ಒಂದೇ ಒಂದು ಕಥೆ

"ಈಗಾಗಲೇ ಸಮಯ 10 ಗಂಟೆ. ಮಲಗಲು ನಿನಗೆ ಇನ್ನೆಷ್ಟು ಹೊತ್ತು ಬೇಕು ಕಂದಾ..?" ಎಂದ ಅಪ್ಪನಿಗೆ "ಒಂದೇ ಒಂದು ಲಾಸ್ಟ್ ಕಥೆ ಹೇಳಪ್ಪಾ.." ಎಂದು ಪೀಡಿಸುತ್ತಲೇ ಇದ್ದ ಮಗುವಿಗೆ ಕತೆ ಹೇಳುತ್ತಲೇ ನಿದ್ರೆ ಹೋದ ಅಪ್ಪ, ಇನ್ನೂ ಎಚ್ಚರವಿರುವ ಮಗು ಇಬ್ಬರನ್ನೂ ನೋಡಿ ಸುಸ್ತಾಗಿದ್ದಾಳೆ ಅಮ್ಮ.

~ವಿಭಾ ವಿಶ್ವನಾಥ್ 

ಅವಳೊಳಗಿನ ಕತೆಗಳು

"ಕೊಟ್ಟದ್ದು ತನಗೆ, ಬಚ್ಚಿಟ್ಟಿದ್ದು ಪರರಿಗೆ" ಎಂಬ ಗಾದೆ ಮಾತು ಕೇಳಿ ಮನಸ್ಸಲ್ಲೇ ಮಂಥನ ಮಾಡಿಕೊಂಡಳು. ಕೊಟ್ಟ ಪ್ರೀತಿ ಮರಳಿ ಸಿಗಲಿಲ್ಲ, ಬಚ್ಚಿಟ್ಟ ನೋವು ಅವಳಲ್ಲೇ ಉಳಿದು ಹೋಯಿತು.
*********************************

ನಿರಾಭರಣ ಸುಂದರಿಯಾದ ಅವಳ ಸೌಂದರ್ಯದ ರಹಸ್ಯ ಅವಳ ಮುಗ್ದ ಮುಗುಳ್ನಗು
**********************************

ಎಲ್ಲರನ್ನೂ ತಿರಸ್ಕಾರದಿಂದ ಧಿಕ್ಕರಿಸುತ್ತಾ ಬದುಕುತ್ತಿರುವವಳ ಕುರಿತು ಆಡುವವರಿಗೇನು ಗೊತ್ತು ಪ್ರೀತಿಯನ್ನು ಮೊಗೆದು ಕೊಟ್ಟು ಮೋಸ ಹೋದ ದೇವತೆ ಅವಳೆಂದು..
**********************************

ಅವಳು ಸತ್ತಳೆಂದು ಎಲ್ಲರೂ ದುಃಖಿಸುತ್ತಿರುವ ಹೊತ್ತಲ್ಲಿ ಅವಳ ಆತ್ಮ ಹೇಳುತ್ತಿತ್ತು. ಅವಳ ಆಸೆಗಳನ್ನು ಕೊಂದುಕೊಂಡು ಎಲ್ಲರ ಆಸೆಯಂತೆ ಬದುಕುವ ತೀರ್ಮಾನ ಮಾಡಿದಾಗಲೇ ಅವಳು ಸತ್ತಿದ್ದಳು, ಬದುಕಿದ್ದು ಅವಳ ದೇಹ ಮಾತ್ರ.
**********************************

ಅವಳ ಹಾಜರಿಯಲ್ಲಿ ಅವಳನ್ನು ತಮ್ಮ ಬದುಕಿನ ಪುಟವೊಂದರಂತೆ ಭಾವಿಸುತ್ತಿದ್ದವರಿಗೆ ಅವಳ ಗೈರು ಹಾಜರಿಯಲ್ಲಿ ಅರಿವಾದದ್ದು ಅವಳೊಂದು ಬೃಹತ್ ಗ್ರಂಥವೆಂದು.
**********************************

