರಾಕ್ ಸ್ಟಾರ್ ಗಳ ಹೆಸರು ಕಾಣುತ್ತದೆ. ಎ.ಬಿ.ಸಿ ನೆಟ್ವರ್ಕ್ ನಲ್ಲಿ ಆಕೆಯ ಶೋ ಗಳಾದ 'ದಿ ಬಾರ್ಬರಾ ವಾಲ್ಟರ್ಸ್ ಸ್ಪೆಶಲ್ಸ್' ಮತ್ತು '10 ಮೋಸ್ಟ್ ಫ್ಯಾಸಿನೇಟಿಂಗ್ ಪೀಪಲ್' ಕೂಡಾ ಪ್ರಸಿದ್ಧಿ ಪಡೆದಿದ್ದ ಶೋ ಗಳು. 1984 ರ ಎ.ಬಿ.ಸಿ ಮ್ಯಾಗಜಿನ್ ನ '20/20' ಕೂಡಾ ಈಕೆಯ ಸೂಪರ್ ಹಿಟ್ ಶೋ.

ಹೀಗೆ ಮೀಡಿಯಾ ಸೂಪರ್ ಸ್ಟಾರ್ ಆದ ಆಕೆಯ ವೇತನ ಒಂದು ಮಿಲಿಯನ್ ಡಾಲರ್. ಹಾಗೆಂದು, ಈಕೆಗೆ ಕೆರಿಯರ್ ಸುಲಭದ ಹಾದಿಯೇನೂ ಆಗಿರಲಿಲ್ಲ. ಎ.ಬಿ.ಸಿ ನ್ಯೂಸ್ ನಲ್ಲಿಯೇ ಎಷ್ಟೋ ಪೈಪೋಟಿ ಇತ್ತು. ಆದರೆ, ಆಕೆಯ ಸಂದರ್ಶನದ ಶೈಲಿಯಲ್ಲಿ ಪ್ರಶ್ನೆಗಳು ನೇರಾನೇರವಾಗಿದ್ದರೂ ಕುತೂಹಲ ಕೆರಳಿಸುವಂತೆ ಹಾಗೂ ಹಿಂದಿನ ಮತ್ತು ಆಗಿನ ಬದುಕನ್ನು ಮಿಳಿತಗೊಳಿಸಿ ನೋಡುಗರು ಹಾಗೂ ಕೇಳುಗರನ್ನು ಹಿಡಿದಿಟ್ಟುಕೊಳ್ಳುವಂತಿರುತ್ತಿದ್ದವು

ನಂತರದ ದಿನಗಳಲ್ಲಿ ಒಂದೋ ನ್ಯೂಸ್ ಚಾನೆಲ್ ನಲ್ಲಿ ಜಾಗತಿಕ ನಾಯಕರ ಜೊತೆಯ ಚರ್ಚೆ ಅಥವಾ ಸೆಲೆಬ್ರಿಟಿಗಳ ಜೊತೆಗೆ ಆಕೆಯ ರೆಗ್ಯುಲರ್ ಶೋ 'ಬಾರ್ಬರಾ ವಾಲ್ಟರ್ಸ್ ಸ್ಪೆಷಲ್ಸ್' ಅಥವಾ ಲೇಟೆಸ್ಟ್ ಹೆಡ್ ಲೈನ್ ಗಳ ಕುರಿತ ಡೇ ಟೈಮ್ ಶೋ 'ದಿ ವ್ಯೂವ್' ನಲ್ಲಿ ಪ್ಯಾನೆಲ್ ಡಿಸ್ಕಶನ್ ಗಳಲ್ಲಿ ಬಾರ್ಬರಾ ಹೆಸರು ಇದ್ದೇ ಇರುತ್ತಿತ್ತು. ಈಕೆಯ 'ದಿ ವ್ಯೂವ್' ಶೋ ಅನ್ನು ನಕಲು ಮಾಡುವಂತೆ ಅಮೆರಿಕನ್ ಟಾಕ್ ಶೋಗಳಾಗಿ 'ದಿ ಟಾಕ್' ಮತ್ತು 'ದಿ ಚ್ಯೂ' ಶುರುವಾದರೆ ಬ್ರಿಟನ್ ನಲ್ಲಿ 'ಲೂಸ್ ವುಮೆನ್' ಹಾಗೂ ನಾರ್ವೆಯಲ್ಲಿ 'ಸ್ಟುಡಿಯೋ 5' ಗಳು ಶುರುವಾದವು. 

2014 ರಲ್ಲಿ ಆಕೆ ತನ್ನ 52 ವರ್ಷದ ವೃತ್ತಿ ಜೀವನದಿಂದ ನಿವೃತ್ತಿ ಹೊಂದಿದರು. ಆಕೆ ಕಾಣಿಸಿಕೊಂಡ ಕೊನೆಯ ಡೇ ಟೈಮ್ ಶೋ 'ದ ವ್ಯೂವ್'. ಹಾಗೆ ತನ್ನ ಫುಲ್ ಟೈಮ್ ಜಾಬ್ ನಿಂದ 2014 ರಲ್ಲಿ ಆಕೆ ನಿವೃತ್ತಿ ಘೋಷಿಸಿದರೂ 'ದಿ ವ್ಯೂವ್' ಶೋ ನಲ್ಲಿ ಪಾರ್ಟ್ ಟೈಮ್ ನಲ್ಲಿ ಮತ್ತೆರಡು ವರ್ಷ ಕೆಲಸ ಮುಂದುವರಿಸಿದರು. 

ಆಕೆ ತನ್ನ ನಿವೃತ್ತಿಯ ಸಮಯದಲ್ಲಿ "50 ವರ್ಷದ ನಿಮ್ಮ ವೃತ್ತಿಗೆ ನೀವು ಹೇಗೆ ನಿವೃತ್ತಿ ಹೇಳುತ್ತೀರಿ" ಎಂದಾಗ ಆಕೆಯ ಉತ್ತರದಲ್ಲಿ ಒಂದು ಸಾರ್ಥಕತೆ, ತೃಪ್ತಿ ಇತ್ತು. " ತಾನು ಅಂದುಕೊಂಡೇ ಇಲ್ಲದ ಜೀವನ ಸಿಕ್ಕಿದೆ. ನಾನು ಎಲ್ಲವನ್ನೂ ಇಷ್ಟ ಪಟ್ಟರೂ.. ಮನಸ್ಸಿನಲ್ಲಿ ನಾನು ಇನ್ನೂ ಒಳ್ಳೆಯ ಕೆಲಸ ನಿರ್ವಹಿಸುತ್ತಿದ್ದೇನೆ ಎನ್ನುವಂತೆಯೇ ನಾನು ಇಲ್ಲಿಂದ ಹೊರ ನಡೆಯಬೇಕು ಎಂದುಕೊಂಡಿದ್ದೇನೆ. ಅಷ್ಟೇ ಅಲ್ಲ.. ಇಲ್ಲಿನ ಯುವ ಮಹಿಳಾ ನ್ಯೂಸ್ ಮೇಕರ್ಸ್ ಹಾಗೂ ರಿಪೋರ್ಟರ್ ಗಳನ್ನು ನೋಡಿದಾಗ ಈ ಪರಂಪರೆಯನ್ನು ಬೆಳೆಸಿದ್ದಕ್ಕೆ ಹಾಗೂ ನೋಡುತ್ತಿರುವುದಕ್ಕೆ ಬಹಳ ಖುಷಿಯಿದೆ." ಎನ್ನುತ್ತಾರೆ. ಈಕೆಯ ಮೇಲಿನ ಗೌರವಕ್ಕಾಗಿ ಮೇ 2014 ರಲ್ಲಿ ಎ.ಬಿ.ಸಿ ಯ ನ್ಯೂಯಾರ್ಕ್ ಹೆಡ್ ಕ್ವಾರ್ಟರ್ ಗೆ 'ಬಾರ್ಬರಾ ವಾಲ್ಟರ್ಸ್ ಬ್ಯುಲ್ಡಿಂಗ್' ಎಂದು ಮರು ನಾಮಕರಣ ಮಾಡಲಾಗಿದೆ.

ಬಾರ್ಬರಾ ವಾಲ್ಟರ್ಸ್ ಕುರಿತು ಹೆಚ್ಚಿನ ಓದಿಗಾಗಿ 2008 ರಲ್ಲಿ ಬಿಡುಗಡೆಯಾಗಿರುವ ಆಕೆಯ ಆತ್ಮಕತೆ 'ಅಡಿಷನ್' ಅನ್ನು ಓದಬಹುದಾಗಿದೆ. ಆಕೆಯ ಆತ್ಮಕತೆಗೆ ಅಡಿಷನ್ ಎಂಬ ಹೆಸರೇ ಏಕೆ ? ಎಂದು ಕೇಳುವುದಾದರೆ ಆಕೆ ತನ್ನನ್ನು ತಾನು ಪದೇ ಪದೇ ನಿರೂಪಿಸಿಕೊಳ್ಳಬೇಕಿತ್ತು. ಇಲ್ಲಿ ಕೇವಲ ಆಕೆಯ ವೃತ್ತಿ ಬದುಕಿನ ಚಿತ್ರಣವಲ್ಲದೆ, ವೈಯಕ್ತಿಕ ಬದುಕಿನ ಕಥನವೂ ಕೂಡಿದೆ. 

ಇಂಟರ್ನೆಟ್ ನ್ಯೂಸ್, ಬ್ಲಾಗ್, ವ್ಲೋಗ್, ಮೊಬೈಲ್ ವಿಡಿಯೋಗಳ ಕಾಲದಲ್ಲಿಯೂ ಬಾರ್ಬರಾ ವಾಲ್ಟರ್ಸ್ ನ ಜರ್ನಲಿಸಂನ ಗುರುತು ಅಳಿಸಲಾಗದ ಗುರುತೇ. ಕೇವಲ ಮಹಿಳಾ ಜರ್ನಲಿಸಂ ಮಾತ್ರವಲ್ಲ.. ಜರ್ನಲಿಸಂ ಕ್ಷೇತ್ರದಲ್ಲಿ ಸದಾ ನೆನಪಿಟ್ಟುಕೊಳ್ಳಬೇಕಾದ ಹೆಸರು 'ಬಾರ್ಬರಾ ಜಿಲ್ ವಾಲ್ಟರ್ಸ್'.

~ವಿಭಾ ವಿಶ್ವನಾಥ್

ಎಲ್ಲಿ ಹೋದವು 2000 ರೂಪಾಯಿ ನೋಟುಗಳು ?

2000 ರೂಪಾಯಿಯ ಪಿಂಕ್ ಬಣ್ಣದ ನೋಟುಗಳನ್ನು ಮೊದಲು  ಕಂಡಾಗ, ಕೈಯ್ಯಲ್ಲಿ ಹಿಡಿದಾಗ ಹೊಸದೇನನ್ನೋ.. ಬೆಳೆಬಾಳುವಂತಹದ್ದೇನನ್ನೋ ಕೈಯ್ಯಲ್ಲಿ ಹಿಡಿದಂತೆ. ಭಾರತದಲ್ಲಿ ಮೊದಲ ಬಾರಿಗೆ ಅಷ್ಟು ಮುಖಬೆಲೆಯ ನೋಟು ನೋಡಿದ್ದು ಎಂದು ಒಂದು ಕಾರಣವಾದರೆ , ಪಿಂಕ್ ಬಣ್ಣದ ನೋಟು ಸಹಾ ಮನಸೆಳೆದಿತ್ತು. ಹೀಗೆ 2000 ನೋಟು ಚಲಾವಣೆಗೆ ಬಂದದ್ದು 2016 ರ ನವೆಂಬರ್ 8 ರಿಂದ. ಆಗ 500 ಹಾಗೂ 1000 ರೂಪಾಯಿ ಮುಖಬೆಲೆಯ ನೋಟುಗಳ ಡಿ-ಮಾನಿಟೈಸೇಷನ್ ಅನ್ನು ಸರಿದೂಗಿಸುವ ಸಲುವಾಗಿ ಬಂದ 2000 ರೂಪಾಯಿ ನೋಟುಗಳು ಈಗ ಎಲ್ಲಿವೆ ? ಇತ್ತೀಚೆಗೆ ಕಾಣುತ್ತಿಲ್ಲವಾದ ಆ ನೋಟುಗಳ ಆಯುಷ್ಯ ಅಷ್ಟೆಯೇ ? ಕೇವಲ ಆ ಡಿ-ಮಾನಿಟೈಸೇಷನ್ ಅನ್ನು ಸರಿದೂಗಿಸಲು ಮಾತ್ರ ಈ ನೋಟುಗಳು ಚಲಾವಣೆಗೆ ಬಂದವಾ..?? ಈ ಪ್ರಶ್ನೆ ನಿಮಗೂ ಕಾಡುತ್ತಿದೆಯೇ ? ಇಂದು ಬ್ಯಾಂಕ್ ಗೆ ಹಣ ಡ್ರಾ ಮಾಡಲು ಹೋದರೆ ಅಥವಾ ಎ.ಟಿ.ಎಂ ಗೆ ಹೋದರೆ ನಿಮಗೆ 2000 ರೂಪಾಯಿಯ ನೋಟಿಗಳ ಬದಲಾಗಿ 500 ರೂಪಾಯಿಯ ನೋಟುಗಳೇ ಹೆಚ್ಚಾಗಿವೆಯಲ್ಲಾ.. ಇದಕ್ಕೆ ಕಾರಣವಾದರೂ ಏನು ? 2000 ರೂಪಾಯಿಗಳೆಲ್ಲವೂ ಕಾಣೆಯಾಗಿವೆ ಎಂಬುದು ಇದರ ಅರ್ಥವಲ್ಲ. ಬದಲಾಗಿ, ಅಪರೂಪಕ್ಕೆ ಅಲ್ಲೊಂದು ಇಲ್ಲೊಂದು ಕಾಣಸಿಗಬಹುದು. ಅವುಗಳ ಚಲಾವಣೆಯ ಪ್ರಮಾಣ ಗಣನೀಯವಾಗಿ ಇಳಿಕೆಯಾಗಿದೆ. ಹಾಗಾದರೆ, ಬ್ಯಾಂಕ್ ಗೆ ಬಂದ 2000 ನೋಟುಗಳೇನಾದರೂ ಮತ್ತೆ ಚಲಾವಣೆಗೆ ಹೋಗುತ್ತಿಲ್ಲವಾ.. ಹೇಗೆ ? ಅಥವಾ 2023 ರಿಂದ 2000 ರೂಪಾಯಿಯ ಹೊಸ ಮುದ್ರಣದ ಸೀರೀಸ್ ಏನಾದರೂ ಮುದ್ರಣಗೊಂಡು ಚಲಾವಣೆಗೆ ಬರಲಿದೆಯಾ..?? ಹೀಗೆ 2000 ರೂಪಾಯಿಯ ನೋಟಿನ ಕುರಿತು ಸುಮಾರು ಅನುಮಾನಗಳು ಸೃಷ್ಟಿಯಾಗಿವೆ. 

ಈ ಪ್ರಶ್ನೆಗಳಿಗೆಲ್ಲಾ ಉತ್ತರ ಸಿಗಬಹುದೇ ? ಯಾಕಿಲ್ಲ. ಆದರೆ , ಆ ಸಿಕ್ಕ ಉತ್ತರ ಎಷ್ಟು ಸಮರ್ಪಕ ಎನ್ನುವುದನ್ನು ನೀವೇ ನಿರ್ಧರಿಸಿ. ಆರ್.ಟಿ.ಐ ಎಂದರೆ ಮಾಹಿತಿ ಹಕ್ಕು ಕಾಯ್ದೆಯ ಅಡಿಯಲ್ಲಿ ಎ.ಐ.ಎನ್.ಎಸ್ ಇದೇ ಪ್ರಶ್ನೆ ಕೇಳಿತ್ತು. ಮತ್ತು ಆರ್.ಟಿ.ಐ ಮೂಲಕ ಇದಕ್ಕೆ ಉತ್ತರ ಕೂಡಾ ದೊರೆತಿದೆ. ಅದನ್ನು ತಿಳಿಯುವ ಮುನ್ನ 2016 ರಿಂದ 2000 ರೂಪಾಯಿ ನೋಟುಗಳು ಎಷ್ಟಿದ್ದವು ಎಂಬುದನ್ನು ತಿಳಿಯೋಣ. 

ಮೊದಲಿಗೆ 2016-17 ನೇ ವರ್ಷದಲ್ಲಿ 3,542.991 ಮಿಲಿಯನ್ ಗಳಷ್ಟು ನೋಟು ಮುದ್ರಣವಾಗಿದ್ದರೆ, 2017-18 ರಲ್ಲಿ ಇದಕ್ಕಿಂತ ಕಡಿಮೆ ಅಂದರೆ 111.507 ಮಿಲಿಯನ್ ನೋಟು ಮುದ್ರಣವಾಗಿವೆ. ಅದರ ನಂತರದ ವರ್ಷದಲ್ಲಿ ಅಂದರೆ 2018-19 ರ ವರ್ಷದಲ್ಲಿ 46. 690 ಮಿಲಿಯನ್ ನೋಟುಗಳು ಮುದ್ರಣವಾಗಿವೆ. ಆರ್.ಟಿ.ಐ ನ ಮಾಹಿತಿಯ ಪ್ರಕಾರ ಹಾಗೂ ಕೇಂದ್ರ ಸರ್ಕಾರ ಲೋಕ ಸಭೆಯಲ್ಲಿ ಹೇಳಿರುವ ಪ್ರಕಾರ ಕಳೆದ 3 ವರ್ಷಗಳಲ್ಲಿ ಎಂದರೆ 2019 ರಿಂದ ಈಚೆಗೆ 2000 ರೂಪಾಯಿಯ ಒಂದು ನೋಟು ಸಹಾ ಮುದ್ರಣವಾಗಿಲ್ಲ. ಅಂದರೆ, 2000 ರೂಪಾಯಿ ನೋಟು ಮುದ್ರಣವಾದ ಸಂಖ್ಯೆ ಸೊನ್ನೆ. ಭಾರತೀಯ ರಿಸರ್ವ್ ಬ್ಯಾಂಕ್ ನೋಟ್ ಮುದ್ರಣ್ ಸಹಾ ಇದನ್ನು ಹೌದು ಎಂದಿದೆ. 2022 ರ ಮಾರ್ಚ್ 31 ರ ಸರ್ಕ್ಯುಲೇಷನ್ ನ ಪ್ರಕಾರ ಈಗ ಚಾಲ್ತಿಯಲ್ಲಿ ಇರುವ 2000 ರೂಪಾಯಿಯ ನೋಟುಗಳ ಸಂಖ್ಯೆ ಕೇವಲ 21,420 ಲಕ್ಷ. ನೋಟು ಮುದ್ರಣವಾಗದೇ ಇರುವುದೇ 2000 ರೂಪಾಯಿ ನೋಟುಗಳು ಕಾಣೆಯಾಗಿರುವುದಕ್ಕೆ ಕಾರಣ ಎಂದಿದೆ. ನೋಟುಗಳ ಮುದ್ರಣ ಏಕೆ ಆಗಿಲ್ಲ ಎಂಬುದರ ಜಾಡು ಹಿಡಿದು ಹೊರಟರೆ..

ಎನ್.ಸಿ.ಆರ್.ಬಿ ಯ ಪ್ರಕಾರ 2016 ರಿಂದ ಇತ್ತೀಚೆಗೆ ನಕಲಿ ನೋಟುಗಳ ಹಾವಳಿ ಹೆಚ್ಚಾಗಿದೆ. ಅದರಲ್ಲಿಯೂ ಈ 2000 ರೂಪಾಯಿಯ ನಕಲಿ ನೋಟುಗಳ ಹಾವಳಿ ಹೆಚ್ಚಾಗಿದೆ ಎನ್ನುತ್ತಿದ್ದಾರೆ. 2016 ರಲ್ಲಿ 2272 ರಷ್ಟು ನಕಲಿ ನೋಟುಗಳು ಪತ್ತೆಯಾಗಿದ್ದರೆ 2017 ರಲ್ಲಿ 74,898 ನಕಲಿ ನೋಟುಗಳು, 2018 ರಲ್ಲಿ 54,776 ನಕಲಿ ನೋಟುಗಳು, 2019 ರಲ್ಲಿ 90,566 ನಕಲಿ ನೋಟುಗಳು, 2020 ರಲ್ಲಿ 2,44,834 ನಕಲಿ ನೋಟುಗಳು ಪತ್ತೆಯಾಗಿವೆ. ಈ ನಕಲಿ ನೋಟುಗಳನ್ನು ಚಲಾವಣೆಗೆ ಬಿಟ್ಟು ಅಸಲಿ ನೋಟುಗಳನ್ನು ಬಳಸಿ ಆ ಹಣವನ್ನು ಭಯೋತ್ಪಾದಕರ ಚಟುವಟಿಕೆಗಳಿಗೆ ನೀಡಲಾಗುತ್ತಿದೆ ಎನ್ನಲಾಗುತ್ತಿದೆ. 

ಈ 2000 ರೂಪಾಯಿಯ ನೋಟುಗಳ ನಕಲಿ ಏಕೆ ಹೆಚ್ಚು ಎಂದು ಹೇಳುವುದಕ್ಕೆ ಮುನ್ನ ನಾವು ಬಳಸುವ ನೋಟು ಮುದ್ರಿಸಲು ಆಗುವ ಖರ್ಚು ಎಷ್ಟು ಎಂದು ತಿಳಿದು ಬರೋಣ. 

ರಿಸರ್ವ್ ಬ್ಯಾಂಕ್ ನೀಡಿರುವ ಮಾಹಿತಿಯ ಪ್ರಕಾರ ಒಂದು 200 ರೂಪಾಯಿ ನೋಟು ಮುದ್ರಿಸಲು 2.93 ರೂಪಾಯಿ ಖರ್ಚಾದರೆ 500 ರೂಪಾಯಿಯ ನೋಟು ಮುದ್ರಣಕ್ಕೆ 2.94 ರೂಪಾಯಿ ಖರ್ಚಾಗುತ್ತದೆ. 2000 ರೂಪಾಯಿ ನೋಟು ಮುದ್ರಣಕ್ಕೆ 3.54 ರೂಪಾಯಿ ಖರ್ಚಾಗುತ್ತದೆ. 2000 ರೂಪಾಯಿಯನ್ನು ಮುದ್ರಿಸಲು ಐನೂರರ ನಾಲ್ಕು ನೋಟು ಮುದ್ರಣ ಮಾಡುವ ಖರ್ಚಿಗಿಂತ ಅತಿ ಕಡಿಮೆ ಖರ್ಚಿನಲ್ಲಿ ಎರಡು ಸಾವಿರದ ಒಂದು ನೋಟು ಮುದ್ರಣವಾಗುತ್ತದೆ. 

ಇದೇ ಸೂತ್ರವನ್ನೇ ಖೋಟಾ ನೋಟು ಮಾರುತ್ತಿರುವವರು ಸಹಾ ಬಳಸುತ್ತಿರುವುದು. ನೋಟು ಮುದ್ರಿಸಲು ಖರ್ಚಾಗುವ ಹಣಕ್ಕೂ ಖೋಟಾ ನೋಟು ಮುದ್ರಣಕ್ಕೂ ಕೆಲವು ರೂಪಾಯಿಗಳ ವ್ಯತ್ಯಾಸ ಕಂಡು ಬಂದರೂ 500 ಕ್ಕಿಂತ 2000 ರೂಪಾಯಿಯ ನೋಟು ಮುದ್ರಿಸುವುದೇ ಲಾಭಕರ ಎನ್ನಿಸಿರಲೂಬಹುದು. 

ಇತ್ತೀಚಿನ 3 ವರ್ಷಗಳಲ್ಲಿ 2000 ರೂಪಾಯಿಯ ಒಂದು ನೋಟು ಸಹಾ ಮುದ್ರಣವಾಗದೇ ಇರಬಹುದು. ಆದರೆ, ಈಗಾಗಲೇ ಮುದ್ರಣವಾದ ನೋಟುಗಳು ಏನಾದವು ? 

ಇದಕ್ಕೆ ಇನ್ನೂ ಎಲ್ಲಿಯೂ ಸರಿಯಾದ ಉತ್ತರ ದೊರೆತಿಲ್ಲ.ಇನ್ನೂ ಈ ಕುರಿತು ಸರಳವಾಗಿ ಹೇಳಬೇಕು ಎಂದರೆ.. ನೀವು ಕಳೆದ ಮೂರು ವರ್ಷದಿಂದ ಯಾವುದೇ ಬಟ್ಟೆ ಕೊಂಡಿಲ್ಲ ಎಂದರೆ ನಿಮ್ಮ ಬಳಿ ಇರುವ ಬಟ್ಟೆಗಳು ಕಡಿಮೆ ಸಂಖ್ಯೆಯಲ್ಲಿವೆ ಎಂದಲ್ಲ. ಹಾಗೆ, ನಿಮ್ಮ ಬಳಿ ಈಗಾಗಲೇ ಇರುವ ಬಟ್ಟೆಗಳು ಒಂದೋ ಹರಿದಿರಬೇಕು ಇಲ್ಲವೇ ಬಳಸಲಾಗಷ್ಟು ಹಾಳಾಗಿ ಎಸೆದಿರಬೇಕು. ಇಲ್ಲವೇ, ನಿಮ್ಮ ವಾರ್ಡ್ ರೋಬ್ ನಿಂದ ಆ ಬಟ್ಟೆಗಳು ಮಾಯವಾಗಿರಬೇಕು. ಅಲ್ಲವೇ ? ಹಾಗಾದಾಗ ಮಾತ್ರವೇ ನೀವು ತೊಡುವ ಬಟ್ಟೆಗಳು ಕಡಿಮೆಯಾಗಿವೆ ಎಂದು ಪರಿಗಣಿಸಬಹುದು.

2000 ರೂಪಾಯಿ ನೋಟುಗಳ ವಿಚಾರಕ್ಕೆ ಬಂದಾಗಲೂ ಹೀಗೆಯೇ ಏನಾದರೊಂದು ಆಗಿರಬೇಕು. ಒಂದೋ ಬ್ಯಾಂಕ್ ಈ ನೋಟುಗಳನ್ನು ಮತ್ತೆ ಹಂತ ಹಂತವಾಗಿ ಹಿಂಪಡೆಯುತ್ತಿರಬಹುದು. ಇಲ್ಲವೇ, ಕಪ್ಪು ಹಣದ ರೂಪದಲ್ಲಿ ಎಲ್ಲೋ ಶೇಖರಣೆಯಾಗುತ್ತಿರಬೇಕು. ಅಲ್ಲವಾ..?? 

ಒಂದು ಬಾರಿ ಮುದ್ರಿಸಿದ ನೋಟುಗಳನ್ನು ಹಿಂಪಡೆದ ಇತಿಹಾಸವಿದೆಯೇ ಎಂದು ಗಮನಿಸುವುದಾದರೆ.. ಆಗಿನ ಕಾಲದಲ್ಲಿ ಚಲಾವಣೆಯಲ್ಲಿದ್ದ 500, 1000 ಮತ್ತು 10000 ರೂಪಾಯಿ ನೋಟುಗಳನ್ನು ಜನವರಿ 1946 ರಲ್ಲಿ ಅಮಾನ್ಯಗೊಳಿಸಿ. ಹೆಚ್ಚಿನ ಮುಖಬೆಲೆಯ 1000, 5000 ಮತ್ತು 10000 ರೂಪಾಯಿ ನೋಟುಗಳನ್ನು 1954 ರಲ್ಲಿ ಪುನಃ ಪರಿಚಯಿಸಲಾಯಿತು ಮತ್ತು ಈ ಬ್ಯಾಂಕ್‌ನೋಟುಗಳು ಅಂದರೆ 1000, 5000 ಮತ್ತು ₹10000 ರೂಪಾಯಿಗಳನ್ನು ಜನವರಿ 1978 ರಲ್ಲಿ ಮತ್ತೊಮ್ಮೆ ಡಿ-ಮಾನಿಟೈಜ್ ಮಾಡಲಾಯಿತು. 

ನಮ್ಮ ದೇಶವನ್ನು ಹೊರತುಪಡಿಸಿದರೆ 2018 ರಲ್ಲಿ ಯುರೋಪಿಯನ್ ಸೆಂಟ್ರಲ್ ಬ್ಯಾಂಕ್ 500 ಯೂರೋಗಳನ್ನು ಹಿಂಪಡೆದಿತ್ತು. 2010 ರಲ್ಲಿ ಸಿಂಗಾಪುರ ಕೂಡಾ 10000 ಸಿಂಗಾಪುರ ಡಾಲರ್ ಗಳನ್ನು ಹಿಂಪಡೆದಿತ್ತು.

