ಪುಸ್ತಕದ ಶೀರ್ಷಿಕೆ : ನೆನಪು ನಂಜುಂಡ (ನೆನಪಿನ ದೋಣಿಯಲ್ಲಿ)
ಕೃತಿ ಪ್ರಕಾರ : ಸಣ್ಣ ಕತೆಗಳು & ಮಾತುಕತೆಗಳು
ಲೇಖಕರು : ಡಾ|| ಜಿ. ಪಿ. ರಾಜರತ್ನಂ
ಪ್ರಕಾಶಕರು : ಸಪ್ನ ಬುಕ್ ಹೌಸ್
ಪ್ರಥಮ ಮುದ್ರಣ : 1968
ಎರಡನೇ ಮುದ್ರಣ : 2024
ಪುಟಗಳು : 175
ಬೆಲೆ : 125 ರೂ.
ಇದರಲ್ಲಿ 24 ಕತೆಗಳಿವೆ. ಇವುಗಳಲ್ಲಿ ಕೆಲವು ಸಣ್ಣ ಕಥೆಗಳು, ಕೆಲವು ಮಾತುಕತೆಗಳು. ಹಲವು ಕೊರವಂಜಿ, ಪ್ರಜಾವಾಣಿ, ಆಕ್ರೋದ 'ತಾಯಿನಾಡಂ' ಸುಧಾ ಇನ್ನಿತರ ಪತ್ರಿಕೆಗಳಲ್ಲಿ ಪ್ರಕಟವಾದವು. ಪುಸ್ತಕದ ಜೊತೆಗೆ 'ಹನಿಗಳು' ಪುಸ್ತಕವನ್ನು ಜೋಡಿಸಿಕೊಂಡರೆ ನಾನು ಬರೆದಿರುವ ಕಥೆಗಳೆಲ್ಲ ಒತ್ತಟ್ಟಿಗೆ ದೊರಕಿದಂತಾಗುತ್ತವೆ ಎನ್ನುತ್ತಾರೆ ಲೇಖಕರು.
ನೆನಪು ನಂಜುಂಡ: ಪೀಟರ್ಸನ್ ಪ್ರಿನ್ಸಿಪಲ್ ಹಾಕಿದ್ದಾಗ ಕೇಶವಮೂರ್ತಿ ರೈಟರ್ ಆಗಿದ್ದವರು. ಅವರ ಕಾವ್ಯದಲ್ಲಿ ನೆನಪಿಸಿಕೊಂಡ ಒಂದು ಸಂದರ್ಭವಿದ
"ಮನುಷ್ಯನ ಸಾಯಿಸೋ ಈ ಮುದಿತನ ಅನ್ನೋ ನಂಜನ್ನ ಹೊಡಿಯೋಕೆ ನೆನಪಿಗಿಂತ ದೊಡ್ಡ ನಂಜುಂಡ ಇನ್ನಿಲ್ಲ" ಅಂತ ಎನ್ನುವ ಮಾತು ಎಷ್ಟು ನಿಜವಲ್ಲವೇ..?!
ಪೀಟರ್ಸನ್ ನೆನಪಿಸಿಕೊಂಡ ಮೇಷ್ಟ್ರು ಮತ್ತು ನಾಯಕರ ತುಂಟ ಹುಡುಗರ ಚಂದದ ನೆನಪು ಇಲ್ಲಿದೆ. ನಗುವಿನ ಕಚಗುಳಿ ಜೊತೆಗೆ ಹರಿದ ಹುಡುಗರ ಬುದ್ಧಿವಂತಿಕೆಯೂ..!
