ಹೆಣ್ಣೆಂಬ ಕಾರಣಕೆ....

ಹೆಣ್ಣೆಂಬ ಕಾರಣಕೆ ಕಣ್ಬಿಡುವ ಮುನ್ನವೇ,

ಹೊಸಕದಿರಿ ಈ ಜೀವವನು.

ಚಿಗುರಲ್ಲೆ ಚಿವುಟದಿರಿ ನನ್ನನು,

ಅವಕಾಶ ನೀಡಿ ನೋಡಿ ಎನಗೊಂದು.

ನನ್ನದಲ್ಲದ ತಪ್ಪಿಗೆ ನನಗೇಕೆ ಶಿಕ್ಷೆ?

ತಲೆತಗ್ಗಿಸುವ ತಪ್ಪು ನಾನೆಂದು ಮಾಡೆನು

ಜೀವನದಲ್ಲಿ ಯಾರಿಗೂ ಹೊರೆಯಾಗೆನು

ನಾನು ಸಮಾಜಕ್ಕಂಟಿರುವ ಶಾಪವಲ್ಲ,

ಬಾಳುವೆನು ಹಠದಲಿ, ಸಾಧನೆಯ ಹಾದಿಯಲಿ.

ರೂಪುಗೊಳ್ಳುವೆ ನೀವೆ ಹೆಮ್ಮೆಪಡುವಂತೆ.

ದೌರ್ಜನ್ಯವೆಸಗದಿರಿ ಹೆಣ್ಣೆಂಬ ಕಾರಣಕೆ,

ಕತ್ತರಿಸದಿರಿ ನಿಮ್ಮ ಕರುಳ ಕುಡಿಯನು,

ನಿಮ್ಮನ್ನು ಹಡೆದ ತಾಯಿ ಹೆಣ್ಣಲ್ಲವೇ?

ಮಗು ಹೆಣ್ಣೆಂಬ ಕಾರಣಕೆ ಏಕೆ ಈ ಕಲ್ಲುಮನಸು?

                                         -vಭಾ