ಪುಣ್ಯ ಫಲಿಸಿತು (ಪುಸ್ತಕ ಯಾನ - 489)

ಪುಸ್ತಕದ ಶೀರ್ಷಿಕೆ : ಪುಣ್ಯ ಫಲಿಸಿತು 

ಲೇಖಕರು : ಹೆಚ್. ಜಿ. ರಾಧಾದೇವಿ

ಪ್ರಕಾಶಕರು : ಇಂದಿರಾ ಪ್ರಕಾಶನ

ಪ್ರಥಮ ಮುದ್ರಣ : 2003

ಮರು ಮುದ್ರಣ : 2024

ರಂಜಿತ ಹುಟ್ಟಿದ ಎರಡನೇ ವರ್ಷಕ್ಕೆ ತಾಯಿಯನ್ನು ಕಳೆದುಕೊಂಡಳು. ಮಲತಾಯಿ ಬಂದರಾದರೂ ಅವರಿಂದ ಇವಳಿಗೆ ತೊಂದರೆಯಾಗುವ ಪ್ರಮೇಯವಿಲ್ಲದಕ್ಕೆ ಕಾರಣ ತಂದೆಯ ತಾಯಿ ಅಂದರೆ ಅಜ್ಜಿ ಗೋದಮ್ಮ. ಅವರಿಗೆ ಮೊಮ್ಮಗಳೆಂದರೆ ಪಂಚಪ್ರಾಣ. ಮಲಮಗು ಎಂದೆಲ್ಲಿ ಇವಳನ್ನು ಕಡೆಗಣಿಸುತ್ತಾರೆ ಎಂಬ ಭಯಕ್ಕೆ ಅತಿಯನ್ನಿಸುವಷ್ಟೇ ಪ್ರೀತಿ ಹಾಗೂ ಕಾಳಜಿ ಮಾಡಿ ಸಾಕಿದ ಅವರು ತಮ್ಮ ಎರಡನೆಯ ಸೊಸೆಯಿಂದ ಇದ್ದ ಇಬ್ಬರು ಮೊಮ್ಮಕ್ಕಳಿಗೆ ಯಾವುದೇ ಸೌಕರ್ಯವನ್ನು ಮಾಡಿಕೊಡಲಿಲ್ಲ. ಹಾಗೆಂದು ಪ್ರೀತಿ ಇರಲಿಲ್ಲವೆಂದಲ್ಲ. ಬದುಕು ಇದ್ದದ್ದೇ ಮೊಮ್ಮಗಳು ರಂಜಿತಾಳಿಗೆ ಎಂಬಂತೆ ಬದುಕಿದವರು. ಆಕೆಯೂ ಓದು ಬಿಟ್ಟು ಮತ್ತೇನನ್ನೂ ಆಶಿಸದೆ ಓದಿನ ಗಮನ ಹರಿಸಿ ಸಾಫ್ಟ್ವೇರ್ ಇಂಜಿನಿಯರ್ ಆಗಿ ಕೆಲಸಕ್ಕೆ ಸೇರಿ ಒಳ್ಳೆಯ ಸಂಬಳ ತೆಗೆದುಕೊಂಡಳು. ತನ್ನ ವಿವಾಹಕ್ಕಿಂತ ಮೊದಲೇ ಮಲತಂಗಿಯ ವಿವಾಹವಾದಾಗಲು ರಂಜಿತ ದೃತಿಗೆಡಲಿಲ್ಲ. ತಂದೆ ಈ ಇವಳತ್ತ ಗಮನ ಹರಿಸದಾಗಲೂ ಧೃತಿಗೆಡಲಿಲ್ಲ.

ಗೋದಮ್ಮನವರು ಪಾರ್ಶ್ವವಾಯು ಪೀಡಿತರಾದಾಗ, ಮಗ-ಸೊಸೆಯಿಂದ ಯಾವುದೇ ಆಸರೆ ಸಿಗದಾಗ, ಕೊಂಚ ಚೇತರಿಸಿಕೊಂಡು ಮೊಮ್ಮಗಳ ಜೊತೆಯಲ್ಲಿ ಇರಲು ಹೊರಟರು. ಆಗ ಅವರ ನೆರವಿಗೆ ಬಂದಿದ್ದು ತಮ್ಮನ ಹೆಂಡತಿ ವತ್ಸಲಳ ತಮ್ಮಂದಿರಾದ ಸುಹಾಸ್ ಹಾಗೂ ವಿಶ್ವಾಸ್.