ಕೆರೆಯನ್ನು ಕಾಪಾಡಿದ ದೇವರು: ಮದ್ರಾಸ್ ಪ್ರಾಂತ್ಯದ ಚೆಂಗಲ್ಪೆಟ್ ಜಿಲ್ಲೆಯ ಮಧುರಂತಕಂ ನಲ್ಲಿ ಪುರಾತನವಾದ ಕೋದಂಡರಾಮನ ದೇವಸ್ಥಾನವಿದೆ, ಇದನ್ನು 'ಏರಿ ಕಾತ್ತ ಪೆರುಮಾಳ್' ಹಿನ್ನಲೆ ಕೆರೆಯನ್ನು ಕಾಪಾಡಿದ ದೇವರು ಎಂದು ಕರೆಯುತ್ತಾರೆ ಈಸ್ಟ್ ಇಂಡಿಯಾ ಕಂಪನಿ ಆಳ್ವಿಕೆಯ ಸಂದರ್ಭದಲ್ಲಿ ಜಿಲ್ಲೆಯ ಕಲೆಕ್ಟರ್ ಆಗಿದ್ದ ಲಿಯೋನೆಲ್ ಪ್ರೈಸ್ ಮೂರನೆಯ ಬಾರಿ ಅಣೆಕಟ್ಟನ್ನು ತಾನೇ ಮೇಲ್ವಿಚಾರಣೆಯವಹಿಸಿ ಕಟ್ಟಿಸಿದ. ಸೀತಾ ಮಾತೆಯ ದೇವಸ್ಥಾನವನ್ನು ವಿಸ್ತರಿಸಬೇಕೆನ್ನುವ ಸಂದರ್ಭದಲ್ಲಿಯೇ ಪ್ರೈಸ್ ಈ ಬಾರಿ ಅಣೆಕಟ್ಟು ಮಳೆ ಬಂದಾಗ ಕೊಚ್ಚಿ ಹೋಗದೆ ನಿಂತರೆ ದೇವಿಗೆ ನಾನೇ ದೇವಸ್ಥಾನವನ್ನು ಕಟ್ಟಿಕೊಡುತ್ತೇನೆ ಎಂದು ಮಾತು ಕೊಟ್ಟ ಸಂದರ್ಭ. ಮುಂದೇನಾಯಿತು ಓದಿ ನೋಡಿ.
ಬೆಳದಿಂಗಳು : ರಂಗಯ್ಯ ಹೆಣ್ಣು ಮಗುವಿನ ಹುಟ್ಟಿದ ಹಬ್ಬಕ್ಕೋಸ್ಕರ ಶಾಮಿಯನ್ನು ಆಹ್ವಾನಿಸಿದ್ದಕ್ಕೆ ಮೊದಲು ಹೊರಟನಾದರೂ ನಂತರ ಆಲೋಚನೆಯ ಹುಚ್ಚು ಹೊಳೆಯೇ ಹರಿದು ಅಲ್ಲಿಗೆ ಹೋದಾಗ ಆತನ ತಂಗಿಯ ಮದುವೆಯ ಪ್ರಸ್ತಾಪ ಬಂದಿತು ಈ ಮದುವೆಯಲ್ಲಿ ದೈವ ಪ್ರಯತ್ನ ಹೆಚ್ಚೋ ಅಥವಾ ಪುರುಷ ಪ್ರಯತ್ನ ಹೆಚ್ಚೋ ಎಂಬುದನ್ನು ಓದಿ ನೋಡಿ.
ವಸೂಲಿ: ಮದುವೆಯಾಗಿ ಒಂದೂವರೆ ವರ್ಷದಲ್ಲಿ ಶಾಮಿ ತನ್ನ ಮಾವನ ಮನೆಗೆ ಹೋಗಿದ್ದು ಇದೂ ಸೇರಿ 13 ನೇ ಸಲ. ಪ್ರತಿ ಬಾರಿಯೂ ನಗುನಗುತ್ತ ಹೋಗುವುದು ಬರುವಾಗ ಸಿರಿಗುಟ್ಟುತ್ತಾ ಬರುವುದು.. ಅತ್ತೆ-ಮಾವಂದಿರಿಗೆ ಮಾತ್ರವಲ್ಲ ಅವನ ಪತ್ನಿ ವಿಲಾಸಿನಿಗೂ ಇದರ ಕಾರಣ ಅರಿವಾಗಿರಲಿಲ್ಲ. ಶಾಮಿ ಅಲ್ಲಿ ವಸೂಲು ಮಾಡಿದ್ದಾದರೂ ಏನನ್ನು..? ಓದಿ ನೋಡಿ.
