ಶುಕ್ರವಾರ, ಸೆಪ್ಟೆಂಬರ್ 28, 2018

ಆತ ಮತ್ತು ಈಕೆ

ಆಗ, ಆತ ಭಾವಗಳಲ್ಲಿ ಶಾಂತತೆಯ ಆಗರ
ಈಕೆ ಕೃತಿಯಲ್ಲಿ ಭೋರ್ಗರೆಯುವ ಕಡಲು
ಈಗ, ಆತ ಉಕ್ಕಿ ಹರಿಯುವ ಹುಚ್ಚು ಹೊಳೆ..
ಈಕೆ ಭರತವಿಳಿದ ಮಂದ್ರ ಸಾಗರದಂತಾ ನಡೆ

ಎಲ್ಲದಕ್ಕೂ ಕುತೂಹಲದ ಪ್ರಶ್ನೆ ಮಾಡುವಾಕೆಗೆ
ಎಲ್ಲದರ ಉತ್ತರ ಕೊಡುವ ಆಸಕ್ತ ಆತ
ಕೇಳುತ್ತಾ, ಈಕೆ ಮೌನಿಯಾಗುತ್ತಲೇ ಹೋದಳು
ಉತ್ತರಿಸುತ್ತಾ ಆತ ವಾಚಾಳಿಯಾಗುತ್ತಲೇ ಇದ್ದ

ಆಗ ಕೆಲವೊಂದರಲಿ ಆತ ಪೂರ್ವ,ಈಕೆ ಪಶ್ಚಿಮ
ಈಗ ಅವೆಲ್ಲದರಲ್ಲೂ ಆತ ಪಶ್ಚಿಮ,ಈಕೆ ಪೂರ್ವ
ಹೊಸದರಲಿ ಎಲ್ಲವೂ ಬೇಕೆನಿಸುವ ಆಸೆ ಆಕೆಗೆ
ಈಗೀಗ ಎಲ್ಲವನ್ನೂ ಆತನಿಗೆ ನೀಡುವುದೇ ಆಸೆ

ಇಬ್ಬರೂ ಒಬ್ಬರನೊಬ್ಬರು ಒಪ್ಪಿ ಅರಿಯುವಲ್ಲಿ
ಬದಲಾದರು ಈಕೆಯಂತೆ ಆತ,ಅವನಂತೆ ಈಕೆ
ಬದಲಾವಣೆಯ ಇಬ್ಬರ ಈ ಪರಿಭ್ರಮಣವೇ
ಆಕೆ ಮತ್ತು ಈತನ ಜೀವನದ ಮರುಸಮ್ಮಿಲನ

~ವಿಭಾ ವಿಶ್ವನಾಥ್

ಕಾಮೆಂಟ್‌ಗಳಿಲ್ಲ:

ಕಾಮೆಂಟ್‌‌ ಪೋಸ್ಟ್‌ ಮಾಡಿ