ಅಜ್ಜಿಗೆ ಆಸರೆಯಾಗಿದ್ದು, ರಂಜಿತಳಿಗೂ ಅಡಿಗೆ-ತಿಂಡಿ ಮಾಡಿಕೊಡುತ್ತಾ.. ಮನೆ ನಿಭಾಯಿಸುತ್ತಾ ಇದ್ದವರಿಗೆ ರಂಜಿತ ಮೊದಲ ತಿಂಗಳಿನಲ್ಲಿಯೇ ಹತ್ತು ಸಾವಿರ ನೀಡಿ ಅವರಿಗೆ ಅನುಭವ ಇದ್ದ ಅಡುಗೆ ಉದ್ಯಮದಲ್ಲಿ ಮುಂದುವರಿಯಲು ಅನುವು ಮಾಡಿಕೊಟ್ಟು ಹೊಸ ಉದ್ಯಮ ಆರಂಭಿಸಲು ಬಂಡವಾಳ ನೀಡಿದಳು. 

ಮೂರು ತಿಂಗಳ ಹೊತ್ತಿಗೆ ಮನೆಯಲ್ಲಿ ಪುಟ್ಟ ಕಾರ್ಯಗಾರ ಶುರುವಾಗಿ ರಘುರಾಮ, ಸುಭದ್ರಮ್ಮ ದಂಪತಿಗಳು ಜೊತೆಯಾದರು. ಸುಹಾಸ್ ನೇತೃತ್ವ, ಸುಭದ್ರಮ್ಮನ ನಿರ್ವಹಣೆ ಅದನ್ನು ಇನ್ನಷ್ಟು ಗಟ್ಟಿಗೊಳಿಸಿತು. ಅವರ ಇಬ್ಬರು ಹೆಣ್ಣುಮಕ್ಕಳು ರಾಗಿಣಿ, ಪದ್ಮಿನಿ. 

ಮನೆ ಬಾಡಿಗೆಗೆ ನೀಡಿದ್ದ ಓನರ್ ಇಂದಿರಮ್ಮನಿಗೆ ತಮ್ಮ ಡಿಪ್ಲೋಮೋ ಇಂಜಿನಿಯರ್ ಮಗ ರಾಜಾರಾಮ್ ನನ್ನು ರಂಜಿತ ವಿವಾಹವಾಗಲೆಂಬ ಆಸೆ. ಅದಕ್ಕಾಗಿ ಗೋದಮ್ಮನವರ ಬಳಿ ಸಾಕಷ್ಟು ಸಲುಗೆ ತೆಗೆದುಕೊಳ್ಳುತ್ತಿದ್ದರಾದರೂ.. ಅಜ್ಜಿಗೆ ತನ್ನ ಮೊಮ್ಮಗಳಿಗೆ ತಕ್ಕ ವರನನ್ನೇ ಹುಡುಕುವ ಆಸೆ. ಅದಕ್ಕೆ ತಕ್ಕಂತೆ ಮೋಹನನ ಪ್ರಸ್ತಾಪ ಬಂದರೂ.. ಇಷ್ಟವಾದರೂ.. ಬಂದಷ್ಟೇ ವೇಗವಾಗಿ ಮರೆಗೆ ಸರಿದಿತ್ತು. ಅದಕ್ಕೆ ಕಾರಣವೇನು..?

ಇದಾದ ನಂತರ ಮೋಹನನ ದೆಸೆಯಿಂದಲೇ ಮುಂದೆ ರಂಜಿತಳಿಗೆ ತನ್ನ ಉದ್ಯೋಗದಲ್ಲಿ ಬದಲಾವಣೆ ಸಿಕ್ಕಿ, ಸಂಬಳವೂ ಹೆಚ್ಚಿತು. ಮೋಹನ್ ಅವಳನ್ನು ಮೆಚ್ಚಿದ್ದರೂ.. ಮೊದಲಿಗೆ ವಿವಾಹಕ್ಕೆ ಒಪ್ಪದೇ ನಂತರ ಒಪ್ಪಿದ್ದು ಏಕೆ..?

ಇಂದಿರಮ್ಮನ ಧನದ ದಾಹದಿಂದ ಬಾಡಿಗೆಗಿದ್ದ ರಂಜಿತ ಹಾಗೂ ಮನೆಯವರಿಗೆ ತೊಂದರೆಯಾದದ್ದು ಹೇಗೆ...?

