ಒಂದಿಷ್ಟು ಸಮಯ ಬೇಕಿದೆ

ಒಂದಿಷ್ಟು ಸಮಯ ಬೇಕಿದೆ
ನನ್ನದೇ ಆದ ಬದುಕ ಬದುಕಲು

ಮರಳಿ ಬಾರದ ಗತದ ನೆನಪಲ್ಲಿ
ಮುಚ್ಚಿ ಹೋದ ಹವ್ಯಾಸಗಳ ರೂಢಿಸಿಕೊಳ್ಳಲು
ಒತ್ತಡಗಳಿಂದ ಕೊಂಚ ನಿರಾಳವಾಗಲು
ಒಂದಿಷ್ಟು ಸಮಯ ಬೇಕಿದೆ..

ಒಡೆದು ಬಿದ್ದ ಕನಸುಗಳ ಕಟ್ಟಲು
ಪುನಃ ಒಡೆಯದಂತೆ ಎಚ್ಚರಿಕೆ ವಹಿಸಲು
ಆತ್ಮಶಕ್ತಿಯ ಗಟ್ಟಿಗೊಳಿಸಿಕೊಳ್ಳಲು
ಒಂದಿಷ್ಟು ಸಮಯ ಬೇಕಿದೆ..

ಮತ್ತೊಬ್ಬರ ಸಂಚಿಗೆ ಬಲಿಯಾಗದಂತೆ
ಅವರಿವರ ಚುಚ್ಚುಮಾತಿಗೆ ತಲೆಕೆಡಿಸಿಕೊಳ್ಳದಂತೆ
ನನ್ನದೇ ನಿರ್ಧಾರಗಳಂತೆ ನಡೆದುಕೊಳ್ಳಲು
ಒಂದಿಷ್ಟು ಸಮಯ ಬೇಕಿದೆ..

ಆಗದಿರುವುದಕ್ಕೆ ಕೊರಗುತ್ತಾ ಕೂರದೆ
ಮುಂದಾಗುವುದಕ್ಕೆ ಮಾತ್ರ ಗಮನ ನೀಡುತ್ತಾ
ಆಗುವುದೆಲ್ಲಾ ಒಳ್ಳೆಯದಕ್ಕೆ ಎಂದುಕೊಳ್ಳಲು
ಒಂದಿಷ್ಟು ಸಮಯ ಬೇಕಿದೆ..

ಅವರಿವರೊಂದಿಗೆ ಹೋಲಿಸಿಕೊಳ್ಳದೆಯೇ
ನಮ್ಮತನವನ್ನು ತೊರೆಯದೆ ಬದುಕಲು
ಬದುಕ ಬಯಲಿನ ಅಲೆಮಾರಿಯಂತಾಗಲು
ಒಂದಿಷ್ಟು ಸಮಯ ಬೇಕಿದೆ..

ಬಯಸಿದ್ದೆಲ್ಲಾ ಆ ಕ್ಷಣಕ್ಕೇ ನೆರವೇರಲು
ನಮ್ಮ ಬಳಿ ಮಂತ್ರದಂಡವೂ ಇಲ್ಲ
ಬದುಕು ಮಾಯಾಜಾಲವೂ ಅಲ್ಲ
ಎಲ್ಲದಕ್ಕೂ ಒಂದಿಷ್ಟು ಸಮಯ ಬೇಕಿದೆ

~ವಿಭಾ ವಿಶ್ವನಾಥ್