ಅವಳ ಚುಚ್ಚು ಮಾತು, ಪ್ರತಿಯೊಂದಕ್ಕೂ ತಡೆಯೊಡ್ಡುವ ಹಿಂದಿನ ಪ್ರೀತಿ ಅದೇಕೋ ಅವಳ ಸುತ್ತಮುತ್ತಲಿನವರಿಗೆ ಕಾಣಲೇ ಇಲ್ಲ.
************************************

ಕತೆಗೊಂದು ಜೀವಂತಿಕೆ ಸೃಷ್ಟಿಸಿ ಮಾಯವಾದಳು, ಕತೆ ಮುಗಿದ ನಂತರವೇ ಅರಿವಾದದ್ದು ಕತೆ ಮತ್ತು ಕತೆಯ ಜೀವಾಳವೇ ಅವಳೆಂದು
************************************

ಆಟ,ಪಾಠ,ಕಲೆ ಎಲ್ಲದರಲ್ಲೂ ಗೆಲುವು ಅವಳದ್ದೇ ಆದರೆ ಪ್ರೀತಿ ಪಡೆದುಕೊಳ್ಳುವುದರಲ್ಲಿ ಏಕೋ ಸೋತಿದ್ದಳು.
*************************************

ಅವಳನ್ನು ಸೋಲಿಸಿದೆ ಎಂಬ ಅಹಂಭಾವದಲ್ಲಿ ಮೆರೆಯುತ್ತಿದ್ದವನಿಗೆ ಗೊತ್ತಿರಲಿಲ್ಲ.. ತನ್ನ ಗೆಲುವು, ಅವಳ ಸೋಲು ಎರಡೂ ಅವಳು ಬಯಸಿದ್ದು ಮತ್ತು ಅದೇ ಅವಳ ಗೆಲುವೆಂದು.
*************************************

ಬೇಜಾರೇನಿಲ್ಲ ಅವಳಿಗೆ ಬೇರಾರ ಮೇಲೂ, ಅವಳ ಹೊರತು. ಪ್ರೀತಿ, ಕಾಳಜಿ ತೋರಿ ಮರುನಿರೀಕ್ಷಿಸುವ ತನ್ನ ಕುರಿತೇ ಅವಳಿಗೆ ಬೇಜಾರು ಅಷ್ಟೇ.
**************************************

ಹಣದಿಂದ ಪ್ರತಿಯೊಂದನ್ನೂ ಕೊಂಡುಕೊಳ್ಳಬಹುದೆಂಬ ಅಹಂನಲ್ಲಿದ್ದವನಿಗೆ ಅವಳು ಹೇಳಿದ್ದಳು. ಹಣದಿಂದ ನೀನು ಕೊಂಡುಕೊಳ್ಳಬಹುದಾದದ್ದು ನನ್ನ ದೇಹವನ್ನಷ್ಟೇ.. ಮನಸ್ಸನ್ನಲ್ಲ ಎಂದು.
***************************************

ಮಿಥ್ಯವೆಂದು ತಿಳಿದಿದ್ದರೂ ಅದನ್ನು ಮುಚ್ಚಿಟ್ಟು ಸತ್ಯವನ್ನಾಗಿಸಲು ಪಣತೊಟ್ಟು ಅವನನ್ನು ಕೆಟ್ಟತನದಿಂದ ಒಳ್ಳೆಯತನಕ್ಕೆ ಪರಿವರ್ತಿಸಿದವಳ ಹೆಸರು "ಮುಗ್ಧ ಕಿನ್ನರಿ" ಎಂದಿರಬಹುದೇ..?***************************************

ಎಲ್ಲವೂ ಬದಲಾಗಬಹುದು ಆದರೆ ಅವಳೊಳಗಿನ ತಾಯ್ತನದ ಮಿಡಿಯುವ ಮನಸ್ಸೊಂದನ್ನು ಬಿಟ್ಟು
***************************************

ಮಡಿಲಲ್ಲಿಟ್ಟು ಜಗದ ಪ್ರೀತಿಯನ್ನು ಪರಿಚಯಿಸಿದವಳಿಗೆ, ಅವಳು ಅವನ ಆಸರೆ ಬಯಸಿದ ಸಂಧರ್ಭದಲ್ಲಿ ಜಗದ ಕ್ರೌರ್ಯವನ್ನು ಪರಿಚಯಿಸಿದ.
****************************************