ಸುಹಾಸ್ ರಾಗಿಣಿಯನ್ನು ವಿವಾಹವಾಗಲು ಇಷ್ಟಪಟ್ಟಿದ್ದ . ಪದ್ಮಿನಿಯನ್ನು ವಿಶ್ವಾಸ್ ಗೆ ವಿವಾಹ ಮಾಡಿಸಲು ನಿರ್ಧರಿಸಿದ್ದ ಜೊತೆಗೆ ಅವರ ತಂದೆ-ತಾಯಿಯನ್ನು ತಮ್ಮ ಜೊತೆಗೇ ಇಟ್ಟುಕೊಂಡು ತಮ್ಮ ಉದ್ಯಮವನ್ನು ಬೆಳೆಸುವ ಕುರಿತಾಗಿಯೂ.. ರಂಜಿತ ವಿವಾಹವಾಗಿ ಹೋದ ನಂತರ ಅಜ್ಜಿಯನ್ನು ತಾವೇ ಚೆನ್ನಾಗಿ ನೋಡಿಕೊಳ್ಳುವುದಾಗಿಯೂ.. ಇದು ಅವಳಿಗೆ ತವರು ಮನೆಯಂತೆ ಎಂದು ಭರವಸೆ ನೀಡಿದ್ದ. 

ಅಣ್ಣನಂತೆ ಅವಳ ಬೆಂಬಲಕ್ಕೆ ನಿಂತಿದ್ದ ಸುಹಾಸ್ ಕುರಿತಾಗಿ ರಂಜಿತ ಅನುಮಾನ ಪಟ್ಟದ್ದಕ್ಕೆ ಕಾರಣವೇನಿತ್ತು..?

ರಂಜಿತ ಮತ್ತು ಮೋಹನರ ವಿವಾಹದ ಸಿದ್ಧತೆಯಾಗುವ ಸಂದರ್ಭದಲ್ಲಿ ಇದ್ದಕ್ಕಿದ್ದಂತೆ ಮನೆಯಲ್ಲಿ ಅಡುಗೆ ಉದ್ಯಮಕ್ಕೆ ತಯಾರಿಸುತ್ತಿದ್ದ ಪುಡಿಗಳೆಲ್ಲವೂ ಹಾಳಾಗಿದ್ದು ಹೇಗೆ..? ತೊಂದರೆ ಹೊರಗಿನಿಂದ ಎಂದು ಭಾವಿಸಿದಾಗ ಮನೆಯೊಳಗೆ ಹುಟ್ಟಿದ್ದ ಶತ್ರು ಯಾರು..?

ಇಷ್ಟೆಲ್ಲ ಸಂಚು ನಡೆಸಿದರೂ ರಂಜಿತ ಮತ್ತು ಮೋಹನರ ವಿವಾಹ ಸಾಂಗವಾಗಿ ನೆರವೇರಿದ್ದರ ಹಿಂದಿನ ಶಕ್ತಿ ಯಾರು..?

ಮೋಹನ್ ಹಾಗೂ ಸುಹಾಸ್ ರಿಗೆ ವಿಶ್ವಾಸ್ ಮೇಲೆ ಅನುಮಾನ ಬಂದದ್ದಕ್ಕೆ ಕಾರಣವೇನಿತ್ತು..? ಆ ಅನುಮಾನ ಬಗೆಹರಿದದ್ದು ಹೇಗೆ..?

ವಿಶ್ವಾಸ್ ಹಾಗೂ ಪದ್ಮಿನಿಯರ ವಿವಾಹ ಕೂಡಿ ಬರದೆ ಹೋದದ್ದಕ್ಕೆ ಏನೆಲ್ಲ ಕಾರಣವಾಯಿತು..? ವಿಶ್ವಾಸ್ ಬದುಕನ್ನು ಬದಲಿಸಿದ ಸಂದರ್ಭವೇನು..? ಅಣ್ಣನ ಯಾವ ಗುಣ ವಿಶ್ವಾಸ್ ನನ್ನು ಪ್ರೇರೇಪಿಸಿತು ಓದಿ ನೋಡಿ.

ಕಾದಂಬರಿಯ ಅಂತ್ಯ ವಾಸ್ತವದಂತೆಯೂ.. ಕೊಂಚ ಸಿನಿಮೀಯವಾಗಿಯೂ ಇದೆ.