ಒಮ್ಮೆಗೆ ಹೀಗೆ ಮುದ್ರಿಸಿದ ನೋಟುಗಳನ್ನು ಒಮ್ಮೆಗೆ ಹಿಂಪಡೆಯುವುದನ್ನು ಹೊರತುಪಡಿಸಿದರೆ ನಮ್ಮ ದೇಶದಲ್ಲಿ 2005 ರಿಂದ ಹಿಂದೆ ಮುದ್ರಿತವಾಗಿದ್ದ ನೋಟುಗಳನ್ನು ಹಂತ ಹಂತವಾಗಿ ಬ್ಯಾಂಕ್ ಗೆ ಬಂದಾಗಲೆಲ್ಲಾ ಹಿಂಪಡೆದು ಅವುಗಳನ್ನು ಮರು ಚಲಾವಣೆಗೆ ನೀಡಲಾಗುತ್ತಿಲ್ಲ. ಇದಕ್ಕೆ ಕಾರಣ, ಇವುಗಳನ್ನು ಸುಲಭವಾಗಿ ನಕಲಿಸಬಹುದು ಎಂಬುದು ಇದರ ಕಾರಣ. ಇದು ಬ್ಯಾಂಕ್ ಗಳೇ ನೀಡಿರುವ ಅಧಿಕೃತ ಮಾಹಿತಿ. 2000 ರೂಪಾಯಿ ನೋಟುಗಳ ವಿಚಾರದಲ್ಲಿಯೂ ಹೀಗೆಯೇ ಆಗಿರಬಹುದಾ ಎಂದು ಈಗಾಗಲೇ  ರೈಟ್ ಟು ಇನ್ಫರ್ಮೇಶನ್ ಅಡಿಯಲ್ಲಿ ಮನೋರಂಜನ್ ಎಸ್. ರಾಯ್ ಎನ್ನುವವರು ಪ್ರಶ್ನಿಸಿದ್ದಾರೆ. ಇದಕ್ಕೆ ದೊರೆತಿರುವ ಉತ್ತರದ ಪ್ರಕಾರ "ಸಾಯಿಲ್ಡ್ ಅಥವಾ ಮ್ಯುಟಿಲೇಟೆಡ್" ಆಗಿರುವ 2000 ರೂಪಾಯಿ ನೋಟುಗಳನ್ನು ಮಾತ್ರ ಹಿಂಪಡೆಯಲಾಗಿದೆ ಎನ್ನುತ್ತಿದ್ದಾರೆ. ಸಾಯಿಲ್ಡ್ ನೋಟುಗಳು ಎಂದರೆ ಹರಿದು ಜೋಡಿಸಿರುವ, ಕಣ್ಣೀರಿನಿಂದ ಹಾಳಾಗಿರುವ ಅಥವಾ ಹರಿದು ಜೋಡಿಸಿದಂತೆ ಕಾಣುವ ಹಾಳಾಗಿರುವ ನೋಟುಗಳು. ಮ್ಯುಟಿಲೇಟೆಡ್ ನೋಟುಗಳು ಎಂದರೆ ಆ ನೋಟಿನಲ್ಲಿ ಒಂದು ಭಾಗ ಹರಿದು ಹೋಗಿದ್ದರೆ ಅಥವಾ ಸ್ವಲ್ಪ ಕಾಣೆಯಾದಂತೆ ಕಾಣುವ ಭಾಗ. ಇಂತಹಾ ನೋಟುಗಳನ್ನು ಮಾತ್ರ ಹಿಂಪಡೆದು ಬೇರೆ ನೋಟುಗಳನ್ನು ರಿಪ್ಲೇಸ್ ಮಾಡಲಾಗಿದೆ ಎನ್ನುತ್ತಿದ್ದಾರೆ. 

ಡಿ- ಮಾನಿಟೈಸೇಷನ್ ಮಾಡಲು ನೀಡಿದ ಕಾರಣವೆಂದರೆ ಹೆಚ್ಚಾಗಿ ಸಂಗ್ರಹಿಸಿದ ಹಣ ಕಪ್ಪು ಹಣದ ರೂಪದಲ್ಲಿ ಸೇರ್ಪಡೆಯಾಗಿದೆ. ಅದನ್ನು ಸರಿಪಡಿಸಲು ಎಂಬುದಾಗಿ. ಆದರೆ, ಈಗ 2000 ರೂಪಾಯಿಗಳನ್ನು ಕೂಡಾ ಹೀಗೆಯೇ ಸಂಗ್ರಹಿಸಲಾಗಿದೆ ಎನ್ನುತ್ತಿದ್ದಾರೆ. 1000 ರೂಪಾಯಿ ಅಥವಾ 500 ರೂಪಾಯಿಯನ್ನು ಕೂಡಿಡುವುದಕ್ಕಿಂತ 2000 ರೂಪಾಯಿಗಳನ್ನು ಕೂಡಿಡುವುದೇ ಸುಲಭ ಎಂದಾಗಿರಬಹುದೇ ? ಕಡಿಮೆ ಜಾಗದಲ್ಲಿ ಹೆಚ್ಚಿನ ಮೊತ್ತ ಪೇರಿಸಿಡುತ್ತಿರಬಹುದೇ ? ಹೀಗೆ ಸಂಗ್ರಹವಾದ ಮೊತ್ತದಿಂದ ಡ್ರಗ್ ಟ್ರಾಫಿಕಿಂಗ್, ಭಯೋತ್ಪಾದಕರಿಗೆ ಫಂಡಿಂಗ್ ಹಾಗೂ ತೆರಿಗೆ ಕಳ್ಳತನ ನಡೆಯುತ್ತಿವೆ ಎಂಬ ಪುಕಾರುಗಳೂ ಇವೆ. 

ಈ 2000 ರೂಪಾಯಿಗಳ ನೋಟುಗಳ ಚಲಾವಣೆ ಡಿಜಿಟಲ್ ಟ್ರ್ಯಾನ್ಶ್ಯಾಕ್ಶನ್ ಕಾರಣಕ್ಕೆ ಕಾಣೆಯಾಗುತ್ತಿವೆ ಎನ್ನುತ್ತಿದೆ ಕೇಂದ್ರ ಸರ್ಕಾರ. ಇದು ನಿಜವೇ ಆಗಿದ್ದಲ್ಲಿ ಎಲ್ಲಾ ನೋಟುಗಳ ಚಲಾವಣೆಯೂ ಕಡಿಮೆ ಆಗಬೇಕಿತ್ತು. ಅಲ್ಲವಾ ? ಆದರೆ, ನಾವು ಗಮನಿಸಬೇಕಾದ ಮತ್ತೊಂದು ಮುಖ್ಯವಾದ ಅಂಶವೂ ಇದೆ. ಈಗ ಚಲಾವಣೆಯಾಗುತ್ತಿರುವ ಹಣದಲ್ಲಿ ಪ್ರತಿ ಮೂರು ಚಲಾವಣೆಯಲ್ಲಿ ಒಂದು 500 ರೂಪಾಯಿಯ ನೋಟು ಇರುತ್ತದೆ. 500 ರೂಪಾಯಿಯ ಚಲಾವಣೆಯಲ್ಲಿ ಈಗ 64.8 % ರಷ್ಟು ಹೆಚ್ಚಾಗಿದೆ. ಪ್ರತಿ ವರ್ಷ ಇಂತಿಷ್ಟು ಬೆಲೆಯ ಇಂತಿಷ್ಟು ನೋಟು ಮುದ್ರಣವಾಗಬೇಕಾದರೆ ಅದರ ನಿರ್ಧಾರವನ್ನು ಭಾರತ ಸರ್ಕಾರ ಮತ್ತು ಆರ್.ಬಿ.ಐ ಇಬ್ಬರೂ ಜಂಟಿಯಾಗಿ ನಿರ್ಧರಿಸಬೇಕಾಗುತ್ತದೆ. ಇತ್ತೀಚಿನ ನೋಟು ಮುದ್ರಣದ ಅಂಕಿ- ಅಂಶಗಳನ್ನು ಗಮನಿಸಿದರೆ ಹೇಗೆ 2000 ರೂಪಾಯಿಯ ನೋಟುಗಳು ಮುದ್ರಣವಾಗಿಲ್ಲವೋ ಹಾಗೆಯೇ 200 ಮತ್ತು 500 ರೂಪಾಯಿಯ ನೋಟುಗಳ ಮುದ್ರಣದ ಸಂಖ್ಯೆ ಗಣನೀಯವಾಗಿ ಏರಿಕೆಯಾಗಿದೆ. ಇದು ರಿ - ಮಾನಿಟೈಸೇಷನ್ ಸಂಕೇತವಾ ? ಅಥವಾ ಕ್ರಮೇಣ ಕಡಿಮೆ ಮುಖಬೆಲೆಯ ನೋಟುಗಳು ಮಾತ್ರ ಚಲಾವಣೆಯಲ್ಲಿರಬಹುದಾ ?? 

ಈಗ ಅಮೆರಿಕಾದಲ್ಲಿ 100 ಯು.ಎಸ್.ಡಿ, ಚೀನಾದಲ್ಲಿ 100 ಯುಹಾನ್, ಕೆನಡಾದಲ್ಲಿ 100 ಕೆನಡಿಯನ್ ಡಾಲರ್, ಯುರೋಪಿಯನ್ ಯೂನಿಯನ್ ನಲ್ಲಿ 200 ಯುರೋ ಗಳೇ ಅಲ್ಲಿನ ಅತಿ ಹೆಚ್ಚು ಮುಖಬೆಲೆಯ ಹಣಗಳು. ನಮ್ಮ ದೇಶವೂ ಇದೇ ಹಾದಿ ಹಿಡಿಯಬಹುದಾ..?? ಡಿಜಿಟಲ್ ಟ್ರಾನ್ಸ್ಯಾಕ್ಷನ್ ಜೊತೆಗೆ ಈಗ ಡಿಜಿಟಲ್ ರುಪೀ ಕೂಡಾ ಜೊತೆಯಾಗಿದೆ. 2000 ರೂಪಾಯಿ ನೋಟು ಸಂಪೂರ್ಣ ಕಾಣೆಯಾದರೂ ಅಚ್ಚರಿಯೇನಿಲ್ಲ.

ಅಲ್ಲದೇ, 2023 ರಿಂದ 2000 ರೂಪಾಯಿಯ ನೋಟಿನ ಜೊತೆಗೆ 1000 ರೂಪಾಯಿಯ ನೋಟುಗಳು ಮರು ಮುದ್ರಣಗೊಂಡು ಚಲಾವಣೆಗೆ ಬರಲಿವೆ ಎಂಬ ಸುದ್ದಿ ಹಾಗೂ ವಿಡಿಯೋ ಹರಿದಾಡುತ್ತಿದ್ದು ಇದು ಸಂಪೂರ್ಣ ಸುಳ್ಳು ಎಂದು ಫ್ಯಾಕ್ಟ್ ಚೆಕ್ ಸ್ಪಷ್ಟ ಪಡಿಸಿದೆ. 2000 ರೂಪಾಯಿಯ ನೋಟು ಬಂದಾಗ ಇದರಿಂದ ಚಿಲ್ಲರೆ ಪಡೆಯಲು ತೊಂದರೆ ಪಡೆಯಲು ತೊಂದರೆ ಎಂದು ಹೇಳಿದ್ದರೆ, ಈಗ ಕಾಣೆಯಾಗುತ್ತಿರುವ ಸಂಧರ್ಭದಲ್ಲಿ ನೋಟು ಸಂಗ್ರಹಣೆಗೆ ಸುಲಭ ಎನ್ನುತ್ತಿದ್ದಾರೆ. ಒಟ್ಟಾರೆ 2000 ರೂಪಾಯಿ ನೋಟು ಅಂದಿನಿಂದ ಇಂದಿನವರೆಗೂ ಒಂದಲ್ಲಾ ಒಂದು ಸುದ್ದಿಯಲ್ಲಿದೆ. ಇದೀಗ, 2000 ರೂಪಾಯಿ ನೋಟು ಏನಾಗಿರಬಹುದು, ಏನಾಗುತ್ತಿರಬಹುದು ಎಂಬುದನ್ನು ಸಿಕ್ಕ ಮತ್ತು ಸಿಗದ ಉತ್ತರಗಳ ಸತ್ಯಾಸತ್ಯತೆಗಳನ್ನು ಪರಿಶೀಲಿಸಿ ಒಪ್ಪಬೇಕಿದೆ.

~ವಿಭಾ ವಿಶ್ವನಾಥ್

ಈ - ರುಪೀ/ ಡಿಜಿಟಲ್ ರುಪೀ ಎನ್ನುವ ಹೊಸ ಡಿಜಿಟಲ್ ಕರೆನ್ಸಿ

ಹಣಕ್ಕೆ ಬೇರೆ ಬೇರೆ ಹೆಸರುಗಳು ಇರುವ ಹಾಗೆ ಈಗ ಬೇರೆ ಬೇರೆ ರೂಪಗಳೂ ಬರುತ್ತಿವೆ. ಈಗಾಗಲೇ ಕೈಯ್ಯಲ್ಲಿ ಹಿಡಿಯುವ ಹಣವನ್ನು ಹಾರ್ಡ್ ಕ್ಯಾಶ್ ಎಂದೂ.. ಯು.ಪಿ.ಐ ಸೇವೆಗಳಲ್ಲಿ ಬಳಕೆಯಾಗುವ ಹಣವನ್ನು ಸಾಫ್ಟ್ ಕ್ಯಾಶ್ ಅಥವಾ ಡಿಜಿಟಲ್ ಕ್ಯಾಶ್ ಎಂದೂ ಕರೆಯುತ್ತಿದ್ದೆವು. ಈಗ ಬಂದಿರುವ ಹೊಸ ಕರೆನ್ಸಿ ಈ ಯು.ಪಿ.ಐ ಕರೆನ್ಸಿಗಳಿಗಿಂತ ವಿಭಿನ್ನ. ಇದುವೇ ಸೆಂಟ್ರಲ್ ಬ್ಯಾಂಕ್ ಡಿಜಿಟಲ್ ಕರೆನ್ಸಿ (ಸಿ.ಡಿ.ಬಿ.ಸಿ). ಬ್ಯಾಂಕಿಂಗ್ ಭಾಷೆಯನ್ನು ಹೊರತುಪಡಿಸಿ ನಮಗೆ ಕರೆಯಲು ಅನುಕೂಲವಾಗುವಂತೆ ಹೇಳುವುದಾದರೆ ಡಿಜಿಟಲ್ ರುಪೀ ಅಥವಾ ಈ-ರುಪೀ. ಆರ್.ಬಿ.ಐ ನಿಂದ ಸಿಕ್ಕಿರುವ ಹೊಸ ಡಿಜಿಟಲ್ ಕರೆನ್ಸಿ ವ್ಯವಸ್ಥೆ. 

2017 ಜನವರಿಯಲ್ಲಿಯೇ ಆರ್.ಬಿ.ಐ ಈ ಡಿಜಿಟಲ್ ರುಪೀ ಕುರಿತು ಹೇಳಿತ್ತಾದರೂ.. ಇದು ಟ್ರಯಲ್ ಪಿರಿಯೆಡ್ ಮುಗಿಸಿ 2022 ಡಿಸೆಂಬರ್ ನಿಂದ ಮೊದಲ ಹಂತದಲ್ಲಿ ಮುಂಬೈ, ದೆಹಲಿ, ಬೆಂಗಳೂರು ಹಾಗೂ ಭುವನೇಶ್ವರ ಈ ನಾಲ್ಕು ನಗರಗಳಲ್ಲಿ ಶುರುವಾಗಿದ್ದು ಈ ಹಂತದಲ್ಲಿ ಎಸ್.ಬಿ.ಐ, ಐ.ಸಿ.ಐ.ಸಿ.ಐ, ಯೆಸ್ ಬ್ಯಾಂಕ್, ಐ.ಡಿ.ಎಫ್.ಸಿ ಫಸ್ಟ್ ಬ್ಯಾಂಕ್ ಗಳಲ್ಲಿ ಲಭ್ಯವಿದೆ. ಎರಡನೇ ಹಂತದಲ್ಲಿ ಈ ಡಿಜಿಟಲ್ ರುಪೀ ಇನ್ನೂ ನಾಲ್ಕು ಬ್ಯಾಂಕ್ ಗಳಲ್ಲಿ ಲಭ್ಯವಾಗಲಿದೆ. ಅವುಗಳು ಬ್ಯಾಂಕ್ ಆಫ್ ಬರೋಡ, ಯೂನಿಯನ್ ಬ್ಯಾಂಕ್ ಆಫ್ ಇಂಡಿಯಾ, ಹೆಚ್.ಡಿ.ಎಫ್.ಸಿ ಬ್ಯಾಂಕ್ ಹಾಗೂ ಕೋಟಕ್ ಮಹಿಂದ್ರಾ ಬ್ಯಾಂಕ್ ಗಳನ್ನು ಒಳಗೊಳ್ಳಲಿವೆ. ಅಹಮದಾಬಾದ್, ಗ್ಯಾಂಗ್ಟಾಕ್, ಗೌಹಾತಿ, ಹೈದರಾಬಾದ್, ಇಂದೋರ್, ಕೊಚ್ಚಿ, ಲಕ್ನೋ, ಪಾಟ್ನಾ, ಶಿಮ್ಲಾ ಮುಂತಾದ 11 ನಗರಗಳಲ್ಲಿ ಶುರುವಾಗಲಿದೆ.

ಅಷ್ಟಕ್ಕೂ ಕೈಯಲ್ಲಿ ಕಾಸು ಇರುವಾಗ, ಕಣ್ಣಿಗೆ ನೋಡಲು ಗ್ಯಾರೆಂಟಿ ಇರುವ ಹಣ ಇರುವಾಗ, ಕಾಂಟ್ಯಾಕ್ಟ್ ಲೆಸ್ ಅಥವಾ ಡಿಜಿಟಲ್ ರೂಪದ ಯು.ಪಿ.ಐ ಇರುವಾಗ ಇದು ಬೇಕಿತ್ತಾ ? ಎಂದು ಎಷ್ಟೋ ಜನರಿಗೆ ಅನ್ನಿಸಿರಬಹುದು. ಆದರೆ, ಮಾಮೂಲಿ ಹಾರ್ಡ್ ಕ್ಯಾಶ್ ಗಿಂತಲೂ , ಯು.ಪಿ.ಐ ಎಂದರೆ ಭೀಮ್, ಪೇಟಿಎಂ, ಗೂಗಲ್ ಪೇ, ಫೋನ್ ಪೇ ಗಿಂತಲೂ ಇದು ವಿಭಿನ್ನವಾಗಿದೆ. ಹೇಗೆ ವಿಭಿನ್ನ ಮತ್ತು ಈ ಡಿಜಿಟಲ್ ರುಪೀ ಯಾಕೆ ಅನುಕೂಲಕರವಾಗುತ್ತದೆ ಎಂದು ಬ್ಯಾಂಕ್ ದೃಷ್ಟಿಯಿಂದ ನೋಡುವುದಾದರೆ :

ನೋಟುಗಳ ಮುದ್ರಣಕ್ಕೆ, ಅವುಗಳ ಸಾಗಣೆಗೆ, ಅವುಗಳನ್ನು ಸಂಗ್ರಹಿಸಿ ಇಡಲು, ಅವುಗಳನ್ನು ಹಂಚಲು ಆಗುವ ಖರ್ಚನ್ನು ಇದರಿಂದ ತಗ್ಗಿಸಬಹುದು. ನೋಟುಗಳನ್ನು ನಕಲಿಸಲು ಸಾಧ್ಯವಾಗುವುದಿಲ್ಲ. ಎ.ಟಿ.ಎಂ ಗಳಲ್ಲಿ ಅಥವಾ ಮನೆಗಳಲ್ಲಿ ಹಣವನ್ನು ದರೋಡೆ ಮಾಡಲು ಸಾಧ್ಯವಾಗುವುದಿಲ್ಲ. 

ಇಷ್ಟೇ ಅಲ್ಲ.. ಇದು ಈಗ ಇರುವ ಪೇಮೆಂಟ್ ಸಿಸ್ಟಮ್ ಗಳ ಜೊತೆಗೆ ಒಂದು ವ್ಯವಸ್ಥೆ ಅಷ್ಟೇ.. ನೆನಪಿರಲಿ.. ಇದು ಬದಲಿ ವ್ಯವಸ್ಥೆ ಅಲ್ಲ. ಒಂದು ರೀತಿಯ ಹೆಚ್ಚುವರಿ ಆಯ್ಕೆ. ಈ ಡಿಜಿಟಲ್ ರುಪೀಯನ್ನು ಬಳಸಲೇ ಬೇಕು ಎಂದು ಯಾರಿಗೂ ಯಾವ ಒತ್ತಾಯವೂ ಇಲ್ಲ. 

ಈ ಡಿಜಿಟಲ್ ರುಪೀ ಯು.ಪಿ.ಐ ಗಳಿಂಗಿಂತ ಹೇಗೆ ಭಿನ್ನ ಎಂದು ತಿಳಿದುಕೊಳ್ಳತ್ತಲೇ ನಮಗೆ ಈ ಆಯ್ಕೆ ಲಭ್ಯವಾದರೆ ನಾವು ಇದನ್ನು ಹೇಗೆ ಬಳಸಬಹುದು ಎಂದು ನೋಡೋಣ. ನಾವು ಯು.ಪಿ.ಐ ನಲ್ಲಿ ಹಣ ಕಳುಹಿಸುವಾಗ ನಮ್ಮ ಆಪ್ ನಲ್ಲಿ ನಮ್ಮ ಬ್ಯಾಂಕ್ ಮೂಲಕ ವ್ಯವಹಾರ ನಡೆಯುತ್ತದೆ. ಅಂದರೆ, ಬ್ಯಾಂಕ್ ಮಧ್ಯವರ್ತಿಯ ಹಾಗೆ ವರ್ತಿಸುತ್ತದೆ. ಆದರೆ, ಡಿಜಿಟಲ್ ರುಪೀ ಯಲ್ಲಿ ಬ್ಯಾಂಕ್ ಗಳು ನಡುವೆ ಬರುವುದೇ ಇಲ್ಲ. ಆರ್.ಬಿ.ಐ ಮೂಲಕವೇ ನೇರಾನೇರ ವ್ಯವಹಾರಗಳು ನಡೆಯುತ್ತವೆ. 

ಡಿಜಿಟಲ್ ರುಪೀ ಎರಡು ಕ್ಯಾಟಗರಿಗಳಲ್ಲಿ ಲಭ್ಯ. ಯು.ಪಿ.ಐ ನಲ್ಲಿ ಪರ್ಸನಲ್ ಹಾಗೂ ಬ್ಯುಸಿನೆಸ್ ಅಕೌಂಟ್ ಇರುತ್ತದಲ್ಲಾ ಹಾಗೆ ಇಲ್ಲಿ ಎರಡು ಕ್ಯಾಟಗರಿಗಳಲ್ಲಿ ಬಳಸಬಹುದು.

ಜನರಲ್ ಪರ್ಪಸ್ ಆಯ್ಕೆಯಲ್ಲಿ ಎಂಟರ್ ಪ್ರೈಸ್ ಗಳು, ಚಿಕ್ಕ - ಚಿಕ್ಕ ವ್ಯವಹಾರಕ್ಕಾಗಿ ಬಳಸಬಹುದು. 

ಮತ್ತೊಂದು ಹೋಲ್ ಸೇಲ್ ಕ್ಯಾಟಗರಿ. ಇಲ್ಲಿ ಹೆಚ್ಚಿನ ವಹಿವಾಟುಗಳು ಅಲ್ಲದೇ ಬೇರೆ ಬ್ಯಾಂಕ್ ಗಾಗಿ ಹಣದ ಸೆಟಲ್ ಮೆಂಟ್ ಗಳನ್ನು ಸಹಾ ಮಾಡಬಹುದು.

ಡಿಜಿಟಲ್ ರುಪೀ ವ್ಯವಹಾರದಲ್ಲಿ ಬ್ಯಾಂಕ್ ಅಕೌಂಟ್ ಇರಬೇಕೆಂದೇನಿಲ್ಲ ಎಂಬ ತಪ್ಪು ಕಲ್ಪನೆಯೊಂದಿದೆ. ಆದರೆ, ಡಿಜಿಟಲ್ ರುಪೀ ಸಿಸ್ಟಮ್ ನಮಗೆ ಬೇಕು ಎಂದಾದರೆ ನಮಗೆ ಒಂದು ಅಕೌಂಟ್ ಇರಲೇಬೇಕು. ಅಕಸ್ಮಾತ್ ನೀವೂ ಈ ಡಿಜಿಟಲ್ ರುಪೀಯನ್ನು ಬಳಸಲು ಅರ್ಹರಾದಿರಿ ಎಂದಾದರೆ ಅದನ್ನು ಹೇಗೆ ಬಳಸಬೇಕು ಎಂಬ ಗೊಂಡಲವಿದೆಯೇ..??

ಮೊದಲಿಗೆ ಸಿ.ಬಿ.ಡಿ.ಸಿ ( ಸೆಂಟ್ರಲ್ ಬ್ಯಾಂಕ್ ಬ್ಯಾಕ್ಡ್ ಡಿಜಿಟಲ್ ಕರೆನ್ಸಿ ) ಆಪ್ ಅನ್ನು ನಿಮ್ಮ ಮೊಬೈಲ್ ನಲ್ಲಿ ಇನ್ಸ್ಟಾಲ್ ಮಾಡಿಕೊಳ್ಳಬೇಕು. ಅದಾದ ನಂತರ ಈ ಆಪ್ ಅನ್ನು ಬಳಸಲು ನೀವು ನಿಮ್ಮ ಮೊಬೈಲ್ ನಂಬರ್ ಲಿಂಕ್ ಆಗಿರುವ ವ್ಯಾಲಿಡ್ ಬ್ಯಾಂಕ್ ಖಾತೆಯ ಮೂಲಕ ಒಳ ಪ್ರವೇಶಿಸಬಹುದು. ನಿಮ್ಮ ಈ ರಿಜಿಸ್ಟ್ರೇಷನ್ ಸಕ್ಸಸ್ ಆದಲ್ಲಿ ನಿಮಗೆ ಒಂದು ವಿಶೇಷ ಐ.ಡಿ ನೀಡಿ ನಿಮಗೆ ಡಿಜಿಟಲ್ ವ್ಯಾಲೆಟ್ ನೀಡಲಾಗುತ್ತದೆ. ಈ ಡಿಜಿಟಲ್ ವ್ಯಾಲೆಟ್ ಮೂಲಕ ನೀವು ನಿಮ್ಮ ವ್ಯವಹಾರಗಳನ್ನು ನಿರ್ವಹಿಸಬಹುದು. ಆದರೆ, ಈ ಡಿಜಿಟಲ್ ವ್ಯಾಲೆಟ್ ನಲ್ಲಿ ಒಂದು ಸ್ವಾರಸ್ಯವಿದೆ.

ಸಾಮಾನ್ಯವಾಗಿ ನಾವು ನಮ್ಮ ಯು.ಪಿ.ಐ ನಲ್ಲಿ ವ್ಯಾಲೆಟ್ ಗಳನ್ನು ಬಳಸುವುದು ಕಡಿಮೆ. ಡೈರೆಕ್ಟ್ ಹಣ ಟ್ರ್ಯಾನ್ಸ್ಫರ್ ಮಾಡಬಹುದು.  ಇಲ್ಲವೇ ಚಿಲ್ಲರೆಯನ್ನು ಸಹಾ ಸೇರಿಸಿಕೊಳ್ಳಬಹುದು.

ಇಲ್ಲಿ.. ಡಿಜಿಟಲ್ ರುಪೀ ವ್ಯಾಲೆಟ್ ನಲ್ಲಿ ನಮ್ಮ ಹಣವನ್ನು ಲೋಡ್ ಮಾಡುವುದೇ ಆದರೆ ಈ ಸಿಸ್ಟಮ್ ಅನ್ನು ನಮ್ಮ ಎ.ಟಿ.ಎಂ ಸಿಸ್ಟಮ್ ಗೆ ಹೋಲಿಕೆ ಮಾಡಿಕೊಳ್ಳಿ. ನಾವು ಎ.ಟಿ.ಎಂ ನಿಂದ ಹಣ ತೆಗೆದುಕೊಳ್ಳುವುದೇ ಆದರೆ 10,000 ರೂಪಾಯಿ ಬೇಕೆಂದರೆ 2000, 500 ಅಥವಾ 100 ರೂಪಾಯಿಯಲ್ಲಿ ಆಯ್ಕೆ ಮಾಡಿ ಎಷ್ಟು ನೋಟುಗಳು ಬೇಕು ಎಂದು ಕೇಳುತ್ತದೆ. 

ಡಿಜಿಟಲ್ ರುಪೀ ವ್ಯಾಲೆಟ್ ಗೆ ಹಣ ಲೋಡ್ ಮಾಡುವಾಗಲೂ ನಾವು 500 ರೂ. ಅಥವಾ 100 ರೂ. ಅಥವಾ 50 ರೂ. ಗಳ ಎಷ್ಟು ನೋಟುಗಳು ಎಂಬುದನ್ನು ನಿರ್ಧರಿಸಿ ಆಯ್ಕೆ ಮಾಡಿಕೊಂಡು ವ್ಯವಹರಿಸಬೇಕಾಗುತ್ತದೆ.

ಹಾಗಾದರೆ, ಇಂಟರ್ನೆಟ್ ಇದ್ದರೆ ಮಾತ್ರ ಹಣದ ವಹಿವಾಟು ನಡೆಸಬಹುದು ಎಂದುಕೊಂಡಿದ್ದರೆ ಅದು ತಪ್ಪು. ಇಂಟರ್ನೆಟ್ ಇಲ್ಲದೆಯೂ ನಾವು ಡಿಜಿಟಲ್ ರುಪೀ ವ್ಯವಹಾರ ನಡೆಸಬಹುದು. ಸ್ಮಾರ್ಟ್ ಫೋನ್ ಇದ್ದರೆ ಕ್ಯೂ.ಆರ್ ಕೋಡ್ ಮೂಲಕ ಇಲ್ಲವಾದಲ್ಲಿ ಮಾಮೂಲಿ ಎಸ್.ಎಂ.ಎಸ್ ಮೂಲಕ ಕೂಡಾ ಈ ವ್ಯವಸ್ಥೆಯನ್ನು ಬಳಸಬಹುದು. ಯು.ಪಿ.ಐ ನಲ್ಲಿ ಸಿಗದ ಆಫ್ ಲೈನ್ ಟ್ರ್ಯಾನ್ ಸ್ಯಾಕ್ಷನ್ ವ್ಯವಸ್ಥೆ ಈಗ ಡಿಜಿಟಲ್ ರುಪೀ ಯಲ್ಲಿ ಲಭ್ಯ. 

ಹಾಗಾಗಿಯೇ ಡಿಜಿಟಲ್ ರುಪೀ ಎರಡು ರೂಪದಲ್ಲಿ ಲಭ್ಯ. ಆಪ್ ಮೂಲಕ ರಿಜಿಸ್ಟ್ರಾರ್ ಮಾಡಿಕೊಂಡು ಟೋಕನ್ ಸಿಕ್ಕ ನಂತರ ಟೋಕನ್ ಮೂಲಕ ಡಿಜಿಟಲ್ ರುಪೀ ಯನ್ನು ಬಳಸಬಹುದು.

