ಅನಂತ ಪ್ರೇಮ

ಅವಳು ಮುಗ್ಧ ಮನಸ್ಸಿನ ನಿಷ್ಕಲ್ಮಶೆ

ಅವನೋ ಜಗತ್ತಿನ ದೊಡ್ಡ ಚಿತ್ತಚೋರ

ಬಾಲ್ಯವದು ಬೆಸೆದಿಹುದು ಇಬ್ಬರನೂ

ಅಮ್ಮನಿಗೆ ಬಾಯಲ್ಲಿ ಬ್ರಹ್ಮಾಂಡ ತೋರಿದವ

ಅವಳಿಗೆ ಕೊಳಲ ನಾದದಿ ಪ್ರೀತಿ ತೋರಿದ

ಎರಡು ದೇಹದ ಆತ್ಮಗಳೂ ಒಂದಾದವು

ನಂದಗೋಕುಲದಿ ಎಲ್ಲರ ಕಣ್ಣುಕುಕ್ಕುವಂತೆ

ನಡೆದೇ ಇತ್ತು ಇಬ್ಬರ ಪ್ರೇಮಪಯಣ

ಹಳಿ ತಪ್ಪಿತು ಪ್ರೀತಿ ಕರ್ತವ್ಯದ ಹೊಣೆಯಲಿ

ಹೊರಟೇ ಬಿಟ್ಟನು ಮುರಾರಿ ಲೋಕಕಲ್ಯಾಣಕೆ

ಕಾಳಿಂದಿಯೊಡಲಲಿ ಸೇರಿ ಹೋಯಿತು

ರಾಧೆಯ ಕಣ್ಣೀರೊಡನೆ, ಪ್ರೀತಿ ಪಯಣವೂ

ಸಂಸಾರದ ನೊಗ ಹೊತ್ತರಿಬ್ಬರೂ ಬೇರೆಯಾಗಿ

ತಮ್ಮ ಪ್ರೀತಿಗೆ ಅಂತರ್ಪಟವನೆಳೆದು..

ಸಾವಿಲ್ಲದ ಪ್ರೀತಿ ಸಾಯದೆ ಬದುಕುತಲಿತ್ತು

ಜೀವನಕೆ ಅಮೃತ ಸಮಾನವಾಗಿ ಉಳಿದಿತ್ತು

ಕಡೆಗೂ ದೇಹಗಳು ಒಂದಾಗಲೇ ಇಲ್ಲ

ರಾಧೆಯ ಅನಂತ ಪ್ರೀತಿ ಲೀನವಾಯಿತು ಮುರಾರಿಯಲಿ

~ವಿಭಾ ವಿಶ್ವನಾಥ್