ಬೆನ್ನ ಹಿಂದಿನ ಮಸಲತ್ತು, ಪಿತೂರಿ
ಕಾಲ ಕೆಳಗಿನ ಕತ್ತಲು ಎರಡೂ ಒಂದೇ
ಹೆಚ್ಚು ವ್ಯತ್ಯಾಸವೇನಿಲ್ಲ..
ಬೈದದ್ದು ಪ್ರೀತಿಯಿಂದ ಎಂದೇ ನಂಬಿಸುವ
ಮಾಡುವುದೆಲ್ಲವೂ ಮಮತೆಯಿಂದಲೇ
ಎಂದು ಸತ್ಯದ ತಲೆ ಮೇಲೆ ಹೊಡೆದಂತೆ
ಬಿಂಬಿಸುತ್ತಾ ಮಾಡುವ ಮೋಸಕ್ಕೂ, ದಗಕ್ಕೂ
ಹೆಚ್ಚು ವ್ಯತ್ಯಾಸವೇನಿಲ್ಲ
ಕೈ ಕಟ್ಟಿ ಕುಳಿತ ಅಸಹಾಯಕತೆಯ ನಡೆಗೂ
ಆಡಬೇಕೆನಿಸಿದರೂ ಆಡಲಾಗದ ನುಡಿಗೂ
ಮೋಸದ ಪರದೆ ಸರಿಸಿ ನೋಡಿದರೂ ನೋಡದಂತೆ
ಕಣ್ಮುಚ್ಚಿ ಕೂತ ಕುರುಡಿಗೂ, ಸತ್ತು ಸತ್ತು ಹುಟ್ಟುವುದಕ್ಕೂ
ಹೆಚ್ಚು ವ್ಯತ್ಯಾಸವೇನಿಲ್ಲ
ಅವರಿಗೆ ಕತ್ತಲಲ್ಲಿ ಗುರಿ ಹೊಡೆದದ್ದು ಸಾಕಿತ್ತು
ಇವರಿಗೆ ಬಿದ್ದರೂ ಮೀಸೆ ಮಣ್ಣಾಗದಂತಿರಬೇಕಿತ್ತು
ಅವರ ಹಾಗೂ ಇವರ ಮುಸುಕಿನಾಟಕ್ಕೆ ಬಲಿಯಾದವಳ
ಆತ್ಮ ಸತ್ತದಕ್ಕೂ, ಮನಸ್ಸಾಕ್ಷಿ ಮುಕ್ಕಾದದ್ದಕ್ಕೂ
ಹೆಚ್ಚು ವ್ಯತ್ಯಾಸವೇನಿಲ್ಲ
~ವಿಭಾ ವಿಶ್ವನಾಥ್
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