ಟೋಕನ್ ಬೇಸ್ಡ್ ವ್ಯವಸ್ಥೆ ಮತ್ತೊಂದು ಅಕೌಂಟ್ ನಂಬರ್ ಆಧರಿಸಿ ಅಕೌಂಟ್ ಬೇಸ್ಡ್.

ಮಾಮೂಲಿನ ಬ್ಯಾಂಕ್ ವ್ಯವಹಾರಗಳಲ್ಲಿ ಸಣ್ಣ - ಪುಟ್ಟ ಹಣದ ವರ್ಗಾವಣೆ ಲೆಕ್ಕವನ್ನೂ ಬ್ಯಾಂಕ್ ರಿಜಿಸ್ಟರ್ ಮಾಡಿಕೊಂಡಿರುತ್ತದೆ.  ಆದರೆ, ಇಲ್ಲಿ ಹಾಗಿರುವುದಿಲ್ಲ. ಅಲ್ಲದೇ, ಬ್ಯಾಂಕ್ ವ್ಯವಹಾರದಲ್ಲಿ 50,000 ಕ್ಕಿಂತ ಹೆಚ್ಚಿನ ವ್ಯವಹಾರ ನಡೆಸುವಾಗ ಕೇಳುವ ಹಾಗೂ ಬಳಸಲಾಗುವ ಪ್ಯಾನ್ ಕಾರ್ಡ್ ಅವಶ್ಯಕತೆಯೂ ಇರುವುದಿಲ್ಲ. ಅಸಲಿಗೆ.. ಇಲ್ಲಿ ಡಿಜಿಟಲ್ ರುಪೀ ಮೂಲಕ ಬ್ಯಾಂಕ್ ವ್ಯವಹಾರ ನಡೆಯುತ್ತಿದೆ ಎಂದಾದಲ್ಲಿ 50,000 ಕ್ಕಿಂತ ಕಡಿಮೆ ಹಣದ ವಹಿವಾಟು ದಾಖಲೆಯೇ ಆಗುವುದಿಲ್ಲ ಎಂದಿದೆ. ಆರ್. ಬಿ. ಐ. ಅದಕ್ಕಿಂತಲೂ ಹೆಚ್ಚಿನ ಹಣದ ವಹಿವಾಟು ನಡೆಸುವುದೇ ಆದಲ್ಲಿ ಅವುಗಳು ದಾಖಲಾಗುತ್ತವೆ. ಟ್ಯಾಕ್ಸ್ ಕಾರಣದಿಂದ 2 ಲಕ್ಷಕ್ಕಿಂತ ಹೆಚ್ಚಿನ ವಹಿವಾಟು ನಡೆಸುವುದೇ ಆದಲ್ಲಿ ಅದನ್ನು ಡಿಕ್ಲೇರ್ ಮಾಡಬೇಕು ಎನ್ನುತ್ತಾರೆ.

ಕೆಲವು ಬ್ಯಾಂಕ್ ಎ.ಟಿ.ಎಂ ಗಳಲ್ಲಿ ರಾತ್ರಿ ಹೊತ್ತಿನಲ್ಲಿ ಅಥವಾ 10,000 ಕ್ಕಿಂತ ಹೆಚ್ಚಿನ ಹಣವನ್ನು ಎ.ಟಿ.ಎಂ ನಿಂದ ಡ್ರಾ ಮಾಡುವಾಗ ನಮ್ಮ ರಿಜಿಸ್ಟರ್ ಮೊಬೈಲ್ ನಂಬರ್ ಒಂದು ಓ.ಟಿ.ಪಿ ಬರುತ್ತದೆ. ಇದು ಸಹಾ ನಮ್ಮ ದೃಷ್ಟಿಯಿಂದ ದೊಡ್ಡ ಅಮೌಂಟ್ ಎಂದೇ ಪರಿಗಣಿಸುವಾಗ ಡಿಜಿಟಲ್ ರುಪೀ ಯಲ್ಲಿ 50,000 ಕ್ಕಿಂತ ಕಡಿಮೆ ಮೊತ್ತದ ವಹಿವಾಟು ದಾಖಲೆಗೇ ಸಿಗುವುದಿಲ್ಲ ಎನ್ನುವುದಕ್ಕೆ ಕಾರಣ ಏನಿರಬಹುದು ಎಂದು ಹುಡುಕಿದಾಗ ಸಿಕ್ಕಿದ್ದು ಗೌಪ್ಯತೆಯ ಕಾರಣ. ವಹಿವಾಟು ನಡೆಸುವವರ ವೈಯಕ್ತಿಕ ಮಾಹಿತಿಯ ಗೌಪ್ಯತೆ. ಆದರೆ, ಇದು ಸುರಕ್ಷಿತ ಎನ್ನುತ್ತದೆ ಆರ್. ಬಿ. ಐ.

ಡಿಜಿಟಲ್ ರುಪೀಯಲ್ಲಿ ನಮ್ಮ ಖಾತೆಯಲ್ಲಿ ಹಾರ್ಡ್ ಮನಿ ಬ್ಯಾಕ್ ಅಪ್ ಇರಲೇ ಬೇಕು ಎಂದೇನಿಲ್ಲ. 

ಇನ್ನೊಂದು ವಿಚಾರ ಎಂದರೆ ನಮ್ಮ ಡಿಜಿಟಲ್ ವ್ಯಾಲೆಟ್ ನಲ್ಲಿ ಇರುವ ಹಣ ನಮ್ಮದು. ನಮ್ಮದು ಎಂದರೆ ನಮ್ಮದಷ್ಟೇ ಬ್ಯಾಂಕ್ ನದ್ದಲ್ಲ. ಇನ್ನೂ ಸರಳವಾಗಿ ಹೇಳುವುದಾದರೆ ನಮ್ಮ ಪರ್ಸಿನಲ್ಲಿ ಇರುವ ಹಣದಂತೆ ಅಷ್ಟೇ..

ಇದರಿಂದ ಅನುಕೂಲ ಇರುವ ಹಾಗೆ ಅನಾನುಕೂಲವೂ ಇಲ್ಲದಿಲ್ಲ. ಇದ್ದೂ ಇಲ್ಲದಂತಿರುವ ಹಣ, ಇಲ್ಲದೆಯೂ ಇರುವಂತಿರುವ ಹಣ.. ಭಾರತದ ಡಿಜಿಟಲ್ ಕರೆನ್ಸಿ ವ್ಯವಸ್ಥೆಯೊಂದಕ್ಕೆ ಮುನ್ನುಡಿಯಂತಿದೆ. ಇಷ್ಟವಾದರೆ, ಅವಶ್ಯಕತೆಯಿದೆ ಎಂದಾದರೆ ತಪ್ಪದೇ ನೀವೂ ಈ ಸೌಲಭ್ಯದ ಬಳಕೆಗೆ ಅರ್ಹರಾದಾಗ ಬಳಸಿ. ಇಲ್ಲವಾದಲ್ಲಿ ಎಂದಿನಂತೆ ಇದುವರೆಗೂ ಬಳಸಿದ ವ್ಯವಸ್ಥೆಗಳು ಇದ್ದೇ ಇವೆಯಲ್ಲ. ನೆನಪಿರಲಿ.. ಇದು ಬದಲೀ ವ್ಯವಸ್ಥೆಯಲ್ಲ.. ಹೆಚ್ಚುವರಿ ವ್ಯವಸ್ಥೆ.

- ವಿಭಾ ವಿಶ್ವನಾಥ್

ಸಿನಿಮಾ ಪ್ರಭಾವಳಿ : ಬಾಕ್ಸ್ ಆಫೀಸ್ ಮತ್ತು ವ್ಯಾಲ್ಯೂ ಸುತ್ತ

ನಮ್ಮ ದೇಶದಲ್ಲಿ ಹೆಚ್ಚಿನ ಕ್ರೇಜ್ ಇರುವುದು ಕ್ರಿಕೆಟ್ ಹಾಗೂ ಸಿನಿಮಾಗಳಲ್ಲಿ.. ಇತ್ತೀಚಿನ ಟ್ರೆಂಡ್ ಗಳಲ್ಲಿ ಸಿನಿಮಾ ನೋಡುವುದೂ ಒಂದು. ಟ್ರೆಂಡಿಂಗ್ ಸಿನಿಮಾ ನೋಡಿಲ್ಲವಾದರೆ ಯಾವುದೋ ಅನ್ಯಗ್ರಹದಿಂದ ಬಂದವರೇನೋ ಎಂಬಂತೆ ನೋಡಲು ಶುರು ಮಾಡಿ ಬಿಡುತ್ತಾರೆ.. ಬೇರೆಯವರು ಹಾಗೆ ಮಾಡದಿದ್ದರೂ ಈಗಿನ.ಸೋಶಿಯಲ್ ಮೀಡಿಯಾ ಪೋಸ್ಟ್, ರೀಲ್ಸ್, ರಿವ್ಯೂ ಎಲ್ಲವನ್ನೂ ನೋಡುತ್ತಾ ನಾವಿನ್ನೂ ಅಪ್ಡೇಟ್ ಆಗಿಲ್ಲವೇನೋ ಎಂದೊಮ್ಮೆ ಅನುಮಾನ ಹುಟ್ಟಿ ಬಿಡುತ್ತದೆ. ಅದರಲ್ಲೂ ಈಗ ಓ.ಟಿ.ಟಿ ಪ್ಲಾಟ್ಫಾರಂ ಬಂದ ನಂತರ ಮೊದಲಿನಂತೆ ಸಿನಿಮಾ ನೋಡಲು ಚಿತ್ರ ಮಂದಿರಕ್ಕೆ ಹೋಗಿಯೇ ನೋಡಬೇಕು ಅಥವಾ ಟಿ.ವಿಯಲ್ಲಿ ಬರುವ ಸಿನಿಮಾಗಳಿಗೇ ಕಾಯಬೇಕು ಎಂದೇನಿಲ್ಲ. ಇನ್ನೊಂದು ವಿಚಾರ.. ಸಿನಿಮಾ ನೋಡಲು ಓ.ಟಿ.ಟಿ ಗಳೂ ಅಲ್ಲದೇ ವಿವಿಧ ದಾರಿಗಳೂ ಸಿಕ್ಕಿವೆ ಈಗ. ಅಮೆಜಾನ್, ನೆಟ್ ಪ್ಲಿಕ್ಸ್, ಸೋನಿ ಲಿವ್, ಜೀ ಫೈ, ಹಾಟ್ ಸ್ಟಾರ್, ವೂಟ್ ಹೀಗೆ ತರಹೇವಾರಿ ಓ.ಟಿ.ಟಿ ಗಳು ಹೆಚ್ಚಾಗುತ್ತಿದ್ದರೂ ಸಿನಿಮಾ ಥಿಯೇಟರ್ ಗಳ ಕ್ರೇಜ್ ಇನ್ನೂ ಕಡಿಮೆಯಾಗಿಲ್ಲ. ಒಂದು ಬಾರಿ ನೋಡುವ ಸಿನಿಮಾ, ಇನ್ನೊಮ್ಮೆ ನೋಡುವಂತದ್ದು, ಮತ್ತೆ ಮತ್ತೆ ನೋಡುವಂತಹದ್ದು, ಥಿಯೇಟರ್ ನಲ್ಲಿ ಆ ಎಫೆಕ್ಟ್ ನಲ್ಲೇ ನೋಡುವಂತಹದ್ದು, ತ್ರಿ-ಡಿ ಎಫೆಕ್ಟ್ ನಲ್ಲಿ ನೋಡುವಂತಹದ್ದು ಎಂದು ಸಿನಿಮಾ ಬಂದ ದಿನವೇ ಇಲ್ಲವೇ ಸಿನಿಮಾ ಟ್ರೈಲರ್ ಅಲ್ಲಲ್ಲ ಈಗೀಗ ಸಿನಿಮಾ ಟೀಸರ್ ಬಂದ ದಿನದಿಂದಲೇ ಅಭಿಪ್ರಾಯ ಮೂಡಿಸುವಂತಹಾ ರಿವ್ಯೂಗಳು ಬರಲು ಶುರುವಾಗುತ್ತವೆ. 

ಈ ರೇಟಿಂಗ್, ರಿವ್ಯೂಗಳು ಯೂಟ್ಯೂಬ್ ನಲ್ಲಿ, ಸೋಶಿಯಲ್ ಮೀಡಿಯಾದಲ್ಲಿ ಹರಿದಾಡಲು ತೊಡಗುತ್ತಿದ್ದಂತೆ ಜನರಿಗೆ ಕುತೂಹಲ ಹೆಚ್ಚುತ್ತಾ ಈ ಸಿನಿಮಾವನ್ನು ನೋಡಲೇಬೇಕು ಎನ್ನುವ ಅಭಿಪ್ರಾಯ ಉಂಟಾಗುತ್ತದೆ. ಇಲ್ಲವಾದರೂ ಯಾವುದೇ ಸಿನಿಮಾ ನೋಡುವಾಗಲೂ ಮೊದಲಿಗೆ ಇಂತಹದ್ದೇ ಸಿನಿಮಾ ನಿರ್ಧರಿಸಬೇಕು. ಆ ಸಿನಿಮಾ ನೋಡಲೇಬೇಕು ಎಂದು ಏಕೆ ನಿರ್ಧರಿಸುತ್ತೇವೆ ? ಒಂದೋ ನಮ್ಮಿಷ್ಟದ ಹೀರೋ ಅಥವಾ ಹೀರೋಹಿನ್ ಮಾಡಿದ್ದರೆ, ಕುತೂಹಲಕಾರಿ ಅಂಶ ಸೆಳೆದರೆ ಇಲ್ಲವೇ ಸಿನಿಮಾ ನಿರ್ಮಾಣ ಭರ್ಜರಿಯಾಗಿದ್ದು ಅದು 'ಸಕ್ಸಸ್' ಎಂದೋ ಅಥವಾ 'ಬಾಕ್ಸ್ ಆಫೀಸ್ ಹಿಟ್' ಎಂದೋ ಖ್ಯಾತಿ ಪಡೆದಿದ್ದರೆ.. ಕಾಂಟ್ರವರ್ಸಿ ಅಥವಾ ಬೇರೆ ರೀತಿ ಖ್ಯಾತಿ ಪಡೆದ ಸಿನಿಮಾ ನೋಡುತ್ತಾರಾದರೂ 'ಬಾಕ್ಸ್ ಆಫೀಸ್ ಹಿಟ್' ಅಥವಾ 'ಪ್ಯಾನ್ ಇಂಡಿಯಾ ' ಸಿನಿಮಾಗಳನ್ನೇ ಆಯ್ಕೆ ಮಾಡಿಕೊಂಡು ನೋಡುವವರ ಸಂಖ್ಯೆಯೂ ಹೆಚ್ಚು. ಖ್ಯಾತಿ ಪಡೆಯುತ್ತಿರುವ ಸಿನಿಮಾಗಳಲ್ಲಿ ಈಗ ಬಡ್ಜೆಟ್ ನಿಂದ ಅಥವಾ ರಿವ್ಯೂ ಗಳಿಂದ ಖ್ಯಾತಿ ಪಡೆಯುತ್ತಿರುವ ಸಿನಿಮಾಗಳೇ ಹೆಚ್ಚು. ಹಾಗೆಂದು ತನ್ನ ಕತೆಯಿಂದ ಮನಸೆಳೆಯದ ಸಿನಿಮಾಗಳೂ ಇಲ್ಲದಿಲ್ಲ. ಆದರೆ, ಅವುಗಳ ಸಂಖ್ಯೆ ತೀರಾ ವಿರಳ ಅಷ್ಟೇ.. 

ಬಾಕ್ಸ್ ಆಫೀಸ್ ಹಿಟ್ ಸಿನಿಮಾಗಳು ಅಷ್ಟೊಂದು ಹಿಟ್ ಸಿನಿಮಾಗಳಾ..?? ಈ ಅನುಮಾನ ನಿಮ್ಮಲ್ಲಿ ಮೂಡಿದ್ದಿದೆಯಾ ? 

ಯಾರಿಗಾದರೂ ನಿನ್ನ ಸಂಬಳ ಎಷ್ಟು ಎಂದು ಕೇಳಿದರೆ ಅಥವಾ ಎಸ್.ಎಸ್.ಎಲ್.ಸಿ ಅಥವಾ ಪಿ.ಯು.ಸಿ ವಿದ್ಯಾರ್ಥಿಗೆ ರಿಸಲ್ಟ್ ಬಂದಾಗ ನಿನ್ನ ರಿಸಲ್ಟ್ ಎಷ್ಟು ಎಂದು ಕೇಳಿದರೆ ನಮಗೆ ಅವರ ನಿಜ ವಿಚಾರ ತಿಳಿದಿಲ್ಲ ಎಂದರೆ ಅದರ ಕುರಿತು ಮುಚ್ಚಿಟ್ಟು ಸುಳ್ಳು ಲೆಕ್ಕ ಹೇಳುವವರೇ ಹೆಚ್ಚು ಅಲ್ಲವಾ..?? ಇಷ್ಟೇ ಯಾಕೆ.. ರಿಯಾಲಿಟಿ ಶೋಗಳಲ್ಲಿ ಎಸ್.ಎಂ.ಎಸ್ ವೋಟಿಂಗ್ ಮೇಲೆ ಗೆಲುವಿನ ನಿರ್ಧಾರ ಮಾಡುವಾಗ ಅವರು ಇಷ್ಟು ವೋಟ್ ಬಂದಿದ್ದವು. ವಿನ್ನರ್ ಗೆ ಇಂತಿಷ್ಟು.. ರನ್ನರ್ ಅಪ್ ಗೆ ಇಂತಿಷ್ಟು ಎಂದು ಯಾವತ್ತಾದರೂ ಹೇಳಿದ್ದು ನೋಡಿದ್ದೀರಾ..?? ವ್ಯಾಪಾರದಲ್ಲಿ ಇಂತಿಷ್ಟೇ ಲಾಭವಾಯಿತು ಎಂದು ರಾಜಾರೋಷವಾಗಿ ಹೇಳಿಕೊಳ್ಳುವವರನ್ನು ನೋಡಿದ್ದೀರಾ..?? ವ್ಯಾಪಾರದಲ್ಲಿ ನಷ್ಟವಾದರೆ ಇಂತಿಷ್ಟು ನಷ್ಟವಾಗುತ್ತಿದೆ ಎಂದು ಗೋಳಾಡುವವರೇ ಹೆಚ್ಚು ಅಲ್ಲವಾ..?? ಈ ಸಿನಿಮಾ ಪ್ರಪಂಚದ ವ್ಯವಹಾರ ತೋರಿಸಿಕೊಂಡಷ್ಟೇ ಇರುತ್ತದಾ.. ಅಥವಾ ಹೀಗೆ ಬಾಕ್ಸ್ ಆಫೀಸ್ ಹಿಟ್ ಗಳ ಲೆಕ್ಕ ತೋರಿಸಿದರೆ ಅವರಿಗಾಗುವ ಲಾಭ ಬೇರೆಯೇ ಇದೆಯಾ..??

ಈ ಕುರಿತು ಹೇಳುವ ಮುನ್ನ ಲಾಭ ಎಂದರೆ ಏನು ಎಂಬುದನ್ನು ತಿಳಿಯೋಣ. ಒಬ್ಬ ರೈತ ಒಂದು ಬೆಳೆ ಬೆಳೆದಾಗ ಆತ ಲಾಭ ಕಾಣಲು ಎಷ್ಟೆಲ್ಲಾ ಅಡೆ- ತಡೆಗಳನ್ನು ದಾಟಬೇಕು. ಅಲ್ಲವಾ.. ಬೆಳೆ ಹಸನಾಗಿ ಬರುತ್ತಿದ್ದರೂ ಸದಾ ಆತನಿಗೆ ತನ್ನ ಬೆಳೆ ಬರುವ ಕಾಲಕ್ಕೆ ಇರುವ ಮಾರ್ಕೆಟ್ ರೇಟಿನದ್ದೇ ಚಿಂತೆ. ಇದರ ನಡುವೆ ಸರಿಯಾದ ಪ್ರಮಾಣದ ನೀರು ಹಾಯಿಸುವಿಕೆ, ಕಳೆ ಕೀಳುವುದು, ಕೀಟ ನಾಶಕ ಸಿಂಪಡಿಸುವುದು, ಗೊಬ್ಬರ ನೀಡುವುದು, ಆಳುಗಳ ಹುಡುಕಾಟ.. ಕೊಯ್ಲಿನ ನಂತರ ಮಾರುಕಟ್ಟೆಗೆ ಸಾಗಿಸುವುದು ಹೀಗೆ ಎಲ್ಲದಕ್ಕೂ ಖರ್ಚು ಮಾಡಬೇಕು. ಇದೆಲ್ಲಾ ಖರ್ಚುಗಳನ್ನು ಕಳೆದು ಕೈ ಸೇರುವ ಹಣ ಆತನ ನಿಜವಾದ ಲಾಭ. ಒಂದು ಬೆಳೆಯಿಂದ 10 ಲಕ್ಷ ರೂ. ಕೈ ಸೇರಿದರೆ ಅದು ಆತನ ಕೃಷಿಯಿಂದ ಬಂದ ಗಳಿಕೆ ಅಷ್ಟೇ.. ಅದು ಲಾಭವಲ್ಲ. ಎಲ್ಲಾ ಖರ್ಚುಗಳನ್ನು ಕಳೆದು ಆತನಿಗೆ 2 ಲಕ್ಷ ಉಳಿಯಿತು ಎಂದರೆ ಅದು ಆತನ ನಿಜವಾದ ಲಾಭ. ಇದು ಒಂದು ರೀತಿಯ ಅದೃಷ್ಟ ಪರೀಕ್ಷೆಯೂ ಹೌದು.

ಸಿನಿಮಾ ಕ್ಷೇತ್ರದಲ್ಲಿ ಸಿಗುವ ಲಾಭ ಕೂಡಾ ಹೀಗಿಯೇ.. ಪರಿಸ್ಥಿತಿ ಇದಕ್ಕಿಂತ ಭಿನ್ನವಾಗಿ ಏನೂ ಇರುವುದಿಲ್ಲ. ಸಿನಿಮಾದಲ್ಲಿ ಹಣ ತೊಡಗಿಸಿದಾಗ ಇಂತಿಷ್ಟು ಹಣವನ್ನು ತಯಾರಿಸಿಕೆಗೆ, ಡಿಸ್ಟ್ರಿಬ್ಯುಷನ್ ಗೆ, ಇಂತಿಷ್ಟು ಹಣ ಹಕ್ಕುಗಳನ್ನು ಕೊಳ್ಳಲು, ಇಂತಿಷ್ಟು ಹಣವನ್ನು ಮಾರ್ಕೆಟಿಂಗ್ ಗೆ ಎಂದು ವಿಂಗಡಿಸಿಕೊಳ್ಳುತ್ತಾರೆ. ಇದಾದ ನಂತರವೂ ಥಿಯೇಟರ್ ನವರಿಗೆ, ಡಿಸ್ಟ್ರಿಬ್ಯುಟರ್ ಗಳಿಗೆ , ಟ್ಯಾಕ್ಸ್ ಗಳಿಗೆ ದುಡ್ಡು ಕೊಡಬೇಕು. ಉಳಿದದ್ದು ಮಾತ್ರ ಅಲ್ಲವೇ ಲಾಭ. 

ಉದಾಹರಣೆಗೆ ಹೇಳುವುದೇ ಆದರೆ.. 20 ಕೋಟಿ ಹಾಕಿ ಸಿನಿಮಾ ಮಾಡಿದರೆ , 10 ರಿಂದ 15 ಕೋಟಿ ಪೊಮೋಷನ್, ಮಾರ್ಕೆಟಿಂಗ್ ಎಂದು ಖರ್ಚು ಮಾಡಿ, 10 ಕೋಟಿ ಸ್ಯಾಟಲೈಟ್ ಗೆ ಎಂದು ಮೀಸಲಿಟ್ಟು ಆ ಸಿನಿಮಾ ಕೊಟ್ಟರೆ ಡಿಸ್ಟ್ರಿಬ್ಯುಟರ್ ಗಳು ಸಬ್ ಡಿಸ್ಟ್ರಿಬ್ಯುಟರ್ ಗಳಿಗೆ ಕೊಡುತ್ತಾರೆ. ನಂತರ ಥಿಯೇಟರ್ ಹಾಗೂ ಮಲ್ಟಿಫ್ಲೆಕ್ಸ್ ಗಳಲ್ಲಿ ತೆರೆ ಕಂಡಾಗ ಬಂದ ಟಿಕೆಟ್ ಮಾರಾಟದಿಂದ ಥಿಯೇಟರ್ ನವರು 50% ನೀಡಿದರೆ, ಮಲ್ಟಿಫ್ಲೆಕ್ಸ್ ನವರು ಮೊದಲ ವಾರ 40% , ಎರಡನೇ ವಾರದಿಂದ 50% ನೋಡುತ್ತಾರೆ. ಅದರಲ್ಲಿ ರಾಜ್ಯದಿಂದ ರಾಜ್ಯಕ್ಕೆ ಬದಲಾಗುವ ಜಿ.ಎಸ್.ಟಿ ಕಟ್ಟಿ ಉಳಿದಿದ್ದರಲ್ಲಿ ಡಿಸ್ಟ್ರಿಬ್ಯುಟರ್ ಗಳಿಗೆ ಹಂಚಿ ಕೈ ಗೆ ಸಿಗುವುದು 23 ಕೋಟಿಯಂತೆ. 

ಆದರೆ, ನಮಗೆ ಸಿಗುವ ಸುದ್ದಿಯಲ್ಲಿ ಇರುವುದು 100 ಕೋಟಿ, 300 ಕೋಟಿ, 500 ಕೋಟಿ ಈ ರೀತಿಯ ಬಾಕ್ಸ್ ಆಫೀಸ್ ಹಿಟ್ ಸುದ್ದಿ. ಬಾಕ್ಸ್ ಆಫೀಸ್ ಲಾಭ ಎಂದು ತೋರಿಸುವುದು ಟಿಕೆಟ್ ನಿಂದ ಬರುವ ಹಣ. ನೆನಪಿರಲಿ, ಇದು ಎಷ್ಟು ಟಿಕೆಟ್ ಮಾರಾಟವಾಯಿತು ಎಂಬುದರ ಲೆಕ್ಕವಲ್ಲ ಟಿಕೆಟ್ ಕಲೆಕ್ಷನ್ ಗಳ ಒಟ್ಟು ಹಣ. ಅಂದ ಹಾಗೆ, ಈ ಟಿಕೆಟ್ ರೇಟ್ ಗಳು ಎಲ್ಲಾ ಕಡೆಯೂ , ಎಲ್ಲಾ ಸಿನಿಮಾಗಳಿಗೂ ಒಂದೇ ರೀತಿ ಇರುವುದಿಲ್ಲ. ಹೀಗೆ ಭಾರತದ ಹೆಚ್ಚಿನ ಸಿನಿಮಾಗಳ ಬಾಕ್ಸ್ ಆಫೀಸ್ ಹಿಟ್ ಲೆಕ್ಕ ಸಿಗುವುದು. ಅಂದ ಹಾಗೆ ಈ ಲೆಕ್ಕ ಪಾರದರ್ಶಕವಾ ? ರೆನ್ ಟ್ರ್ಯಾಕ್ ಎನ್ನುವ ಇಂಟರ್ ನ್ಯಾಷನಲ್ ಆರ್ಗನೈಸೇಷನ್ ಒಂದರಲ್ಲಿ ಮಾತ್ರವೇ ಈ ಪಾರದರ್ಶಕತೆ ಇರುವುದಂತೆ.

ಈ ಬಾಕ್ಸ್ ಆಫೀಸ್ ನಂಬರ್ ಅನ್ನು ಹೆಚ್ಚು ತೋರಿಸುವುದರಿಂದ ಆಗುವ ಲಾಭಗಳೇನು ? ನಮ್ಮೆಲ್ಲರಿಗೂ ಬಿಗ್ ಸಕ್ಸಸ್, ಬಿಗ್ ಬಜೆಟ್, ಬಿಗ್ ಅಮೌಂಟ್, ಬಿಗ್ ನಂಬರ್ ಗಳ ಮೇಲೆಯೇ ಒಲವು ಹೆಚ್ಚು. ಅಲ್ಲವಾ..??

ಒಂದು ವಸ್ತುವಿನ ಬೆಲೆ ಹೆಚ್ಚಿದ್ದರೆ ಅದರ ಕ್ವಾಲಿಟಿ ಹೆಚ್ಚು, ಒಂದು ಶಾಲೆಯಲ್ಲಿ ಹೆಚ್ಚು ಅಮೌಂಟ್ ಕಟ್ಟಿಸಿಕೊಂಡರೆ ಆ ಶಾಲೆಯ ಶಿಕ್ಷಣ ಚೆನ್ನ ಎನ್ನುತ್ತಾ ಎಲ್ಲದರ ಕ್ವಾಲಿಟಿಯನ್ನು ಬಿಗ್ ನಂಬರ್ ಗಳಲ್ಲಿ ಅಳೆಯುತ್ತೇವಲ್ಲಾ ಇದೂ ಅಂತಹಾ ಸಾಲಿಗೇ ಸೇರುತ್ತದೆ. 