ಒಲವೋ? ಕುಲವೋ?: ಶ್ರೀ ವೈಷ್ಣವ ಶಠಗೋಪ ಒಲಿದಿದ್ದು ವೀಳ್ಯದೆಲೆಯವಳಾದ ರತ್ನಿಗೆ. ಪ್ರೀತಿಗೆಲ್ಲಿಯ ಜಾತಿ ಎಂದುಕೊಂಡರೂ.. ಅಣ್ಣ ರಾಮಾನುಜನ ಮಾತಿಗೆ ಬೆಲೆ ಕೊಟ್ಟು ಅವರಿಂದ ದೂರಾಗುವೆನೆಂದರೂ ಅದು ಸಾಧ್ಯವಿತ್ತೇ..?
ಕೆಸರಿನ ಕಮಲ: ನಿರಂಜನ ಸಿರಿಪುರದ ಮೃಗಾಲಯದ ಮುಖ್ಯ ಅಧಿಕಾರಿ. ಮೃಗಾಲಯಕ್ಕೆ ಹೊಸ ಆನೆಯನ್ನು ಸೋಲಿಗ ದಂಪತಿಗಳು ಕೊಂಡುಬಂದರು. ಕೆಸರಿನ ಕಮಲದಂತಿದ್ದ ಆಕೆಯ ಮೇಲೆ ನಿರಂಜನನ ಆಸೆಗಣ್ಣು. ಆನೆ ಭೈರವ ತನ್ನ ಒಡತಿ ಚೆನ್ನಿಯ ಮಾತನ್ನಲ್ಲದೆ ಬೇರೆಯವರ ಮಾತನ್ನು ಕೇಳುತ್ತಿರಲಿಲ್ಲ. ನಿರಂಜನನ ಆಸೆ ಮುಂದೆ ದುರಾಸೆಯಾಗಿ ಬೆಳೆದುದರ ಪರಿಣಾಮ ಏನಾಯ್ತು ಎಂಬ ಕಥೆ ಇಲ್ಲಿದೆ. ಪರಿಣಾಮಕಾರಿ ಕಥಾತಂತ್ರ ಬಹಳ ಇಷ್ಟವಾಯಿತು.
ಅನಿಷ್ಟಕ್ಕೆ ಶನೇಶ್ವರ ಗುರಿ: ಸಿರಿಪುರದ ವಾರ್ತಾ ತರಂಗದಲ್ಲಿ ಬಂದ ವಾರ್ತೆ 40ನೇ ವರ್ಷಕ್ಕೆ ಅಮಲದಾರರಾದ ಶ್ರೀಮಾನ್ ಈ.ಟಿ ರಾಯರ ಸಾವು. ಲೋಕದ ಕಣ್ಣಿಗೆ ಬೇರೆಯಾಗಿ ಕಾಣುವ ಸುದ್ದಿಯ ಹಿಂದೇನಿತ್ತು..? ಪತ್ರ ರೂಪದ ಕತೆ ಇದು.
೨೪-೨-೩೦: ಶೀರ್ಷಿಕೆಯಲ್ಲಿನ ತಾರೀಕಿಗೊಂದು ಮಹತ್ವವಿದೆ ಕಥೆಯಲ್ಲಿ. ಗಾರ್ಕಿಯ ಉಕ್ತಿಯಿಂದ ಆರಂಭವಾಗುವ ಈ ಕಥೆಯಲ್ಲಿ ಅಮ್ಮನ ಏಕೈಕ ಆಸೆಯಂತೆ ತಂದೆ ಇಲ್ಲದ ಮಗ ವಿವಾಹವಾದ. ಮುಂದೆ ಆತನ ಶಾಂತಿಪ್ರಸ್ತವೂ ನಿಗದಿಯಾಯಿತು. ಆದರೆ, ವಿಧಿಯಾಟ ಬೇರೆಯೇ ಇತ್ತು. ಅದಕ್ಕೂ ಶೀರ್ಷಿಕೆಗೂ ಇರುವ ಸಂಬಂಧ ಇಲ್ಲಿದೆ.
ಕರಿಯ ಕಂಬಳಿ: ಮಳೆಯಲ್ಲಿ ಚಳಿಯಲ್ಲಿ ಹಳ್ಳಿಯವನಿಗೆ ಮಾಡಿದ್ದು ಸಹಾಯವೇ..? ಅಥವಾ ಇವರ ಒಳ್ಳೆತನದ ದುರುಪಯೋಗವಾಯಿತೇ..? ಒಂದು ಕಂಬಳಿಯು ಎಷ್ಟೆಲ್ಲಾ ಆಲೋಚನೆಗೆ ಹಚ್ಚಬಲ್ಲದು..!
