ಆಯ್ಕೆ ನನ್ನದಲ್ಲ

ಆಯ್ದುಕೊಳ್ಳುವ ಭಾಗ್ಯ ನಿನಗೆ ಸಿಕ್ಕಿದೆ
ಸುಖ, ದುಃಖದ ಆಯ್ಕೆ ನಿನ್ನದೇ, ನನ್ನದಲ್ಲ

ಬರೆಸಿಕೊಳ್ಳುವ ತೆವಲು ನಿನಗೆ
ಇಂತಹವರಿಂದಲೇ ಎಂಬ ಆಯ್ಕೆ ಬೇರೆ
ದಕ್ಕದವರಿಗೂ ದಕ್ಕಿಸಿಕೊಳ್ಳುವ
ಇಡಿಯಾಗಿ ದೊರೆಯುವ ಆಯ್ಕೆ ನಿನ್ನದೇ, ನನ್ನದಲ್ಲ

ಒಂದಿಷ್ಟು ಅಕ್ಷರಗಳ ರಾಶಿಯ ಗುಡ್ಡೆ ಹಾಕಿಕೊಂಡು
ಆಯ್ಕೆ ನನ್ನದೇ ಎಂದು ಬೀಗಿದ್ದ ಕಾಲವೊಂದಿತ್ತು
ಬದಲಾದದ್ದು ಆಲೋಚನೆಯಷ್ಟೇ, ಅಕ್ಷರವಲ್ಲ
ಬರೆಸಿಕೊಂಡು ಬೀಗುವ ಆಯ್ಕೆ ನಿನ್ನದೇ, ನನ್ನದಲ್ಲ

ಮನದಿ ಮಂಥನವ ನಡೆಸಿ, ಕಾಯಿಸಿ
ಹೊರಬರುವ ಕಾಲವನೂ ನೀನೇ ನಿರ್ಧರಿಸಿ
ರಾಜಾರೋಷವಾಗಿ ಹೊರಬಂದು ನಿಂತು
ನನ್ನಿಂದ ನೀನು ಎನ್ನುವ ಆಯ್ಕೆ ನಿನ್ನದೇ, ನನ್ನದಲ್ಲ

~ವಿಭಾ ವಿಶ್ವನಾಥ್