ಒಳ್ಳೆಯ ಅಡ್ವಾನ್ಸ್ ಬುಕ್ಕಿಂಗ್ ನಲ್ಲಿ ಇದರ ಪರಿಣಾಮ ಹೆಚ್ಚು. ಇದು ಯಾರ ಸಿನಿಮಾ.. ಕಥೆ ಏನು ಎನ್ನುವುದಕ್ಕಿಂತ ಐ.ಎಂ.ಡಿ.ಬಿ ರೇಟಿಂಗ್ ನೋಡುವತ್ತ ಗಮನ ಹರಿಸುವ ನಮ್ಮ ಮನಸ್ಸು ಸೆಳೆಯಲು ಇದೂ ಒಂದು ಪರಿಣಾಮಕಾರಿ ಅಂಶ. ಬಿಗ್ ಬಾಕ್ಸ್ ಆಫೀಸ್ ಸಕ್ಸಸ್ ನಿಂದ ನೋಡುಗರಿಗಷ್ಟೇ ಅಲ್ಲ. ಸಿನಿಮಾ ಮಾಡುವವರ ರೇಟಿಂಗ್ ಕೂಡಾ ನಿರ್ಧರಿತವಾಗುತ್ತದಂತೆ. ಈ ಬಾಕ್ಸ್ ಆಫೀಸ್ ಹಿಟ್ ಲಿಸ್ಟ್ ನಲ್ಲಿ ಬಾರದ ನಟರ ಬೇಡಿಕೆ ಹಾಗೂ ಸ್ಟಾರ್ ವ್ಯಾಲ್ಯೂ ಕುಸಿಯುತ್ತಿದೆ. ಹಿಂದಿ ಸಿನಿಮಾ ಇಂಡಸ್ಟ್ರಿಯಲ್ಲಿ ಈ ರೀತಿಯ ಸತತ ಬಾಕ್ಸ್ ಆಫೀಸ್ ಬಾಂಬ್ ಅಥವಾ ಫೇಲ್ಯೂರ್ ನಿಂದ ಬ್ರ್ಯಾಂಡ್ ಕೂಡಾ ಕಡಿಮೆಯಾಗುತ್ತಿದೆ.

ಒಂದು ರೇಟಿಂಗ್, ಒಂದು ರಿವ್ಯೂ ಇಷ್ಟೆಲ್ಲಾ ಮಾಡಬಲ್ಲದು ಎನ್ನುವುದಾದರೆ ಒಂದೊಳ್ಳೆಯ ಕಥೆ ಅಥವಾ ಒಂದು ಫರ್ಫೆಕ್ಟ್ ಸಿನಿಮಾ ಪ್ರಭಾವ ಬೀರಲು ಸಾಧ್ಯವಿಲ್ಲವೇ..?? ಆದರೆ, ಈ ಹಾದಿ ಅಷ್ಟು ಸುಲಭವಿಲ್ಲ. ಈ ಪ್ರಭಾವ ಹೇಗೆ ಮೂಡುತ್ತದೆ ಗೊತ್ತೇ ?

ಮನಃಶಾಸ್ತ್ರಜ್ಞರ ಪ್ರಕಾರ ಒಬ್ಬರ ಮೇಲೆ ಮತ್ತೊಬ್ಬರ ಹೇಳಿಕೆಗಳು ಹೇಗೆ ಪರಿಣಾಮ ಬೀರುತ್ತವೆ ಎಂದರೆ.. ಆ ಮಾತಿನ ಕುರಿತು ನಂಬಿಕೆ ಹುಟ್ಟಿಸಲು ಅಥವಾ ಅನುಮಾನ ಹುಟ್ಟಿಸಲು ಒಂದು ಹತ್ತು ಜನ ಅದೇ ಮಾತನ್ನು ಪುನರುಚ್ಚರಿಸಿದರೆ ಸಾಕು. "ನೀನ್ಯಾಕೆ ಇವತ್ತು ಡಲ್ ಆಗಿ ಕಾಣಿಸುತ್ತಾ ಇದ್ದೀಯ" ಎಂದು ಒಬ್ಬರು ಕೇಳಿದರೆ ಇಲ್ಲ ಎನ್ನುತ್ತೇವೆ. ಮೂರು - ನಾಲ್ಕು ಜನ ಮುಂದೆ ಸಿಕ್ಕವರು ಹಾಗೆ ಕೇಳಿದರೆ ಹಾಗೆಯೇ ಇರಬಹುದೇನೋ ಎಂದು ನಮ್ಮ ಮೇಲೆಯೇ ನಮಗೆ ಅನುಮಾನ ಶುರುವಾಗುತ್ತಿದ್ದ ಹಾಗೆ ಒಂದು ಹತ್ತು ಜನ ಕೇಳುವಷ್ಟರಲ್ಲಿ ನಾವು ನಿಜಕ್ಕೂ ಡಲ್ ಆಗಿ ಬಿಟ್ಟಿರುತ್ತೇವೆ. ರಿವ್ಯೂ ಹಾಗೂ ರೇಟಿಂಗ್ ಗಳಿಂದ ನಮಗೆ ಉಂಟಾಗುವ ಪ್ರಭಾವ ಹೀಗೆಯೇ ಇರುತ್ತದೆ. 10 ಜನರಿಗೆ ಇಷ್ಟವಾದ ಸಿನಿಮಾ ನಮಗೆ ಇಷ್ಟವಾಗಲೇ ಬೇಕು ಎಂದೇನಿಲ್ಲ. ಆದರೆ, ನನಗೆ ಇಷ್ಟವಾಗಲಿಲ್ಲ ಎಂದರೆ ನಮ್ಮನ್ನು ಬೇರೆಯದ್ದೇ ರೀತಿ ನೋಡಿದರೆ ಎಂಬ ಭಾವನೆಯಿಂದ ಅದನ್ನು ಹೇಳದೆ ಸುಮ್ಮನುಳಿಯುತ್ತೇವೆ. 

ಹೀಗೆ.. ಬರೀ ಕಥೆಯಿಂದಲೇ ಸಿನಿಮಾ ಗೆಲ್ಲುತ್ತದೆ ಎಂದು ಹೋದಾಗ ಅಲ್ಲಿ ಮಾರ್ಕೆಟಿಂಗ್ ಕೂಡಾ ಬೇಕಾಗುತ್ತದೆ. ಎಷ್ಟೋ ಒಳ್ಳೆಯ ಸಿನಿಮಾಗಳು ಅಥವಾ ಹೊಸಬರ ಸಿನಿಮಾಗಳನ್ನು ಓ.ಟಿ.ಟಿಯಲ್ಲಿ ಕಂಡಾಗ ಈ ಸಿನಿಮಾ ಥಿಯೇಟರ್ ನಲ್ಲಿ ನೋಡಿದರೆ ಚೆನ್ನಾಗಿರುತ್ತಿತ್ತು ಎಂದುಕೊಳ್ಳುತ್ತಿರುತ್ತೇವೆ. ಆದರೆ, ಅವುಗಳು ಅದಾಗಲೇ ಚಿತ್ರ ಮಂದಿರದಲ್ಲಿ ತೆರೆ ಕಂಡು ಒಂದೆರಡು ದಿನಕ್ಕೇ ಎತ್ತಂಗಡಿಯಾಗಿ ಬಿಟ್ಟಿರುತ್ತವೆ. 

ಅಷ್ಟಕ್ಕೂ ಕತೆ ಇದ್ದರೆ ಮಾತ್ರ ಸಿನಿಮಾ ನೋಡಬೇಕೇ..?? ನಾವು ನೋಡುವುದು ಎಂಟರ್ಟೈನ್ ಮೆಂಟ್ ಗೆ ಎನ್ನುತ್ತೀರಾ.. ಒಂದು ಸಿನಿಮಾ ನೋಡಿದರೆ ಅದರಿಂದ ಏನಾದ್ರೂ ಒಂದು ಪ್ರಯೋಜನವಿರಬೇಕು. ಏನನ್ನಾದರೂ ತಿಳಿದುಕೊಳ್ಳುವಂತೆ, ಮನಸ್ಸಿಗೆ ಸಮಾಧಾನ ನೀಡುವಂತೆ, ನಕ್ಕು ಹಗುರಾಗಿಸುವಂತೆ..ಹೀಗೆ ಏನಾದರೊಂದು. ಅಲ್ಲವಾ.. ಹಾಸ್ಯ, ಹಾರರ್, ಸೈಕಾಲಾಜಿಕಲ್ ಥ್ರಿಲ್ಲರ್, ಫ್ಯಾಮಿಲಿ ಓರಿಯೆಂಟೆಡ್, ಭಕ್ತಿ ಪ್ರಧಾನ, ಪ್ರೇಮ ಕತೆಗಳು ಹೀಗೆ ಹಲವಾರು ಸಿನಿಮಾಗಳಿವೆ.  ಇದೆಲ್ಲದರ ನಡುವೆ ಮಕ್ಕಳ ಸಿನಿಮಾಗಳೇ ಕಂಡು ಬರುತ್ತಿಲ್ಲ. ಹಾಗಾದರೆ, ಮಕ್ಕಳು ಕೂಡಾ ದೊಡ್ಡವರ ಸಿನಿಮಾಗಳನ್ನೇ ನೋಡಬೇಕಾ.. ಸ್ಕೂಲ್ ಟೈಮ್ ನಲ್ಲಿ ವರ್ಷಕ್ಕೆ ಒಂದು ಸಿನಿಮಾ ಇಲ್ಲವೇ ಪ್ರವಾಸಕ್ಕೆ ಕರೆಯುತ್ತಿದ್ದರು. ಮಕ್ಕಳ ಸಿನಿಮಾಗಳೇ ಕಡಿಮೆಯಾದರೆ ಮಕ್ಕಳು ನೋಡಿದ ಸಿನಿಮಾಗಳಿಂದ ಕಲಿಯುವುದಾದರೂ ಏನನ್ನು..?? ಮನೆಮಂದಿಯೆಲ್ಲಾ ಕುಳಿತು ನೋಡುವಂತಹಾ ಸಿನಿಮಾ ಬರುವ ಕಾಲ ಬದಲಾಗುತ್ತಿದೆ. ರೌಡಿಸಂ, ಹಿಂಸೆ, ಕ್ರೌರ್ಯ ಹೆಚ್ಚಾಗಿರುವಂತಹಾ.. ಡಬಲ್ ಮೀನಿಂಗ್ ಡೈಲಾಗ್ ಗಳು ಹಾಸ್ಯ ಎನ್ನಿಸುವಂತಹಾ ಸಿನಿಮಾಗಳ ನಡುವಲ್ಲಿ ರೇಟಿಂಗ್ , ರಿವ್ಯೂ ಗೊಡವೆಗೆ ಹೋಗದಂತಹಾ ಒಳ್ಳೆಯ ಸಿನಿಮಾಗಳಿವೆ. 

ಸಿನಿಮಾ ನೋಡುವಾಗ, ಆಯ್ಕೆ ಮಾಡಿಕೊಳ್ಳುವಾಗ ಯಾವುದನ್ನು ಎಷ್ಟು ನೋಡಬೇಕು, ಎಷ್ಟು ಪ್ರಭಾವ ಹೊಂದಬೇಕು, ಎಷ್ಟು ಪಾಲಿಸಬೇಕು ಎಂಬುದು ನಮಗೆ ಚೆನ್ನಾಗಿ ಅರಿವಿರಬೇಕು. ಎಷ್ಟು ನೆನಪಿಟ್ಟುಕೊಳ್ಳಬೇಕು ಮತ್ತು ಎಷ್ಟನ್ನು ಮನಃಪಟಲದಿಂದ ಅಳಿಸಿ ಬಿಡಬೇಕು ಎಂದೂ ತಿಳಿದಿರಬೇಕು. ರೇಟಿಂಗ್, ರಿವ್ಯೂ, ಪಾಪ್ಯುಲರ್ ಎಂಬುದನ್ನು ಗಮನದಲ್ಲಿ ಇಟ್ಟುಕೊಂಡು ಯೋಚಿಸಿದರೆ ಬಿಗ್ ಥಿಂಗ್ ಸಿನಿಮಾದ ವ್ಯಾಲ್ಯೂ. ಅಲ್ಲವಾ..??

- ವಿಭಾ ವಿಶ್ವನಾಥ್

ಬಿಗ್ ಬಜಾರ್ ಯಾಕೆ ಹಾಳಾಯ್ತು...

ಎಲ್ಲವೂ ಬದಲಾಗುತ್ತಿದೆ ಮತ್ತು ಬದಲಾಗಲೇ ಬೇಕು. ಹೌದಲ್ಲವಾ.. ಮೊದಲೆಲ್ಲಾ ಶೆಟ್ಟರ ಅಂಗಡಿಯಲ್ಲಿ ದಿನಸಿ ಸಾಮಾನು ತರುತ್ತಿದ್ದವರು ಮಾಲ್ ಗೆ ಲಗ್ಗೆ ಇಟ್ಟದ್ದು, ಮಾಮೂಲಿ ಸಿನಿಮಾ ಥಿಯೇಟರ್ ಗಳಲ್ಲಿ ಸಿನಿಮಾ ನೋಡುತ್ತಿದ್ದವರು ಈಗ ಮಾಲ್ ನ ಮಲ್ಟಿಫ್ಲೆಕ್ಸ್ ನಲ್ಲಿಯೇ ಸಿನಿಮಾ ನೋಡಬೇಕು ಎನ್ನುತ್ತಾ ಸಿನಿಮಾಗಿಂತ ಪಾಪ್ ಕಾರ್ನ್ ಗೇ ಹೆಚ್ಚು ಹಣ ಸುರಿಯುತ್ತಿರುವುದು, ಮೊದಲೆಲ್ಲಾ ಯಾವುದೋ ಪರಿಚಯದ ಅಂಗಡಿಗೆ ಹೋಗಿ ವರ್ಷಕ್ಕೆ ಎರಡು ಬಾರಿಯೋ ಮೂರು ಬಾರಿಯೋ ಬಟ್ಟೆ ತೆಗೆದುಕೊಳ್ಳುತ್ತಿದ್ದವರು ವಾರವಾರಕ್ಕೂ ಮಾಲ್ ಗೆ ಹೋಗಿ ಬೆಲೆ ಕೂಡಾ ನೋಡದೆ ಬೇಕಾಬಿಟ್ಟಿ ಕೊಂಡು ತರುವುದು. ತರಕಾರಿ, ಹಣ್ಣು ಬೇಕಾದಾಗ ಮಾರ್ಕೆಟ್ ಗೆ ಅಥವಾ ಸಂತೆಗೆ ಹೋಗಿ ತರುವ ಕಾಲ ಹೋಗಿ ಅದಕ್ಕೂ ಫ್ರೆಶ್, ಲೋ ಪ್ರೈಸ್ ಎಂದು ಜಾಹೀರಾತು ನೀಡಿರುವ ಮಾಲ್ ಗೆ ನುಗ್ಗುವುದಾಗಿದೆ. ಹತ್ತು ರೂಪಾಯಿಯ ಸೊಪ್ಪು ಒಂಬತ್ತು ರೂಪಾಯಿಗೆ ಸಿಗುತ್ತದೆ ಎನ್ನುವ ಆಸೆಗೆ ಒಂದು ಲೀಟರ್ ಪೆಟ್ರೋಲ್ ಖರ್ಚು ಮಾಡಿ ತರುವವರ ಸಂಖ್ಯೆಯೂ ಕಡಿಮೆಯೇನೂ ಇಲ್ಲ. ಅಷ್ಟೇ ಅಲ್ಲ, ವಾರಕ್ಕೆ ಬೇಕಾಗಿದ್ದನ್ನು ಸಂತೆಯಲ್ಲಿ ಹಾಗೂ ತಿಂಗಳಿಗೆ ಬೇಕಾದ ಸಾಮಾಗ್ರಿಗಳನ್ನು ಪಟ್ಟಿ ಮಾಡಿ ಹೋಲ್ ಸೇಲ್ ಅಂಗಡಿಯಲ್ಲಿ ತರುವ ಕಾಲ ಬದಲಾಗಿ ಈಗ ಸುಮ್ಮನೆ ಕೈ ಬೀಸಿಕೊಂಡು ಹೋಗಿ ಸಿಕ್ಕದ್ದನ್ನೆಲ್ಲಾ ಟ್ರಾಲಿಯಲ್ಲಿ ಹಾಕಿ ಬಿಲ್ಲಿಂಗ್ ಮಾಡಿಸುವ ಕಾಲ. ಇದು ಮಾಲ್ ಸಂಸ್ಕೃತಿಯ ಕಾಲ. 

ನಿಧಾನವಾಗಿ ಇದೂ ಬದಲಾಗುತ್ತಿದೆ. ಆದರೆ ಇನ್ನೂ ಸಂಪೂರ್ಣವಾಗಿ ಬದಲಾಗಿಲ್ಲ. ಮಾಲ್ ಗಳ ಏಳು - ಬೀಳಿನ ಹಾದಿಯನ್ನೊಮ್ಮೆ ನೋಡೋಣ ಬನ್ನಿ.

ಬೆಂಗಳೂರು, ದೆಹಲಿ, ಚೆನ್ನೈ, ಕೊಲ್ಕತ್ತಾ ಹೀಗೆ ದೊಡ್ಡ ಸಿಟಿಗಳನ್ನು ನೋಡಿದರೆ ದೊಡ್ಡ ದೊಡ್ಡ ಮಾಲ್ ಗಳು ಕಣ್ಣಿಗೆ ರಾಚುವಂತೆ ಕಾಣುತ್ತಿರುತ್ತವೆ. ಬೆಳಿಗ್ಗೆ 10 ಕ್ಕೆ ನೋಡಿದರೂ ಜನಜಂಗುಳಿ. ರಾತ್ರಿ 10 ಕ್ಕೂ ಅಷ್ಟೇ ಜನಜಂಗುಳಿ. ವೀಕೆಂಡ್ ನಲ್ಲಿ ಮತ್ತೂ ಹೆಚ್ಚು. 

ಯಾವುದೇ ಆದರೂ ಕಡಿಮೆ ಬೆಲೆಗೆ ಎಂದಾಗ ಕೊಳ್ಳುವ ಆಸೆ. ಜೊತೆಗೆ ಟಚ್ ಅಂಡ್ ಫೀಲ್ ಮಾಡಬಹುದಲ್ಲಾ.. ಟ್ರಯಲ್ ನೋಡಬಹುದಲ್ಲಾ ಎನ್ನುವ ಆಡೆಡ್ ಅಡ್ವಾನ್ಟೇಜ್ ಬೇರೆ. ಒಮ್ಮೆ ಮಾಲ್ ಒಳ ಹೊಕ್ಕರೆ ದಿನಸಿ ತೆಗೆದುಕೊಳ್ಳುವುದು, ಎಲೆಕ್ಟ್ರಾನಿಕ್ಸ್ ಗೂಡ್ಸ್, ಬಟ್ಟೆ, ಫುಟ್ ವೇರ್ ಹೀಗೆ ಎಲ್ಲಾ ರೀತಿಯ ದಿನ ಬಳಕೆಯ ವಸ್ತುಗಳು, ಶಾಪಿಂಗ್ ಮಾಡಿ ದಣಿವಾಯಿತು ಎಂದರೆ ಸಿನಿಮಾಗೆ ಮಲ್ಟಿಫ್ಲೆಕ್ಸ್, ತರಹೇವಾರಿಯಾಗಿ ಬೇಕಾದ ತಿನಿಸು ತಿನ್ನಲು ಫುಡ್ ಕೋರ್ಟ್. ಬೇಸರವಾದರೆ ವಿಂಡೋ ಶಾಪಿಂಗ್. ಅಂದ ಹಾಗೆ ಇಲ್ಲಿ ಬಂದ ಮೇಲೆ ಕೊಳ್ಳಲೇ ಬೇಕು ಎನ್ನುವ ನಿಯಮವೂ ಇಲ್ಲವಲ್ಲ.. ಟೈಮ್ ಪಾಸ್ ಗೆ ಮಾಲ್ ಎನ್ನುವಂತಾಗಿತ್ತು. 

ಮೊದಲೆಲ್ಲಾ ಬೆಂಗಳೂರಿಗೆ ಬಂದಾಗ ಮಾಲ್ ಎಂದರೆ ಅದೊಂದು ಬೆರಗಿನ ಲೋಕದಂತೆ. ಆ ಎಸ್ಕಲೇಟರ್, ಲಿಫ್ಟ್ ಎಲ್ಲವೂ ವಿಭಿನ್ನ ಅನುಭವವನ್ನೇ ಕೊಡುತ್ತಿದ್ದವು. ಆದರೆ, ಏನನ್ನಾದರೂ ಕೊಳ್ಳಲು ಹಿಂದೆ ಮುಂದೆ ನೋಡಬೇಕಿತ್ತು. ಏಕೆಂದರೆ, ಮಾಲ್ ಎಂದರೆ ಆಗ ದುಬಾರಿ ಎನ್ನಿಸುತ್ತಿತ್ತು. ಈಗಲೂ ಕೆಲವೊಮ್ಮೆ ಹಾಗೆಯೇ ಅನ್ನಿಸುವುದಿದೆ. ಹಣಕಾಸಿನ ತೊಂದರೆ ಎಂದಲ್ಲ. ಆದರೆ, ಊರಿನಲ್ಲಿ ಕಡಿಮೆ ಬೆಲೆಗೆ ಸಿಗುತ್ತಿದ್ದದ್ದು ಇಲ್ಲಿ ದುಬಾರಿ ಎಂಬ ಭಾವ. ಅದೇ 50% ಆಫರ್ ಎಂದೋ.. ಹಬ್ಬದ ರಿಯಾಯಿತಿ ಎಂದೋ ಅಥವಾ ಕೂಪನ್ ಗೆ ಇಷ್ಟು ದುಡ್ಡಿಗೆ ಕೊಂಡರೆ ಇಷ್ಟು ರಿಯಾಯಿತಿ ಎಂದೋ ಇದ್ದರೆ ಅದೇನೋ ಸೆಳೆತ. ಆನಂತರ, ನಮ್ಮ ಮನಸ್ಥಿತಿ ಬದಲಾಯಿತೋ ಅಥವಾ ಮಾಲ್ ಗಳ ವಸ್ತುಗಳು ಕೈಗೆಟುಕುವ ಬೆಲೆಗೆ ಸಿಗುವಂತಾಯಿತೋ ಅಂತೂ ಶ್ರೀಮಂತರಿಗೆ ಎಂದಿದ್ದ ಮಾಲ್ ಮಧ್ಯಮ ವರ್ಗದವರನ್ನೂ ಸೆಳೆಯತೊಡಗಿತು. ದೊಡ್ಡ ದೊಡ್ಡ ಸಿಟಿಗಳಲ್ಲಿ ಮಾತ್ರ ಇದ್ದ ಮಾಲ್ ಗಳು ಈಗ ಸಣ್ಣ ಪುಟ್ಟ ಪಟ್ಟಣಗಳಿಗೂ ಲಗ್ಗೆ ಇಟ್ಟವು. ದೊಡ್ಡ ದೊಡ್ಡ ನಗರಗಳಲ್ಲಿ ಒಂದೇ ರಸ್ತೆಯಲ್ಲಿ ಕಾಂಪಿಟೇಶನ್ ಎನ್ನುವಂತೆ ಅಕ್ಕ - ಪಕ್ಕವೇ ಮಾಲ್ ಗಳು ಬಂದವು.

ನಾನು ಚೆನ್ನೈಗೆ ಬಂದ ನಂತರ ಇಲ್ಲಿ ಗಮನಿಸಿದ್ದು ಜನರಿಗೆ ಏನೇ ಬೇಕಾದರೂ ಮೊದಲ ಆಯ್ಕೆ 'ಸರವಣ ಸೂಪರ್ ಸ್ಟೋರ್' ಎನ್ನುವ ಮಾಲ್. ಸಾಮಾನ್ಯರಿಗೆ ಕೈಗೆಟಕುವ ಬೆಲೆಯಲ್ಲಿ ಎಲ್ಲವೂ ಒಂದೇ ಕಡೆ ಸಿಗುವ ಮಾಲ್. ಚಿಕ್ಕ ಸೂಜಿಯಿಂದ ಹಿಡಿದು ಎಲ್ಲವೂ ಇಲ್ಲಿ ಲಭ್ಯ. ಜೊತೆಗೆ ಇಲ್ಲಿ ಎಷ್ಟೇ ಹೆಸರಾಂತ ಮಾಲ್, ಬ್ರ್ಯಾಂಡೆಡ್ ಶಾಪಿಂಗ್ ಸೆಂಟರ್ ಗಳಿದ್ದರೂ ಇಲ್ಲಿ ಪ್ರಾದೇಶಿಕತೆಗೋ ಅಥವಾ ಅಲ್ಲಿನ ಸಿಸ್ಟಮ್ ಗೋ ಗೊತ್ತಿಲ್ಲ ಇಲ್ಲಿನವರ ಆಯ್ಕೆ ಸರವಣವೇ..

ಮಾಲ್ ಎಂಬುದರ ಅನ್ವರ್ಥ ನಾಮದಂತಿದ್ದ 'ಬಿಗ್ ಬಜಾರ್'ನ ಕಾನ್ಸೆಪ್ಟ್ ಕೂಡಾ ಈ ಸರವಣ ಸ್ಟೋರ್ಸ್ ನೋಡಿಯೇ ಬಂದದ್ದು ಎಂದರೆ ಅಚ್ಚರಿಯೇ. ಹಾಸನದಲ್ಲಿ ನಾನು ಕಂಡಂತೆ ಮೊದಲಿಗೆ ಬಂದ ಮಾಲ್ ಎಂದರೆ ಬಿಗ್ ಬಜಾರ್. ಆದರೆ, ನಂತರ ಅದು ಮುಚ್ಚಿ ಹೋದಾಗ ಬಹುಶಃ ಏನೋ ಬಿಲ್ಡಿಂಗ್ ಕೆಲಸ ನಡೆಯುತ್ತಾ ಇರಬಹುದು ಎಂದೇ ಭಾವಿಸಿದ್ದೆವು. ನಂತರ ತಿಳಿದದ್ದು ಬಿಗ್ ಬಜಾರ್ ಸಂಪೂರ್ಣವಾಗಿ ಮುಚ್ಚಿಹೋಗಿದೆ ಎಂದು. ಯಾಕೆ ಹೀಗಾಯ್ತು ಎಂದು ಹುಡುಕುತ್ತಾ ಹೋದಾಗ ತಿಳಿದದ್ದು ಒಂದು ಯಶೋಗಾಥೆಯ ದುರಂತಗಾಥೆ.

1961 ರಲ್ಲಿ ಮಾರವಾಡಿ ಕುಟುಂಬದಲ್ಲಿ ಹುಟ್ಟಿದ ಕಿಶೋರ್ ಬಿಯಾನಿಗೆ ರಕ್ತಗತವಾಗಿಯೇ ಸಿದ್ಧಿಸಿತು ಬಿಸಿನೆಸ್ ನ ಕಲೆ. ಆದರೆ , ಅದ್ಯಾಕೋ ಅವರದ್ದೇ ಸಿಲ್ಕ್ ಫ್ಯಾಕ್ಟರಿ ಮಾತ್ರ ನೋಡಿಕೊಳ್ಳುವುದರಲ್ಲಿ ಮನಸ್ಸಿರಲಿಲ್ಲ. ತಲೆಯಲ್ಲಿ ಹೊಸ ಹೊಸ ಆಲೋಚನೆಗಳು ಬರುತ್ತಿದ್ದವಾದರೂ ಅದನ್ನು ಕಾರ್ಯರೂಪಕ್ಕೆ ತರಲು ಐಡಿಯಾ ಸಿಕ್ಕಿರಲಿಲ್ಲ. ಆ ಸಮಯದಲ್ಲಿ ತನ್ನ ಸ್ನೇಹಿತನೊಬ್ಬ ತಯಾರಿಸಿದ 'ಸ್ಟೋನ್ ವಾಷ್ ಪ್ಯಾಬ್ರಿಕ್' ಎಂಬ ಬಟ್ಟೆಯನ್ನು ಕಂಡರು. ಇದರ ವಿಶೇಷತೆ ಎಂದರೆ ನೋಡಲು ಒರಟಾಗಿದ್ದರೂ ಸ್ಟೋನ್ ವಾಷ್ ಪ್ರಕ್ರಿಯೆಯಿಂದ ಗಟ್ಟಿ ಬಟ್ಟೆಗೆ ಮೃದುತ್ವ ನೀಡುತ್ತಿತ್ತು. ಮತ್ತು ಬಟ್ಟೆಯನ್ನು ಧರಿಸಿದರೂ ಹೊಸದಾಗಿಯೇ ಕಾಣುವಂತೆ ರೂಪಿಸಲಾಗಿತ್ತು. ಇದನ್ನು ಉಪಯೋಗಿಸಿಕೊಂಡ ಬಿಯಾನಿ 1987 ರಲ್ಲಿ ಕಲ್ಕತ್ತಾದಲ್ಲಿ ಪುರುಷರಿಗಾಗಿ ಮೆನ್ಸ್ ವೇರ್ ಹೋಲ್ ಸೇಲ್ ರಿಟೇಲ್ ಶಾಪ್ ಒಂದನ್ನು ಶುರು ಮಾಡುತ್ತಾರೆ. ಅದೇ 'ಪ್ಯಾಂಟಲೂನ್ಸ್'. ನಂತರ ವುಮನ್ಸ್ ವೇರ್ ಹಾಗೂ ಕಿಡ್ಸ್ ವೇರ್ ಗಳೂ ಬಂದವು.

