ನಯನ ಮನೋಹರಿ

ಶಿಲ್ಪ ಸೊಬಗಿನ ಬೀಡಿನೊಳಗೂ

ತನ್ನ ಸೊಬಗನು ಚೆಲ್ಲುತಿರುವ

ನೀ ಧರೆಗಿಳಿದ ಅಪ್ಸರೆಯೋ?

ಜೀವ ತಳೆದು ನಿಂತ ಶಿಲ್ಪವೋ?

ದೀಪವನಿಡಿದ ದೀಪಧಾರಿಣಿ

ಚೆಲ್ಲುತಿರುವ ಬೆಳಕು ಇಮ್ಮಡಿಸಿ

ಪಸರಿಸುತಿದೆ ಅವಳಂದವನು

ಕತ್ತಲೂ ನಾಚಿ  ಓಡುವಂತೆ..

ಕಲ್ಯಾಣಿಯಲಿ ಪ್ರತಿಫಲಿಸಿರುವ

ಸೊಗಸುಗಾತಿಯ ಬಿಂಬ ಕಂಡು

ಅರಳಿರುವ ನೈದಿಲೆಯೂ ನಾಚಿ

ಸ್ವಾಗತಿಸುತಿದೆ ನನ್ನ ಸ್ಪರ್ಶಿಸೆಂದು

ಕಲ್ಲುಕಂಬಕೆ ಆತು ನಿಂತಿರುವ

ಪ್ರತಿ ಶಿಲ್ಪಕೂ ಕಣ್ಣುಕುಕ್ಕುತಲಿದೆ

ನೀ ಧರಿಸಿದ ಸ್ವರ್ಣಾಭರಣ

ಜೊತೆಗೆ ಪತ್ತಲದ ಚಿತ್ತಾರವೂ

ಶಿಲಾಬಾಲಿಕೆಯರೆಲ್ಲರ ಚೆಲುವಿಂದ

ಎರಕ ಹೊಯ್ದು ತಯಾರಾದಂತೆ

ಜೀವ ತಳೆದು ಕಣ್ಮನ ಸೆಳೆವ ನೀನು

ನಿಜಕ್ಕೂ ನಯನ ಮನೋಹರಿಯೇ..!

~ವಿಭಾ ವಿಶ್ವನಾಥ್