ಮೂಲವೆಲ್ಲಕ್ಕು ಮನಸು: ಇಲ್ಲಿ ದೇವಪುತ್ರ ಹಾಗೂ ಜಿನಪುತ್ರರು ಒಂದೇ ಕಾಲದಲ್ಲಿ ಒಂದೇ ಕೆಲಸವನ್ನು ಮಾಡಿದರೂ ಇಬ್ಬರೂ ಪಡೆದ ಫಲ ಬೇರೆಯೇ...
"ನುಡಿನಡೆಗಳು ಮುಖ್ಯವಹುದು ಆದರೆ ಮನಸ್ಸನ್ನು ಬಿಟ್ಟ ನುಡಿನಡೆಗಳು ನುಡಿನಡೆಗಳೇ ಅಲ್ಲ. ಮೂಲವಲ್ಲಕ್ಕು ಮನಸು" ಎಂಬುದನ್ನು ಅರ್ಥೈಸುವ ಪ್ರಸಂಗ ಇಲ್ಲಿದೆ.
ಬಳೆ ತೊಟ್ಟನಾ ಭೀಮಸೇನ: ಭೀಮಭಾರತದ ಬೃಹನ್ನಾರೀಪರ್ವವನ್ನು ಆಧಾರವಾಗಿಟ್ಟುಕೊಂಡು ಬರೆದ ಅಜ್ಞಾತವಾಸದ ಪ್ರಸಂಗವಿದು.
ಕ್ವಾಣನ ಕಾಳಗ: ವಿಶ್ವಾಮಿತ್ರ ಹಾಗೂ ಹರಿಶ್ಚಂದ್ರರ ಪ್ರಸಂಗವನ್ನು ಆಡು ನುಡಿಯಲ್ಲಿ ಹೇಳುತ್ತಾ ವಿಭಿನ್ನ ಭಾಷೆ ಹಾಗೂ ವಿಭಿನ್ನ ಸ್ವರೂಪದಲ್ಲಿ ಕಟ್ಟಿರುವ ಕಥೆ ಇದು.
ರಾಘವಾಂಕನ ಹಲ್ಲು: 11ನೇ ಶತಮಾನದಲ್ಲಿದ್ದ ಕೆಲ ಕೃತಿಗಳನ್ನು ತುಳಿದು ಕಳೆಯುವುದಕ್ಕೆ 12ನೆಯ ಶತಮಾನದಲ್ಲಿ ಬಂದ ಕೃತಿಗಳ ಕುರಿತು ಪ್ರಸ್ತಾಪಿಸುತ್ತಾ.. ಹರಿಹರ ಹಾಗೂ ರಾಘವಾಂಕರ ಹೆಸರಿಗೆ ಅಂಟಿಕೊಂಡಿರುವ ದಂತಕತೆಗೆ ಮೂಲವಾದ ಫೇಂಡಾಕರ್ಣನ ಪ್ರಸಂಗವಿದೆ. ರಾಘವಾಂಕನ ತಾಳ್ಮೆ ಕಳೆದು ಫೇಂಡಾಕರ್ಣನ ಕೆನ್ನೆಗೆ ಅಪ್ಪಳಿಸಿದಾಗ ಅವನ ಐದು ಹಲ್ಲುಗಳು ಮುರಿದು ಬಿದ್ದದ್ದೇಕೆ..? ಇಂದಿಗೂ ಹರಿಹರ ರಾಘವಾಂಕರನ್ನು ಜಾತಿಭೇದವಿಲ್ಲದೆ ಸ್ಮರಿಸುವಾಗ ಫೇಂಡಾಕರ್ಣ ಕಣ್ಮರೆಯಾಗಿರುವ ಹಿಂದಿನ ಮರ್ಮವಿಲ್ಲಿದೆ.