ಕೆಟ್ಟತನ ಎಷ್ಟೇ ವಿಜೃಂಭಿಸಿದರೂ ಅದನ್ನು ಮೆಟ್ಟಿ ನಿಲ್ಲುವ ಒಳ್ಳೆಯತನ ಇದ್ದೇ ಇದೆ. ಒಳಿತಿಗೆ ಜಯ ಎಂಬ ತತ್ವ ಜೊತೆಗೆ ಕಾದಂಬರಿಯ ಶೀರ್ಷಿಕೆಗೆ ಬಹಳವಾಗಿ ಹೊಂದುವ ಕಾದಂಬರಿ.

ಶಾಂತವಾಗಿ ಬಂದದ್ದೆಲ್ಲ ಬರಲಿ ಎಂದು, ಹೆಚ್ಚು ಹಿಗ್ಗದೆ, ಹೆಚ್ಚು ಕುಗ್ಗದೆ ಎಲ್ಲವನ್ನೂ ಸಮಚಿತ್ತದಿಂದ ನಿಭಾಯಿಸಿಕೊಂಡು ಹೋಗುವ ಶಾಂತತೆಯ ಸಂಸ್ಕಾರವಂತೆ ರಂಜಿತ ಇಷ್ಟವಾಗುತ್ತಾಳೆ. ಇದುವರೆಗೂ ರಾಧಾದೇವಿಯವರ ಕಾದಂಬರಿಗಳ ನಾಯಕಿಯರಿಗಿಂತ ವಿಭಿನ್ನವಾಗಿ ಕಂಡವಳು ಇವಳು.

ಸಾಮಾನ್ಯವಾಗಿ ರಾಧಾದೇವಿಯವರ ಕಾದಂಬರಿಗಳಲ್ಲಿ ನಾಯಕನ ಪಾತ್ರ ಎಂದು ಮುನ್ನಡೆಯಲ್ಲಿ ಹೆಚ್ಚು ಗುರುತಿಸಿಕೊಳ್ಳುವ ನಾಯಕ ಪ್ರಧಾನ ಪಾತ್ರಗಳು ಬೆರಳಿಣಿಕೆಯಷ್ಟು. ಆದರೆ, ಇಲ್ಲಿ ಸುಹಾಸ್ ಕಷ್ಟಜೀವಿಯಾಗಿ, ಮಮತಾಮಯಿಯಾಗಿ, ಹೊಂದಿಕೊಳ್ಳುವವನಾಗಿ, ಭವಿಷ್ಯದ ಆಲೋಚನೆ ಉಳ್ಳವನಾಗಿ, ಸದ್ಗುಣವಂತನಾಗಿ ಒಟ್ಟಿನಲ್ಲಿ ಮನೆಯ ಹಿರಿಯಣ್ಣ ಹೀಗಿದ್ದರೆ ಸೂಕ್ತ ಎಂಬಂತಹ ಭಾವ ಹುಟ್ಟಿಸುವಂತಹ ಪಾತ್ರವಿದು. 

ಬದುಕಿನಲ್ಲಿ ಒಮ್ಮೆ ಮಾಡಿದ ತಪ್ಪನ್ನು ಮತ್ತೊಮ್ಮೆ ಮಾಡಬಾರದು ಎನ್ನುವ.. ತನ್ನ ತಪ್ಪಿನ ಅರಿವಾದಾಗ ಸಂದರ್ಭವನ್ನು ಪ್ರಾಮಾಣಿಕವಾಗಿ ನಿಭಾಯಿಸಿದ ಜೊತೆಗೆ ಸೂಕ್ಷ್ಮವಾಗಿ ಆಲೋಚಿಸುವ ಮೋಹನ್ ಪಾತ್ರ ಸಹ ಮನಸ್ಸಿನಲ್ಲುಳಿಯುತ್ತದೆ.

ಬುದ್ಧಿವಂತಿಕೆ, ಶ್ರಮ ಎರಡರ ಜೊತೆಗೆ ಅದೃಷ್ಟವೂ ಸೇರಿದಾಗ ಫಲಿಸುವ ಪುಣ್ಯ ಹೇಗಿರುತ್ತದೆ ಎಂಬ ಸಂಪೂರ್ಣ ಚಿತ್ರಣವನ್ನು ಕಟ್ಟಿಕೊಡುತ್ತದೆ ಈ ಕಾದಂಬರಿ. ಸರಾಗವಾದ ಸುಂದರ ಕಾದಂಬರಿಯ ಓದು.

~ವಿಭಾ ವಿಶ್ವನಾಥ್