ಇದೊಂದೇ ಅಲ್ಲ ಸೆಂಟ್ರಲ್, ಎಫ್.ಬಿ.ಬಿ, ಬ್ರ್ಯಾಂಡ್ ಫ್ಯಾಕ್ಟರಿ ಗಳನ್ನೂ ಶುರು ಮಾಡಿದರು. ಬೇರ್ ನೆಸೆಸಿಟಿಸ್ ಮತ್ತು ಜಾನ್ ಮಿಲ್ಲರ್ ಎನ್ನುವ ವಿದೇಶಿ ಕಂಪೆನಿಗಳ ಜೊತೆಗೆ ಟೈ ಅಪ್ ಮಾಡಿಕೊಂಡರು. ಇವೆಲ್ಲವನ್ನೂ ಸೇರಿ ತನ್ನ ಕಂಪೆನಿಗೆ 'ಫ್ಯೂಚರ್ ಗ್ರೂಪ್' ಎಂದು ಹೆಸರಿಟ್ಟರು. 2000 ನೇ ಇಸವಿಯ ಸಮಯದಲ್ಲಿ ಚೆನ್ನೈಗೆ ಭೇಟಿ ಕೊಟ್ಟಾಗ ಅಲ್ಲಿನ ಸರವಣ ಸ್ಟೋರ್ಸ್ ಅನ್ನು ಕಂಡು ಎಲ್ಲಾ ವಸ್ತುಗಳನ್ನು ಒಂದೇ ಸ್ಥಳದಲ್ಲಿ ನೀಡಬಾರದು ಏಕೆ ಎಂದು ಆಲೋಚಿಸಿ ಮೊದಲು ಕೋಲ್ಕತ್ತಾದಲ್ಲಿ, ನಂತರ ಹೈದರಾಬಾದ್ ನಲ್ಲಿ ನಂತರ ಬೆಂಗಳೂರಿನಲ್ಲಿ ಬಿಗ್ ಬಜಾರ್ ಅನ್ನು ಶುರು ಮಾಡಿಯೇ ಬಿಟ್ಟರು. ನಂತರ ವ್ಯಾಪಾರ ವಿಸ್ತರಣೆಯನ್ನೂ ಮಾಡಿದರು. ಇದೆಲ್ಲದಕ್ಕೂ ಮನೆ, ಆಸ್ತಿ ಮೇಲೆ ಹಾಗೂ ಬ್ಯಾಂಕ್ ಗಳಿಂದ ಸಾಲವನ್ನೂ ಮಾಡಿದ್ದರು. ಎಲ್ಲವೂ ಲಾಭದಾಯಕವಾಗಿಯೇ ನಡೆಯುತ್ತಿತ್ತು.

2006 ರ ಗಣರಾಜ್ಯೋತ್ಸವದ ಪ್ರಯುಕ್ತ ಜನವರಿ 26 ರಂದು 50% ಡಿಸ್ಕೌಂಟ್ ಸೇಲ್ ಅನ್ನು ಆಯೋಜಿಸಿದ್ದರು. ಬೆಂಗಳೂರು,ಪುಣೆ, ಕಲ್ಕತ್ತಾದಲ್ಲಿ ಜನ ಮುಗಿಬಿದ್ದು ಕೊಂಡದ್ದನ್ನು ಕಂಡು ಒಂದು ದಿನಕ್ಕೆ ಮಾತ್ರ ಇದ್ದ ಆಫರ್ ಅನ್ನು ಮೂರು ದಿನಕ್ಕೆ ವಿಸ್ತರಿಸಿದರು. ನಿರಂತರ ಲಾಭದಲ್ಲಿದ್ದ ಸಂಸ್ಥೆಗೆ ಮೊದಲ ಆರ್ಥಿಕ ಹೊಡೆತ ಬಿದ್ದದ್ದು 2008 ರಲ್ಲಿ. 2008 ರಲ್ಲಿ ಆದ ಆರ್ಥಿಕ ಮಹಾಕುಸಿತದಿಂದ ಎಲ್ಲೆಡೆ ರಿಸೆಷನ್ ಶುರುವಾಗಿತ್ತು. ಉದ್ಯೋಗಿಗಳ ಕೆಲಸ ಹೋಗುತ್ತಿದ್ದ ಕಾಲದಲ್ಲಿ ಬದುಕು ನಡೆಸಲು ದುಸ್ತರವಾದ ಕಾಲದಲ್ಲಿ ಎಂಟರ್ಟೈನ್ ಮೆಂಟ್ ಗೆಂದು ಜನ ವ್ಯಯಿಸಿಯಾರಾ ? 2012 ರ ಹೊತ್ತಿಗೆ ಬಿಯಾನಿಯ ಮೇಲೆ 8000 ಕೋಟಿ ಸಾಲವಿತ್ತು. 

ಇದನ್ನು ಕೊಂಚವಾದರೂ ಸರಿಪಡಿಸಿಕೊಳ್ಳಬಹುದು ಎಂಬ ಆಶಾಕಿರಣದಿಂದ ಆದಿತ್ಯಾ ಬಿರ್ಲಾ ಗ್ರೂಪ್ ಗೆ 1600 ಕೋಟಿಗೆ ಪ್ಯಾಂಟಾಲೂನ್ಸ್ ಅನ್ನು ಮಾರಿದರು. ಇದಿಷ್ಟೇ ಆಗಿದ್ದರೆ ಚೇತರಿಸಿಕೊಳ್ಳುತ್ತಿದ್ದರೋ ಏನೋ.. ಆದರೆ, ಇನ್ಸುರೆನ್ಸ್ ಮತ್ತು ಈ- ಕಾಮರ್ಸ್ ಕೂಡಾ ಶುರು ಮಾಡಲು ಹೋಗಿ ಕೈ ಸುಟ್ಟುಕೊಂಡರು. ಹೆರಿಟೇಜ್ ಫ್ರೆಶ್, ಹೈಪರ್ ಸಿಟಿ, ಈಸಿ ಕ್ಲಬ್ ಗಳನ್ನು ಕೊಂಡು ರಿಟೇಲ್ ಚೈನ್ ಲಿಂಕ್ ಮಾಡುವ ಪ್ಲಾನ್ ಮಾಡಿದರು. ಆದರೆ, ಅದು ಪ್ಲಾಪ್ ಆಯಿತು. ಇವೆಲ್ಲದರಿಂದ ಸಾಲದ ಹೊರೆ ಹೆಚ್ಚಾಗಿ 12989 ಕೋಟಿ ಸಾಲವಾಯಿತು. ಪರಿಣಿತಿ ಹೊಂದಿದವರ ಮಾರ್ಗದರ್ಶನವಿಲ್ಲದೆ, ಸೂಕ್ತ ಮಾರ್ಗದರ್ಶನ ಇಲ್ಲದೆ ಹೋದಾಗ ಹೀಗಾಗಬಹುದು. ಬಿಸಿನೆಸ್ ಟ್ರೈಯಲ್ ಎರರ್ ಗಳ ಮೇಲೆ ನಿಂತಿದೆ ಎಂದಾದರೂ ಎಲ್ಲವೂ ಯಶಸ್ಸು ಕಾಣಲೇ ಬೇಕು ಎಂದಿಲ್ಲ.

2019 ರಲ್ಲಿ ಅಮೆಜಾನ್ ನವರು ಫ್ಯೂಚರ್ ಗ್ರೂಪ್ ಅನ್ನು ಖರೀದಿಸಲು ಮುಂದೆ ಬಂದರು. ಇನ್ನೇನು ಎಲ್ಲವೂ ಮಾರಾಟವಾಗಬೇಕು ಎನ್ನುವ ಸಂಧರ್ಭದಲ್ಲಿ 2020 ರಲ್ಲಿ ಕೋವಿಡ್ ನಿಂದ ಎಲ್ಲವೂ ಅಲ್ಲಲ್ಲಿಯೇ ನಿಂತಿತ್ತು. ನಂತರ ಕೋವಿಡ್ ದುರಿತ ಕಾಲ ಮುಗಿದ ಮೇಲೆ ರಿಲಯನ್ಸ್ ತಾನು 24,713 ಕೋಟಿಗೆ ಕೊಳ್ಳುವುದಾಗಿ ಹೇಳಿ ಮುಂದೆ ಬಂದಿತು. ಇನ್ನೇನು ಎಲ್ಲಾ ಒಪ್ಪಂದವೂ ಮುಗಿಯಬೇಕು ಎಂದಾಗ ಅಮೆಜಾನ್ ಕೋರ್ಟಿನಿಂದ ಲೀಗಲ್ ನೋಟಿಸ್ ತಂದಿತು. ಕಾರಣವೆಂದರೆ,

ಫ್ಯೂಚರ್ ಗ್ರೂಪ್ ನವರು 2000 ಕೋಟಿಗೆ ಕೂಪನ್ ಸ್ಟೇಕ್ ಅನ್ನು ಅದಾಗಲೇ ಅಮೆಜಾನ್ ಗೆ ಕೊಟ್ಟಿದ್ದರು. ಇದರ ಸಹವಾಸವೇ ಬೇಡವೆಂದು ಹಿಂದೆ ಸರಿಯಿತು ರಿಲಯನ್ಸ್. ಇದೆಲ್ಲದರ ಪರಿಣಾಮ ಬಿಗ್ ಬಜಾರ್ ಈಗ ಅಸ್ತಿತ್ವದಲ್ಲಿಲ್ಲ.

ಇವತ್ತಿನ ನಂಬರ್ ಒನ್ ಮಾಲ್ ಕೊಚ್ಚಿಯ ಲುಲು ಮಾಲ್. ಈ ನಂಬರ್ ಒನ್ ಪಟ್ಟ ಹಾಗೆಯೇ ಉಳಿಯುತ್ತದಾ ? ಬಿಸಿನೆಸ್ ಎಂಬುದು ಯಾವತ್ತಿಗೂ ಏರಿಳಿತದ ಹಾದಿ. 

ಈ ಮಾಲ್ ಕಾನ್ಸೆಪ್ಟ್ ಮೊದಲು ಶುರುವಾಗಿದ್ದು ಅಮೆರಿಕಾದಲ್ಲಿ. ಶುರು ಮಾಡಿದ್ದು ವಿಕ್ಟರ್ ಗೃಯೆನ್. ಭಾರತದಲ್ಲಿ ಮೊದಲ ಮಾಲ್ ಶುರುವಾಗಿದ್ದು 1999 ರಲ್ಲಿ. ಅದೇ ದೆಹಲಿಯ ಅನ್ಸಾಲ್ಸ್ ಪ್ಲಾಜಾ. ನಂತರ ಮುಂಬಯಿಯಲ್ಲಿ 'ಕ್ರಾಸ್ ರೋಡ್ಸ್' ಎನ್ನುವ ಮಾಲ್ ಶುರುವಾಯಿತು. ನಂತರ ಬಂದದ್ದು ಚೆನ್ನೈನ 'ಸ್ಪೆನ್ಸರ್ ಪ್ಲಾಜಾ'. 2002 ರ ವರೆಗೂ ಭಾರತದಲ್ಲಿ ಇದ್ದದ್ದು ಮೂರು ಮಾಲ್ ಗಳು ಮಾತ್ರವೇ. 2003 ರಿಂದ ಮಾಲ್ ಗಳು ಹೆಚ್ಚಾಗತೊಡಗಿದವು. 2007 ರಿಂದ 2008 ರವರೆಗೂ ಮಾಲ್ ಗಳ ಭರಾಟೆ ಜೋರಾಗಿದ್ದ ಕಾಲ. 2008 ಕ್ಕೆ ರಿಸೆಷನ್ ಬಂದು ಹೆಚ್ಚಿನ ಉತ್ಸಾಹಿಗಳು ಹೊರ ನಡೆದರು. ಮಾಲ್ ಗಳು ಮಾತ್ರವಲ್ಲ ದೇಶದಲ್ಲೇ ಹಣದ ವಹಿವಾಟು ತೀರಾ ಮಂದಗತಿಯಾಗಿದ್ದ ಕಾಲ. 

ಆದರೆ, 2011 ರಿಂದ ಮತ್ತೆ ಮಾಲ್ ಗಳ ಭರಾಟೆ ಜೋರಾಯಿತು. 2012 ರಲ್ಲಿ 190 ಮಾಲ್ ಗಳಿದ್ದರೆ 2018 ರ ಹೊತ್ತಿಗೆ 253 ಆಗಿದ್ದವು. 2022 ರಲ್ಲಿ 690 ಕ್ಕೂ ಹೆಚ್ಚು ಮಾಲ್ ಗಳಿವೆ ಮತ್ತು 150 ಇನ್ನೂ ನಿರ್ಮಾಣ ಹಂತದಲ್ಲಿವೆ. ಇಷ್ಟು ಮಾಲ್ ಗಳು ಇವೆಯಾದರೂ ಎಲ್ಲವೂ ಲಾಭದಾಯಕವಾಗಿವೆಯಾ ? 

ಖಂಡಿತವಾಗಿಯೂ ಎಲ್ಲವೂ ಲಾಭದಾಯಕವಾಗಿಲ್ಲ. ಒಂದೇ ರೋಡಿನಲ್ಲಿ 10 ಬೇಕರಿಗಳು ಅಕ್ಕ - ಪಕ್ಕದಲ್ಲಿಯೇ ಇದ್ದಾಗ ನಮ್ಮ ಆಯ್ಕೆ ಶುಚಿ- ರುಚಿ, ಕ್ವಾಲಿಟಿ, ಕ್ವಾಂಟಿಟಿ ಜೊತೆಗೆ ಕಡಿಮೆ ಬೆಲೆ. ಎಲ್ಲವೂ ಬ್ಯಾಲೆನ್ಸ್ ಆಗಿರುವುದು ನಮ್ಮ ಆಯ್ಕೆ. ಅಲ್ಲವೇ..? ಈಗ ಮಾಲ್ ಗಳ ಆಯ್ಕೆ ಕೂಡಾ ಹಾಗೆಯೇ ಆಗುತ್ತಿದೆ. ಜನರ ಓಡಾಟ ಕಡಿಮೆಯಾಗಿ, ಮಾಲ್ ಬಾಡಿಗೆ ಕಟ್ಟಲಾಗದೆ ಎಷ್ಟೋ ಮಾಲ್ ಗಳು ಮುಚ್ಚಿವೆ. ಇಂತಹವುಗಳನ್ನು 'ಡೆಡ್ ಮಾಲ್' ಅಥವಾ 'ಜಾಂಬಿ ಮಾಲ್' ಪಟ್ಟಿಗೆ ಸೇರಿಸಲಾಗಿದೆ. ಕೆಲವನ್ನು ಮಾರ್ಪಾಡು ಮಾಡಿ ಅಪಾರ್ಟ್ಮೆಂಟ್ ಮಾಡಿದ್ದಾರೆ. ಮಾಲ್ ಗಳ ಮೈಂಟೆನೆನ್ಸ್ ಸುಲಭವಾಗಿಯೇನೂ ಇಲ್ಲ. ದೊಡ್ಡ ಪಾರ್ಕಿಂಗ್ ಏರಿಯಾ, ಸೆಕ್ಯೂರಿಟಿ ವ್ಯವಸ್ಥೆ, ಗಾರ್ಡ್ ಗಳು, ಸುರಕ್ಷತೆ, ಸ್ವಚ್ಛತೆ, ಒಳಾವರಣದ ಹವಾಮಾನ ಕಾಯ್ದುಕೊಳ್ಳುವಿಕೆ , ಲಿಫ್ಟ್, ಎಸ್ಕಲೇಟರ್, ವಿದ್ಯುಚ್ಛಕ್ತಿ ಹೀಗೆ ಎಲ್ಲವೂ ದುಬಾರಿಯೇ.. ಮಾಲ್ ಮಾತ್ರ ದೊಡ್ಡದಾಗಿರುವುದಲ್ಲ.. ಅದನ್ನು ನಿಭಾಯಿಸುವ ಖರ್ಚು ಕೂಡಾ ಹೆಚ್ಚೇ..

ಈಗ ಡಿಜಿಟಲ್ ಕಾಲ.  ಈ- ಕಾಮರ್ಸ್ ಬೆಳೆಯುತ್ತಿರುವ ಕಾಲ. ಬಟ್ಟೆ ಕೊಳ್ಳಬೇಕೆಂದಾಗ ಮೊಬೈಲ್ ನಲ್ಲಿಯೇ ಆರ್ಡರ್ ಮಾಡಿಕೊಳ್ಳಬಹುದು. ಮಿಂತ್ರಾ, ಫ್ಲಿಪ್ ಕಾರ್ಟ್, ಅಮೆಜಾನ್, ಆಜಿಯೋ, ಮ್ಯಾಕ್ಸ್, ಮೀಶೋ, ಸ್ನಾಪ್ ಡೀಲ್ ಹೀಗೆ ಪಟ್ಟಿ ಬೆಳೆಯುತ್ತಾ ಹೋಗುತ್ತದೆ. ಕೊಳ್ಳುವುದು ಹಾಗೂ ಹಿಂದಿರುಗಿಸುವುದು ಕೂಡಾ ಇಲ್ಲಿ ಸುಲಭವೇ. ಜೊತೆಗೆ ಮಾಲ್ ನಲ್ಲಿ ಅಂಗಡಿಯ ಬಾಡಿಗೆ, ಮೈಂಟೆನೆನ್ಸ್, ಜಾಹೀರಾತು ಎನ್ನುತ್ತಾ ಇನ್ನೂ ಹೆಚ್ಚಿನ ಬೆಲೆಯೇ ಇರುತ್ತದೆ. ಅಲ್ಲದೇ, ಈಗ ಫ್ಯಾಶನ್ ಟ್ರೆಂಡ್ ನಿಮಿಷ, ನಿಮಿಷಕ್ಕೂ ಬದಲಾಗುತ್ತಲೇ ಇರುತ್ತದೆ. ಈ- ಕಾಮರ್ಸ್ ವೆಬ್ಸೈಟ್ ಗಳು ತಮ್ಮ ಕ್ಯಾಟಲಾಗ್ ಅನ್ನು ಪ್ರತಿ ದಿನ, ಪ್ರತಿ ಗಂಟೆ ಅಷ್ಟೇ ಏಕೆ ಪ್ರತಿ ನಿಮಿಷವೂ ಬದಲಾಯಿಸುತ್ತಿರುತ್ತವೆ. ಆದರೆ, ಮಾಲ್ ನಲ್ಲಿ ಈ ಬದಲಾವಣೆ ಬಹಳ ನಿಧಾನದ ಪ್ರಕ್ರಿಯೆ.

ನಮ್ಮ ಗ್ರಾಹಕರ ಮನಸ್ಥಿತಿ , ಚಾಯ್ಸ್ ಹಾಗೂ ಮೈಂಡ್ ಸೆಟ್ ಆಗಾಗ ಬದಲಾಗುತ್ತಲೇ ಇರುತ್ತದೆ. ಒಮ್ಮೆ ಬೆಲೆ, ಒಮ್ಮೆ ಕ್ವಾಅಳಿತಿ, ಒಮ್ಮೆ ಟ್ರೆಂಡಿಂಗ್, ಒಮ್ಮೆ ಹಳೆಯ ಡಿಸೈನ್ ಹೀಗೆ ಬಯಸಿದ್ದು ಸಿಗುವುದು ಕೊಂಚ ಕಷ್ಟ ಹಾಗೂ ನಿಧಾನವೇ. 

ಈಗ ಆರ್ಡರ್ ಮಾಡಿದ 10 ನಿಮಿಷಗಳಲ್ಲಿಯೇ ಕೂತಲ್ಲಿಗೆ ಬರುವ ದಿನಸಿ, ತರಕಾರಿ, ಹಣ್ಣು, ಆಹಾರ ಇವೆಲ್ಲಕ್ಕೂ ಸ್ವಿಗ್ಗಿ, ಜೊಮ್ಯಾಟೋ, ರ್ಯಾಪಿಡೋ, ಜೆಪ್ಟೋ ಇರುವಾಗ ಹೊರಗೆ ಕಾಲಿಡುವ ಅವಶ್ಯಕತೆಯೇ ಇಲ್ಲ ಎನ್ನುತ್ತಾರೆ ಕೆಲವರು. ಕೋವಿಡ್ ನ ಪರಿಣಾಮ ಕೂಡಾ ಕಡಿಮೆಯದ್ದೇನಲ್ಲ. ಆ ಕಾಲದಲ್ಲಿ ಉಂಟಾದ ನಿರುದ್ಯೋಗ ಸಮಸ್ಯೆ, ಹಣದ ಸಮಸ್ಯೆಯಿಂದಲೂ ಇನ್ನೂ ಚೇತರಿಸಿಕೊಳ್ಳಬೇಕಿದೆ. 

ಮಾಲ್ ಗಳ ಬಳಕೆ ಹೆಚ್ಚಬೇಕೆಂದರೆ ಮಾಲ್ ಗಳಲ್ಲಿ ಕೂಡಾ ಕೆಲವು ಬದಲಾವಣೆ ಬೇಕೆನ್ನುತ್ತಾರೆ ಜನರು. ಅದರ ಲೇಔಟ್ ಹಾಗೂ ಡಿಸೈನ್ ನಲ್ಲಿ ಬದಲಾವಣೆಯಾಗಿದೆ. ಅಡ್ವಾನ್ಸ್ಡ್ ಟೆಕ್ನಾಲಜಿ ಗಳನ್ನು ಬಳಸಬೇಕಿದೆ. ಮತ್ತೆ ಗ್ರಾಹಕರನ್ನು ಅವರ ಕೊಂಡುಕೊಳ್ಳುವಿಕೆಯನ್ನು ಗಮನಿಸಿ, ಅರ್ಥ ಮಾಡಿಕೊಂಡು ಅವರ ವಿಶ್ವಾಸ ಗಳಿಸಬೇಕಿದೆ. ಒಂದೇ ಕಡೆ ಹೆಚ್ಚಿನ ಮಾಲ್ ನಿರ್ಮಾಣ ಮಾಡುವುದಕ್ಕಿಂತ ಮಾಲ್ ಗಳು ಇಲ್ಲದ ಪ್ರದೇಶದಲ್ಲಿಯೂ ಅವುಗಳನ್ನು ನಿರ್ಮಿಸಬಹುದಾಗಿದೆ. 

ಎಲ್ಲವೂ ಬದಲಾಗುತ್ತಿದೆ ಮತ್ತು ಬದಲಾಗಲೇ ಬೇಕು. ಹೌದಲ್ಲವಾ.. 

~ವಿಭಾ ವಿಶ್ವನಾಥ್

ಎನ್ ಲೈಟಿಂಗ್ ಆನ್ ಮೂನ್ ಲೈಟಿಂಗ್

ಇತ್ತೀಚಿಗೆ ಐ.ಟಿ ಕಂಪೆನಿಗಳಿಗೆ ತಲೆಬಿಸಿಯಾಗಿ ಪರಿಣಮಿಸಿರುವ ಈ ಮೂನ್ ಲೈಟಿಂಗ್ ಬೆಳದಿಂಗಳಂತೆ ತಂಪಾಗಿಲ್ಲ. ಇನ್ಪೋಸಿಸ್ ಹಾಗೂ ಐ.ಬಿ.ಎಂ ಗಳು ಮೂನ್ ಲೈಟಿಂಗ್ ಕುರಿತು ತನ್ನ ಕಂಪೆನಿಯ ಉದ್ಯೋಗಿಗಳಿಗೆ ವಾರ್ನಿಂಗ್ ನೀಡಿದ್ದರೆ, ವಿಪ್ರೋ ತನ್ನ ಮುನ್ನೂರು ಉದ್ಯೋಗಿಗಳನ್ನು ವಜಾ ಮಾಡಿದೆ. ಯಾಕೆ ? ಯಾವಾಗ ? ಇದರ ಪರ-ವಿರೋಧಗಳೇನು ಎಂಬುದರ ಕುರಿತು ತಿಳಿಯೋಣ ಬನ್ನಿ.

ಮೂನ್ ಲೈಟಿಂಗ್ ಎಂಬುದು ಭಾರತದ ಪದವಲ್ಲ. ಇದು ಯು.ಎಸ್ ನ ಪದ. ಮೂನ್ ಲೈಟಿಂಗ್ ಅಂದರೆ ಮತ್ತೇನಲ್ಲ.. ತಾನು ಈಗ ಮಾಡುತ್ತಿರುವ ಒಂದು ಉದ್ಯೋಗದ ಜೊತೆಗೆ ಮತ್ತೊಂದು ಉದ್ಯೋಗ ಮಾಡುವುದು. ಹಣದ ಆವಶ್ಯಕತೆಗೆ ಅಥವಾ ತಮ್ಮ ಸ್ಕಿಲ್ ಗಳನ್ನು ಉಪಯೋಗಿಸಿಕೊಳ್ಳಲು ಉದ್ಯೋಗಿಗಳು ಕೆಲಸದ ಅವಧಿಯ ತರುವಾಯ ಮತ್ತೊಂದು ಕೆಲಸ ಹಿಡಿಯುವುದೇ ಮೂನ್ ಲೈಟಿಂಗ್. ಸಾಮಾನ್ಯವಾಗಿ ಕೆಲಸಗಳು 9 ರಿಂದ 5 ರ ವರೆಗೆ ಇರುವಾಗ ಉದ್ಯೋಗಿಗಳು ರಾತ್ರಿ ಪಾಳಿಯ ಮತ್ತೊಂದು ಕೆಲಸವನ್ನು ಹಿಡಿದಾಗ ರಾತ್ರಿಯನ್ನು ಸೂಚಿಸುವ ಪದವಾಗಿ ಮೂನ್ ಲೈಟಿಂಗ್ ಬಳಕೆಯಲ್ಲಿದೆ. ಹೆಚ್ಚಿನ ಐ.ಟಿ ಕಂಪೆನಿಗಳಲ್ಲಿ ವಾರದ ಐದು ದಿನಗಳಲ್ಲಿ ಮಾತ್ರ ಕೆಲಸವಿದ್ದು ಮತ್ತೆರಡು ದಿನ ರಜೆ ಇರುವಾಗ ಬೇರೆ ಚಿಕ್ಕ - ಪುಟ್ಟ ಪ್ರಾಜೆಕ್ಟ್ ಗಳಲ್ಲಿ ಅಥವಾ ಫ್ರೀ ಲ್ಯಾನ್ಸಿಂಗ್ ವರ್ಕ್ ಗಳಲ್ಲಿ ತಮ್ಮನ್ನು ತಾವು ತೊಡಗಿಸಿಕೊಳ್ಳುವವರೂ ಇದ್ದರು.

ಆದರೆ, ಕೋವಿಡ್ ಬಂದು ಲಾಕ್ ಡೌನ್ ಶುರುವಾದ ನಂತರ ಹೆಚ್ಚು ಕಡಿಮೆ ಎಲ್ಲರೂ ವರ್ಕ್ ಫ್ರಮ್ ಹೋಮ್ ಪದ್ಧತಿಯನ್ನು ಅನುಸರಿಸಲು ಆರಂಭಿಸಿದರು. ಆಗಿನಿಂದ ಮೂನ್ ಲೈಟಿಂಗ್ ಪದ್ದತಿ ಹೆಚ್ಚಿತು. 

ಈ ಕುರಿತು ಕಳೆದ ತಿಂಗಳು ವಿಪ್ರೋ ಅಧ್ಯಕ್ಷ ಅಜಿಂ ಪ್ರೇಮ್ ಜೀ ಮಾಡಿದ್ದ ಟ್ವೀಟ್ ನಲ್ಲಿ ಮೂನ್ ಲೈಟಿಂಗ್ ಮೋಸ ಎಂದಿದ್ದರು. ಕಳೆದ ಬುಧವಾರ 46 ನೇ ಆಲ್ ಇಂಡಿಯಾ ಮ್ಯಾನೇಜ್ಮೆಂಟ್ ಅಸೋಸಿಯೇಷನ್ ನಲ್ಲಿ ವಿಪ್ರೊದ ಎಕ್ಸಿಕ್ಯೂಟಿವ್ ಚೇರ್ ಮನ್ ರಿಷಧ್ ಪ್ರೇಮ್ ಜೀ ಯವರು ಮೂನ್ ಲೈಟಿಂಗ್ ಅನುಸರಿಸಿದ ವಿಪ್ರೋದ 300 ಜನ ಉದ್ಯೋಗಿಗಳನ್ನು ವಜಾ ಮಾಡಲಾಗಿದೆ ಎನ್ನುವ ಅಧಿಕೃತ ಮಾಹಿತಿ ತಿಳಿಸಿದರು. 

ಇದಕ್ಕಾಗಿ ವ್ಯಾಪಕ ಪರ - ವಿರೋಧಗಳ ಅಭಿಪ್ರಾಯಗಳು ಉಂಟಾಗಿವೆ. ಪ್ರಸ್ತುತ ಕಂಪನಿಗೆ ರಾಜೀನಾಮೆ ನೀಡದೆ ಮತ್ತೊಂದು ಕೆಲಸ ಮಾಡುತ್ತಾ ನಮ್ಮ ಕಂಪೆನಿಯ ಡೇಟಾಗಳನ್ನು ನಮ್ಮ ವಿರುದ್ಧದ ಮತ್ತೊಂದು ಕಂಪೆನಿಗೆ ಮೇಲ್ ಮೂಲಕ ಹಂಚಿಕೊಳ್ಳುತ್ತಿದ್ದಾರೆ. ಒಬ್ಬ ಉದ್ಯೋಗಿಯಂತೂ ಒಟ್ಟಿಗೆ 7 ಕಂಪೆನಿಯಲ್ಲಿ ಕೆಲಸ ಮಾಡುತ್ತಿದ್ದದ್ದು ಗೊತ್ತಾಗಿದೆ. ಇದು ಕಂಪೆನಿಯ ನಿಯಮಗಳಿಗೆ ವಿರುದ್ಧ ಎನ್ನುವ ಪುಷ್ಟಿಕರಣ ಕೂಡ ನೀಡಿದ್ದಾರೆ. 

ಈ ಕುರಿತು ಉದ್ಯೋಗಿಗಳು ತಾವು ಮಾಡಿದ್ದರಲ್ಲಿ ಯಾವುದೇ ತಪ್ಪಿಲ್ಲ ಎನ್ನುವ ವಾದವನ್ನೂ ಮುಂದಿಟ್ಟಿದ್ದಾರೆ. ನಮ್ಮ ಸ್ಕಿಲ್ ಗಳನ್ನು ನಮಗೆ ಅನುಕೂಲಕರವಾಗುವಂತೆ ಬಳಸಿಕೊಳ್ಳಲಾಗಿದ್ದು ಕಂಪನಿಯ ಸಮಯದಲ್ಲಿ ಬೇರೆ ಕೆಲಸ ಮಾಡುತ್ತಿರಲಿಲ್ಲ ಎಂದು ಕೆಲವರು ಹೇಳಿದ್ದರೆ.. ಇನ್ನು ಕೆಲವರು ಹಣದ ಅವಶ್ಯಕತೆ ಇದ್ದುದರಿಂದ ಕಂಪನಿಯ ಸಮಯ ಹೊರತು ಪಡಿಸಿ ಈ ಕೆಲಸ ಮಾಡುತ್ತಿದ್ದೆವು ಎಂದಿದ್ದಾರೆ. 