ಬಂಧ ಬೆಸೆದುಕೊಂಡಿತೆಂದು ಖುಷಿ ಪಟ್ಟವಳಿಗೆ ಅದು ಬಂಧನವೆಂಬ ಪರಿಚಯ ಮಾಡಿಕೊಟ್ಟ. ಬಂಧನವ ಧಿಕ್ಕರಿಸಿ ನಡೆದವಳು ಅವನ ಅಹಂ ಅನ್ನೂ ತುಳಿದು ನಡೆದಿದ್ದಳು. ಮತ್ತೆ ಸಾವರಿಸಿಕೊಳ್ಳದಂತೆ..
****************************************

ದೊಡ್ಡ ದನಿಯಲ್ಲಿ ಅವನನ್ನು ಗದರಿಸಿ, ಒಳಕೋಣೆ ಸೇರಿದವಳ ಬಿಕ್ಕು ಯಾರಿಗೂ ಕೇಳಲೇ ಇಲ್ಲ.
*****************************************

ಬದುಕಿಗೊಂದು ಗುರಿ ಇರಬೇಕು ಎಂದು ಭಾಷಣ ಮಾಡುತ್ತಿದ್ದವನ ಮಾತು ಕೇಳಿ ಹೇಳಿದಳು. ಗುರಿ ಸಾಧನೆಯಾದರೆ ಸಾಲದು ಅದನ್ನು ಸಂಭ್ರಮಿಸುವವರನ್ನೂ ಸಂಪಾದಿಸಿರಬೇಕು.
*****************************************

ಅವಳ ಮನದ ಭಾವಗಳ ಅರ್ಥೈಸುವಿಕೆ ಅದೆಷ್ಟೇ ಪುಸ್ತಕ ಓದಿದರೂ ಅರ್ಥವಾಗದ್ದು
*****************************************

ಎಲ್ಲಾ ಭರವಸೆಗಳ ತಂತು ಕಡಿದ ಮೇಲೆ ಕೊನೆಗುಳಿಯುವುದು, ಆಸರೆಯಾಗುವುದು ತಾನೇ ಧಿಕ್ಕರಿಸಿ ನಡೆದಿದ್ದ ಅವಳು, ಅವಳ ಭರವಸೆ, ಅವಳ ಮಡಿಲು, ಅವಳ ಒಲವು.


~ವಿಭಾ ವಿಶ್ವನಾಥ್

'ಅಪ್ಪ'ನ ಆಯಾಮಗಳು

ಅವತಾರ
------------
ಮಗಳು ಹುಟ್ಟಿದಾಗಲೇ ಅವನ ಅವತಾರವೂ ಆಗಿತ್ತು. ದೇವರ ಆ ಅವತಾರದ ಹೆಸರೇ 'ಅಪ್ಪ'.

ಕಾಣದ ಪ್ರೀತಿ
------------------
ಕಾಣದಿದ್ದರೂ ಕಾಡುವ ಪ್ರೀತಿಯೆಂದರೆ ಅದು 'ಅಪ್ಪ'ನದ್ದೇ..

ಋಣ
--------
ಋಣಾನುಬಂಧ ಪಶು,ಪತ್ನಿ,ಮಗ ಮತ್ತು ಮನೆಗೇ ಏತಕ್ಕೆ? 'ಅಪ್ಪ'ನೂ ಋಣಾನುಬಂಧದಿಂದಲೇ ದಕ್ಕಿದವನೇ ಅಲ್ಲವೇ?

ಯಯಾತಿ
------------
ಮಗ ಪುರುವಿನ ಯೌವ್ವನವನ್ನು ಅನುಭವಿಸಿದ ಯಯಾತಿ ಇಂದಿಗೂ ಪಶ್ಚಾತ್ತಾಪದಲ್ಲಿ ಬೇಯುತ್ತಲೇ ಇದ್ದಾನೆ. ರಾಜನಾಗಿ ಬದುಕಿದ್ದಕ್ಕೆ.. 'ಅಪ್ಪ'ನಾಗಿ ಯೋಚಿಸದಿದ್ದಕ್ಕೆ..!