ಮದನಕೈ ವಿಗ್ರಹ: ಸ್ಕೌಟ್ ತಂಡದೊಡನೆ ಬೇಲೂರಿಗೆ ಹೋದಾಗ ಅಲ್ಲಿ ನಡೆದ ಸ್ವಾರಸ್ಯಕರ ಪ್ರಸಂಗವಿದು. ಸ್ಕೌಟ್ ಮೇಷ್ಟ್ರಿಗೆ ಹಿತ್ತಾಳೆ ಕಿವಿ ಅಂತಯೇ ಕಿವಿ ಸ್ವಲ್ಪ ಮಂದವೂ ಎನ್ನುತ್ತಾ ಇಲ್ಲಿನ ಪ್ರಸಂಗವನ್ನು ಹಾಸ್ಯಮಯವಾಗಿ ನಿರೂಪಿಸುತ್ತಾರೆ.
ವಾಲ್ಮೀಕಿ ವೊದ್ದಾಟ: ಮನೆ ಕಟ್ಟುವುದಕ್ಕೆ ಸೈಟ್ ತೆಗೆದುಕೊಂಡಾಗ ಅಲ್ಲಿದ್ದ ಹುತ್ತಗಳ ವಿಚಾರವನ್ನು ಪ್ರಸ್ತಾಪಿಸುತ್ತಾ.. ಮನೆಯಲ್ಲಿ ಪತ್ನಿಯೊಡನೆ ನಡೆದ ಸಂಭಾಷಣೆ ಮುದಗೊಳಿಸುವಂತಿದೆ. ಇದು ಮನೆಮನೆಯ ಸಂಭಾಷಣೆಯೂ ಹೌದಲ್ಲವಾ ಎನ್ನಿಸುತ್ತದೆ.
ಹಲೋ!...ನಾನು!...ಶೈಲಾ!: ಗೆಳತಿಗೆ ಫೋನ್ ಮಾಡಿ.. ತನ್ನ ತರಗತಿಗೆ ಗೆಳತಿಯ ಪತಿ ಲೆಕ್ಷರರ್ ಆಗಿ ಬಂದಾಗ ಅಲ್ಲಿನ ಪೇಚಾಟವನ್ನು, ಕೀಟಲೆಯನ್ನು ಸ್ವಾರಸ್ಯಕರವಾಗಿ ಹೇಳಿರುವ ಮಾತುಕತೆ ಇದು.
ಮೂರು ಕಾಗದ: ಬೆಂಗಳೂರಿನಲ್ಲಿ ಇದ್ದ ಪತಿಗೆ ಗೌರಿಹಬ್ಬಕ್ಕೆ ತುಮಕೂರಿನಲ್ಲಿರುವ ಮಗಳ ಮನೆಗೆ ಹೋಗಿ ತವರು ಮನೆಯ ಉಡುಗೊರೆ ಕೊಡಲು ಬರೆದ ಪತ್ರ, ಏನು ಉಡುಗೊರೆ ಬಂತೆಂದು ಮಗಳು ತನ್ನ ತಾಯಿಗೆ ಬರೆದ ಪತ್ರ, ಮತ್ತೆ ಆ ತಾಯಿ ಪತಿಗೆ ಬರೆದ ಪತ್ರ ಇಲ್ಲಿದೆ. ಮೂರನೇ ಪತ್ರ ಬಂತು ಚುಟುಕಾಗಿ ಪಂಚಿಂಗ್ ನಂತಿದೆ.
ನಗಬೇಕೋ? ಅಳಬೇಕೋ?: ವಿದ್ಯಾರ್ಥಿಯೊಬ್ಬ ಪರೀಕ್ಷೆಯ ಪೇಪರ್ಗಳನ್ನು ತಿದ್ದುವ ಲೆಕ್ಚರರ್ ಬಳಿ ಹೋಗಿ ಹೇಳಿದ್ದೇನು..? ಆ ಪ್ರಸಂಗವನ್ನು ಓದಿ ನಗಬೇಕೋ ಅಳಬೇಕೋ ನಮಗೂ ಅರಿವಾಗದು.
