ಭಂಡತನದ ಬಯಲಾಟ

ಬಣ್ಣವೇ ಬಳಿಯದ ನಟರು
ಬಣ್ಣದ ನಾಟಕದ ಪಾತ್ರಧಾರಿಗಳು

ಅಸೂಯೆಯ ಮುಖಕೆ ಪ್ರೀತಿಯ ಮುಖವಾಡ
ದ್ವೇಷಕೆ ಈಗ ಸವಿ ಮಾತಿನ ಮೇಲ್ಪದರ
ಜನ್ಮವನ್ನೇ ಜಾಲಾಡಿದ ಮಾತುಗಳಿಗೀಗ
ಜನ್ಮ ಜನ್ಮಾಂತರದ ನಂಟಿನ ನಿಲುವಂಗಿ

ಮಗಾ ಮಗಾ ಎನ್ನುತ್ತಿರುವುದು ಬಾಯಲ್ಲಿ
ಬೆನ್ನ ಹಿಂದೆ ಭಗ-ಭಗ ಎನ್ನುವ ಉರಿ
ಪಾಪಾತ್ಮರೆಲ್ಲರ ಪುಣ್ಯ ಕಾರ್ಯಕ್ಕೆ ಈಗ
ಸಾಮಾನ್ಯರ ಬದುಕೇ ಒಂದು ರಂಗಸಜ್ಜಿಕೆ

ನಿಸ್ವಾರ್ಥದ ಪ್ರೀತಿ ಸ್ವಾರ್ಥದ ಮುಸುಕಲ್ಲಿ
ಉಸಿರು ಕಟ್ಟಿ ನಲುಗುತಿದೆ, ಸಾಯುತಿದೆ..
ನಿಲ್ಲದಾ ಧೂರ್ತತನಕ್ಕೀಗ ಎಲ್ಲಿಲ್ಲದ ಆವೇಗ
ಮುಗ್ಧರ ಭಾವನೆಗಳ ಜೊತೆ ಚೆಂಡಾಟವಾಡಲು

ಭಂಡತನದ ಪರಮಾವಧಿಯ ಮೀರಿ
ಬಯಲಾಟದ ಬೀದಿ ನಾಟಕ ನಡೆಯುತಿದೆ
ಮುಖವಾಡ ಕಳಚಲು, ಬಣ್ಣ ಅಳಿಸಲು
ಮಂಕುಬೂದಿಯ ಸರಿಸಿ ಎದ್ದೇಳಬೇಕಿದೆ ಬೇಗ..

~ವಿಭಾ ವಿಶ್ವನಾಥ್