ಮಹಾಜ್ಞಾನಿ
----------------
ನನ್ನ ಅಸಂಬದ್ಧ ಪ್ರಶ್ನೆಗಳಿಗೂ ಸಮಾಧಾನದಿಂದಲೇ ಉತ್ತರ ನೀಡಿ, ಎಲ್ಲಾ ಜ್ಞಾನದಾಹವನ್ನು ತಣಿಸುವ ಜಗತ್ತಿನ ಮಹಾಜ್ಞಾನಿ 'ಅಪ್ಪ'.

ಶಿಲ್ಪಿ
-------
ಜವಾಬ್ದಾರಿಯ ನಿರ್ವಹಿಸುತ್ತಲೇ, ಬರೀ ಮಾತಲ್ಲೇ ಹೇಳದೆ ಕೃತಿಯಲ್ಲೂ ತೋರಿಸಿ ಜವಾಬ್ದಾರಿಯುತ ನಾಗರೀಕನನ್ನಾಗಿ ರೂಪಿಸುವ ಶಿಲ್ಪಿ 'ಅಪ್ಪ'

ಆಂತರ್ಯ
--------------
ಮುಪ್ಪಿನ ಮುದುರಿನಲ್ಲೂ ಅದೇ ಶಿಸ್ತು, ಗತ್ತು, ಗೈರತ್ತುಗಳೊಂದಿಗೆ ಬದುಕುತ್ತಾ ಆಂತರ್ಯದಲ್ಲಿ ಅಮ್ಮನ ಅಂತಃಕರಣವನ್ನು ಹೊಂದಿರುವವನೇ 'ಅಪ್ಪ'

ಬದಲಾಗುವ ಪಾತ್ರ
--------------------------
ಕಾಲಕ್ಕೆ ತಕ್ಕಂತೆ, ಪರಿಸ್ಥಿತಿಗಳಿಗೆ ಹೊಂದಿಕೆಯಾಗುತ್ತಾ ಕಿಂಚಿತ್ತೂ ಬದಲಾಗದಂತೆ ಕಂಡರೂ ಬದಲಾಗುವ ಪಾತ್ರವೇ 'ಅಪ್ಪ'

ಅಪ್ಪ ಅಂದರೆ ಅಕಾಶವಲ್ಲ
----------------------------------
ಅಪ್ಪ ಅಂದರೆ ಆಕಾಶ ಅನ್ನೋ ಮಾತನ್ನ ನಾನೊಪ್ಪಲ್ಲ. ಆಕಾಶ ನಿಲುಕದ್ದು, ಹರವಾದ್ರೂ ದೂರದ್ದು,ಆದರೆ 'ಅಪ್ಪ' ಆಗಲ್ವಲ್ಲಾ

ದಾನವತ್ವ-ದೈವತ್ವ
-----------------------
ಕೆಲಸದಲ್ಲಿ ದಾನವತ್ವವನ್ನೂ, ನಡೆಯಲ್ಲಿ ದೈವತ್ವವನ್ನು ಮೈಗೂಡಿಸಿ ಕೊಂಡಿಸಿಕೊಂಡವನೇ 'ಅಪ್ಪ'

ಶ್ರೀಮಂತಿಕೆಯ ಬಡವ
-----------------------------
ಹರಿದ ಬಟ್ಟೆಯ ಹಿಂದಿನ ಹೃದಯ ಶ್ರೀಮಂತಿಕೆಯ ಬಡವನೇ 'ಅಪ್ಪ'.

ಮಹಾಮೌನಿ
-----------------
ಬಡಬಡ ಮಾತನಾಡುವ ಅಮ್ಮನೆದುರಲ್ಲಿ ಮೌನದಿಂದಲೇ ಸಂವಹಿಸಿ ಪ್ರತಿಕ್ರಿಯಿಸುವ ಮಹಾಮೌನಿ 'ಅಪ್ಪ'.