ನಾಸೆಂಟ್ ಇನ್ಫರ್ಮೇಷನ್ ಟೆಕ್ನಾಲಜಿ ಎಂಪ್ಲಾಯಿಸ್ ಸೆನೆಟ್ ಈ ಕುರಿತು ಪ್ರತಿಕ್ರಿಯೆ ನೀಡಿ ವಿಪ್ರೋದ ಈ ನಡೆ ಅನ್ ಎಥಿಕಲ್ ಎಂದಿದೆ. 

ಈ ಕುರಿತು ಕಾನೂನು ಹೇಗಿದೆ ಗೊತ್ತೇ..??

ಕಾರ್ಖಾನೆಗಳ ಕಾಯಿದೆ, ಸೆಕ್ಷನ್ 60 ರ ಪ್ರಕಾರ ಭಾರತದಲ್ಲಿ ದ್ವಿ - ಉದ್ಯೋಗಕ್ಕೆ ನಿಷೇಧವಿದೆ. ಈ ಕಾನೂನು ಇದ್ದರೂ.. ರಾಜ್ಯದಿಂದ ರಾಜ್ಯಕ್ಕೆ ಇದು ಬದಲಾಗಬಹುದು. ರಾಜ್ಯಗಳ ಅನುಕೂಲದನ್ವಯ ಇದನ್ನು ಬದಲಾಯಿಸಿಕೊಳ್ಳಬಹುದಾಗಿದೆ. 

ಐ.ಟಿ ದಿಗ್ಗಜರ ಭಯವೇನು ಗೊತ್ತೇ ? 

ಬೇರೆ ಎಲ್ಲಾ ಕ್ಷೇತ್ರಕ್ಕಿಂತಲೂ ಡೇಟಾ ಟ್ರ್ಯಾನ್ಸ್ಫರ್ ಹಾಗೂ ಡೇಟಾ ಕಳ್ಳತನ ವೇಗವಾಗಿ ಆಗುವುದು ಐ.ಟಿಯಲ್ಲಿಯೇ.. ಇಂಟಲೆಕ್ಚುಯಲ್ ಪ್ರಾಪರ್ಟಿಗಳ ಕಳ್ಳತನದ ಭಯವೂ ಇವುಗಳಿಗೆ ಕಾಡುತ್ತಿದೆ. ತನ್ನ ವಿರುದ್ದದ ಕಂಪೆನಿಯೂ, ತಾನು ಒಂದೇ ರೀತಿ ಆಲೋಚನೆ ಮಾಡಿದರೆ ಹೇಗಿರುತ್ತದೆ. ಉದ್ಯೋಗಿಗಳ ದ್ವಿಪಕ್ಷೀಯ ಕೆಲಸದಿಂದ ಆಗುತ್ತಿರುವುದೂ ಅದೇ.. 

ಅಷ್ಟೇ ಅಲ್ಲ, ಇಲ್ಲಿ ಮತ್ತೊಂದು ಟ್ರಿಕ್ ಇದೆ. ಕೆಲವು ಉದ್ಯೋಗಿಗಳಿಗೆ ತಾನು ವರ್ಕ್ ಮಾಡುತ್ತಿರುವ ಕಂಪೆನಿ ತನ್ನ ಕಂಪನಿಯ ರೈವರ್ಲಿ ಕಂಪೆನಿ ಎಂದು ಗೊತ್ತೇ ಇರುವುದಿಲ್ಲ. ಗೊತ್ತಾಗದೇ ಕೆಲಸ ಮಾಡುತ್ತಾರಾ..! ಎಂದು ಅಚ್ಚರಿಗೊಳಗಾದಿರಾ ? ಫ್ರೀ ಲ್ಯಾನ್ಸಿಂಗ್ ಮೂಲಕ ಸಿಗುವ ಕೆಲಸವನ್ನು/ ಪ್ರಾಜೆಕ್ಟ್ ಅನ್ನು ಅಷ್ಟೇ ಮಾಡುತ್ತಾರೆ ಉದ್ಯೋಗಿಗಳು. ಹೀಗಿದ್ದಾಗ ಇದರ ಹಿಂದಿರುವ ನಿಜವಾದ ಕಂಪನಿ ಯಾವುದೆಂದು ಗೊತ್ತೇ ಇರುವುದಿಲ್ಲ ಅವರಿಗೆ. 

ಈ ಕುರಿತು ಬೇರೆ ಬೇರೆ ಕಂಪನಿಗಳು ಹಾಗೂ ಮುಖ್ಯಸ್ಥರ ನಿಲುವುಗಳೇನಿದೆ ತಿಳಿಯೋಣ ಬನ್ನಿ

 

ಟಿ.ಸಿ.ಎಸ್ ನ  ಎನ್.ಜಿ ಸುಬ್ರಮಣಿಯನ್ ಮೂನ್ ಲೈಟಿಂಗ್ ಎಥಿಕಲ್ ಇಷ್ಯೂ ಎಂದಿದ್ದಾರೆ.

ಕಳೆದ ವಾರದಲ್ಲಿ ಇನ್ಪೋಸಿಸ್ ತನ್ನ ಉದ್ಯೋಗಿಗಳಿಗೆ ವಾರ್ನಿಂಗ್ ರೀತಿಯ ಮೇಲ್ ಒಂದನ್ನು ಕಳುಹಿಸಿದೆ. 

"ನೋ ಟೂ ಟೈಮಿಂಗ್

ನೋ ಮೂನ್ ಲೈಟಿಂಗ್

ನೋ ಡಬಲ್ ಲೈವ್ಸ್ " ಎಂದಿದೆ.

ಇನ್ಪೋಸಿಸ್ ನ ಮಾಜಿ ಡೈರೆಕ್ಟರ್ ಮೋಹನ್ ದಾಸ್ ಪೈ ಮೂನ್ ಲೈಟಿಂಗ್ ಚೀಟಿಂಗ್ ಅಲ್ಲ ಎಂದಿದ್ದಾರೆ. ಅವರ ಪ್ರಕಾರ "ಉದ್ಯೋಗ ಎನ್ನುವುದು ಉದ್ಯೋಗಿಗಳು ಹಾಗೂ ಅವರಿಗೆ ಸಂಬಳ ನೀಡುವ ಉದ್ಯೋಗದಾತರ ನಡುವಿನ ಕಾಂಟ್ರ್ಯಾಕ್ಟ್ ಇದ್ದಂತೆ. ಈ ಒಪ್ಪಂದದ ಪ್ರಕಾರ ನಾನು ಮಾಡುವ ಇಂತಿಷ್ಟು ಗಂಟೆ ಕೆಲಸಕ್ಕೆ ಇಂತಿಷ್ಟು ಎಂದು ಸಂಬಳ ನೀಡುತ್ತಾರೆ. ಅದರಾಚೆಗಿನ ನನ್ನ ಸಮಯ ನನ್ನ ಸ್ವಾತಂತ್ರ್ಯ. ಆ ಸಮಯದಲ್ಲಿ ನನಗೇನು ಬೇಕೋ ಅದನ್ನು ಮಾಡುವ ಸ್ವಾತಂತ್ರ್ಯ ನನಗಿದೆ" ಎನ್ನುತ್ತಾರೆ.

ಇನ್ಪೋಸಿಸ್ ಆ ಮೇಲ್ ನಲ್ಲಿ ಮತ್ತೊಂದು ವಿಚಾರವನ್ನು ಸಹಾ ನಮೂದಿಸಿದೆ. ನೀವು ಕೆಲಸಕ್ಕೆ ಸೇರಿದಾಗ ಸಹಿ ಮಾಡಿರುವ ಅಗ್ರಿಮೆಂಟ್ ಅನ್ನು ಮತ್ತೊಮ್ಮೆ ಓದಿ ಎಂದಿದೆ. ಆ ಅಗ್ರಿಮೆಂಟ್ ನ ಪ್ರಕಾರ ಎರಡು ಉದ್ಯೋಗಗಳಲ್ಲಿ ತೊಡಗಿಸಿಕೊಳ್ಳುವಂತಿಲ್ಲ.

ಮೀಡಿಯಾ ಮಂತ್ರದ ಅಸಿಸ್ಟೆಂಟ್ ಜನರಲ್ ಮ್ಯಾನೇಜರ್ ಹೆಚ್. ಆರ್ ಪ್ರೇರಣಾ ಚೌಹಾಣ್ ಪ್ರಕಾರ "ಮೂನ್ ಲೈಟಿಂಗ್ ಅನ್ ಎಥಿಕಲ್ ಹಾಗೂ ಹೆಚ್ಚು ರಿಸ್ಕ್. ಉದ್ಯೋಗಿಗಳು ತನ್ನ ಕಂಪನಿ ನೀಡಿರುವ ಟೂಲ್ ಗಳು ಹಾಗೂ ಸಾಫ್ಟ್ವೇರ್ ಅನ್ನು ಸ್ವಂತಕ್ಕೆ ಬಳಸಿಕೊಳ್ಳುವುದು ನೈತಿಕವಾಗಿ ತಪ್ಪು. ಅಲ್ಲದೇ ಭಾರತದ ಕಾನೂನಿನ ಪ್ರಕಾರ ಎರಡು ಉದ್ಯೋಗವನ್ನು ಏಕಕಾಲದಲ್ಲಿ ಮಾಡುವುದಕ್ಕೆ ಅವಕಾಶವಿಲ್ಲ."

ಟೆಕ್ ಮಹಿಂದ್ರಾದ ಸಿ.ಈ.ಓ ಹಾಗೂ ಎಂ.ಡಿ ಸಿ.ಪಿ ಗೌರಾನಿ ಬೇರೆಯದ್ದೇ ರೀತಿಯಾಗಿ ಪ್ರತಿಕ್ರಿಯೆ ನೀಡುತ್ತಾರೆ. 

"ಯಾವ ಉದ್ಯೋಗಿಗಳೇ ಆಗಲಿ ದಕ್ಷತೆಯಿಂದ ಕಾರ್ಯ ನಿರ್ವಹಿಸಿ ಪ್ರೊಡಕ್ಟೀವಿಟಿ ರೀಚ್ ಮಾಡಿದ ನಂತರ ಹೆಚ್ಚಿನ ಹಣದ ಅವಶ್ಯಕತೆ ಇದ್ದಾಗ ಮತ್ತೊಂದು ಕೆಲಸ ಮಾಡಿದರೆ ತಪ್ಪಿಲ್ಲ. ಆದರೆ, ಅದು ನಮ್ಮ ಕಂಪನಿಯ ಕೆಲಸದ ಮೇಲೆ ಪರಿಣಾಮ ಬೀರಬಾರದು. 

ಅಷ್ಟೇ ಅಲ್ಲ, ಈ ರೀತಿಯ ಪಾಲಿಸಿ ಮಾಡಲು ಸಹಾ ನಾನು ಸಿದ್ದ. ಯಾರಾದರೂ ಈ ರೀತಿ ಕೆಲಸ ಮಾಡುತ್ತಿದ್ದರೆ ತಿಳಿಸಿ ಅದಕ್ಕೆ ನಾನು ಪ್ರೋತ್ಸಾಹ ನೀಡುತ್ತೇನೆ. ಯಾವುದೇ ಮುಚ್ಚು-ಮರೆ ಮಾಡಬೇಡಿ. ಪಾರದರ್ಶಕತೆ ಇರಲಿ. " ಎಂದಿದ್ದಾರೆ.

ಲೀಗಲ್ ವಿಜ್.ಇನ್ ನ ಸ್ಥಾಪಕರಾದ ಶ್ರೀಜೇ ಶೇಥ್ ಅಡ್ಡಗೋಡೆಯ ಮೇಲೆ ದೀಪವಿಟ್ಟಂತೆ "ಇದು ಉದ್ಯೋಗಿಗಳು ಕೆಲಸದ ಕುರಿತ ವರ್ಕ್ ಎಥಿಕ್ಸ್, ಇಂಟೆಗ್ರಿಟಿ ಹಾಗೂ ಪ್ರಿಯಾರಿಟಿಗಳ ಆಧಾರದ ಮೇಲೆ ಎದುರಿಸುವ ದೊಡ್ಡ ಸಮಸ್ಯೆಯಾಗಿದೆ. ವರ್ಕ್ ಫ್ರಮ್ ಹೋಮ್ ನಿಂದ ಇದು ಸಾಮಾನ್ಯವಾಗಿದೆ. ಕೆಲವರಿಗೆ ಇದು ಓ.ಕೆಯಾದರೆ ಮತ್ತೆ ಕೆಲವರಿಗೆ ಸಮಸ್ಯೆ" ಎಂದಿದ್ದಾರೆ.

ಆದರೆ, ಸ್ವಿಗ್ಗಿ ಮೂನ್ ಲೈಟಿಂಗ್ ಪರವಾಗಿ ತನ್ನ ವರ್ಕ್ ಪಾಲಿಸಿಯನ್ನು ಬದಲಾಯಿಸಿದೆ. ಸ್ವಿಗ್ಗಿಯ ಹೆಚ್. ಆರ್ ಹೆಡ್ ಗಿರೀಶ್ ಮೆನನ್ ಈ ಕುರಿತು ಐ.ಟಿ ಯ ಹೇಳಿಕೆಗಳಿಗೆ ವ್ಯತಿರಿಕ್ತವಾದ ನಿಲುವನ್ನು ವ್ಯಕ್ತ ಪಡಿಸಿದ್ದಾರೆ. ಸಾಮಾನ್ಯ ಕೆಲಸದ ಜೊತೆಗೆ ಎರಡನೇ ಕೆಲಸವನ್ನು ಮಾಡಲಿ ಎಂದಿದ್ದಾರೆ.

ಪೂರ್ಣ ಪ್ರಮಾಣದ ಕೆಲಸವಿದ್ದರೂ.. ಎನ್.ಜಿ.ಓ ಜೊತೆಗೆ ವಾಲೆಂಟಿಯರಿಂಗ್ ಮಾಡಬಹುದು. ಡ್ಯಾನ್ಸ್ ಇನ್ಸ್ಟ್ರಕ್ಟರ್ ಆಗಿಯೂ ಕೆಲಸ ಮಾಡಬಹುದು. ಅಥವಾ ಸೋಶಿಯಲ್ ಮೀಡಿಯಾಗಳ ಕಂಟೆಂಟ್ ಕ್ರಿಯೇಟರ್ ಆಗಿಯೂ ಕೆಲಸ ಮಾಡಬಹುದು. ಅದು ಅವರ ಹವ್ಯಾಸಗಳನ್ನು ಪೋಷಿಸಿಕೊಳ್ಳಲು ಅವರ ಆಯ್ಕೆ ಎನ್ನುತ್ತಾರೆ.

ಭಾರತದಲ್ಲಿ ಹೀಗಿರುವಾಗ, ಕಳೆದ ವಾರ ಕ್ಲೌಡ್ ನ ಮೇಜರ್ ಕಂಪೆನಿಯಾಗಿರುವ ಐ.ಬಿ.ಎಂ ಇದು ಎಥಿಕಲ್ ಅಲ್ಲ ಮತ್ತು ಕಂಪನಿ ಈ ಕುರಿತ ಬಿಹೇವಿಯರ್ ಅನ್ನು ಪ್ರಮೋಟ್ ಮಾಡುವುದಿಲ್ಲ ಎಂದು ಸ್ಪಷ್ಟಪಡಿಸಿದೆ. 

ಈಗ ವರ್ಕ್ ಫ್ರಮ್ ಹೋಮ್ ಕೊಟ್ಟಿರುವ ಕಂಪೆನಿಗಳು ಕಡ್ಡಾಯವಾಗಿ ಮೂರು ದಿನ ಕೆಲಸಕ್ಕೆ ಬರಲೇ ಬೇಕೆನ್ನುವ ನಿಯಮ ರೂಪಿಸುತ್ತಿವೆ.

ತಪ್ಪು - ಸರಿಗಳ ನಡುವೆ :

ರಿಯಲ್ ಎಸ್ಟೇಟ್ ರೆಗ್ಯುಲೇಟರಿ ಅಥಾರಿಟಿಯ ಟರ್ಮ್ಸ್ ಹಾಗೂ ಕಂಡೀಷನ್ಸ್, ನಾನ್- ಡಿಶ್ ಕ್ಲೋಶರ್ ಅಗ್ರಿಮೆಂಟ್ ಅನ್ನು ಉಲ್ಲಂಘಿಸಿದ್ದಕ್ಕೆ ನೋಯ್ಡಾದ ಟ್ವಿನ್ ಟವರ್ ಗಳನ್ನು ನೆಲಸಮ ಮಾಡಲಾಯಿತು. ಯಾವುದೇ ಕಾನೂನನ್ನು ಉಲ್ಲಂಘಿಸಿದರೂ ಕ್ರಮ ಕೈಗೊಳ್ಳಲೇಬೇಕು ಅಲ್ಲವೇ ??

ಕೆಲಸದ ನಂತರದ ಸಮಯದಲ್ಲಿ ಮಾಡುವ ಮತ್ತೊಂದು ಕೆಲಸ ಈ ಪ್ರಸ್ತುತ ಕೆಲಸದ ಮೇಲೆ ಎಫೆಕ್ಟ್ ಆದಾಗ..

ನನ್ನ ಕಾಲೇಜ್ ಹಾಸ್ಟೆಲ್ ನಲ್ಲಿರುವಾಗ ನೈಟ್ ಶಿಫ್ಟ್ ಕೆಲಸಕ್ಕೆಂದು ಬರುತ್ತಿದ್ದ ವಾಚ್ ಮ್ಯಾನ್ ಅನ್ನು ಒಂದೇ ವಾರಕ್ಕೆ ವಜಾ ಮಾಡಿದರು. ಕಾರಣ ಗೊತ್ತೇ ? ಬೆಳಿಗ್ಗೆ ಪಾಳಿಯಲ್ಲಿ ಮತ್ತೊಂದು ಕೆಲಸ ಮಾಡಿ ಬಂದು ರಾತ್ರಿ ಪಾಳಿ ಕೆಲಸದಲ್ಲಿ ಆಯಾಸದಿಂದ ನಿದ್ದೆ ಹೋಗಿರುತ್ತಿದ್ದ. ಆತನಿಗೆ ಹಣದ ಅವಶ್ಯಕತೆ ಇದ್ದದ್ದು ನಿಜ. ಹಾಗಾಗಿ ಎರಡು ಕೆಲಸದ ನಿರ್ವಹಣೆ ಮಾಡಲು ಯತ್ನಿಸುತ್ತಿದ್ದ. ಆದರೆ, ಮನುಷ್ಯನ ದೇಹದ ಎನರ್ಜಿಗೂ, ಆರೋಗ್ಯಕ್ಕೂ ಒಂದು ಮಿತಿ ಇದೆ ಅಲ್ಲವೇ ?? ಆತನ ಸ್ವಂತ ಸಮಸ್ಯೆಗಳಿಗೆ ಸಂಸ್ಥೆಯನ್ನು ಹೊಣೆ ಮಾಡಲಾಗುತ್ತದಾ ? ಮಾನವೀಯತೆ ಹಾಗೂ ವರ್ಕ್ ಎಥಿಕ್ಸ್ ಎರಡೂ ಬೇರೆ ಬೇರೆಯೇ ಅಲ್ಲವಾ..

ಇನ್ನು ಹೈಸ್ಕೂಲ್ ನಲ್ಲಿ ನನ್ನ ಗಣಿತದ ಸರ್ ಒಬ್ಬರು ಟ್ಯೂಷನ್ ಸೆಂಟರ್ ನಡೆಸುತ್ತಿದ್ದರು. ಹಾಗಾಗಿ, ಶಾಲೆಯಲ್ಲಿ ಅರ್ಧಂಬರ್ಧ ಪಾಠ ಮಾತ್ರ ನಡೆಯುತ್ತಿತ್ತು. ಹಣ ಉಳ್ಳವರು ಟ್ಯೂಷನ್ ಗೆ ಹೋಗುತ್ತಿದ್ದರು ಸರಿ. ಇಲ್ಲವಾದವರಿಗೆ ಕಲಿಯುವ ಹಕ್ಕಿರಲಿಲ್ಲವೇ ? ಪಡೆವ ಸಂಬಳಕ್ಕೆ ಸರಿಯಾಗಿ ಪಾಠ ಮಾಡಬೇಕು ಎನ್ನುವುದು ಆತನ ನೈತಿಕ ಹೊಣೆ ಅಲ್ಲವಾ..??

ಉದ್ಯೋಗದ ನಂತರ ಹವ್ಯಾಸಗಳನ್ನು ಮುಂದುವರಿಸಲು ಅಡ್ಡಿ ಇಲ್ಲ. ಆದರೆ, ಮತ್ತೊಂದು ಕೆಲಸ ಮಾಡುವಾಗ ಜವಾಬ್ದಾರಿಯನ್ನು ಎಷ್ಟು ಸಮರ್ಥವಾಗಿ ನಿಭಾಯಿಸಬಲ್ಲೆವು ಎನ್ನುವುದು ಸಹಾ ಮುಖ್ಯ ಅಲ್ಲವಾ ? 

ಅಷ್ಟಕ್ಕೂ ಈಗಿನ ವರ್ಕ್ ಎಥಿಕ್ಸ್ ಹೇಗಿದೆ ಗೊತ್ತೇ..?? 

ನನ್ನ ಅಪ್ಪನ ಕಾಲದವರು ಕಾಯಕವೇ ಕೈಲಾಸ ಎನ್ನುತ್ತಿದ್ದರು. ಸರ್ಕಾರಿ ಅಥವಾ ಪ್ರೈವೇಟ್ ಕೆಲಸ ಯಾವುದೇ ಆಗಲಿ ಮೋಸ ಮಾಡುತ್ತಿರಲಿಲ್ಲ. ಸಂಬಳಕ್ಕಿಂತ ಕೆಲಸ ನೀಡಿದವರಿಗೆ ಹಾಗೂ ಕೆಲಸಕ್ಕೆ ಹೆಚ್ಚು ಋಣಿಯಾಗಿರುತ್ತಿದ್ದರು. ಈಗ ಹಾಗಿಲ್ಲ. ನೀನು ಕೆಲಸ ಕೊಡ್ತೀಯ, ನಾನು ಮಾಡ್ತೀನಿ. ನಾನು ಮಾಡಿದ ಕೆಲಸಕ್ಕೆ ನೀನು ಸಂಬಳ ಕೊಡುತ್ತೀಯ ಅಷ್ಟೇ ಎಂಬ ಭಾವ. ಕಂಪನಿಯ ಜೊತೆ ಭಾವನಾತ್ಮಕ ನಂಟುಗಳಿಲ್ಲ. ಹಣ ಹಾಗೂ ಕೆಲಸದ ವಿಚಾರವಷ್ಟೇ. ಅಲ್ಲಿ ಋಣವಿಲ್ಲ. ಮೂರು ವರ್ಷಕ್ಕೆ ಆರಕ್ಕಿಂತ ಕಂಪೆನಿ ಜಿಗಿದು ಸಂಬಳ ಹಾಗೂ ವೃತ್ತಿಯಲ್ಲಿಯೂ ಜಿಗಿದಾಗಿರುತ್ತದೆ.

ಯಾವುದು ಸರಿ ಯಾವುದು ತಪ್ಪು.?? ನೀವೇ ನಿರ್ಧರಿಸಿ.

~ವಿಭಾ ವಿಶ್ವನಾಥ್

ಶ್ರೀ ಕೃಷ್ಣಮೂರ್ತಿ ಪುರಾಣಿಕರ ಸಾಹಿತ್ಯ ಕೃತಿಗಳಲ್ಲಿ ಸ್ತ್ರೀ ಪಾತ್ರಗಳ ವೈಶಿಷ್ಟ್ಯ

ಕಾದಂಬರಿಗಳಲ್ಲಿ ಬರುವ ಸ್ತ್ರೀ ಪಾತ್ರಗಳು ಎಂದಾಕ್ಷಣ ಕೇವಲ ತ್ಯಾಗದ ಮನೋಭಾವವನ್ನು ತೋರುತ್ತಾ ಅಥವಾ ಒಪ್ಪಿಕೊಂಡು ಬಾಳುವ ಅನಿವಾರ್ಯತೆಯನ್ನು ಸೂಚಿಸುತ್ತವೆ ಎಂಬುದರಾಚೆಗೂ ಸ್ತ್ರೀ ಪಾತ್ರಗಳನ್ನು ಕಟ್ಟಿಕೊಟ್ಟ  ಶ್ರೀ ಕೃಷ್ಣಮೂರ್ತಿ ಪುರಾಣಿಕರ ಕಾದಂಬರಿಗಳಲ್ಲಿ ಹೆಚ್ಚಿನ ವಾಸ್ತವತೆ ಕಂಡುಬರುತ್ತದೆ. ಆಗಿನ ಕಾಲಘಟ್ಟಕ್ಕೆ ಮಾದರಿ ಎನ್ನಿಸಬಹುದಾದ ಹಾಗೂ ವಿಭಿನ್ನವಾಗಿರುವ ಸ್ತ್ರೀ ಪಾತ್ರಗಳು ಕೆಲವು ಮಹಿಳೆಯರನ್ನು ಹೀಗಿರುವಂತೆಯೂ ಪ್ರೇರೇಪಿಸುತ್ತವೆ. 

ಒಂದೇ ಸ್ತ್ರೀಯಲ್ಲಿ ಪಾಸಿಟಿವ್ ಹಾಗೂ ನೆಗೆಟಿವ್ ಎರಡೂ ಗುಣಗಳಿರುವಂತೆ.. ಎಂದರೆ, ಮೊದಲಿಗೆ ಕೆಟ್ಟವರಾಗಿದ್ದು ಆನಂತರ ಒಳ್ಳೆಯವರಾಗಿ ಕಾಣುವಂತೆ ಅಥವಾ ವೈರುಧ್ಯದ ಮನೋಭಾವದ ಹೆಣ್ಣುಮಕ್ಕಳಲ್ಲಿ ತಾಯ್ತನವೂ ಬಿಂಬಿತವಾಗಿರುವಂತೆ ಕೆಲವು ಪಾತ್ರಗಳು, ಇನ್ನು ಕೆಲವು ಕಾದಂಬರಿಗಳಲ್ಲಿ ಒಂದೇ ಮನೆಯಲ್ಲಿನ ಇಬ್ಬರು ಹೆಣ್ಣು ಮಕ್ಕಳಲ್ಲಿ ಒಬ್ಬರಲ್ಲಿ ತ್ಯಾಗದ ಮನೋಭಾವ, ಸಹಿಸಿಕೊಂಡು ಹೋಗುವ ಮನೋಭಾವವೂ.. ಇನ್ನೊಬ್ಬರಲ್ಲಿ ಕಿಚ್ಚು ಹಚ್ಚುವ, ಹೊಟ್ಟೆ ಉರಿಯ, ಅಸೂಯಾಪರ ಮನೋಭಾವವೂ ಇರುವಂತೆ ಅಥವಾ ದಬ್ಬಾಳಿಕೆಯ ಮನೋಭಾವವಿರುವಂತೆಯೂ ಚಿತ್ರಿಸಲಾಗಿದೆ. ಇದರಿಂದ ಎರಡು ಮನೋಭಾವದ ಹೆಣ್ಣು ಮಕ್ಕಳ ಚಿತ್ರಣವೂ ದೊರಕಿದಂತಾಗುತ್ತದೆ. ಹೆಣ್ಣು ಎಂದರೆ ಕೇವಲ ದೇವತೆಯಲ್ಲ ಅಥವಾ ಅವಳು ರಕ್ಕಸಿಯೂ ಅಲ್ಲ.. ಆಕೆಯೂ ಮನುಷ್ಯ ಮಾತ್ರಳು. ಕೋಪ, ತಾಪ, ದ್ವೇಷ, ಅಸೂಯೆಗೆ ಅತೀತಳಲ್ಲ ಎನ್ನುವ ಚಿತ್ರಣವಿದೆ.

"ಕುಲವಧು" ಕಾದಂಬರಿಯಲ್ಲಿ ಬರುವ ಗೋಪಾಲರಾಯರ ಇಬ್ಬರು ಹೆಣ್ಣು ಮಕ್ಕಳಲ್ಲಿ ಹಿರಿಮಗಳ ಸ್ವಭಾವ ದಬ್ಬಾಳಿಕೆಯದ್ದಾದರೆ.. ಇನ್ನೊಬ್ಬಳು ಇನ್ನೂ ಕಿರಿಯಳು. ಅವರಿಬ್ಬರ ತಾಯಿಯದ್ದು ಸೌಮ್ಯ ಹಾಗೂ ಸಾಧುಸ್ವಭಾವ. ಒಂದೇ ಮನೆಯಲ್ಲಿ, ಒಂದೇ ಪರಿಸರದಲ್ಲಿ ಇಷ್ಟು ವ್ಯತಿರಿಕ್ತವಾದ ಸ್ವಭಾವಗಳ ಸ್ತ್ರೀ ಪಾತ್ರಗಳ ಚಿತ್ರಣ ಕಂಡುಬರುತ್ತದೆ.