ಅಕ್ರೋಧ : "ಅಕ್ರೋಧದಿಂದ ಕ್ರೋಧವನ್ನು ಜಯಿಸಿರಿ" ಎಂಬುದು ಬುದ್ಧನ ಧರ್ಮ ಪದದೊಳಗಿನ ಪ್ರಸಿದ್ಧವಾದ ಮಾತು. ವಿರೋಧವಿಲ್ಲದೆ ಇರುವುದು ಹಾಗೂ ಅದಕ್ಕೆ ಪ್ರತಿಯಾಗಿ ಮೈತ್ರಿಯನ್ನು ಹೊಂದಿರುವುದು. ಈ ಕುರಿತಾಗಿ ಹಲವಾರು ಪ್ರಸಂಗಗಳನ್ನು ಚೆಂದವಾಗಿ ಪ್ರಸ್ತಾಪಿಸಿದ್ದಾರೆ.
ಮೂರ್ತಿ ಹೇಳಿದ ಕಥೆ: ಮೂರ್ತಿ ಮತ್ತು ಕೀರ್ತಿ ಒಟ್ಟಿಗೆ ಬೆಳೆದವರು. ಮುಂದೆ 10-12 ವರ್ಷ ಒಬ್ಬರನ್ನೊಬ್ಬರು ಜ್ಞಾಪಿಸಿಕೊಳ್ಳುತ್ತಿದ್ದರೇ ಹೊರತು ಭೇಟಿಯಾಗಿರಲಿಲ್ಲ. ಇಬ್ಬರೂ ದೀರ್ಘಕಾಲದ ನಂತರ ಭೇಟಿಯಾದಾಗ ಮೂರ್ತಿಯ ಪ್ರಸಿದ್ಧತೆ ಹಾಗೂ ಕೀರ್ತಿಗೆ ಅದು ಕಂಡ ಬಗೆ ಇಲ್ಲಿದೆ. ಅದರಲ್ಲಿಯೂ ಮೂರ್ತಿಯ ತಂದೆಯ ಸಾವಿನ ಸಂದರ್ಭದಲ್ಲಿ ತುರುಕನಾಗಿದ್ದ ಜಟಕಾದವನು ಹಾಗೂ ಅವನ ಮಾನವೀಯತೆ, ಆಪ್ತತೆಯನ್ನು ಮೂರ್ತಿ ಮನಮಿಡಿಯುವಂತೆ ಹೇಳುವ ಚಿತ್ರಣವಿಲ್ಲಿದೆ.
ಒಂದು ಕಾರ್ಡಿನ ಕಥೆ : ಲೀಲಾ ಚಿಕ್ಕಮ್ಮ ಬರೆದ ಕಾರಿಗೆ ಪ್ರತಿಯಾಗಿ ತಾತ ಬರೆಸಿದ ಕಾರ್ಡು ಹೇಗಿತ್ತು..? ಈಗ ಬಂದ ಕಾಗದವನ್ನು ತಾತ ಓದಿದ್ದರೆ ಏನೆನ್ನುತ್ತಿದ್ದರು..? ವಿಷಯವನ್ನು ಚುಟುಕಾಗಿ ಹೇಳುವ ರೀತಿ, ಪಂಕ್ತಿಯಲ್ಲಿ ಬರೆಯುವ ಪರಿ, ಅಚ್ಚುಕಟ್ಟುತನ ಎಲ್ಲವನ್ನೂ ಇಲ್ಲಿ ಗಮನಿಸಬಹುದಾಗಿದೆ.
ಗೋಳುಕರೆ: 'ಹುಟ್ಟಿದವರೆಲ್ಲ ಸಾಯಲೇಬೇಕು' ಎಂದು ಗೀತೆಯಲ್ಲಿ ಇದ್ದರೂ ಈ ಸತ್ಯವನ್ನು ಒಪ್ಪುವುದು ಅಷ್ಟು ಸುಲಭವಲ್ಲ. ಅಜ್ಜಿಯ ಸಾವಿನ ಸಂದರ್ಭದ ಗೋಳಿನ ಚಿತ್ರಣ ಇಲ್ಲಿದೆ.