ಗುರಾಣಿ
------------
ಅಮ್ಮನ ಕೋಪಕ್ಕೆ ಅಡ್ಡ ನಿಂತು ತನ್ನನ್ನೇ ಗುರಾಣಿಯಾಗಿಸಿಕೊಂಡು ರಕ್ಷಿಸುವುದು 'ಅಪ್ಪ' ಮಾತ್ರವೇ..

ಶಕ್ತ-ದುರ್ಬಲ
-------------------
ನನ್ನ ಬದುಕಿನ ಶಕ್ತಿ ಮತ್ತು ದುರ್ಬಲತೆ ಎರಡೂ ಅಪ್ಪನಂತಹಾ 'ಅಪ್ಪ' ಮಾತ್ರವೇ..

ಶಾಪಗ್ರಸ್ತ
-------------
ಶಾಪಗ್ರಸ್ತ ಗಂಧರ್ವನಿಗೆ ಅವತರಿಸಲು ಒಂದು ದೇಹದ ಅವಶ್ಯಕತೆ ಇತ್ತು. ಆತ ಸೃಷ್ಟಿಸಿಕೊಂಡ ಆ ದೇಹದ ನಾಮವೇ 'ಅಪ್ಪ'.

~ವಿಭಾ ವಿಶ್ವನಾಥ್

'ಅವಳ' ಕಥೆಗಳು

1. ಬಿದ್ದು ಎದ್ದವಳು

-------------------------

ಅವಳು ಎಡವಿ ಬಿದ್ದಿದ್ದಳು ರಸ್ತೆಯಲ್ಲಿ ಮಾತ್ರವಲ್ಲ, ಬದುಕಿನಲ್ಲಿಯೂ. ಅಷ್ಟೇ ವೇಗವಾಗಿ ಮೇಲೂ ಎದ್ದಿದ್ದಳು ಅಷ್ಟೇ ಸಶಕ್ತಳಾಗಿ.ಎಷ್ಟೆಂದರೆ ಮತ್ತೊಬ್ಬರನ್ನು ಕೈ ಹಿಡಿದು ಎತ್ತುವಷ್ಟು. ರಸ್ತೆಯಲ್ಲಿ ಬಿದ್ದಿದ್ದವರನ್ನು ಮಾತ್ರವಲ್ಲ, ಬದುಕಿನಲ್ಲಿ ಬಿದ್ದಿದ್ದವರನ್ನೂ ಸಹಾ.

2. ಬಾಡಿದ ಬದುಕು

--------------------------

ಹೂ ಬಾಡುತ್ತದೆ ಎಂದು ನೀರು ಚಿಮುಕಿಸುತ್ತಿದ್ದ ಬಾಲೆಯ ಬದುಕು ಶಿಕ್ಷಣವಿಲ್ಲದೆ ಮುದುಡಿ ಹೋಗುತ್ತಿತ್ತು.

3.ಕಳಂಕಿನಿ

---------------

ಬದುಕಿನ ಅನಿವಾರ್ಯತೆಗಾಗಿ ನಿತ್ಯವೂ ಹಗಲು ಇರುಳು ಎನ್ನದೆ ಪುರುಷರ ಸಂಗದಲ್ಲಿ ಸತ್ತು ಹುಟ್ಟುತ್ತಿದ್ದಳು. ಮನದ ಅಪವಿತ್ರತೆಯನ್ನು ತೊರೆದು, ಹೊಸ ಬದುಕನ್ನು ಕಟ್ಟಿಕೊಂಡ ನಂತರವೂ ಆಕೆ ಜನರ ಮನಃಪಟಲದಲ್ಲಿ ಕಳಂಕಿನಿಯಾಗಿಯೇ ಉಳಿದಳು.

4. ಮುಖವಾಡ

---------------------

ತನ್ನ ನೋವನ್ನೆಲ್ಲಾ ಮರೆತು ಮುಖದ ಮೇಲೆ ನಗು ತಂದುಕೊಂಡು ಸವಿ ಮಾತನಾಡುತ್ತಿದ್ದವಳಿಗೆ ಸಿಕ್ಕ ಬಿರುದು "ಮುಖವಾಡ ತೊಟ್ಟವಳು".