ಇದೇ ಕಾದಂಬರಿಯ ನಾಯಕಿ ಸೀತಾ ಚಿಕ್ಕಂದಿನಲ್ಲಿಯೇ ಶಾಲೆ ಬಿಟ್ಟು ಮದುವೆಯ ಕಟ್ಟುಪಾಡಿಗೆ ಒಳಗಾಗಬೇಕಾಗುವ ಅನಿವಾರ್ಯತೆ ಕಂಡುಬರುತ್ತದೆ. ವರದಕ್ಷಿಣೆಯ ಕಾರಣದಿಂದ ಆಕೆ ಮತ್ತೆ ತವರು ಸೇರುವಂತಾದಾಗ.. ಆಕೆ ಕುಗ್ಗದೆಯೇ.. ತನ್ನ ಓದನ್ನು ಮುಂದುವರೆಸಿ, ಶಿಕ್ಷಕಿಯಾಗಿ ಹೆಣ್ಣುಮಕ್ಕಳಿಗೆ ಯಾವ ಕಷ್ಟಕ್ಕೂ ಕುಗ್ಗದೆ ಭವಿಷ್ಯವನ್ನು ರೂಪಿಸಿಕೊಳ್ಳುವ ಪರಿಯಿಂದ ಮಾದರಿಯಾಗುತ್ತಾಳೆ. ತನ್ನ ಸಂಪಾದನೆಯನ್ನು ಕೂಡಿಡುತ್ತಾ.. ನಂತರ, ಅದನ್ನು ಬಳಸುವ ರೀತಿಯಲ್ಲಿಯೂ ಆಕೆ ಮಾದರಿಯೇ. ಸೀತಾ ಅವಳ ಮಾವನ ಹಣದ ಅತಿಯಾಸೆಯಿಂದ ಬಳಲುವಂತಾದರೂ.. ಸಂಸಾರಕ್ಕಿಂತಲೂ, ಸಮಾಜಕ್ಕೆ ಹೆಮ್ಮೆಯ ಮಗಳಾಗಿ.. ಶಿಕ್ಷಕಿಯಾಗಿ ನಿಂತು ದೃಢವಾಗುವ ಪಾತ್ರ ಹೆಚ್ಚಿನ ತೂಕವುಳ್ಳದ್ದು ಎನಿಸುತ್ತದೆ. ಹಾಗೆಂದು, ಆಕೆ ಸಂಸಾರವನ್ನು ಕಡೆಗಣಿಸಲೂ ಇಲ್ಲ. ಆಕೆ ಕುಲವಧುವಾಗಿಯೂ ಈ ಕಾದಂಬರಿಯ ಆಶಯವನ್ನು ಪೂರ್ತಿಗೊಳಿಸುತ್ತಾಳೆ. 

"ಸನಾದಿ ಅಪ್ಪಣ್ಣ" ಕಾದಂಬರಿಯ ಪುಷ್ಪಲತಾ ಹನುಮಂತನ ಹೆಂಡತಿಯಾಗಿದವಳು. ಅಪ್ಪಣ್ಣ ತನ್ನ ಮಾವನೆಂಬ ಪರಿಚಯವಿಲ್ಲದೆ.. ತನ್ನ ಗಂಡ ಆತನನ್ನು ಮನೆ ಕೆಲಸದವನೆಂದು ಪರಿಚಯಿಸಿದಾಗ, ಆಕೆ ಅವನನ್ನು ಹಾಗೆ ನಡೆಸಿಕೊಂಡಿರುತ್ತಾಳಾದರೂ.. ಆತನೇ ತನ್ನ ಗಂಡನ ತಂದೆಯೆಂದು ತಿಳಿದು ಬಂದಾಗ, ಆಕೆಯಲ್ಲಿ ಮೂಡುವ ಪರಿವರ್ತನೆ.. ಆಕೆಯ ಗಂಡನಿಗೆ ಹೇಳುವ ಮಾತುಗಳು ಇವೆಲ್ಲವೂ.. ತಿಳಿಯದೇ ಆದ ತಪ್ಪನ್ನು ಮತ್ತೆ ಸರಿಪಡಿಸಿಕೊಳ್ಳುವ ಪರಿಯನ್ನು ತೋರಿಸುತ್ತವೆ. ಅಷ್ಟೇ ಅಲ್ಲದೆ, ಒಬ್ಬಳು ಸೊಸೆಯಾಗಿ ಮಾವನಿಗೆ ನೀಡುವ ಗೌರವವನ್ನಷ್ಟೇ ಅಲ್ಲದೆ, ಮಗಳಂತೆ ಅಪ್ಪನಿಗೆ ತೋರಬೇಕಾದ ಗೌರವವನ್ನು ಎತ್ತಿ ಹಿಡಿಯುತ್ತಾಳೆ. 

"ಹೊಸ ಬಾಳು" ಕಾದಂಬರಿಯಲ್ಲಿ ಓರಗಿತ್ತಿಯರಾದ ತುಂಗಮ್ಮ ಹಾಗೂ ತಾರ ಒಂದೇ ಮನೆಯಲ್ಲಿರುವಾಗ, ತುಂಗಮ್ಮ ತಾರಾಳ ಬಗೆಗೆ ತಾತ್ಸರ ಹೊಂದಿದವಳಂತೆ, ದಬ್ಬಾಳಿಕೆ ನಡೆಸುತ್ತಿರುತ್ತಾಳೆ. ತಾರಾ ಎಲ್ಲವನ್ನು ಸಹಿಸಿಕೊಂಡೇ ಹೋಗುತ್ತಾಳೆ. ಆದರೆ, ತುಂಗಮ್ಮನಲ್ಲಿಯೂ ತಾಯ್ತನದ ಭಾವವಿರುತ್ತದೆ. ಏಕೆಂದರೆ, ತನ್ನ ಮಾವನವರಿಗೆ ಮಾತು ಕೊಟ್ಟಂತೆಯೇ ತನ್ನ ಮೈದುನನಾದ ವಿಶ್ವಾಸನನ್ನು ಮಗನಂತೆ ನೋಡಿಕೊಳ್ಳುತ್ತಿರುತ್ತಾಳೆ. ಆದರೆ, ಆತ ತನ್ನ ನೆಂಟರ ಹುಡುಗಿಯಾದ ಮನೋರಮಾಳನ್ನು ವಿವಾಹವಾಗದೆ.. ತಾರಾಳನ್ನು ವಿವಾಹವಾದ್ದದ್ದೇ ಆಕೆಯ ಧುಸುಮುಸುವಿಗೆ ಕಾರಣವಾಗಿರುತ್ತದೆ. ಹಾಗಾಗಿಯೇ ತಾರಾಳಿಗೆ ಕಷ್ಟವೊಡ್ಡಿ, ಕೋಪವನ್ನು ತೋರಿಸಿಕೊಳ್ಳುತ್ತಿರುತ್ತಾಳೆ. ಆದರೆ, ವಿಶ್ವಾಸನಿಗೆ ಗೋವಿನಪುರವೆಂಬ ದೂರದ ಊರಿನಲ್ಲಿ ಕೆಲಸ ಸಿಕ್ಕು ಹೊರಟು ನಿಂತಾಗ, ಅವರಿಬ್ಬರ ಮೇಲೆ ತೋರುವ ಕಾಳಜಿ ,ಮಮತೆ ಎಲ್ಲವೂ ಸಹಜ ಮಾತೃವಾತ್ಸಲ್ಯದಂತಹದ್ದು. ಅಷ್ಟು ಕರುಗುತ್ತಾಳೆ ಅವಳು.

"ತುಂಬಿದ ಮನೆ" ಕಾದಂಬರಿಯಲ್ಲಿ ಭಾವೂರಾಯರ ಮೊದಲಿಬ್ಬರು ಸೊಸೆಯಂದಿರಾದ ಕಾಶೀಬಾಯಿ ಹಾಗೂ ಕಾಂತಾಬಾಯಿಯವರದ್ದು ಮಾಮೂಲು ಓರಗಿತ್ತಿಯರ ಜಗಳ. ಆದರೆ, ಮೈದುನ ಹಾಗೂ ನಾದಿನಿಯರ ಮೇಲೆ ತೋರುವ ಪ್ರೀತಿಯಂತೂ ಮಾತೃವಾತ್ಸಲ್ಯವೇ ಸರಿ. ಹೆಣ್ಣು ತಾನು ಮನೆಯ ಒಡತಿಯಾದಾಗ ತನಗೇ ಎಲ್ಲರೂ ಗೌರವ ಕೊಡಬೇಕು ಎಂದು ಅಪೇಕ್ಷಿಸುತ್ತಾಳೆ. ಅದು ಸಹಜವೂ ಹೌದು. ಇಂತಹಾ ಅಪೇಕ್ಷೆ ಕಾಶೀಬಾಯಿಯಲ್ಲಿ ಕಂಡು ಬರುತ್ತದೆ. ಅಷ್ಟೇ ಅಲ್ಲದೆ, ಆಕೆಯನ್ನು ಉಪೇಕ್ಷಿಸಿದಾಗ ಆಕೆ ತೆಗೆದುಕೊಳ್ಳುವ ನಿರ್ಧಾರವೆಂದರೆ ಸಂಭ್ರಮಗಳಿಂದೆಲ್ಲಾ ಆಚೆ ಉಳಿಯುವುದು. ಕಾಂತಾಬಾಯಿಯೂ ಮುಂದೊಮ್ಮೆ ತನಗೆ ದುಃಖ ಉಂಟಾದಾಗ ಎಲ್ಲದರಿಂದ ದೂರ ಉಳಿಯುತ್ತಾಳೆ. ಹೆಣ್ಣು ತನಗೆ ನೋವಾದಾಗ ಬಯಸುವ ಏಕಾಂಗಿತನದ ಚಿತ್ರಣ ಇಲ್ಲಿದ್ದರೂ.. ಆ ನೋವನ್ನು ಅನುಭವಿಸುವವಳು ಅವಳೇ. ಏಕೆಂದರೆ, ಕುಟುಂಬದ ಕೆಲವರಿಗೆ ಈ ಕುರಿತ ಅರಿವಿದ್ದರೂ.. ಹೆಚ್ಚಾಗಿ ಯಾರೂ ತಲೆಕೆಡಿಸಿಕೊಳ್ಳಲಾರರು. ಆ ಮನೆಯ ಮಗಳಾದ ಸುಧಾ ವಯಸ್ಸಿನಲ್ಲಿ ಕಿರಿಯವಳಾಗಿದ್ದರೂ.. ಅತ್ತಿಗೆಯರ ವಿಮನಸ್ಕತೆಯನ್ನು ಗಮನಿಸಿ, ತಾನು ವಿವಾಹವಾಗಿ ಹೋಗುವ ಸಂದರ್ಭದಲ್ಲಿ ಮಾರ್ಮಿಕವಾಗಿ ಬುದ್ಧಿ ಹೇಳುತ್ತಾಳೆ ಸಹಾ.

ಹೆಣ್ಣು ಮಕ್ಕಳಿಗೆ ಬುದ್ಧಿ ಹೇಳಲು ಕೇವಲ ವಿದ್ಯೆ ಇರಬೇಕು ಎಂದಿಲ್ಲ. ಕೆಲವೊಮ್ಮೆ ಕಿರಿಯರಾದರೂ.. ಅನುಭವದ ಪಾಠ ಅವರಿಂದ ಈ ರೀತಿಯ ಮಾತುಗಳನ್ನಾಡಿಸುತ್ತದೆ. ಇದರ ಉದಾಹರಣೆಯನ್ನು ಸುಧಾಳ ಮೂಲಕ ತೆರೆದಿಟ್ಟಿದ್ದಾರೆ. ಅಷ್ಟೇ ಅಲ್ಲದೆ, ತನ್ನ ಅಣ್ಣ ರಾಜಣ್ಣನ ಜೊತೆ ಮಾತನಾಡುವಾಗಲೂ.. ಸುಧಾಳ ಈ ಗುಣ ತೋರುತ್ತದೆ.

ಕಾಶೀಬಾಯಿ ತನ್ನ ಗಂಡ ಮನೆಯ ಯಜಮಾನನಾದಾಗ ಆತ ವ್ಯವಹಾರದಲ್ಲಿ ಅಷ್ಟು ಬಿಗಿ ಇಲ್ಲದಿದ್ದಾಗಲೂ.. ತಾನು ತೋರುವ ವ್ಯವಹಾರ ನಿಪುಣತೆ, ಹೆಣ್ಣು ಗಂಡಿಗಿಂತಲೂ ವಿದ್ಯಾವಂತೆಯಾದಾಗ ತೋರುವ ಚತುರತೆಯನ್ನು ತೋರುತ್ತದೆ. ಅದು ಹಾಗೆಯೇ ಮುಂದುವರಿದಿದ್ದರೆ ಚೆನ್ನಾಗಿತ್ತೇನೋ.. ಆದರೆ, ದೊಡ್ಡಸ್ತಿಕೆ ತೋರುವ ಅತಿಯಾಸೆಯಿಂದ ಆಕೆ ತನ್ನ ಬೆಲೆಯನ್ನು ಕ್ರಮೇಣ ಕಳೆದುಕೊಳ್ಳುತ್ತಾಳೆ. 

ಈ ಕಾದಂಬರಿಯಲ್ಲಿ ಹೆಣ್ಣು ಮಕ್ಕಳ ಕೃತ್ರಿಮ ಪ್ರೇಮ ಭಾವವು ತೋರುವಂತೆಯೇ.. ಅವರು ಎಷ್ಟೇ ಜಗಳವಾಡಿದರೂ.. ಮತ್ತೆ ಮರುದಿನ ಬೆಳಗ್ಗೆ ಒಂದಾಗಿ ಒಂದೇ ಪಂಕ್ತಿಯಲ್ಲಿ ಅಕ್ಕ-ಪಕ್ಕದಲ್ಲಿ ಕುಳಿತು ಊಟ ಮಾಡುವ ಸಂದರ್ಭವೂ ಕಾಣುತ್ತದೆ. ಕಾಶೀಬಾಯಿ ಹಾಗೂ ಸರಳ ಇಬ್ಬರ ಜೊತೆಗೂ ಚೆನ್ನಾಗಿರುತ್ತಾ ಸಂಚು ಮಾಡುವ ಕಾಂತಾಬಾಯಿ ಕೆಲವೊಮ್ಮೆ ಕೆಟ್ಟವಳಾಗಿ ಕಂಡರೂ.. ಅವಳ ದೃಷ್ಟಿಯಿಂದ ನೋಡಲು ಹೊರಟರೆ, ಸಮರ್ಥನೆಗಳಂತೂ ಕಾಣುತ್ತವೆ. ಈ ಕಾದಂಬರಿಯಲ್ಲಿ ಹೆಣ್ಣು ಹೀಗೆಯೇ ಎಂಬ ಭಾವಗಳಿಲ್ಲ. ಒಂದೊಮ್ಮೆ ಒಳ್ಳೆಯವಳಾಗಿ ಕಂಡರೆ, ಮತ್ತೊಮ್ಮೆ ನೆಗೆಟಿವ್ ಆಗಿ ಗೋಚರವಾಗುತ್ತಾಳೆ. ಹೆಣ್ಣಿನ ಮನಸ್ಸನ್ನು ತಿಳಿಯಲು ಸಾಧ್ಯವಿಲ್ಲ ಎನ್ನುವ ಮಾತು ಇಲ್ಲಿ ನೆನಪಾಗುತ್ತದೆ.

ಸ್ತ್ರೀ ಅದೆಷ್ಟೋ ಭಾವಗಳ ಆಗರ. ಅದೆಷ್ಟೋ ತರಹದ ನಡವಳಿಕೆಗಳು.. ಒಮ್ಮೆ ತಾಯಿಯಾಗಬಲ್ಲಳು, ಒಮ್ಮೆ ಸ್ನೇಹಿತೆಯಾಗಬಲ್ಲಳು, ಕೆರಳಿದರೆ ಕಾಳಿಯಾಗಬಲ್ಲಳು.. ಜಗಳಕ್ಕೂ ಸೈ, ಸ್ನೇಹಕ್ಕೂ ಸೈ. ಮಾತೃ ರೂಪಿಯೂ ಹೌದು, ಮುನಿದರೆ ಮಾರಿಯೂ ಹೌದು. ತನ್ನ ತಪ್ಪಿದ್ದಾಗ ತಿದ್ದಿಕೊಳ್ಳುವ ಮಮತಾಮಯಿಯೂ ಹೌದು. ಮತ್ತೊಬ್ಬರ ತಪ್ಪಿದ್ದಾಗ ತನ್ನ ಕಟು ಮಾತಿನಿಂದ ಶಿಕ್ಷೆಯನ್ನು ಕೊಡುತ್ತಾಳೆ ಅಥವಾ ತನ್ನ ನಡೆಯಿಂದಲೇ ಅವರನ್ನು ಪರಿವರ್ತನೆ ಮಾಡುತ್ತಾಳೆ. ಹೀಗೆ ಹಲವಾರು ರೀತಿಯ ಸ್ತ್ರೀ ಪಾತ್ರಗಳು ಶ್ರೀ ಕೃಷ್ಣಮೂರ್ತಿ ಪುರಾಣಿಕರ ಕಾದಂಬರಿಗಳಲ್ಲಿ ಕಂಡು ಬರುತ್ತವೆ.

~ವಿಭಾ ವಿಶ್ವನಾಥ್

ವಿಶೇಷಾಂಕದ ವಿಶೇಷಗಳು

ವಿಶೇಷಾಂಕ ಎಂದರೆ ನನಗೆ ಮೊದಲು ನೆನಪಾಗುವುದು 'ತರಂಗ' ವಿಶೇಷಾಂಕ. ಹಳ್ಳಿಯ ತೋಟದಲ್ಲಿದ್ದ ನಮ್ಮ ಮನೆಗೆ ಪೇಪರ್ ತರುತ್ತಿದ್ದರೂ.. ಅದನ್ನು ಹೊರತುಪಡಿಸಿ ಆಗಾಗ ತರುತ್ತಿದ್ದ ತರಂಗ, ಕರ್ಮವೀರ, ಕಸ್ತೂರಿ ಇವೆಲ್ಲವೂ ಇದ್ದರೂ.. ದೀಪಾವಳಿಯ ವಿಶೇಷವಾಗಿ ತರುತ್ತಿದ್ದದ್ದು ತರಂಗ ವಿಶೇಷಾಂಕವೇ. ಆಗಿನ ಮಕ್ಕಳ ಕತೆ ಪುಸ್ತಕಗಳು ಈ ರೀತಿ ವಿಶೇಷಾಂಕವನ್ನು ಹೊಂದಿರದಿದ್ದರೂ.. ಆ ಪಾಕ್ಷಿಕ ಅಥವಾ ಮಾಸದಲ್ಲಿ ಆ ಹಬ್ಬದ ಕುರಿತು ಕತೆಗಳಿರುತ್ತಿದ್ದವು. ತುಂತುರು ಹಾಗೂ ಚಂಪಕ ಹಾಗೆ ನೆನಪಿನಲ್ಲಿ ಉಳಿದಿವೆ. 2013- 15 ರ ಸಮಯದಲ್ಲಿ ಓದುತ್ತಿದ್ದ ವಿಜಯ ನೆಕ್ಸ್ಟ್ ಎನ್ನುವ ವಾರ ಪತ್ರಿಕೆಯ ವಿಶೇಷಾಂಕ ಬಹಳ ಇಷ್ಟವಾಗಿದ್ದವು. ಆ ವಾರಪತ್ರಿಕೆ ಹೆಚ್ಚು ವರ್ಷ ಪ್ರಕಟವಾಗಲಿಲ್ಲ. 

ಪುಟ್ಟ ಕಥೆ ಪುಸ್ತಕಗಳಿಂದ ಬಡ್ತಿ ಹೊಂದಿ ತರಂಗ, ಕಸ್ತೂರಿ, ಕರ್ಮವೀರ, ಮಯೂರ, ಮಂಗಳ ಹಿಡಿಯುವಂತಾದರೂ ಅಲ್ಲಿನ ಕಥೆಗಳು ಬೇಗ ಮುಗಿದು ಯಾವುದಾದರೂ ಹೆಚ್ಚಿನ ಕಥೆಗಳಿರುವ ಪುಸ್ತಕ ಸಿಕ್ಕರೆ.. ಎನ್ನಿಸುತ್ತಿತ್ತು. ಗ್ರಂಥಾಲಯದ ಖಾಯಂ ಓದುಗಳಾದ ನಂತರ ಅಲ್ಲಿ ಇದ್ದ ಹಳೆಯ ವಿಶೇಷಾಂಕಗಳನ್ನೂ ತಿರುವಿ ಹಾಕಿದೆ.

 ಚೆಂದದ ಮನಸೆಳೆಯುವ ಮುಖಪುಟ.. ಅದೂ ಸಾಂಪ್ರದಾಯಿಕ ಶೈಲಿಯಲ್ಲಿರುತ್ತಿತ್ತು. ಪುಟದ ಗಾತ್ರದಲ್ಲಿ ಹೆಚ್ಚಿದ್ದ ಪುಟಗಳನ್ನು ತೆರೆಯುವಾಗ ಯಾರು ಯಾರ ಬರಹವಿದೆ ಎನ್ನುವ ಪರಿವಿಡಿ ಓದಬೇಕೆಂದು ಅನ್ನಿಸುತ್ತಿರಲಿಲ್ಲ. ಮೊದಲ ಆದ್ಯತೆ ಕಥೆಗಳಿಗೆ. ನಂತರ ಹಾಸ್ಯ ಬರಹಗಳಿಗೆ.. ನಂತರ ಲೇಖನಗಳು ,ಕವಿತೆ ಹಾಗೂ ವ್ಯಂಗ್ಯ ಚಿತ್ರಗಳೆಲ್ಲವೂ ನಂತರಕ್ಕೆ. ಜಾಹೀರಾತುಗಳ ಸಂಖ್ಯೆಯೂ ಹೆಚ್ಚಿರುತ್ತಿತ್ತು. ಅಲ್ಲದೇ, ಜಾಹೀರಾತುಗಳ ಶೈಲಿ ಕೂಡಾ ವಿಭಿನ್ನವಾಗಿರುತ್ತಿತ್ತು. ಆ ಲೇಖಕರ ಹೆಸರುಗಳು ಈಗ ಅಷ್ಟು ನೆನಪಿನಲ್ಲಿ ಉಳಿದಿಲ್ಲ. ಆಗ ಲೇಖಕರ ಹೆಸರಿನ ಹಂಗಿಲ್ಲದೇ ಓದುತ್ತಿದ್ದ ಸಮಯ.

ಈಗಿನ ವಿಶೇಷಾಂಕಗಳಲ್ಲಿ ಮುಖಪುಟದ ಜೊತೆಗೆ ಸ್ಪರ್ಧಾ ವಿಜೇತ ಕಥೆಗಳು ಎಂಬ ಅಂಶ ಕುತೂಹಲದಿಂದ ಆ ಕಥೆಗಳು ಹೇಗಿರಬಹುದು ಎಂದು ಓದುವಂತೆ ಮಾಡುತ್ತವೆ. ಮೊದಲಿನಂತೆ ಹೆಚ್ಚಿನ ವೈವಿಧ್ಯಮಯ ಕಥೆಗಳು ಈಗ ಸಿಗದಿದ್ದರೂ ಸಮಕಾಲೀನ ಬರಹಗಾರರ ಹೆಸರುಗಳು ಚಿರಪರಿಚಿತ. ಅವರ ಬರಹದ ಶೈಲಿ ಪರಿಚಿತವಾಗಿರುವಂತೆ ಕಂಡರೂ ಅಪ್ರಕಟಿತ ಕಥೆ, ಕವಿತೆಗಳು ಹೊಸ ಓದಿಗೆ ದಾರಿ ಮಾಡಿಕೊಡುತ್ತವೆ. ಈಗಿನ ವಿಶೇಷಾಂಕಗಳಲ್ಲಿಯೂ ಜಾಹೀರಾತು ಹೆಚ್ಚೇ ಕಾಣುತ್ತದೆ. ಈಗಿನ ಆದ್ಯತೆ ಮೊದಲು ಸಂಪಾದಕರ ಮಾತು, ಕತೆ , ಕವಿತೆ ಹಾಗೂ ಲೇಖನಗಳಿಗೆ ಸಾಗುತ್ತದೆ. ಈಗೀಗ ಪುಟ್ಟಕತೆ, ನ್ಯಾನೋ ಕತೆಗಳು ಸಹಾ ಕಾಣುತ್ತವೆ. ಅನುವಾದಿತ ಕತೆ/ಕವಿತೆ,ಪ್ರವಾಸ, ಅಡುಗೆ, ಪದಬಂಧ, ಸುಡೊಕು, ಹನಿಗವನ ಹೀಗೆ ಒಂದೊಂದು ವಿಶೇಷಾಂಕದಲ್ಲಿ ಅವರದ್ದೇ ಆದ ವಿಶೇಷ. ಈ ಬಾರಿಯ ವಿಜಯ ಕರ್ನಾಟಕದ ಯುಗಾದಿ ವಿಶೇಷಾಂಕದಲ್ಲಿ ನಾಲ್ವರು ಬರಹಗಾರರು ಸೇರಿ ಬರೆಯುವ ಕಥೆ.. ಎಂದರೆ, ಒಬ್ಬರು ಬರೆದ ಕತೆಯನ್ನು ಅವರೊಂದಿಗೆ ಚರ್ಚಿಸದೆ ಮತ್ತೊಬ್ಬ ಬರಹಗಾರರು ಮುಂದುವರಿಸಿಕೊಂಡು ಹೋಗುವ ರೀತಿ. ಹೀಗೆ ನಾಲ್ವರು ಬರಹಗಾರರು ಸೇರಿ ಬರೆದ ಕತೆ ಇದೆ ಎಂಬ ಅಂಶ ಗಮನಿಸಿದೆ. 

ಸ್ವಾತಂತ್ರ್ಯ ದಿನದ ವಿಶೇಷಾಂಕ ಓದಿ ಸ್ವಾತಂತ್ರ್ಯದ ಕತೆಗಳು, ವಿಚಾರಗಳು ಇರುತ್ತವೆ ಎಂದು ಗಮನಿಸಿದ್ದವಳಿಗೆ

 ದೀಪಾವಳಿ ಅಥವಾ ಯುಗಾದಿ ವಿಶೇಷಾಂಕ ಎಂದರೆ ದೀಪಾವಳಿ ಅಥವಾ ಯುಗಾದಿಯ ಕುರಿತಾಗಿ ಮಾತ್ರ ಇರುತ್ತವೆ ಎಂಬ ತಪ್ಪು ತಿಳುವಳಿಕೆ ದೂರವಾಗಿದೆ. ಈಗ ಆನ್ಲೈನ್ ವೆಬ್ಸೈಟ್ ಹಾಗೂ ಪತ್ರಿಕೆಗಳು ಕೂಡಾ ಈ ವಿಶೇಷಾಂಕದ ಬಿಡುಗಡೆ ಮಾಡುತ್ತವೆ. ಮೊದಲೆಲ್ಲಾ ಓದಿನ ದೃಷ್ಟಿಯಿಂದ ಮಾತ್ರ ಅವಲೋಕಿಸುತ್ತಿದ್ದ ವಿಶೇಷಾಂಕಗಳು ಈಗ ನಾನು ಬರೆಯಲು ಶುರು ಮಾಡಿದ ನಂತರ ಕೊಂಚ ಸೂಕ್ಷ್ಮವಾಗಿ ಅವಲೋಕಿಸಲು ಶುರು ಮಾಡಿದ್ದೇನೆ. ಯುಗಾದಿ ವಿಶೇಷಾಂಕದಲ್ಲಿ ನಾನು ಸ್ಕಿಪ್ ಮಾಡುವ ಪುಟಗಳು ಎಂದರೆ ವರ್ಷ ಭವಿಷ್ಯ. ನಂಬಿಕೆ, ಅಪನಂಬಿಕೆಯ ಕಾರಣ ಎಂದಲ್ಲ.. ಮುಂದಾಗುವುದನ್ನು ಓದಿ ಸುಮ್ಮನೆ ಏಕೆ ತಲೆಕೆಡಿಸಿಕೊಳ್ಳಬೇಕೆಂಬುದು. 

ವಿಶೇಷಾಂಕಗಳನ್ನು ನಾನು ತಿರುವಿ ಹಾಕದೆಯೂ ನೆನಪಾಗುವ ಇತ್ತೀಚಿನ ಕೆಲವು ಕತೆ, ಕವಿತೆಗಳಿವೆ. ಈಗೀಗ ಚಿತ್ರತಾರೆಯರ ಸಂದರ್ಶನಗಳೂ ಹೆಚ್ಚಾಗಿ ಬರುತ್ತಿವೆ. ಕರ್ಮವೀರ,ಪ್ರಭಾತ ಹಾಗೂ ಸಂಚಯದ ಹಳೆಯ ಕೆಲವು ವಿಶೇಷಾಂಕಗಳು ಆನ್ಲೈನ್ ನ ಈ ಲಿಂಕ್ ನಲ್ಲಿ ಉಚಿತವಾಗಿ ಲಭ್ಯವಿವೆ. ( https://archive.org/search?query=%E0%B2%B5%E0%B2%BF%E0%B2%B6%E0%B3%87%E0%B2%B7%E0%B2%BE%E0%B2%82%E0%B2%95 )  ಆಸಕ್ತರು ಓದಬಹುದು.

ಪ್ರತಿಯೊಂದು ಪತ್ರಿಕೆ ಅಥವಾ ವಾರಪತ್ರಿಕೆಯ ವಿಶೇಷಾಂಕಗಳೂ ತಮ್ಮದೇ ರೀತಿಯಲ್ಲಿ ವಿಶೇಷವೇ ಆಗಿವೆ. ನಮಗೆ ಗೊತ್ತಿಲ್ಲದ ಕೆಲವು ಪ್ರಾದೇಶಿಕ ಪತ್ರಿಕೆಗಳ ವಿಶೇಷಾಂಕಗಳೂ ವಿಶಿಷ್ಟವೇ.. ಈ ಮೇಲಿನ ಅಭಿಪ್ರಾಯ ಕೇವಲ ನಾನು ಓದಿ ಕಂಡಂತೆ ಅಷ್ಟೇ.. 

~ವಿಭಾ ವಿಶ್ವನಾಥ್

ತ್ರಿವೇಣಿಯವರ ಬರಹಗಳು

ಬಹುಶಃ ತ್ರಿವೇಣಿಯವರು ಇಂದು ಬದುಕಿದ್ದಿದ್ದರೆ ನಮಗೆ ಇನ್ನೂ ಅದೆಷ್ಟು ಮೌಲ್ಯಯುತ ಕಾದಂಬರಿಗಳು ಸಿಗುತ್ತಿದ್ದವಲ್ಲವಾ ಎಂಬ ಆಲೋಚನೆ ಮೂಡದಿರಲಾರದು. ಕೆಲವರ ಬದುಕು ಬೇಗ ಮುಗಿಯಬಹುದು. ಆದರೆ, ಅವರ ಸಾಧನೆಗಳು ಎಂದಿಗೂ ಅಜರಾಮರ. ತ್ರಿವೇಣಿಯವರು ಕೂಡಾ ಇದೇ ಸಾಲಿಗೆ ಸೇರಿದ ಮನೋಜ್ಞ ಕಾದಂಬರಿಗಳನ್ನು ಕೊಟ್ಟ ಲೇಖಕಿ.