ಒಂದು ಏರೋಗ್ರಾಮ್: ಪ್ರತಿಯೊಬ್ಬರಿಗೂ ತನ್ನ ಮಗಳಿಗೆ ಮಗುವಾದದ್ದು, ಯಾವ ಮಗು, ಹೆರಿಗೆಯಾದ ಸಂದರ್ಭ, ಮಗು ಹೇಗಿದೆ ಎಂಬ ಚಿತ್ರಣವನ್ನು ಬರೆದು ಪ್ರತ್ಯೇಕವಾಗಿ ಹೇಳುವ ಬದಲಾಗಿ ಒಂದೇ ಏರೋಗ್ರಾಮ್ ನಲ್ಲಿ ಅಮೆರಿಕಾದಿಂದ ಸುದ್ದಿ ಕೊಟ್ಟ ಹಾಗೂ ಒಬ್ಬೊಬ್ಬರೂ ಓದಿ ಮತ್ತೊಬ್ಬರಿಗೆ ಕಳುಹಿಸುವಂತಹ ಸರಣಿ ರೀತಿಯ ಪತ್ರವಿದು. ತಮ್ಮ ಪತ್ರವನ್ನು ಮಾತ್ರವೇ ಓದಿ ಸುಮ್ಮನಾಗುವುದಿಲ್ಲ. ಕುತೂಹಲಕ್ಕಾಗಿಯಾದರೂ ಮತ್ತೊಬ್ಬರ ಪತ್ರ ಓದುತ್ತಾರಲ್ಲವೇ..!? ಹಾಗಾಗಿ ಇಲ್ಲಿ ಯಾವ ವಿಚಾರವನ್ನೂ ಮತ್ತೆಮತ್ತೆ ಹೇಳಿಲ್ಲ. ಪ್ರತಿಯೊಬ್ಬರಿಗೆ ನೀಡಿದ ಸುದ್ದಿಯೂ ವಿಶೇಷವೇ.. ವಿಭಿನ್ನವೇ..!
ಗಾಂಪರೊಡೆಯರ ಸಂಗಡ: ಮರುಳ, ಮಂಕ, ಮುಠ್ಠಾಳ, ಮಡೆಯ, ಮಡ್ಡಿ ಇವರನ್ನು 'ಪೆಂಗು ಪಾಂಡವರು' ಎಂದು ಕರೆಯುತ್ತಿದ್ದರು. ಅವರ ಜೊತೆ ನಗೆಗಡಲಲ್ಲಿ ಚಂದ್ರಲೋಕಕ್ಕೆ ಹೋದ ಸಂದರ್ಭ ಹೇಗಿರುತ್ತದೆ ಎಂಬುದನ್ನು ಕಟ್ಟಿಕೊಟ್ಟಿದ್ದಾರೆ ಇಲ್ಲಿ.
ರಾಜರತ್ನಂ ಅವರ ಈ ಕಥೆಗಳನ್ನು ಓದಿದಾಗ ಅವುಗಳನ್ನು ಬಹಳ ಸ್ವಾರಸ್ಯಕರವಾಗಿ ನಿರೂಪಿಸಿರುವ ಹಾಗೂ ಪ್ರಸಂಗಗಳನ್ನು ಪ್ರಸ್ತಾಪಿಸಿರುವ ಪರಿ ಬಹಳ ಇಷ್ಟವಾಯಿತು. ಕೆಲವೊಮ್ಮೆ ಗಂಭೀರವಾದ ಉಕ್ತಿಗಳಿದ್ದರೂ.. ಗಂಭೀರತೆಗೆ ತಕ್ಕಂತೆಯೇ ತೆಳು ಹಾಸ್ಯವೂ ಇಲ್ಲಿದೆ. ಹೆಚ್ಚಿನವುಗಳನ್ನು ಓದುವಾಗ ತುಟಿಯ ಮೇಲೊಂದು ನಗು ಇದ್ದೇ ಇರುತ್ತದೆ. ಆಡುನುಡಿಯ ಕಥೆಗಳು, ಪೌರಾಣಿಕ ಸಂದರ್ಭಗಳನ್ನು ಹೇಳಿರುವ ರೀತಿ, ಶೀರ್ಷಿಕೆಗಳನ್ನು ಕಟ್ಟಿಕೊಟ್ಟಿರುವ ಪರಿ ಒಟ್ಟಿನಲ್ಲಿ ಎಲ್ಲವೂ ಇಷ್ಟವಾಯಿತು. ಮನೋಲ್ಲಾಸದಾಯಕ ಓದು ಇದು.
~ವಿಭಾ ವಿಶ್ವನಾಥ್