5. ಅನ್ನಪೂರ್ಣೇಶ್ವರಿ

---------------------------

'ಅನ್ನಪೂರ್ಣೇಶ್ವರಿ'ಯಾಗಿ ಎಲ್ಲರಿಗೂ ನಿತ್ಯವೂ ಅನ್ನದಾನ ಮಾಡುತ್ತಿದ್ದವಳಿಗೆ ಮಾತ್ರ ಗೊತ್ತಿತ್ತು ತನ್ನ ಬಾಲ್ಯದಲ್ಲಿ ಆನ್ನವಿಲ್ಲದೆ ಪರದಾಡುತ್ತಾ ಬರೀ ಗಂಜಿಯಲ್ಲೇ ಅರೆಹೊಟ್ಟೆಯಲ್ಲೇ ಜೀವನ ಸಾಗಿಸಿದ್ದರ ಕಷ್ಟ.

6. ಪ್ರೀತಿಯನ್ನಪ್ಪಿ

-----------------------

ಹದಿಹರೆಯದ ಕಾಮನೆಗಳಿಗೆ ಮನಸೋತು ಪ್ರೀತಿಯನ್ನಪ್ಪಿ ಹೊರಟವಳಿಗೆ ತಂದೆ-ತಾಯಿಯರ ಪ್ರೀತಿಯಪ್ಪುಗೆಯ ವಿದಾಯ ಸಲ್ಲಲೇ ಇಲ್ಲ.

7. ಭಿಕ್ಷುಕಿ

-------------

ಹೊಸದಾದ ಹವಾನಿಯಂತ್ರಿತ ಕಾರಿನಲ್ಲಿ ಕುಳಿತಿದ್ದವಳಿಗೆ ಮಗುವಿಗೆಂದು ಭಿಕ್ಷೆ ಬೇಡುತ್ತಿದ್ದ ಭಿಕ್ಷುಕಿ ಕಾಣಿಸಿದ್ದಳು. ಆ ಕ್ಷಣದಲ್ಲೇ ಅವಳಿಗೊಂದು ಪ್ರಶ್ನೆ ಕಾಡುತ್ತಿತ್ತು. ಪ್ರೀತಿಯ ಮಗುವಿಗಾಗಿ ಹಣವಿಲ್ಲದೆ ಭಿಕ್ಷೆ ಬೇಡುತ್ತಿರುವ ಅವಳು ಭಿಕ್ಷುಕಿಯೋ ಇಲ್ಲ ಹಣವಿದ್ದರೂ ಹಿಡಿ ಪ್ರೀತಿಗೆ, ಮಗುವಿಗೆ ಗಂಡನನ್ನು ಬೇಡುವ ತಾನು ಭಿಕ್ಷುಕಿಯೋ?

8. ಸ್ವಾತಂತ್ರ್ಯ

-----------------

ಮಹಿಳಾ ಸ್ವಾತಂತ್ರ್ಯದ ಕುರಿತು ಕವನ ವಾಚನ ಮಾಡುತ್ತಿದ್ದವಳಿಗೆ ಹಠಾತ್ತನೆ ಗಂಡನ ಮಾತು ನೆನಪಾಗಿತ್ತು. ಎಲ್ಲಾ ಕೆಲಸ ಮುಗಿಸಿ ಹೊರಡು ಆದರೆ ಸಂಜೆ 6 ಘಂಟೆಯ ಮೊದಲು ಮನೆಯಲ್ಲಿರಬೇಕು.

9.ಬಿರುದು

--------------

ಒಂದೂ ಮಕ್ಕಳಿಲ್ಲವೆಂಬ ಕಾರಣಕ್ಕೆ ಬಂಜೆಯೆಂಬ ಬಿರುದು ಇದ್ದವಳಿಗೆ ಅನಾಥಾಶ್ರಮದ ನೂರಾರು ಮಕ್ಕಳು "ಅಮ್ಮ" ಎಂಬ ಬಿರುದು ನೀಡಿದ್ದಾರೆ.