ಮೊದಲಿಗೆ ಅಂದರೆ ನಾನು ಹೈ ಸ್ಕೂಲ್ ನಲ್ಲಿರುವಾಗ ನಾನು ಲೈಬ್ರರಿಗೆ ಹೋದಾಗ ನನಗೆ ಬೇಕಾದ ಪುಸ್ತಕಗಳ ಜೊತೆಗೆ ಅಮ್ಮ ಹಾಗೂ ಚಿಕ್ಕಮ್ಮನಿಗೆ ಬೇಕಾದ ಕಾದಂಬರಿಗಳನ್ನು ತರಲು ಹೋದಾಗ ಮೊದಲು ತಂದದ್ದೇ ತ್ರಿವೇಣಿಯವರ "ಬೆಕ್ಕಿನ ಕಣ್ಣು" ಕಾದಂಬರಿ. ಅವರೂ ಮನೆಯಿಂದಲೇ ಹೇಳಿ ಕಳುಹಿಸುತ್ತಿದ್ದದ್ದು ತ್ರಿವೇಣಿಯವರ ಕಾದಂಬರಿಯನ್ನೇ ತೆಗೆದುಕೊಂಡು ಬಾ ಎಂದು. ನನಗೆ ಆಯ್ಕೆ ಗೊತ್ತಾಗದೇ ಕೆಲವೊಮ್ಮೆ ಲೈಬ್ರರಿಯನ್ ಅನ್ನು ಕೇಳಿದಾಗ ಕೈಗಿಡುತ್ತಿದ್ದದ್ದು ಸಹಾ ತ್ರಿವೇಣಿಯವರ ಕಾದಂಬರಿಯನ್ನೇ..

ನಾನು ಕಾದಂಬರಿ ಓದುವಂತಾದ ಮೇಲೆ ಮೊದಲು ಓದಿದ ತ್ರಿವೇಣಿಯವರ ಕಾದಂಬರಿ "ಬೆಳ್ಳಿ ಮೋಡ". ಕಾದಂಬರಿ ಜೊತೆಗೆ ನೋಡಿದ ಚಲನಚಿತ್ರ ಕೂಡಾ ಅಚ್ಚಳಿಯದಂತೆ ಉಳಿದಿದೆ.

ಸೋತು ಗೆದ್ದವಳು ಓದಿದಾಗ ಅದು ಆ ಕಾಲಘಟ್ಟದಲ್ಲಿ ಆಲೋಚನೆಯಲ್ಲಿ ಮುಂದಿದ್ದ ಕತೆ ಎನ್ನಿಸುತ್ತದೆ. ಬಹುಶಃ ಹೆಣ್ಣಿನ ತಪ್ಪಿಗೆ ಕ್ಷಮೆ ಸಿಗುವುದು ವಿರಳ. ಗಂಡನ್ನು ಹೆಣ್ಣು ಕ್ಷಮಿಸಿ ಮತ್ತೆ ಸ್ವೀಕರಿಸಿದರೂ ಗಂಡು ಹೆಣ್ಣನ್ನು ಸ್ವೀಕರಿಸುವ ಮನಸ್ಥಿತಿ ಹೊಂದಿರುವುದು ವಿರಳ. ಅಂದು ಮಾತ್ರವಲ್ಲ ಇಂದಿಗೂ ಅದು ವಿರಳವೇ..

ಅದು ಬಿಟ್ಟರೆ ಶರಪಂಜರದ ಕಾವೇರಿ ಪಾತ್ರ ಮನದಲ್ಲಿ ಇನ್ನೂ ಅಚ್ಚುಳಿದಿದೆ. ಈ ಸಮಾಜ ಮತ್ತೆ ಅವಳಿಗೆ ಬಾಳುವ ಅವಕಾಶ ನೀಡಿದ್ದರೆ .?? ಮಾರ್ಮಿಕ ಸಂಚುಗಳು, ವಂಚನೆಗಳು, ನಂಬಿಕೆಗಳೇ ಅವಳ ಪಾಲಿಗೆ ಮುಳುವಾದವಾ..??

ತ್ರಿವೇಣಿಯವರ ಬರವಣಿಗೆಯ ಶೈಲಿ ನಮ್ಮನ್ನು ಅದರಲ್ಲಿಯೇ ಮುಳುಗಿಸಿ ಓದಿಸಿಕೊಂಡು ಹೋಗುವಂತಹದ್ದು. ಜೊತೆ ಕಥಾ ಹಂದರಗಳೂ ಒಂದಕ್ಕಿಂತ ಒಂದು ವಿಭಿನ್ನವೇ.. ತಾವು ಓದಿರುವ ಮನಃಶಾಸ್ತ್ರವನ್ನು ಸಶಕ್ತವಾಗಿ ಬರವಣಿಗೆಯ ಮೂಲಕ ಹೊರ ಹಾಕಿ ತಮ್ಮ ಜ್ಞಾನವನ್ನು ಪಸರಿಸಿದವರು ಅವರು. 

ಬಹುಶಃ, ದುಃಖದಲ್ಲಿದ್ದಾಗ ನೋವಿನಲ್ಲಿದ್ದಾಗ ಅವರ ಪುಸ್ತಕಗಳನ್ನು ಹಿಡಿದರೆ ಕೆಲವೊಮ್ಮೆ ಸಾಂತ್ವನ ಸಿಕ್ಕರೆ ಮತ್ತೆ ಹಲವೊಮ್ಮೆ ದುಃಖಾಂತ್ಯದಿಂದ ವಿಷಾಧ ಆವರಿಸುತ್ತದೆ. ಅವರು ನಿಲುಕದ ನಕ್ಷತ್ರ ಎಂದರೂ ತಪ್ಪಾಗಲಾರದು.

~ವಿಭಾ ವಿಶ್ವನಾಥ್

ಪುಸ್ತಕ ಯಾನ

 

ಬದುಕಿನಲ್ಲಿ ನಾವು ಅದೆಷ್ಟು ಪಾಠ ಕಲಿಯುತ್ತೇವೆ. ಅಲ್ಲವಾ..?? "ದೇಶ ಸುತ್ತು, ಕೋಶ ಓದು" ಎನ್ನುವ ಮಾತಂತೂ ಜನಜನಿತ. ದೇಶ ಸುತ್ತುವ ಆಯ್ಕೆ ಅದೆಷ್ಟು ಜನರಿಗೆ ಸರಿಯಾಗಿ ಸಿಗುವುದೋ..?? ಗೊತ್ತಿಲ್ಲ..! ಏಕೆಂದರೆ, ದೇಶ ಸುತ್ತುವ ಬರದಲ್ಲಿ ಕೆಲವೊಮ್ಮೆ ಅಕ್ಕ-ಪಕ್ಕದಲ್ಲಿರುವ ಜಾಗಗಳನ್ನೇ ನಾವಿನ್ನೂ ಸರಿಯಾಗಿ ಗಮನಿಸಿರುವುದಿಲ್ಲ. ಬಹುಶಃ ದೃಷ್ಟಿಕೋನ ಹಾಗೂ ಆಲೋಚನೆ ಕೂಡಾ ಇದಕ್ಕೆ ಅತ್ಯವಶ್ಯಕ. ಆದರೆ, ಪುಸ್ತಕಗಳು ಹಾಗಲ್ಲ. ಒಂದೆಡೆ ಕುಳಿತು ಕೈಯ್ಯಲ್ಲಿಡಿದರೆ ಸಾಕು. ಪ್ರಿಂಟೆಡ್ ಸಿಗದವರಿಗೆ ಮೊಬೈಲ್ ನಲ್ಲಿಯೇ ಇ-ಬುಕ್. ಓದುವ ಆಸಕ್ತಿ ಇಲ್ಲದಿದ್ದರೆ ಕೇಳಿಸಿಕೊಳ್ಳುವ ಆಯ್ಕೆ ಇರುವ ಆಡಿಯೋ ಬುಕ್. ಈಗಂತೂ ಅದೆಷ್ಟೋ ಬಗೆಯ ಪುಸ್ತಕಗಳು.. ದಿನಕ್ಕೆ ಅದೆಷ್ಟು ಪುಸ್ತಕಗಳು ಬಿಡುಗಡೆಯಾಗುತ್ತವೋ ಗೊತ್ತಿಲ್ಲ. ಇಂದು ಓದುಗನಿಗಿಂತ ಹೆಚ್ಚಾಗಿ ಲೇಖಕರೇ ಇದ್ದಾರೇನೋ ಎನ್ನಿಸಿಬಿಡುತ್ತದೆ. ಪ್ರಕಟಿತ ಪುಸ್ತಕಗಳಲ್ಲಿ ಗಟ್ಟಿ ಸಾಹಿತ್ಯ ಹಾಗೂ ಜೊಳ್ಳು ಸಾಹಿತ್ಯ ಎರಡನ್ನೂ ಪ್ರತ್ಯೇಕಿಸಿ.. ಯಾವುದು ನಮ್ಮ ಆಯ್ಕೆಯ ಸಾಹಿತ್ಯವಾಗುತ್ತದೆ ಎಂಬುದನ್ನು ನಾವೇ ಅರಿಯಬೇಕಾಗಿದೆ. 

"ಡೋಂಟ್ ಜಡ್ಜ್ ಬುಕ್ ಬೈ ಇಟ್ಸ್ ಕವರ್" ಎನ್ನುವಂತೆ ಯಾವುದೇ ಲೇಖಕನನ್ನು, ಅವರ ಜೀವನವನ್ನು ಅಥವಾ ಪುಸ್ತಕದ ಮುಖಪುಟವನ್ನು ಅಥವಾ ಮತ್ತಾರೋ ಪುಸ್ತಕದ ಬಗ್ಗೆ ಬರೆದ ಸಾಲುಗಳನ್ನು ಗಮನಿಸಿ, ಅದಕ್ಕೆ ತಕ್ಕಂತೆ ನಮ್ಮ ಆಲೋಚನೆಗಳನ್ನು ಮೂಡಿಸಿಕೊಳ್ಳುತ್ತೇವೆ ಎಂದರೆ ಅದು ಸರಿಯಾಗುವುದಿಲ್ಲವೇನೋ.. ಏಕೆಂದರೆ, ಪ್ರತಿಯೊಬ್ಬ ಓದುಗನ ಶೈಲಿಯೂ ವಿಭಿನ್ನ. ಕೆಲವರಿಗೆ ಕವನ ಸಂಕಲನಗಳು ಇಷ್ಟವಾದರೆ ಕೆಲವರಿಗೆ ಕಥಾ ಸಂಕಲನ, ಮತ್ತೆ ಕೆಲವರಿಗೆ ಕಾದಂಬರಿ, ಇನ್ನೂ ಹಲವರಿಗೆ ಆತ್ಮಚರಿತ್ರೆ, ಜೀವನ ಚರಿತ್ರೆ ಹೀಗೆ.. ನಮ್ಮ ನಮ್ಮ ಆಸಕ್ತಿಯ ಕ್ಷೇತ್ರಗಳನ್ನು ನಾವೇ ಗುರುತಿಸಿಕೊಳ್ಳಬೇಕು ಹಾಗೂ ಅದಕ್ಕೆ ತಕ್ಕಂತಹಾ ಲೇಖಕರ, ವಸ್ತು-ವಿಷಯದ ಆಯ್ಕೆಯನ್ನು ನಾವು ಓದುತ್ತಲೇ ಕಂಡುಕೊಳ್ಳಬೇಕು.

ನನ್ನ ಅನುಭವಕ್ಕೆ ಬಂದ ವಿಚಾರಗಳೆಂದರೆ ಎಷ್ಟೋ ಪುಸ್ತಕಗಳ ಶೀರ್ಷಿಕೆ ಸೆಳೆಯದಿದ್ದರೂ.. ಕಥಾವಸ್ತುಗಳಂತೂ ಬಹಳವೇ ಚೆಂದವಿರುತ್ತವೆ. ಇನ್ನೂ ಅನನುಭವಿ ಲೇಖಕರು ಎಂದು ಪಕ್ಕಕ್ಕೆ ಎತ್ತಿಟ್ಟವರ ಪುಸ್ತಕಗಳಲ್ಲಿಯೇ ನನಗೆ ನನ್ನ ನೆಚ್ಚಿನ ಕಥೆಗಳು ಹಾಗೂ ಇಷ್ಟಪಡುವ ಸಾಲುಗಳು ಸಿಕ್ಕುತ್ತವೆ. ಕೆಲವೊಮ್ಮೆ ನಾವು ಕೈಗೆತ್ತಿಕೊಳ್ಳುವ ಪುಸ್ತಕ ನಮ್ಮ ಮನಸ್ಥಿತಿಯ ಮೇಲೆಯೂ ಆಧಾರಿತವಾಗಿರುತ್ತದೆ. ಕೆಲವು ಪುಸ್ತಕಗಳನ್ನು ಓದಲು ನಮ್ಮ ಮನಸ್ಸು, ಅನುಭವ, ವಯಸ್ಸು ಎಲ್ಲವೂ ಪರಿಪಕ್ವವಾಗಿರಬೇಕಾಗುತ್ತದೆ. 

ಆಗಿನ್ನೂ ಪುಸ್ತಕ ಓದಲು ಶುರು ಮಾಡುವವರಿಗೆ ಯಾವುದೋ ಮಹಾಕಾವ್ಯವನ್ನು ಸಜೆಸ್ಟ್ ಮಾಡಿದರೆ.. ಅವರಿಗೆ ಅದು ಬೋರಾಗಿ ಹೋಗಬಹುದು. ಅದರ ಬದಲಿಗೆ, ಮೊದಲಿಗೆ ಆಸಕ್ತಿಯುಳ್ಳ ಕಥಾವಸ್ತುವಿನ ಕಥಾಸಂಕಲನವನ್ನು ಅಥವಾ ಕಾದಂಬರಿಯನ್ನು ಕೈಗಿತ್ತರೆ ಅವರಿಗೆ ಓದಿನಲ್ಲಿ ಆಸಕ್ತಿ ಹೆಚ್ಚಾಗಬಹುದು. ಅಂತಹಾ ಪುಸ್ತಕಗಳು ಹೆಚ್ಚು ರುಚಿಸುತ್ತವೆ ಎಂಬುದು ಸತ್ಯ. ಇನ್ನೂ ಓದಲು ಸರಿಯಾಗಿ ಶುರುಮಾಡಿದ ಅಥವಾ ಓದಿನ ಕುರಿತು ಆಸಕ್ತಿ ಬೆಳೆಸಿಕೊಳ್ಳದಿದ್ದವರನ್ನು ನೋಡಿ ಯಾರೋ ಕವಿಯೊಬ್ಬರು ಹೇಳಿದ ಚೆಂದದ ಮಾತೊಂದು ನನಗೆ ನೆನಪಾಗುತ್ತದೆ. "ಅವರಿಗಿನ್ನೂ ಓದಿನ ಕುರಿತು ಆಸಕ್ತಿ ಬೆಳೆದಿಲ್ಲ ಎಂದಿದ್ದರೆ.. ಅದಕ್ಕೆ ಕಾರಣ ಅವರಿಗಿನ್ನೂ ಅವರ ಆಸಕ್ತಿ ಕೆರಳಿಸುವಂತಹಾ ಪುಸ್ತಕ ದೊರೆತಿಲ್ಲ ಎಂಬುದು". ಇದು ಹೌದಾದರೂ.. ಅಂತಹಾ ಆಸಕ್ತಿ ಬೆಳೆಸಿಕೊಳ್ಳುವುದು ಸಹಾ ಅವರವರ ಆಸಕ್ತಿಯ ಕ್ಷೇತ್ರ, ಹವ್ಯಾಸ ಹಾಗೂ ಪ್ರಯತ್ನಗಳ ಮೇಲೆಯೇ ನಿಂತಿರುತ್ತದೆ. 

ಎಷ್ಟೋ ಬಾರಿ ಕೆಲವು ಸಿನಿಮಾಗಳನ್ನು ನೋಡಲು ಹೋದಾಗ ಮಧ್ಯಂತರದ ನಂತರದ ಕಥೆ ಹೆಚ್ಚು ಇಷ್ಟವಾಗಬಹುದು ಅಥವಾ ಆಸಕ್ತಿ ಮೂಡಿಸುವಂತಹಾ ಪಾತ್ರಗಳ ಪಾತ್ರಪೋಷಣೆ ಅಲ್ಲಿಂದ ದೊರೆಯಬಹುದು. ಈ ಅನುಭವ ನನಗೂ ಎಷ್ಟೋ ಬಾರಿ ಆಗಿದೆ. "ಅಯ್ಯೋ.. ಆ ಪಿಚ್ಚರ್ರಾ..?? ಪೂರ್ತಿ ನೋಡಿದ್ಯಾ...?? ನಾನಾಗಿದ್ರೆ ಇಂಟರ್ವಲ್ ನಲ್ಲೆ ಎದ್ದು ಬರ್ತಾ ಇದ್ದೆ." ಎಂಬ ಮಾತನ್ನು ನಾನು ಕೇಳಿದ್ದೇನೆ. ಆದರೆ, ನನಗೊಂದು ವಿಚಿತ್ರ ಅಭ್ಯಾಸವಿದೆ. ಯಾವುದೇ ಸಿನಿಮಾವನ್ನಾಗಲಿ ಅಥವಾ ಯಾವುದೇ ಪುಸ್ತಕವನ್ನಾಗಲಿ ಅದು ಎಷ್ಟೇ ಮಹಾನ್ ಬೋರು ಎನ್ನಿಸಿದರೂ.. ಎಷ್ಟೇ ಕಷ್ಟವಾದರೂ.. ಪೂರ್ತಿ ಮುಗಿಸುತ್ತೇನೆ. ಯಾರಿಗೆ ಗೊತ್ತು..?? ಯಾವುದೋ ಕೊನೆಯ ಸಾಲಿನಲ್ಲಿ ಅಥವಾ ಕೊನೆಯ ಐದು ನಿಮಿಷದಲ್ಲಿ ಎಂತಹದ್ದೋ ಟ್ವಿಸ್ಟ್ ಸಿಗಬಹುದು ಅಥವಾ ಯಾವುದೋ ಮೋಟಿವೇಷನ್ ಸಿಗಬಹುದು. ಯಾವುದೇ ಆದರೂ ಅದರಲ್ಲಿ ಕೆಟ್ಟದ್ದು ಎಂಬುದು ಇಲ್ಲವೆಂದೇ ನನ್ನ ಅಭಿಪ್ರಾಯ. "ಒಳ್ಳೆಯವರನ್ನು ಹುಡುಕುತ್ತಾ ಹೋದ ದುರ್ಯೋಧನನಿಗೆ ಒಳ್ಳೆಯವರು ಸಿಗಲಿಲ್ಲವಂತೆ. ಹಾಗೆಯೇ, ಕೆಟ್ಟವರನ್ನು ಹುಡುಕುತ್ತಾ ಹೋದ ಧರ್ಮರಾಯನಿಗೆ ಕೆಟ್ಟವರೇ ಸಿಗಲಿಲ್ಲವಂತೆ. " ಹಾಗೆಯೇ.. ಎಲ್ಲವೂ ನಮ್ಮ-ನಮ್ಮ ದೃಷ್ಟಿಕೋನದ ಮೇಲೆ ಅವಲಂಬಿತ ಎನ್ನುವ ಮಾತು ಒಪ್ಪದಕ್ಕದ್ದೇ. ಅಲ್ಲವೇ..??

ಎಷ್ಟೋ ಬಾರಿ ಓದು ಸಮಾಧಾನವನ್ನು ತಂದುಕೊಟ್ಟರೆ, ಎಷ್ಟೋ ಬಾರಿ ಅದೇ ಓದು ಮನಕಲಕಿ ಮನಸ್ಸನ್ನು ದುಗುಡದ ಕೂಪಕ್ಕಿಳಿಸುವುದು ಸಹಾ ಹೌದು. ಆದರೆ, ಅಂತಹಾ ಸಮಾಧಾನವನ್ನು ಉಳಿಸಿಕೊಳ್ಳುವುದು ಹಾಗೂ ದುಗುಡವನ್ನು ದೂರಪಡಿಸಿ ಮತ್ತೊಂದು ಪುಸ್ತಕವನ್ನು ಕೈಗೆತ್ತಿಕೊಳ್ಳುವುದು ನಮ್ಮ ಕೈಯಲ್ಲೇ ಇದೆ. ಎಷ್ಟೋ ಬಾರಿ 'ನಾನೇಕೆ ಬರೆಯಲಿ..?' ಎಂದು ನನಗನಿಸುವುದಂತೂ ಹೌದು. ಏಕೆಂದರೆ, ಓದಬೇಕಾದ ಎಷ್ಟೋ ವಿಷಯಗಳು ಹಾಗೆಯೇ ಉಳಿದು ಹೋಗಿವೆ. ನಾನಿನ್ನೂ ಕಲಿಯಬೇಕಾದದ್ದು ಬಹಳವೇ ಇದೆ ಎನಿಸುತ್ತದೆ. ಎಷ್ಟೋ ಬಾರಿ ಯಾವುದೋ ಹೊಸ ವಿಷಯವೇನೋ ಎಂಬಂತೆ ಹುಡುಕಿಕೊಂಡು ಹೋಗುವ ಆ ಪ್ರಚಲಿತ ವಿಷಯವನ್ನು ಕಂಡಾಗ.. ಅದಾಗಲೇ ನಾನು ಇಂತಹಾ ಸನ್ನಿವೇಶವನ್ನು ಕಥೆಯಲ್ಲೋ.. ಕಾದಂಬರಿಯಲ್ಲೋ.. ಇಂತಹವರ ಜೀವನ ಚರಿತ್ರೆಯಲ್ಲೋ.. ಕಂಡಿದ್ದೇನಲ್ಲಾ ಎಂಬ ಭಾವ ಮೂಡುವುದೂ ಹೌದು. ನಾವು ಹೆಚ್ಚೆಚ್ಚು ಬರೆಯಬೇಕಾದರೆ.. ಸಂಶೋಧನೆಗಳನ್ನು ಮಾಡಬೇಕಾಗುತ್ತದೆ. ಓದಬೇಕಾಗುತ್ತದೆ. ನಾವು ಮತ್ತೊಬ್ಬರಿಗೆ ನಮ್ಮ ವಿಚಾರಗಳನ್ನು ದಾಟಿಸಬೇಕು ಎಂದರೆ ನಮ್ಮ ಅನುಭವದ ಜೊತೆಗೆ ನಮ್ಮ ಅಧ್ಯಯನ ಕೂಡ ಅಷ್ಟೇ ಮುಖ್ಯವಾಗುತ್ತದೆ. 

ಹೀಗೆ ಓದಿನ ಸುಖಕ್ಕೆ ಒಮ್ಮೆ ನಮ್ಮನ್ನು ತೆರೆದುಕೊಂಡರೆ, ಖಂಡಿತವಾಗಿಯೂ ಅದರಿಂದ ಹೊರಬರುವುದು ಕಷ್ಟವೇ ಕಷ್ಟ. ಓದುಗರಾಗಿರುವವರಿಗೆ ಇದರ ಕುರಿತು ತಿಳಿದಿರುತ್ತದೆ. ಎಷ್ಟೋ ಬಾರಿ ಪಠ್ಯಪುಸ್ತಕದ ಓದು, ಏಕಾಗ್ರತೆ ಮೂಡಿಸದೆ ಹೋಗಿದ್ದಾಗ ಅಥವಾ ಪರೀಕ್ಷೆಗಾಗಿಯೇ ಓದುವ ಸಂದರ್ಭದಲ್ಲಿ ಏಕಾಗ್ರತೆ ಮೂಡದಿದ್ದಾಗ ಫಿಕ್ಷನ್ ಗಳನ್ನು ಹಿಡಿದು ಕೂತು ಒಂದೇ ಗುಕ್ಕಿನಲ್ಲಿ ಮುಗಿಸಿರುವುದೂ ಇಲ್ಲದಿಲ್ಲ. ಓದು ಎನ್ನುವುದು ನನ್ನ ಪಾಲಿಗೆ ನಿರಂತರ ಕಲಿಕೆ. ಅದು ಎಂದಿಗೂ ಮುಗಿಯುವುದು ಸಾಧ್ಯವೇ ಇಲ್ಲ. ಶೈಕ್ಷಣಿಕ ಓದು ಮುಗಿದಿದೆ ಅಷ್ಟೇ.. ಆದರೆ, ನಾವೆಷ್ಟು ತಿಳಿದುಕೊಂಡಿದ್ದೇವೆ ಹಾಗೂ ಅದರಲ್ಲಿ ಎಷ್ಟು ನೆನಪಿದೆ ಎಂದು ಹುಡುಕುತ್ತಾ ಹೊರಟರೆ ನಮಗೆ ಎಷ್ಟು ದಕ್ಕುತ್ತದೆ..? ಹಾಗೆಂದು ನಾವು ಹವ್ಯಾಸಕ್ಕೆಂದು ಓದುವ ಓದಿನಲ್ಲಿಯೂ ಕೆಲವೊಂದು ಕಾದಂಬರಿಗಳ ಕಥೆ ನೆನಪಿದ್ದರೆ ಅವುಗಳ ಪಾತ್ರಗಳ ನೆನಪಿಲ್ಲದಿರಬಹುದು ಅಥವಾ ಪಾತ್ರಗಳ ಹೆಸರು ಥಟ್ ಅಂತ ಹೊಳೆದರೂ.. ಸ್ಥಳಗಳ ಹೆಸರುಗಳು ಮಿಸ್ ಆಗಿ ಬಿಡಬಹುದು. ಅಥವಾ ಆ ಓದು ಇನ್ನಷ್ಟು ದಿನಗಳ ನಂತರ ಮತ್ತೆ ಓದಿದಾಗ ಹೊಸ ಓದು ಎನಿಸಬಹುದು. 

ಹೊಸ ಓದು ಹಾಗೂ ಮರು ಓದು ಎರಡರಲ್ಲಿಯೂ ಸಹಾ ಬಹಳ ವ್ಯತ್ಯಾಸವಿದೆ. ಕೆಲವು ಪುಸ್ತಕಗಳ ಮರು ಓದು ಸಹ ನಮ್ಮಲ್ಲೇನೋ ಹೊಸತನವನ್ನು, ಹೊಸ ಆಲೋಚನೆಯನ್ನು ಮೂಡಿಸಬಹುದು. ಹೀಗೆ ನನ್ನ ಓದು.. ಹೊಸ ಓದು ಹಾಗೂ ಮರು ಓದಿನ ಸಮ್ಮಿಲನ. ಎಷ್ಟೋ ಪುಸ್ತಕಗಳ ಕುರಿತು ಓದಿ ಸುಮ್ಮನಾಗಿ ಅದನ್ನು ದಾಖಲಿಸದೆ ಬಿಟ್ಟಿದ್ದೆ. ಆದರೆ, ನಾನು ಓದಿದ ಪುಸ್ತಕಗಳ ಕುರಿತು ಕೊಂಚವಾದರೂ ಬರೆದರೆ ನನ್ನ ಮರು ಓದಿನಲ್ಲಿ, ಹಿಂದೆ ಬರೆದಿದ್ದ ಟಿಪ್ಪಣಿಗಳು ನನ್ನ ಆಲೋಚನಾ ಶೈಲಿಯನ್ನು ಹಾಗೂ ಗ್ರಹಿಕೆಯ ಶಕ್ತಿಯನ್ನು ನನಗೆ ಪರಿಚಯಿಸುತ್ತವೆ ಎಂಬುದು ಅರಿವಾಯಿತು. 

ನನ್ನ ಓದಿನ ಪಯಣ ಹಾಗೂ ನನ್ನ ಓದಿನ ಟಿಪ್ಪಣಿಗಳನ್ನು ನಾನು ನಿಮಗೆ ತಲುಪಿಸುತ್ತೇನೆ. ನೀವು ಇದನ್ನು ಓದಿದ ನಂತರ, ನೀವು ಆ ಪುಸ್ತಕವನ್ನು ಈಗಾಗಲೇ ಓದಿದ್ದರೆ, ನಿಮಗೆ ಹೇಗನಿಸಿತ್ತು ಎಂಬುದನ್ನು ಹಂಚಿಕೊಳ್ಳಬಹುದು ಅಥವಾ ನೀವಿನ್ನೂ ಆ ಪುಸ್ತಕವನ್ನು ಓದಿರದಿದ್ದರೆ.. ಅದು ಕುತೂಹಲ ಮೂಡಿಸಿತು ಎನ್ನುವ ರೀತಿಯಲ್ಲಿ ಭಾಸವಾದರೆ ಅಥವಾ ನಿಮಗೆ ಇಷ್ಟವಾಯಿತು ಎನ್ನುವ ಅಂಶವಿದ್ದರೆ ನಿಮ್ಮ ಮುಂದಿನ ಓದಿನ ಪಟ್ಟಿಯಲ್ಲಿಯೂ ಸಹಾ ನೀವು ಈ ಪುಸ್ತಕಗಳನ್ನು ಸೇರಿಸಿಕೊಳ್ಳಬಹುದು. ನಾನಂತೂ ಸದಾ ಬರವಣಿಗೆಯ ಮೂಲಕ ನಿಮ್ಮ ಜೊತೆ ಇರುತ್ತೇನೆ. ನೀವು ನಿಮ್ಮ ಪ್ರೋತ್ಸಾಹದ ಮೂಲಕ ನನ್ನ ಜೊತೆ ಇರುತ್ತೀರಿ ಅಲ್ಲವೇ..??

ಎಲ್ಲರಿಗೂ ತುಂಬು ಹೃದಯದ ಧನ್ಯವಾದಗಳು.

~ವಿಭಾ ವಿಶ್ವನಾಥ್