10. ಅರಿವು

-----------------

ರೂಪವಿದೆ ಎಂದು ಮೆರೆಯುತ್ತಾ, ಬೇರೆಯವರನ್ನು ಜರಿಯುತ್ತಿದ್ದವಳಿಗೆ ರೂಪ ನಶ್ವರ ಎಂಬುದು ಅರಿವಾಗಲು ಹೆಚ್ಚು ಸಮಯವೇನೂ ಬೇಕಿರಲಿಲ್ಲ, ಕಾಲವೇ ಅವಳಿಗೆ ಅರಿವು ಮೂಡಿಸಿತ್ತು.

11. ವಾಸ್ತವ

------------------

ಬರಹದಲ್ಲಿ ಪ್ರೀತಿಯ ಪರಿಯನ್ನು, ಪ್ರೇಮಿಗಳನ್ನು, ಸಂಬಂಧಗಳನ್ನು ಚೆನ್ನಾಗಿ ಕಟ್ಟಿಕೊಡುತ್ತಿದ್ದವಳ ಬದುಕಲ್ಲಿ ವಾಸ್ತವದಲ್ಲಿ ಪ್ರೀತಿಸಲು ಯಾರೂ ಇರಲಿಲ್ಲ. ಆಕೆ ಅನಾಥೆ ಎಂಬ ಸತ್ಯ ಓದುಗರಿಗೆ ತಿಳಿಯಲೇ ಇಲ್ಲ.

12. ಅನಕ್ಷರಸ್ಥೆ

--------------------

ಡಿಗ್ರಿಯಲ್ಲಿ ಓದಿನಲ್ಲಿ ಚಿನ್ನದ ಪದಕ ಗಳಿಸಿದ್ದ ಆಕೆ ಆಗ ತಾನೇ ಶುರು ಮಾಡಿದ್ದ ನೂತನ ಸಂಸಾರದಲ್ಲಿ ಬಂಧಗಳ ಸೆಳಕೂ ಗೊತ್ತಿಲ್ಲದ ಅನಕ್ಷರಸ್ಥೆ.

13. ನಪಾಸು

-----------------

ಎಲ್ಲಾ ಪರೀಕ್ಷೆಯಲ್ಲೂ ಉತ್ತಮ ಶ್ರೇಣಿಯಲ್ಲಿಯೇ ಉತ್ತೀರ್ಣಳಾಗುತ್ತಿದ್ದ ಅವಳು ವಧುಪರೀಕ್ಷೆಯಲ್ಲಿ ಪ್ರತಿಬಾರಿಯೂ ನಪಾಸು. ಕಾರಣ ಇಷ್ಟೇ, ತಳುಕು ಬಳುಕಿಗೆ ಒಗ್ಗದ ಆಕೆಯ ತತ್ವ, ಪ್ರಾಮಾಣಿಕತೆ ಮತ್ತು ಅದರ ದೆಸೆಯಿಂದ ಬಂದೊದಗದ ಆಕೆಯ ಆಸ್ತಿ.

14. ಕೃಷ್ಣ ಸುಂದರಿ

------------------------

ಸೃಷ್ಟಿಯಲ್ಲಿ ಕಪ್ಪು ಶ್ರೇಷ್ಠ ಎಂದೆಲ್ಲಾ ಭಾಷಣ ಮಾಡುತ್ತಿದ್ದ, ಕಪ್ಪು ಬಣ್ಣ ಇಷ್ಟವೆಂದು ಬೊಗಳೆ ಬಿಡುತ್ತಿದ್ದ ಮಹಾಶಯ ಮಗಳನ್ನು ದ್ವೇಷಿಸಲು ಕಾರಣ ಇಷ್ಟೇ.. ಮಗಳು ಕೃಷ್ಣ ಸುಂದರಿ.

15. ಪಾಠ

--------------

ಪ್ರೀತಿಯ ಮಾಯೆಯಲ್ಲಿ ಬೀಳಬೇಡ ಎಂದು ಮಗಳಿಗೆ ಕಿವಿಮಾತು ಹೇಳುತ್ತಿದ್ದ ಅಮ್ಮನಿಗೆ ಆಕೆಯ ವಿಫಲ ಪ್ರೇಮ ಚೆನ್ನಾಗಿಯೇ ಪಾಠ ಕಲಿಸಿತ್ತು.

~ವಿಭಾ ವಿಶ್ವನಾಥ್